Një delegacion nga tri komuna të Suedisë ka qëndruar dje në Malishevë, ku kanë vizituar komunën, qendrën e rehabilitimit “Handikos” në Malishevë dhe çerdhen publike për fëmijë.

Delegacionin nga Suedia e ka pritur edhe i pari i Malishevë, Ragip Begaj, i cili i ka falënderuar për vizitën dhe për gatishmërinë e tyre, për bashkëpunim të ndërsjellë. Begaj, i ka njoftuar me Komunën e Malishevës, duke ju dhënë pasqyrë të përgjithshme të Malishevës, si sipërfaqja, numri i banorëve, institucionet, shkollat, qendrat mjekësore, gjendjen ekonomike dhe të tjera.

Delegacioni nga Suedia, u shprehën të kënaqur me vizitën Malishevë dhe me pritjen e bërë, si dhe u shprehën të gatshëm për thellimin e bashkëpunimit të ndërsjellë, mes Malishevës dhe komunave në Suedi.

Po ashtu gjatë ditës, ky delegacion ka bërë disa vizita në institucione të ndryshme në Malishevë, përfshi edhe çerdhen për fëmijë dhe Qendrën e Rehabilitimit “Handikos”, ku janë njoftuar me shërbimet dhe kujdesin që ofrojnë “Handikos” dhe çerdhja. /PrizrenPress.com/

Takimi i ditës së enjte i kryeministrit Mustafa me qytetarët e rajonit të Dukagjinit, Pejës me rrethinë, që janë të atakuar drejtpërdrejtë me përcaktimin e vijës së re kufitare mes Kosovës dhe Malit të Zi, sipas versionit të tanishëm të Demarkacionit, por edhe një takim i mbajtur mes pozitës dhe opozitës me ndërmjetësim të shoqërisë civile, po shihet nga analistët dhe nga vetë subjektet politike në të dyja blloqet, si një tërheqje e butë e ekzekutivit nga marrëveshja aktuale. Kjo zmbrapsje shkallë-shkallë e Qeverisë nga një marrëveshje e tillë po shihet si pasojë reale e pamundësisë së bindjes së deputetëve edhe në radhët e pozitës për ta mbështetur një dokument të tillë, në dëm të shtetësisë së Kosovës.

Edhe vetë Qeveria po e sheh se askush nuk do ta humbë territorin, për shkak të një papërgjegjësie të tillë, që megjithatë, për nga pesha e përgjegjësisë së negocimit për tre vjet rresht në një mandat qeverisës të PDK-së, dështimi i Demarkacionit mund të jetë edhe një goditje e rëndë dhe e drejtpërdrejtë për presidentin Thaçi, si nënshkrues i marrëveshjes në pozitën e ish-zëvendëskryeministrit dhe ministrit të Jashtëm të Kosovës.

Thaçi përgjegjësi kryesor

Deputeti i LDK-së, Adem Salihaj, pajtohet që këto dy tema të nxehta kanë lënë jashtë rendit të ditës shumë çështje me interes për jetën e qytetarëve, por është optimist që me një pajtim për interesin nacional do të dilet nga kriza dhe të rikuperohen pasojat.

“Çështja e Demarkacionit ka lënë në plan të dytë e të tretë të gjitha çështjet e tjera të rëndësishme. Demarkacioni ka krijuar edhe tensione të mëdha, duke rrezikuar edhe stabilitetin e shtetit. Çështja e Demarkacionit dhe rrezikut të madh për destabilizimin e shtetit është pasojë e një pune totalisht të papërgjegjshme të Hashim Thaçit si kryeministër dhe ministër i Punëve të Jashtme, i cili, me veprimet e tija, duke nënshkruar marrëveshje të dëmshme për Kosovën, i ka krijuar asaj dëme të pariparueshme. Këto pasoja po i bart tash Kosova dhe do t’i bartë për një kohë shumë të gjatë. Mençuria jonë është si të dalim nga kjo situatë shumë e rëndë, me pasoja edhe për marrëdhëniet tona me faktorët ndërkombëtarë. Konsensusi, nëse do të jetë i mundur,do të ishte zgjidhja ideale e këtij problemi”, tha Adem Salihaj për “Kosova Sot”.

Optimist për zgjidhje konsensuale, një tërheqje graduale taktike të Qeverisë nga një marrëveshje, që do të ishte me pasoja të rënda për vendin, është edhe Ismail Kurteshi, deputet nga lëvizja ‘VETËVENDOSJE’.

“Fakti se Qeveria ka lëvizur nga pozicioni i saj i dëmshëm në lidhje me Demarkacionin me Malin e Zi është një fitore e madhe për Kosovën. Jo vetëm për 8.200 hektarët, që mund t’i humbte Kosova me këtë Demarkacion, pa reagimin e opozitës dhe përkrahjes së madhe të qytetarëve. Kjo është gjithashtu fitore edhe për Demarkacionin, që shpejt do të ndodhë me Serbinë”, është shprehur ai. /Kosova Sot/

Paraja sot në vendin tonë e përcakton anën e drejtësisë, ku shpeshherë drejtësia po e merr anën e parasë. Kështu të paktën kanë vlerësuar njohësit e kësaj fushe, por edhe opozita e vendit, të cilët kanë ngritur shqetësimin e tyre se ndikimet e tilla, si dhënia e ryshfetit, korruptimi etj., po ndikojnë drejtpërsëdrejti në pavarësinë e Gjyqësorit në përgjithësi, derisa flasin edhe për atë se deri në çfarë mase ka rënë drejtësia në Kosovë dhe se sa e korruptuar dhe e ndikuar është ajo.

Ndaj në këtë drejtim është ngritur edhe pyetja se si po bëhet kjo shitblerje e drejtësisë në Kosovë, përmes tarifave që duhet paguar sekserëve të gjyqtarëve e prokurorëve në mënyrë që proceset e caktuara të marrin kahun e dëshiruar nga klientët që korruptojnë zyrtarët e shtetit në Gjyqësorin dhe Prokurorinë kosovare.

Analisti Naim Kelmendi, në një prononcim për gazetën “Kosova Sot”, ka thënë se kapja dhe kontrabandimi i drejtë- sisë në përgjithësi, si Gjyqësorit ashtu edhe Prokurorisë, ku, përveç ndikimit nga mafia politike, njëkohësisht ky është një sfidim i madh i institucionit të Gjyqësorit në sundimin e ligjit dhe në rrugën e pavarësimit të drejtësisë në Kosovë.

“Pra, të gjitha ndikimet e jashtme e të papërgjegjshme dhe njëherësh të papranueshme të çfarëdo natyre qofshin, tani për tani mbesin kanceri i shoqërisë që po e han nga brenda drejtësinë dhe ndarjen e saj të drejtë në institucionet gjyqësore, derisa drejtësia nuk po ecën në rrugë të mbarë drejt pavarësimit dhe standardizimit, e posaçërisht demokratizimit në të gjithë resorët e saj”, tha ai. /Kosova Sot/