Opozita kosovare është e vendosur që të mos lëshojë pe për Marrëveshjen e Demarkacionit të Kufirit me Malin e Zi, pavarësisht se pa këtë të fundit definitivisht nuk do të fillojë negocimi i heqjes së vizave për Kosovën.

Komisioni për Liri Qytetare, Drejtësi dhe Punë të Brendshme i Parlamentit Evropian të hënën ka miratuar raportin e eurodeputetes Tanja Fajon për liberalizimin e vizave për Kosovën, por nuk e ka dhënë mandatin për negocim të heqjes së vizave për vendin pa ratifikimin e demarkacionit me Malin e Zi.

Në anën tjetër, Qeveria e Kosovës insiston që këtë marrëveshje do ta rikthejë në Kuvend, ndonëse në seancën e 1 shtatorit nuk arriti t’i sigurojë votat e nevojshme, për shkak të mospjesëmarrjes së deputetëve të listës “Srpska”, me ç’rast u detyrua ta heqë demarkacionin nga rendi i ditës.

“Gjithsesi se Demarkacioni do të kthehet në Kuvend jo vetëm pse kjo është një nga kushtet për liberalizimin e vizave, por edhe pse kjo çështje është e ndërlidhur jetësisht me shtetndërtimin si proces, me normalizimin e raporteve tona me fqinjët, si edhe me integrimet evropiane”, ka thënë për “Zërin” zëdhënësi i Qeverisë, Faton Abdullahu.

Duke mos përmendur një datë të caktuar Abudllahu ka shtuar se kjo hapësirë tani do të shfrytëzohet për të qartësuar këtë marrëveshje edhe më tepër për opinionin. Por, edhe për t’i dhënë kohë partive opozitare që të reflektojnë në qëndrimet e tyre.

“Periudhën kohore prej tërheqjes së projektligjit deri te procedimi i serishëm në Kuvend do ta shfrytëzojmë pos tjerash edhe për të vazhduar tutje me sqarime e interpretime të drejta. Kjo do të bëhet për t’u dhënë mundësi të gjithë subjekteve të ndryshme, deputetëve dhe faktorëve të tjerë relevantë të cilët kanë hezitime, paqartësi e keqkuptime në këtë aspekt të informohen drejt, gjithanshëm me qëllim që të reflektojnë dhe më pas të vendosin në interes të Kosovës”, ka deklaruar Abdullahu. /Zëri

Priten procese gjyqësore komplekse

“Është thënë se në tetor do të fillojë punën kjo Gjykatë, mirëpo për shkaqe teknike mund të ndodhë se do të vonohet për një kohë të shkurtër, por pritet që sa më shpejt të funksionalizohet. Tanimë është ndarë edhe objekti dhe po e ripërsëris se politikanët kosovarë nuk kanë kurrfarë roli, e as ndikimi në punën e Gjykatës Speciale”, tha avokati Tomë Gashi, raporton Gazeta Kosova Sot

Me gjithë pëshpëritjet e opinionit se gjoja shtyrja e funksionalizimit të Gjykatës Speciale na paska ndodhur për shkaqe të interferencës së brendshme politike të krerëve më të lartë të shtetit, për njohësit e kësaj fushe ato vlerësime nuk qëndrojnë fare, ngase është vlerësuar se ndikimi dhe roli i politikanëve kosovarë në këtë drejtim është minor, apo thënë troç zero. Ndaj në këtë drejtim është hequr edhe mëdyshja më e vogël e ndikimit të elitës politike kosovare edhe përmes emërimit të kryeprokurorit David Schwendiman së fundmi në krye të kësaj Gjykate.

Analisti Shefqet Dibrani, në një prononcim për gazetën “Kosova Sot”, ka thënë se nëse shikohet misioni i Gjykatës Speciale dhe fuqia e saj vendimmarrëse, me të drejtë, siç tha, mund të dyshohet se i gjithë ky lëmsh politik është i orkestruar në mënyrë për ta shtyrë funksionimin e kësaj Gjykate, e cila do të merret kryesisht me oligarkët politikë dhe mjaft të tjerë që janë bërë oligarkë nëpër ndërmarrje të mëdha shoqërore e deri tek pozitat e udhëheqësve të bordeve, të cilat krijojnë një unazë, përkatësisht dëshmojnë shtrirjen zinxhirore të një sistemi, ku veprimet e nëntokës janë bazë themelore për të ruajtur ndikimin e tyre në të gjitha sferat dhe shtresat e shoqërisë qytetare.

“Natyrisht, Gjykata Speciale është vonuar dukshëm, por vendeve të Bashkimit Evropian dhe Amerikës nuk u bëhet vonë, prandaj edhe pse ne flasim për zvarritje të proceseve nuk shihet asnjë hezitim apo tërheqje, por pavarësisht asaj se punët po shkojnë ngadalë në këtë drejtim, nuk ka asnjë dyshim se oligarkët politikë dhe një garniturë e kësaj nëntoke do të kenë telashe me këtë Gjykatë”, tha ai.

Në PDK pritet tërmet

Më tej, Dibrani ka nënvizuar se tashmë emërimi i kryeprokurorit David Schwendiman në krye të kësaj Gjykate, jep sinjalin e qartë se Gjykata Speciale nuk ka hequr dorë nga misioni i saj për të vënë rend dhe ligj, por më shumë, siç tha, për ta disiplinuar një kastë politike, e cila po i rri pezull jetës publike në Kosovë.

“Pavarësisht abuzimeve të deritanishme dhe ndikimeve që kanë pasur në Gjykatën dhe Prokuroritë e Kosovës, ku ndikimi i tyre në vendimmarrje ka qenë evident, qeveritarët e korruptuar dhe ata mbi të cilët rëndojnë akuza të rënda nuk do të mund t’i shmangen Gjykatës Speciale. Nuk ishte rastësi e amerikanëve, por as e BE-së, që pikërisht njohësin e mirë të sistemit ligjor në Kosovë dhe atë që për vite është marrë me raste delikate, ta vendosin si kryeprokuror në Gjykatën Speciale, dhe nuk ishte krejt e rastësishme as publikimi i emrit të tij pikërisht një ditë pasi Qeveria e Kosovës e hoqi nga rendi i ditës rastin e Demarkacionit”, është shprehur Dibrani.

Eksperti i fushës së sundimit të Ligjit, Blerim Burjani thotë se Gjykata Speciale pritet që shumë shpejt të veprojë dhe se ky do të jetë një proces i vështirë për t’u dëshmuar nga Tribunali apo Gjykata Speciale, derisa, sipas tij, faktet dhe argumentet janë baza e vetme për të nxjerrë një aktgjykim të drejtë, të paanshëm dhe profesional.

“Pra, do të jetë një punë e gjatë dhe e mundimshme e Gjykatës dhe nuk i dihet fati se çfarë aktgjykime do të nxirren nga kjo Gjykatë, por edhe ana tjetër, ligji për kompensim material të personave që do t’i nënshtrohen Gjykatës është mjaft e vlefshme dhe e moralshme për këtë kategori njerëzish. Proceset e gjykimet do të jenë mjaft komplekse dhe se nuk dihet fundi i tyre. Sidoqoftë, pritet që të ndodhë një termet i fuqishëm për disa njerëz të PDK-së, por edhe njerëz të disa subjekteve të vogla opozitare, por shumë të zëshëm politikisht”, ka vijuar më tej ai.

Burjani ka shtuar se kjo mund të ketë pasoja për skenën politike dhe për disa njerëz, të cilët mbajnë poste të fuqishme nëpër parti, ngase, sipas tij, Gjykata do të godet edhe politikisht dhe do të sjellë ndryshime edhe politike në vend, por, siç tha, pritet të shihet se deri në cilën masë do të ketë ndryshime skena politike vendore pas veprimit të kësaj Gjykate. /Kosova Sot/

Pushteti joserioz lë në izolim kosovarët. Para pak muajsh na thoshin se është në dorën e BE-së vendimi, kurse tash e pranojnë se e kanë në duart e tyre liberalizimin e vizave, raporton Gazeta Kosova Sot

Lajmi më i ri dëshpërues për agjendën e liberalizimit të vizave për kosovarët është parë nga analistët dhe subjektet politike të opozitës, si një shuplakë e re shumë e rëndë për Qeverinë e Kosovës, e cila ka më shumë se një vit që po luan lojë të pandershme, mashtruese e dyfytyrëshe me këtë proces. Krerët e institucioneve dhe zyrtarët e ministrive të ndryshme, ka kohë që po e mashtrojnë popullin me mënyrën e komunikimit të procesit dhe obligimeve që duhet të kryhen për liberalizimin e vizave, pasi një herë thanë se varet nga BE-ja, se këta i kanë kryer të gjitha detyrat, e tash po e thonë të kundërtën, e shpikën Demarkacionin me Malin e Zi si kriter të ri fantom dhe fajin përsëri po e bartin te vetja.

Është një vlerësim i analistëve dhe njohësve të kësaj fushe, sipas të cilëve Bashkimi Evropian po e ndëshkon lidershipin qeverisës të Kosovës, e për pasojë edhe qytetarët e Kosovë, me mosliberalizim të vizave për shkak të korrupsionit galopant dhe jo për ndonjë arsye tjetër.

“Shtyrja e procesit të liberalizimit të vizave për qytetarët e Kosovës pikësëpari vjen si pasojë e aktorëve politikë vendorë, që ende nuk kanë dëshmuar pjekuri politike për të qenë të gatshëm për një sfidë të tillë që është hap shumë i rëndë- sishëm për të ardhmen e vendit”, tha për “Kosova Sot” njohësi i marrëdhënieve ndërkombëtare dhe integrime, Adlum Ramadani.

Proceset integruese, në rrezik

Sipas Ramadanit, mospërmbushja e kritereve bazë nga institucionet vendore, padyshim se dënohet përmes shtyrjes së procesit, i cili si i tillë pastaj ndikon edhe në agjendën politike të vendit si prioritet që në rrethana të tilla që ka Kosova padyshim se është shqetësuese, pasi mbyllen dyert për çështje të tjera të rëndësisë së veçantë për të ardhmen integruese të Kosovës në mekanizma ndërkombëtarë.

“I ashtuquajturi kriteri i korrupsionit, padyshim se është njëri ndër elementet që gjithsesi se duhet luftuar përmes mekanizmave kompetentë, por që në rastin e Kosovës ka dështuar të japë rezultate frytdhënëse pikërisht për faktin se të njëjtat mekanizma janë instrumente me agjenda politike, të cilat shfrytëzojnë imunitetin ligjor për t’u dalë në krahë atyre që do duhej të ishin prapa grilave”, tha ai.

Sipas tij, kjo klasë politike e papërgjegjshme po rrezikon jo vetëm liberalizimin e vizave, por edhe shumë procese të tjera të rëndësishme të agjendës së integrimit evropian dhe hapjes ndërkombëtare.

“Në suaza të tilla, Kosova rrezikon jo vetëm liberalizimin e vizave, por edhe të ardhmen euro-atlantike, rrugëtim ky që do t’i siguronte Kosovës të ardhme me prosperitet, mirëqenie sociale dhe padyshim kushte sigurie, faktorë kyçë që tashmë kanë filluar të marrin rrugën drejt humnerës së famshme të vendeve që nga fatkeqësia rrëshqitën në shtete të dështuara për t’u udhëhequr pastaj në regjime autoritare-diktatoriale”, tha Ramadani për “Kosova Sot”.

BE-së nuk i ngutet për Kosovën

Edhe analistja e fushës së integrimeve evropiane nga Grupi për Studime Juridike dhe Politike Albana Merja vlerëson se me mënyrën e votimit dhe interpretimit të këtij procesi nga Komiteti për të Drejtat Civile, Drejtësi dhe Çështje të Brendshme, LIBE, u pa që Kosova me hapa është duke stagnuar në procesin e liberalizimit të vizave, përkundër premtimeve të deritanishme pompoze e kontroverse të qeveritarëve.

“Votimi i djeshëm në Komitetin për të Drejtat Civile, Drejtësi dhe Çështje të Brendshme, LIBE, tregoi që në këto momente Kosova si asnjëherë më parë e ka humbur mbështetjen e Parlamentit Evropian në lidhje me liberalizimin e vizave. Deputetët votuan pro raportit të Fajonit për liberalizimin e vizave me Kosovën, por në anën tjetër kundër propozimit të përshpejtimit të këtij procesi. Kjo e fundit e fut Kosovën në një procedurë më të zgjatur drejt lëvizjes së lirë”, theksoi ajo.

“Evidenca në luftimin e krimit të organizuar dhe mbi të gjitha korrupsionit në nivele të larta, vazhdon të mbetet një ndër kërkesat kryesore nga ana e BE-së. Përveç luftimit të këtyre dukurive, është e nevojshme që Qeveria e Kosovës, Parlamenti dhe institucione të tjera relevante, të fillojnë një proces të lobimit intensiv dhe të koordinuar, në mënyrë që të garantojnë që do të ketë rezultat pozitiv, gjatë votimit të amendamenteve në seancë plenare të Parlamentit Evropian”, tha Merja për “Kosova Sot”.