Tomë Gashi, avokati i familjes së aktivistit të Lëvizjes Vetëvendosje Astrit Deharit, ka deklaruar se kjo familje ka bërë kallëzim penal kundër përgjegjësve që lejuan që pamjet e burgut ku ai vdiq, të publikohen në media.

Pasi ka bërë padinë te Kryeprokurori i Shtetit Aleksandër Lumezi, Gashi ka thënë se ka ngritur padi kundër katër institucioneve përgjegjëse për këtë publikim.

“Dorëzuam në prokurorinë e Shtetit Kallëzim Penal kundër personave përgjegjës: Drejtorisë Rajonale të Policisë së Prizrenit, kundër Ministrisë së Punëve të Brendshme dhe kundër Agjencisë së Forenzikës dhe Prokurorit të Prizrenit, Sylë Hoxhës”.

“Kallëzimi penal ka të bëjë me pamjet e publikuara në media të pamjeve të burgut ku ka vdekur astrit Dehari”, ka thënë Gashi.

Sipas tij provat që janë siguruar nga vendi i ngjarjes, janë hedhur në publik në mënyrë të paligjshme dhe Prokurori Hoxha, dështoi t’i mbronte ato.

“Ka pasur deklarata të Sylë Hoxhës dhe të të tjerëve zyrtarë kompetentë, që provat janë të sigurta dhe në asnjë mënyrë nuk mund të publikohen dhe se ato po ruhen të sigurta. Në media janë publikuar pamje, pavarësisht a janë të vërteta, të rrejshme apo të montuara. Me këtë akt, ka filluar kontaminimi i provave, gjë që është vepër penale”, ka deklaruar Gashi.

Kallëzimi Penal i Familjes Dehari, ngrehë katër akuza penale, Zbulimin e Paurtorizuar të Provave, Manipulimin me Prova, Zbulimi i Fshehtësisë Zyrtare dhe Keqpërdorim i Autoritetit Zyrtar, raporton Klan Kosova.

“Prokurorin e kemi njoftuar që ka të drejtë të hetojë për vepra të tjera penale që identifikohen në këtë rast”, ka theksuar Tomë Gashi.

“Në emër të familjes Dehari kërkojmë që të eliminohen nga hetimet prokuroria e Prizrenit dhe policia e Prizrenit”, ka thënë ai.

Gashi në deklaratën dhënë gazetarëve, nuk ka akuzuar në asnjë moment mediat për publikimin e pamjeve të brendësisë së burgut ku ka vdekur Dehari, duke theksuar se përgjegjësinë e kërkojnë tek ata të cilët lejuan që provat të binin në duart e mediave.

“Nuk po i akuzojmë mediat, por ata që i zbuluan provat para se të kryhen hetimet. Tani ka filluar një luftë speciale, duke u publikuar në media të dhëna shumë konfidenciale të cilat nuk do të duhej t’i kishte askush, përpos hetuesve policorë”.

I pyetur nga Klan Kosova se si e dëmton hetimin publikimi i këtyre provave, ai nuk ka dhënë përgjigje.

Gashi ka thënë po ashtu se Sylë Hoxha, i kishte thënë atij se është shokuar kur ka parë se provat u bënë publike, pasi ai vetë kishte deklaruar se janë shumë të sigurta.

Tomë Gashi, avokati i familjes së Astrit Deharit do të dorëzojë kallëzim penal në Prokurinë e Shtetit kundër personave përgjegjës për publikimin e pamjeve nga kamerat e sigurisë në burgun e Prizrenit e që kanë të bëjnë me rastin e vdekjes së Astrit Deharit.

“Sot, në orën 14:00 avokati i familjes Dehari do të dorëzojë kallëzim penal në prokurinë e shtetit kundër personave përgjegjës për publikimin e pamjeve nga kamerat e sigurisë në burgun e Prizrenit e që kanë të bëjnë me rastin e vdekjes së Astrit Deharit”.

“Kallëzimi penal ka të bëjë se si është e mundur që të rrjedhin informata të tilla, tejet të ndjeshme, para se të bëhet analizimi i këtyre pamjeve dhe hetuesia të jep mendimin për këtë”, thuhet në një njoftim për media të Lëvizjes Vetëvendosje.

Kallëzimi penal dorëzohet në Prokurorinë e Shtetit që ndodhet afër stacionit policor “Qendra”. /PrizrenPress.com/

Politikanët kryesorë të shtetit të Kosovës, që për disa vjet rresht janë në krye të shtetit dhe janë treguar si qeveritarët e dështuar në instalimin e shtetit ligjor, po vazhdojnë që për dështimet e veta ta fajësojnë Bashkimin Evropian që po e mban akoma Kosovën si një geto të izoluar pa liberalizim vizash edhe pas Raportit të fundit të Progresit. Edhe reagimin e djeshëm tepër të ashpër të presidentit Hashim Thaçi karshi BE-së, përfaqësues të subjekteve të ndryshme politike dhe ekspertë të sundimit të ligjit, njohësit e politikës, e shohin si një reagim tepër hipokrit. Ai tha se BE-ja, në mungesë të unitetit përbrenda, kinse ka dështuar dhe po vazhdon të dështojë në trajtimin e Kosovës në mënyrë të barabartë me shtetet e tjera që aspirojnë anëtarësimin në BE dhe si pasojë e kësaj qasje Kosova vazhdon të mbetet vendi i vetëm i izoluar në Ballkanin Perëndimor dhe perspektiva e anë- tarësimit në BE mbetet tepër e paqartë. Tepër joserioz e ka cilësuar këtë justifikim të presidentit deputeti i LDK-së, Adem Salihaj. “Hashim Thaçi po mundohet ta shfajësojë veten dhe të paraqitet mbrojtës i interesave të Kosovës, e në fakt është krejt e kundërta e gjithë kësaj.

Është fakt që BE-ja i ka vënë Kosovës kushte të rënda dhe diskriminuese, të cilat nuk ia ka vënë asnjë shteti tjetër,shkruan gazeta Kosova Sot.
Por, është fakt gjithashtu se Thaçi me kompani e ka ngulfatur Kosovën me korrupsion dhe krim të organizuar dhe ia ka shkatërruar asaj perspektivën evropiane”, tha Salihaj për “Kosova Sot”.

Ish-lideri i PDK-së thelloi degradimin e shtetit

Po të njëjtin gjykim e ka edhe Teuta Haxhiu, deputete nga AAK-ja. “Pikërisht reagimi, jo vetëm tani ndaj Raportit të Progresit, nga ana e presidentit Hashim Thaçi, por edhe me shumë reagime të tjera, të cilat po i bën kohët e fundit, po tregojnë se ai vetëm sa po pretendon ta nxjerrë të pafajshme e të pastër për dështimet e deritashme të qeverisjes figurën e vet”, u shpreh ajo. Sipas saj, më së shumti fajtor është pikërisht presidenti i tanishëm i vendit, Hashim Thaçi, i cili gjatë gjithë qeverisjes së tij në dy mandate, duke qenë në pozitën e kryeministrit dhe në këtë mandat fillimisht si zëvendëskryeministër e tani si president, Kosova vetëm sa e ka thelluar degradimin në çdo fushë dhe çdo sektor institucional. “Për fat të keq i njëjti trend po vazhdon edhe tani në bashkëqeverisjen PDK -LDK, ngase përkundër faktit që Thaçi është president i vendit prapë ndikimet direkt i ka në PDK dhe në telekomandimin e politikave të qeverisjes së vendit, pavarë- sisht që nga ana formale ka dhënë dorëheqje nga drejtimi i partisë”, tha deputetja Haxhiu për “Kosova Sot”.

Asnjë politikan i lartë nuk u dënua për afera

Edhe profesori i së drejtës, Muhamet Kelmendi, thotë se në Raportin e Progresit të BE-së për Kosovën janë dhënë shumë vërejtje, të cilat lidhen drejtpërdrejt me dështimet e Qeverisë së kaluar dhe të tashme të Kosovës dhe këto dështime nuk mund të mbulohen para opinionit, duke akuzuar strukturat e BE-së. “Ne jemi dëshmitarë se në Kosovë kemi një dështim të lartë të shtetit ligjor. Sa e sa herë kemi shkruar dhe është thënë se kemi qeveri të korruptuar dhe të kriminalizuar. Dhe, në këtë anë çfarë bëri vendi i ynë, organet e shtetit për të luftuar këto dukuri shumë të dëmshme. Tani ajo që është ngarkesë plus dhe e vetme për Kosovën, kundruall vendeve tjera, është edhe demarkacioni. Por, edhe këtu, si në rastin e parë, shkaktar është drejtpërdrejt Qeveria, kryesisht ish-kryeministri Thaçi dhe tash Mustafa”, u shpreh ai. “Në Kosovë kemi dështim tepër të madh dhe deri më tani askush nuk është përgjigjur nga niveli qendror për këso veprimtarish kriminale. Asnjë politikan, udhëheqës i ndonjë bordi, gjykatës a prokuror, person që e ka krimin ekonomik apo tjetër në dorë nuk është dënuar. Kemi vetëm disa dënime të nivelit të ulët dhe të karakterit qesharak”, tha Muhamet Kelmendi për “Kosova Sot”.