Mbrojtësi i të akuzuarit Bajram Kolgeci, avokati Visar Vehapi, ka thënë se i mbrojturi i tij është akuzuar për keqpërdorim të detyrës zyrtare, duke u bazuar në supozime. Vehapi, gjatë shqyrtimit të dytë të mbajtur të enjten në Gjykatën Themelore në Prizren, ka kërkuar hedhjen e aktakuzës në fjalë.
Sipas dispozitivit të aktakuzës, Kolgeci në cilësinë e zyrtarit për prokurim publik në Universitetin e Prizrenit (UPZ), ka shpallur tender publik në kundërshtim me Rregulloren për Prokurim. Tutje, në aktakuzë thuhet se i akuzuari në fjalë, në momentin e shpallje së tenderit për furnizim dhe montim të inventarit në UPZ, nuk ka caktuar sasinë e përafërt të artikujve, të cilën e parasheh rregullorja, duke lënë hapësirë për manipulime.
Avokati Vehapi deklaroi se mundësia për keqpërdorim nuk do të thotë se është bërë keqpërdorimi. Sipas tij, për gabime të mundshme nga personat zyrtarë në institucionet publike, ekzistojnë mekanizmat përmirësues administrativ. Ai tutje ka shtuar se krejt aktakuza është bazuar në një ekspertizë financiare, e sipas të cilës ekspertizë nuk ka pasur të dëmtuar nga tenderi në fjalë.
“Është rasti më i veçantë në karrierën time 12 vjeçare si mbrojtës, por besoj edhe në praktikat e prokurorive dhe gjykatave, që dikush të akuzohet se kinse ka krijuar mundësi për të kryer veprën penale” tha Vehapi. Andaj ka kërkuar që aktakuza si e tillë të hudhet në mungesë të provave.
Prokuroi i rastit, Genc Nixha ka kërkuar që të refuzohet kërkesa e mbrojtjes si e pabazuar dhe të shkohet në shqyrtim kryesor.
Vehapi sërish ka marrë fjalën dhe ka thënë se faza e kundërshtimit të provave dhe hudhjes së aktakuzës, nuk është vetëm fazë e kotë procedurale por është mundësi e dhënë nga ligjvënësi, me të cilin hudhen aktakuzat e pabazuara, si kjo në rastin konkret.
Kryetari i trupit gjykues, Artan Sejrani, ka njoftuar palët se rreth kërkesës së mbrojtjes, do të përgjigjet me shkrim./betimiperdrejtesi/
