Asnjëherë nuk kishte dëgjuar për shqiptarët dhe për Kosovën derisa filloi të shoqërohet me një djalë nga Rugova e Hasit.

Shoqërimi me Maxhun Hotin ia shtoi dashurinë për këtë komb 35 vjeçarit nga Gjermania.

Përveç shoqërimit me shqiptarin nga Kosova Guido Pohlmächer, shprehu dëshirë që të vijë në vendlindjen e Maxhunit.

Dhe këtë verë ai vendosi që shokut të tij shqiptar t’i qëndrojë pranë në ditën më të lumtur të jetës së tij.
Guido ka ardhë në Rugovë të Hasit ku do të jetë njëri nga dasmorët e dasmës së Maxhunit që mbahet këtë javë.

Dhe gjermani nga qyteti Heilbronn i landit Baden-Württemberg për ta shprehur dashurinë për shqiptarët ka bërë një Tatoo në faqe me shqiponjën kuq e zi.

Në të ka vizatuar shkronjën A (Albania) shenjë ndërkombëtare e Shqipërisë dhe D (Deutchland) shenjë ndërkombëtare e Gjermanisë.

Guido është mahnitur me mikpritjen dhe traditat e shqiptarëve të Kosovës dhe premton se çdo vit do ta vizitojë Kosovën.

Kandidati i Lëvizjes “Vetëvendosje” për kryeministër, Albin Kurti, në një intervistë dhënë gazetës “Zëri”, ka folur edhe për kundërkandidatin e tij, Ramush Haradinaj.

Kurti ka thënë se në një demokraci elektorale janë votuesit që i tregojnë gjithkujt se a është dhe sa është i denjë për të qeverisur me vendin.

“Mendimi im personal është se në një demokraci elektorale janë votuesit që i tregojnë gjithkujt se a është dhe sa është i denjë për të qeverisur me vendin. Në zgjedhjet e vitit 2014 ne ishim subjekti i tretë, andaj edhe kur bëmë thirrje për të krijuar koalicionin opozitar, ne nuk kërkuam postin e kryeministrit. Madje nuk kërkuam asnjë post. Ata që këmbëngulën për poste më pas e prishën koalicionin dhe e lanë PDK-në në pushtet, gjë që siç dihet pati pasoja katastrofale të migrimit masiv e kosto të mëdha për vendin, që vijojmë t’i paguajmë si shoqëri e si shtet. Edhe sot, synimi për poste kur nuk i ke votat e duhura rrezikon ta sjellë të njëjtin rezultat, lënien e PDK-së në pushtet”, tha ai.

“Por sot, fatmirësisht, gjërat janë shumë më të lehta për ne, që kemi dalë subjekt i parë dhe shumë të vështira për PDK-në dhe për ata që ajo i josh duke përfituar prej dobësive të tyre”, tha Kurti. /Zeri/

Gazeta e njohur gjermane, Die Welt ka realizuar një intervistë me shkrimtarin shqiptar me përmasa botërore, Ismail Kadare.
Veç temave për të kaluarën e tij dhe shtetin shqiptar në kohën e komunizmit, ai ka folur edhe për Kosovën dhe një deklaratë të presidentit turk, Recep Tayyip Erdogan, kur kishte thënë se “Kosova është Turqi”.

Në këtë bisedë, Kadare thotë ta ketë dëgjuar atë deklaratë, mirëpo nuk u kishte besuar syve kur e kishte lexuar atë.

“Ismail Kadare e ka vendosur Shqipërinë në hartën e literaturës botërore. Sot ai hamendet për deklaratën e Erdoganit për Kosovën”.

Kështu e ka nisur intervistën gazeta gjermane “Die Welt”, ndërsa i ka bërë pyetjen:

Ëelt: Disa vite më parë, presidenti turk, Erdogan, e quajti Kosovën si ‘Turqi’?

Kadare: E mbaj mend këtë deklaratë. Mund të them vetëm se nuk po u besoja syve kur e lexova.

Kujtojmë se Erdogan, këtë deklaratë e kishte bërë gjatë vizitës në Kosovë në vitin 2013, kur kishte thënë “Kosova është Turqi dhe Turqia është Kosovë”.

Shumë banorë të lagjeve “Dardania”, “Kurillë” dhe “Bazhdarhanë” ankohen për reduktime të gjata të ujit të pijshëm. Vapa e këtyre ditëve natyrisht se ka krijuar edhe kushte tepër të rënda, sidomos në ato pjesë të qytetit, ku nuk ka ujë të pijshëm apo në ato fshatra, ku uji i pijshëm mungon dhe krijon stres.

Haziz Hodaj tregoi se tashmë ka probleme të mëdha në fshatra të Hasit me problemin e ujit të pijshëm. Ai thotë për “Kosova Sot” se me ujë të pijshëm ka probleme fshati Gjonaj, Lugishtë e Hasit dhe Planeja. Ai shprehet se një burim i Gjonajve falë donacionit që ka ndarë mjete, “Hidroregjioni jugor” ka ngritur nën bazën për ujë, por shton se ende nuk është funksionalizuar dhe kjo domosdo se ka krijuar edhe apoteozë të ujit të pijshëm në gjithë Hasin.

Apeli i kompanisë

Edhe Fatmir Kastrati, kuvendar nga AAK, pohoi se lagje të tëra të qytetit po përballen me mungesë të ujit të pijshëm dhe shton se mungesa më e madhe e ujit të pijshëm vërehet sidomos në lagjen “2 Korriku” atje ku tani e 15 vite ka të njëjtin problem. Menaxheri për konsumatorë nga “Hidroregjioni jugor”, Hysni Ahmeti, është shprehur përmes telefonit se këto temperatura të larta përcillen me shumë probleme në përgjithësi e po kështu edhe me ato të furnizimit me ujë të pijshëm.

“Ne përndryshe me gjithë kapacitetet maksimale jemi duke i furnizuar të gjithë banorët. Herë pas here edhe mungesa e rrymës po e destabilizon furnizimin me ujë të pijshëm. Kurse tashmë dihet se kemi edhe keqpërdorim të ujit të pijshëm nga të papërgjegjshmit, por ne si kompani të gjitha rastet që shfrytëzojnë ujin ilegalisht do të procedohen në gjykatë”, është shprehur ai. Njëherësh, Kastrati ka thënë se do të shkyçen menjëherë nga rrjeti i ujësjellësit ata që keqpërdorin ujin.

“Nga zyra jonë kemi dalë me një apel se duke i marrë parasysh temperaturat të larta, të cilat po mbretërojnë, rriten e kërkesat të ujit, ka mungesë të të reshurave. Keqpërdorimet e shumta që po bëhen nga ana e konsumatorëve, si dhe shumë faktorë të tjerë, apelojmë që të kursehet maksimalisht uji i pijshëm, mos ta përdorim ujin e pijshëm për destinime tjera, e posaçërisht këto ditë me temperatura të larta. Shfrytëzimi i pa autorizuar dhe keqpërdorimi i ujit të pijes është vepër penale dhe si e tillë është i dënueshëm në bazë të ligjeve të aplikueshme në Republikën e Kosovës.

Humbjet e ujit

Shfrytëzimi pa kriter i ujit të pijes pamundëson furnizim për nevoja elementare të një numri tjetër të konsumatorëve. Keqpërdorimet mund t’i lajmëroni në numrin 029/ 222-631”, pohon Ahmeti. Ai shton se ka reduktime dhe reduktimet janë shumë të vogla, por ato janë për shkak të aspektit teknik, e jo për shkak të mungesës së ujit.

“Në lagjen ‘Dardania’ furnizohen tetë orë në ditë me ujë të pijshëm, mirëpo nuk do të thotë që konsumatorët nuk kanë ujë, sepse na e dimë që të gjithë konsumatorët e asaj lagjeje posedojnë rezervuarë dhe tetë orë janë të mjaftueshme për me u mbush ato rezervuare dhe çdo banor i lagjes ka ujë 24 orë”, thotë Ahmeti.

Sipas Ahmetit për furnizimin me ujë të 36 mijë konsumatorëve të “Hidroregjionit Jugor” duhen 400 deri 500 litra ujë në sekondë, të cilat kapacitete kjo kompani i ka. Ai furnizimin me ujë gjatë 24 orëve e lidhë me eliminimin e humbjeve në rrjet dhe ndalimin e keqpërdoruesve të ujit.

(Kosova Sot)

Tomor Tafarshiku, i cili akuzohej për transport, shpërndarje dhe posedim të paautorizuar të substancave narkotike të llojit kokainë, të martën, është dënuar nga Gjykata Themelore në Prizren me 18 muaj burgim dhe 2500 euro gjobë.

I akuzuari Tafarshiku, paraprakisht kishte arritur marrëveshje mbi pranimin e fajësisë me Prokurorinë Themelore në Prizren, sipas së cilës marrëveshje, ai mund të dënohej prej 18 deri në 22 muaj burgim dhe me gjobë prej 2500 deri në 5000 euro.

Ne seancën për shqyrtimin e marrëveshjes mbi pranimin e fajësisë të arritur në mes palëve, mbrojtësi i të akuzuarit, avokati Esat Gutaj, ka deklaruar se klienti i tij me vullnet të plotë ka hyrë në këtë marrëveshje dhe se është pajtuar me dënimin që parashihet në marrëveshje.

Gutaj ka kërkuar nga gjykata që të akuzuarit t’i shqiptojë dënimin minimal të gjobës dhe dënimit, që parasheh marrëveshja me arsye se ai është i ri në moshë, është student dhe se për herë të parë ka rënë ndesh me ligjin.

Po ashtu edhe i pandehuri Tafarshiku ka thënë se e kupton marrëveshjen e arritur për pranimin e fajësisë dhe se në këtë marrëveshje ka hyrë me vullnet të plotë, pa shtytje apo presion nga askush.

Ai ka thënë se gjatë arritjes së marrëveshjes ka qenë prezent avokati i tij dhe se e ka njoftuar për lartësinë e mundshme të dënimit me burgim dhe me gjobë. Ai ka thënë se është penduar me veprimet e bëra dhe ka premtuar se më asnjëherë nuk do të merret me punë të jashtëligjshme.

Prokurori i rastit, Metush Biraj, ka thënë se aktakuza është ngritur duke u bazuar në prova të pakontestuara dhe marrëveshja për pranimin e fajësisë është arritur duke u bazuar në dispozitat ligjore, andaj ka kërkuar që e njëjta të pranohet nga gjykata.

Kryetari i trupit gjykues, Xheladin Osmani, ka pranuar marrëveshjen për pranimin e fajësisë të arritur në mes prokurorisë dhe të akuzuarit Tomor Tafarshiku dhe atij i ka shqiptuar dënimin me gjobë prej 2500 euro dhe dënimin me burgim prej 18 muajsh. Osmani i ka thënë të akuzuarit se ka shkuar në minimum të dënimeve të parapara me marrëveshje sepse ka marrë parasysh gjendjen e tij financiare, se ai është relativisht i ri dhe se për herë të parë ka rënë ndesh me ligjin.

Ndryshe, Tomor Tafarshiku, akuzohej se ka transportuar narkotik të llojit kokainë nga Tirana me qëllim të shpërndarjes dhe shitjes saj në territorin e Kosovës. Sipas aktakuzës, i akuzuari ka marrë substancën narkotike në Tiranë, me qëllim që të njëjtën ta transportojë për në Prishtinë, por duke udhëtuar me autobus, në pikën kufitare në Vërmicë i është gjetur nga policia kufitare. Të akuzuarit sasia prej 102 gramë kokainë, i ishte gjetur gjatë kontrollimit të autobusit me të cilin udhëtonte nga policia kufitare, i cili e kishte fshehur atë afër pjesëve intime të tij.