Drejtori i gjimnazit “Gjon Buzuku” në Prizren, Shaip Buduri, të hënën, gjatë seancës së mbajtur në Gjykatën Themelore në Prizren, në rastin e kthyer në rigjykim ndaj tij dhe ish-drejtorit të Drejtorisë së Arsimit në Prizren (DKA), Nexhat Çoçajt, ka paraqitur një provë të re.

Buduri ka propozuar që të administrohet si provë, një shkresë e tij, dërguar DKA-së me të cilën e kishte njoftuar për mësimdhënësit të cilët janë punësuar sipas konkursit. Me të njëjtën shkresë, DKA-ja është njoftuar se profesori Besnik Krasniqi është duke mbajtur orët mësimore të lëndës “Gjuhë dhe Letërsi Shqipe”, pa vendim të DKA-së.

Buduri ka thënë se kjo shkresë është e protokolluar në librin e protokollit të shkollës dhe është dorëzuar në sektorin e financave të DKA-së, sepse nuk ka pasur zyre të pranimit.

Ndërsa i akuzuari tjetër, ish-drejtori i DKA-së, Nexhat Çoçaj, ka deklaruar se prej themelimit të kësaj drejtorie, ekziston zyra për pranimin e shkresave, andaj ka thënë se as ai e as DKA-ja nuk kanë qenë të informuar për një shkresë të tillë.

Prokurori i çështjes, Mehdi Sefa, ka kundërshtuar administrimin e kësaj prove, duke thënë se i akuzuari të njëjtën mund ta ketë pasur edhe gjatë gjykimit të parë por nuk e ka prezantuar. Sipas prokurorit Sefa nuk ka prova tjera që e mbështesin besueshmërinë e një prove të tillë.

Në këto rrethana, trupi gjykues, i kryesuar nga gjyqtarja Ajser Skenderi, kanë vendosur që zyrtarisht të kërkojnë nga zyra e protokollit të DKA-së, nëse një shkresë e tillë është protokolluar në librat e tyre, e pastaj të vendosin për administrimin ose jo të saj.

Seanca e radhës është caktuar për 22 shkurt 2017, me fillim në ora 09:30.

Shaip Buduri dhe Nexhat Çoçaj akuzohen se kanë punësuar profesorin Besnik Krasniqi, në gjimnazin “Gjon Buzuku”, pa konkurs publik.

Sipas aktakuzës, Buduri duke qenë drejtor i shkollës në fjalë, ka lejuar, profesorin Krasniqi, të japë mësim për pesë muaj, pa kontratë të punës.

Ndërsa Çoçaj akuzohet se ia ka lidhur Besnik Krasniqit, kontratën e punës në mënyrë të kundërligjshme, pasi që nuk ka shpallur konkurs publik për atë vend të punës.

Shaip Buduri, në maj të këtij viti, është dënuar nga kjo gjykatë me një vit burgim efektiv, ndërsa i akuzuari tjetër Nexhat Çoçaj ishte liruar nga akuza.

Por, Gjykata e Apelit, ka prishur një aktgjykim të tillë, me arsye se nuk është vërtetuar në tërësi gjendja faktike. Sipas Apelit, gjykata nuk ka arritur të arsyetojë përgjegjësinë e drejtorit të shkollës, në punësimin e profesorit, pasi që punësimin e bënë DKA-ja.

Apeli, poashtu ka gjetur se nuk qëndron arsyetimi se drejtori i DKA-së, ka lidhur kontratën në bazë të UA 08/14, pasi që lidhja e kontratës është bërë me 2 shkurt 2014, ndërsa UA ka hyrë në fuqi me 25 shkurt 2014./betimiperdrejtesi/

Janë ngritur dyshime për parregullsi, lidhur me një projekt kapital në Prizren. Fjala është për projektin e ndërtimit të Pallatit të Kulturës në Zhur. Ndaj policia është duke e hetuar në bazë të një autorizimi të lëshuar nga Prokuroria Themelore e Prizrenit.

Tashmë kanë kaluar 6 muaj prej se është lëshuar ky autorizim për grumbullimin e provave, për shkak të dyshimeve mbi rregullsinë e zbatimit të projektit, për të cilin janë shpenzuar afro një milion euro, shkruan sot “Koha Ditore”. Pallati i Kulturës në Zhur ka filluar të ndërtohej në vitin 2009 dhe ende nuk është funksionalizuar. Së fundmi përmes një peticioni të nënshkruar, banorët e këtij lokaliteti kanë kërkuar nga autoritetet komunale që të bëhet ekspertiza për qëndrueshmërinë dhe stabilitetin e objektit.

Kryeprokurori i Prokurorisë Themelore të Prizrenit, Admir Shala, ka bërë të ditur se hetimet lidhur me këtë çështje ende janë në vazhdim e sipër.

Ndonëse ky projekt është nën llupën e hetuesve policorë, pak muaj më parë Ministria e Kulturës, Rinisë dhe Sporteve nuk ka hezituar që të alokonte mjete nga buxheti i saj për të. Kryetari i Komunës së Prizrenit, Ramadan Muja në mbledhjen e fundit të Ekzekutivit lokal pati pranuar se realizimi i këtij projekti kapital ka zgjatur shumë. Paraprakisht ka kërkuar që drejtori i Kulturës, Arhim Ajazi, të raportojë se në cilin stad ka mbetur finalizimi i këtij projekti. Ajazi ka shpjeguar se MKRS-ja ka alokuar 100 mijë euro për këtë objekt kulturor.

Përfaqësues të fshatit Vraniq (Vranishte) kanë bërë padi kundër kryetarit dhe Kuvendit të Komunës së Dragashit në Gjykatën Themelore të Prishtinës, në Departamentin e çështjeve administrative, lidhur me një vendim të organit më të lartë komunal, të miratuar në gusht të vitit 2012.

Vendimi në fjalë, që është i publikuar në ueb faqen e Komunës së Dragashit, ka të bëjë me “shpalljen e interesit të përgjithshëm – për ndërtimin e tubacioneve të ujërave në një gjerësi prej 4 metrave nga vepra e marrjes e deri te hidrocentralet dhe për disa hidrocentrale që kërkojnë dalje në rrugë, mbi ngastrat kadastrale Brod, Dikancë, Baçkë, Mlikë, Kukalane, Vraniq, Krushevë, Restelicë dhe Glloboçicë, si edhe largpërçuesit nga çdo hidrocentral, deri në rrjetin kryesor në Dragash”, shkruan sot “Koha Ditore”.

Komuniteti i Vraniqit përmes rrjeteve sociale ka njoftuar se gjatë kësaj jave është dorëzuar padia në Gjykatën në Prishtinë. “Kënaqësia e banorëve të fshatit Vranishte, por edhe tërë komunitetit goran është e madhe për arsye se lufta për një Gorë të pastër ekologjike ka kaluar në rrafshin e drejtësisë”, shkruan në postimin e tyre, teksa është publikuar edhe fotografia e padisë së protokolluar në gjyqësor.

Gjithashtu në emër të këshillit të fshatit i është shprehur mirënjohja deputetes së Kuvendit të Kosovës, Duda Balje, për mbështetjen në aspektin ligjor, teknik dhe logjistik

Sot, në Malishevë, me homazhe dhe nderime, janë përkujtuar të rënët e “Masakrës së Malishevës”, e 30 janarit të vitit 1990. Në këto homazhe dhe nderime, krahas familjarëve, morën pjesë edhe nënkryetari i Komunës së Malishevës, z.Rexhep Mazreku, i shoqëruar nga drejtorët e drejtorive komunale, deputeti i Kuvendit të Kosovës, Enver Hoti, ish kryetari i Komunës së Malishevës, në atë kohë, Daut Krasniqi dhe personalitete e qytetarë të tjerë.

Më 30 janar të vitit 1990, në qendër të Malishevës, gjatë protestave popullore, për të drejtat e popullit shqiptar në Kosovë, kundër regjimit serb dhe kundër sistemit të asaj kohe, policia serbe, ka hapur zjarr mbi popullatën, ku janë vrarë Hysni Mazreku dhe Ali Kryeziu, derisa dhjetëra të tjerë janë plagosur, torturuar dhe maltretuar.

Në fjalën e rastit, për këtë ngjarje ka folur nënkryetari i Komunës së Malishevës, Rexhep Mazreku, i cili, pasi nderoi dëshmorët Kryeziu e Mazreku, tha se “kjo ishte një prej ngjarjeve më të rëndësishme të asaj kohe, pasi për herë të parë, është shënuar edhe reagimi institucional ndaj sistemit”.

Komuna e Malishevës, nën drejtimin e Daut Krasniqit (ish kryetar i Komunës), në mënyrë institucionale, kanë reaguar ndaj vrasjes së qytetarëve të saj, duke kërkuar përgjegjësi për ngjarjen dhe këtë çështje e kanë ngritur në institucionet më të larta në ish Jugosllavi, dhe në organet tjera ndërkombëtare.

Në orët e mbrëmjes të datës 26 janar pasi u kthye në shtëpi nuk e gjeti derën ashtu si e kishte lënë kur doli gjatë ditës.

Deputetit të Nismas, njëherësh edhe anëtar i komisionit për siguri, Zafir Berishës, i kishin hyrë hajnat, njofton Klan Kosova.

Në atë kohë nuk ishte askush në shtëpinë e tij.
Megjithatë, ish-pjesëtari i UÇK-së thotë se më shumë është i shqetësuar për fëmijët e tij.

Për këtë Berisha fajëson politikat e dobëta të qeverisë.

Ashtu sikurse më herët ishte ideali për ta bërë Kosovën shtet të pavarur, tani vepër patriotike cilësohet të jetë fuqizimi dhe ngritja e sistemit të drejtësisë të mirëfilltë dhe të pavarur. Kështu të paktën kanë vlerësuar njohësit dhe analistët e kësaj fushe ngase, sipas tyre, bashkëpunimi dhe mosndëshkimi i nëntokës kriminale dhe klaneve të korruptuara të instaluara gjithandej nëpër institucione e parti politike i ka bërë qytetarët të pashpresë e paperspektivë për jetë në këtë vend. Ndaj në këtë drejtim është shtruar edhe çështja se përse po e injorojnë sundimin e ligjit tërë klasa politike në Kosove, qoftë pozitë apo edhe opozitë. Analisti Naim Kelmendi, në një prononcim për gazetën “Kosova Sot”, ka thënë se kjo klasë politike e ka pushtetin në duart e veta dhe atë vetëm për interesa kryekëput të tyre dhe asnjëherë për interes të jetës së qytetarit. Tutje, sipas tij, me bekimin e kësaj klase politike që nga paslufta e deri më sot ka lulëzuar krimi i organizuar, derisa korrupsioni ka marrë përmasa shqetësuese për zhvillimet e shoqërisë, gjersa në anën tjetër nëntoka kriminale gjithashtu, njerëz të inkriminuar në parti e institucione të shtetit ia kanë zgjatur jetën krimit e kriminalitetit. Kelmendi shprehet se kjo nëntokë ka humbur dhe mbytur edhe shpresën qytetarit për një jetesë më të mirë apo për perspektivë të jetës në këtë vend.

“Kjo klasë politike është kreatore e së keqes, dhe s’mund të shkarkohet nga barra e fajit dhe përgjegjë- sisë për të gjitha dështimet, derisa nëntoka e krimit e ndërlidhur me mafio- politikën e inkriminuar udhëheqin Kosovën dhe bëjnë ligjin dhe qeverisin vendin me duart e krimit, ndërsa siç u tha më lart qytetarit i është vrarë edhe shpresa për jetën dhe perspektiven jetësore në këtë vend. Pra, kjo është e pafalshme për jetën dhe mirëqenien e qytetarit, i cili në shtetin e vet nuk ka asfarë perspektive dhe as të ardhme”, është shprehur analisti Naim Kelmendi, shkruan gazeta Kosova Sot.

Musa: Drejtësia duhet të shtrohet si çështje imediate në Kuvendin e Kosovës

Avokati Skender Musa thotë se sistemi i drejtësisë në Kosovë me të vërtetë ndodhet në një situatë shumë të rëndë, me vetë faktin, siç tha, që institucionet qeveritare, por edhe partitë politike opozitare asnjëherë nuk e ngritin çështjen e ngritjes së nivelit të përgjegjësisë të gjithë zyrtarëve që merren me zbatim të ligjit në Kosovë, duke filluar nga bashkësitë lokale, pastaj komunat, Qeveria, institucionet e hetuesisë, prokuroria, gjykata, por edhe aktorët e tjerë të drejtë- sisë, siç janë avokatët, në mënyrë që kësisoj të ngritët niveli i llogaridhënies së aktorëve në fjalë. Përveç kësaj, sipas Musës, institucionet shtetërore, por edhe partitë politike, të cilat janë të përfaqësuara në Kuvendin e Kosovës duhet ta shtrojnë një çështje, që është imediate për zhvillimin e drejtësisë, siç është rritja e numrit të prokurorëve dhe gjyqtarëve në të gjitha nivelet e sistemit të drejtësisë, e sidomos numrin e atyre që merren me vepra korruptive. Musta thotë se pa u zhvilluar sistemi i drejtësisë, dhe pa u dënuar ata që kryejnë krime ekonomike të të gjitha niveleve dhe jo vetëm korruptive (për shkak se krimet ekonomike kryhen edhe në nivele të tjera, duke krijuar kështu edhe monopole në tregje të ndryshme të sektorëve ekonomik), nuk mund të ketë zhvillim ekonomik, ku për rrjedhojë nuk mund të ketë as rritje të numrit të punësuarve”.

Ai tutje ka shtuar: “Në këtë drejtim si duket politika është e interesuar që ta mbajë drejtësinë në këtë gjendje, ngase në pamundësi për t’i shqyrtuar të gjitha rastet e shumta që ndodhin në vendin tonë, me theks të veçantë rastet kriminale, atëherë është më lehtë që zyrtarët e korruptuar të shpëtojnë nga institucionet e hetuesisë, por edhe nga drejtësia në tërësi. Në këtë aspekt mendoj se është e rëndësisë së veçantë që të rritet niveli i kapaciteteve të gjyqtarëve dhe prokurorëve, por edhe hetuesve të specializuar në këto fusha, në mënyrë që të ketë kuadro të mjaftueshme për ta luftuar sistemin korruptiv që ekziston në Kosovë, si dhe sistemin e monopoleve në ekonominë dhe në tregtinë e Kosovës, ku përveç kësaj është e nevojshme që të ngritet edhe niveli i performancës së prokurorëve dhe gjyqtarëve”, ka shtuar ai