Në gjykimin e 14 të akuzuarve për krim të organizuar, fajde e vepra të tjera të rënda penale, të mërkuren mungoi e akuzuara Zyrafete Hukolli.

Mbrojtësi i Hukollit, avokati Islam Gashi, e njoftoi gjykatën se e akuzuara është nisur për gjykim, mirëpo rrugës ka pasur probleme me të dashurin e saj dhe tani ndodhet në stacionin policor të Deçanit.

Kryetari i trupit gjykues bisedoi me stacionin policor ne Deçan, ku edhe konfirmoi se ajo gjindet në Qendrën Shëndetësore të Deçanit, ngase ka pësuar lëndime nga personi me të cilin bashkëjeton.

Qysh në fillim, trupi gjykues shpërndau aktvendimin për mbrojtësit dhe të akuzuarit me të cilin i njoftoi se e ka veçuar procedurën penale ndaj të akuzuarit Zef Oroshi, i cili sipas informatave të gjykatës ka ikur jashtë shtetit dhe se për momentin është i pakapshëm për organet e rendit.

Mbrojtja kërkoi veçimin e procedurës edhe për Zyrafete Hukollin. Madje, avokati i Tunë Kqirës, Azem Vllasi, edhe një herë kërkoi ndërprerjen e paraburgimit për të akuzuarit.

“Me të vërtetë në këtë fazë ta ndërpreni paraburgimin, ne nuk po propozojmë masa tjera alternative por ta zëvendësoni me arrest shtëpiak”, tha avokati Vllasi.

Propozimit për ndërprerje të paraburgimit iu bashkangjitën edhe avokatët tjerë, mirëpo këtë propozim e kundërshtoi prokurorja speciale, me arsyetimin se edhe më tutje ekzistojnë të gjitha shkaqet për të vazhduar paraburgimin.

Trupi gjykues vendosi që seanca e së mërkures të shtyhet, ndërsa seancën e radhës e caktoi për 7 prill.

I revoltuar nga kjo situatë, i akuzuari Gjon Kqira, tha se anëtarët e familjes së tij po mbahen pa faj. Madje ai tha se krim i organizuar nuk është familja e tij por është gjykata dhe prokuroria. Kqira, akuzoi edhe komandantin e policisë dhe ish kryeprokurorin e Prizrenit Sylë Hoxha.

“Ta dini se ka Zot. Edhe na kemi familje e kena fëmijë, kjo është maltretim, krim prej komandantit të policisë, e deri te zotëri Sylë Hoxha. Zoti ditë çka boftë mbi trupin e tij, se krejt qetyne na kanë ardhë, s’kemi të bojmë na absolutisht, s’ka qyetarë as familje që mundët me thonë, përveç Zef Grudës edhe ai ka maltretim”, tha Gjon Kqira.

Sipas Prokurorisë Speciale, gjatë disa viteve të kaluara, të pandehurit Tunë, Kastriot, Gjon, Marjan, Gjekson e Gëzim Kqira dhe Benson Buza kanë vepruar si grup i organizuar kriminal më qëllim të përfitimit të drejtpërdrejt të dobisë financiare, duke kryer vepra të rënda penale.

Sipas aktakuzës, Tunë Kqira i ka mbikëqyrur dhe i ka drejtuar veprimet e këtij grupi kriminal.

Grupi ka shfrytëzuar gjendjen e rëndë financiare ose papërvojën e të dëmtuarve dhe u ka dhënë para me fajde. Pastaj, duke përdorur kërcënimet e rënda i kanë detyruar të paguajnë kamata dukshëm joproporcionale ose të kryejnë ndonjë veprim tjetër në dëm të pasurisë së tyre.

Të akuzuar në këtë rast janë: Tunë, Kastriot, Gjon, Marjan, Gjekson e Gëzim Kqira, Benson Buza, Besfort Omaj, Zyrafete Hukolli, Ragip Fazlija, Ekrem Leci, Hil Katinari, Sejdë Kaqorraj dhe Zef Oroshi.

KALLXO.com ka raportuar edhe nga seancat e kaluara të këtij procesi.

Lëvizja Vetëvendosje! në Prizren reagon dhe shpreh shqetësimin për mos përfundimin e punimeve në sheshin “Alija Izetbegoviq”. Sipas VV-së, edhe përkundër organizimit të një peticioni nga ana e banorëve të lagjes “Tabakhane”, deri më tash nuk është ndërmarrë asgjë.

“Tash e sa muaj banorët e lagjes Tabakhane në Prizren janë të preokupuar me mos përfundimin e punimeve në sheshin “Alija Izetbegoviq”. Kjo pjesë e rrugës aktualisht është shtruar me zhavorr dhe nuk është intervenuar fare me asfalt. Me rritjen e temperaturave dhe për shkak të frekuentimit të madh nga këmbësorët dhe makinat, në lagje ngrihet sasi e madhe e pluhurit”, thuhet në reagimin e kësaj lëvizje, përcjellë PrizrenPress.

“Lëvizja VETËVENDOSJE! në Prizren reagon dhe shpreh shqetësimin se edhe përkundër organizimit të një peticioni nga ana e banorëve të kësaj lagjeje, deri më tash nuk është ndërmarrë asgjë. Pavarësisht zotimeve të zyrtarëve të Komunës se kjo ishte çështje ditësh dhe se problemi do të rregullohej së shpejti. E vetë banorëve së tepërmi u është vështirësuar jeta, si në rrafshin e afarizmit, ashtu edhe në rrjedhat normale të jetës. Fëmijët duhet mbajtur mbyllur gjatë tërë ditës, ndërsa probleme shëndetësore kanë edhe disa të sëmurë të lagjes që kanë vështirësi në organet e frymëmarrjes, e ka edhe pacientë të cilët janë alergjikë nga pluhuri. Shqetësimi bëhet edhe më i madh kur kihet parasysh se kjo rrugë lidh qytetin me Republikën e Shqipërisë, pastaj gjykata, prokuroria dhe stacioni i policisë gjenden mu në këtë rrugë”.

“Me fundin e mandatit të kësaj qeverie, gjithnjë e më tepër po vihet në shprehje jo efikasiteti dhe deformimi total i qeverisjes në Prizren”.

“Përmirësimi i gjendjes së tanishme në Komunën e Prizrenit mund të bëhet vetëm duke ndërruar këtë qeverisje”. /PrizrenPress.com/

Gjykata Themelore në Prizren u ka caktuar masën e paraburgimit prej një muaji dy zyrtarëve të arrestuar në pikën kufitare të Vërmicës nën dyshimin për armëmbajtje pa leje.

Lajmin për caktimin e masës së sigurisë për KALLXO.com e konfirmoi, Afërdita Kicaj, zyrtare për informim pranë Gjykatës në Prizren.

Dje KALLXO.com raportoi ekskluzivisht për arrestimin e Tahir Demirit, ushtrues detyre i shefit të administratës në Shërbimin Korrektues të Kosovës dhe Nexhip Gashit, epror në Policinë e Kosovës.

Inspektorati Policor i Kosovës (IPK) dhe Policia e Kosovës, dje përmes një komunikate të përbashkët njoftuan se në pikën kufitare të Vërmicës nga Policia Kufitare është ndaluar vetura “Opel Astra” (me targa të Kosovës), të cilën e drejtonte një zyrtar policor dhe në të cilën si bashkudhëtar ishte edhe një zyrtar i Shërbimit Korrektues të Kosovës.

Po sipas këtij njoftimi, gjatë arrestimit ishin gjetur një gjetur një armë automatike “AK-47” me një karikator me 30 fishekë dhe një pistoletë e tipit “TT” me tetë fishekë.

Tre meshkuj nga Suhareka janë dërguar në spitalin e Prizrenit për trajtim të nevojshëm mjekësor, pasi që të njëjtit janë sulmuar fizikisht nga një mashkull tjetër i cili gjendet në arrati, njofton Policia e Kosovës, përcjellë PrizrenPress.

Rasti ka ndodhur dje rreth orës 13:50, në Suharekë.

Njësitë përkatëse policore janë duke hetuar rastin. /PrizrenPress.com/

Policia e Kosovës, respektivisht, Drejtoria për Hetimin e Trafikimit me Narkotikë, Njësia në Prizren, dje rreth orës 16:30, nga burime të besuara ka pranuar informacione se në mes të fshatrave Shpenadi, Velezhë, Caparc dhe Novakë, afër një are të punuar gjenden disa çanta të mëdha, me ngjyrë të zezë dhe të mbuluara me disa mbulesa plastike dhe bari të tharë .

Pas marrjes së kësaj informate Policia ka dalë në lokacionet e lartcekura dhe aty ka vërejtur se gjenden katër çanta të zeza, në të cilat gjendeshin gjashtëdhjetë e dy (62) paketime, me një substancë të dyshuar për narkotikë të llojit marihuanë, njofton Policia e Kosovës, përcjellë PrizrenPress.

Lidhur me këtë rast është informuar prokurori kompetent në Prizren.

Pas përfundimit të shikimit të vendit të ngjarjes dhe marrjes së dëshmive nga vendi i ngjarjes, në bashkëpunim të njësiteve hetimore rajonale të Prizrenit, Njësisë për Reagim të Shpejtë, teknikës kriminalistike, stacionit policor Veriu dhe stacionit policor në Prizren, me Njësinë K9 ka filluar kontrollimi i zonës rreth vendit të ngjarjes dhe pas rreth 3 km kërkimesh nga qentë e Njësisë K9, gjurmët na kanë dërguar tek shtëpia e një të dyshuari potencial.

Me urdhër verbal të gjyqtarit të procedurës paraprake në Prizren janë kontrolluar shtëpitë, objektet përcjellëse dhe automjetet e të dyshuarit, mirëpo gjatë kontrollimit nuk është gjetur ndonjë dëshmi që lidhet me veprat penale të narkotikëve apo të veprave tjera penale .

Pas matjes së substancave të dyshuara narkotike të llojit marihuanë, ka rezultuar që pesha e tyre të jetë rreth 62 kg e 465 gramë.

Lidhur me këtë rast njësitet përkatëse janë duke zhvilluar hetime të mëtejme. /PrizrenPress.com/

Lidhja Demokratike e Kosovës (LDK) në Zhur, nuk është e kënaqur me mënyrën e shënimit të 100- vjetorit të shkollës “Dëshmorët e Zhurit”.

Sipas këtij subjekti politik, ka filluar t’i humbë imazhi i krijuar deri më tash.

“Dje në Zhur është shënuar 100- vjetori i punës dhe i veprimtarisë edukativo-arsimore, të një ndër shkollat e para shqipe në Kosovë”, thuhet në reagimin e LDK-së në Zhur, përcjellë PrizrenPress.

“Për fat të keq të qytetarëve të Zhurit dhe lokalitetit, aktualisht këtë shkollë e udhëheqë një grup njerëzish me ide e bindje të demoduara nga e kaluara e ”Lëvizjeve ilegale”, të cilët i mohojnë vlerat dhe shkollën e konsiderojnë pronë të tyre”.

“LDK Dega Zhur, reagon që ky grup injorantesh të cilët kanë dëmtuar dhe vazhdojnë ta dëmtojnë rënd imazhin e vlerat historike dhe arsimore të kësaj shkolle, jo vetëm për Zhurin, por edhe për fshatrat e lokalitetit, sepse në këtë shkollë ABC-në e parë e kanë mësuar edhe shumë nxënës e kuadro të vyera nga i tërë lokaliteti: Vërmica, Vlashnja, Kobaja, Dobrushti e Shkoza, rezultatet e të cilëve këtij grupi nuk i konvenojnë. Athua historia e shkollës së Zhurit fillon me këtë grup injorantësh e analfabetësh?”.

“Një përvjetori të tillë do t’ia kishin pasur lakmi edhe shumë treva mbarëkombëtare, ndërsa tek ne të kalojë në heshtje. Kjo është një nëpërkëmbje për vlerat e kësaj shkolle dhe të Zhurit në përgjithësi”.

“Së paku bile kryetari i Komunës së Prizrenit, që është nga Zhuri z.Ramadan Muja dhe i cili ka qenë nxënës i kësaj shkolle duhet të merrte pjesë në këtë manifestim e shumë-shumë kuadro tjera të larta shkencore më tituj akademik dhe doktor shkencash”. /PrizrenPress.com/