Ministri i Shëndetësisë i Republikës së Kosovës Imet Rrahmani do të vizitojë sot Komunën e Malishevës dhe atë të Rahovecit.

Ministri Rrahmani me autoritetet e pushtetit lokal do të diskutojë për Kujdesin Parësor Shëndetësorë dhe përgatitjet për ballafaqim me rastet eventuale të Etheve Hemorragjike.

Opozita në Kosovë barrikadohet me tenda përballë qeverisë. Ata thonë se do të protestojnë 24 orë në ditë deri në rrëzimin e qeverisë dhe do ta pengojnë zgjedhjen e Hashim Thaçit, President të Kosovës.

Të premten (26.02) Kuvendi i Kosovës do të votojë për zgjedhjen e Presidentit të vendit.

Ky vendim u mor të mërkurën (24.02) pasdite gjatë një mbledhjeje të kryesisë së Kuvendit, në të cilën sërish u hodh gaz lotsjellës nga një përfaqësues i opozitës në mbledhje.

Kandidati i koalicionit qeverisës PDK-LDK, për postin e Presidentit të Kosovës është kryetari i Partisë Demokratike (PDK), Hashim Thaçi, i cili gëzon mbështetjen e koalicionit qeverisës dhe të pakicave të përfaqësuara në parlament.

Sipas procedurave kushtetuese, për zgjedhjen e presidentit, kërkohen dy të tretat e votave të deputetëve, 80 vota nga 120 deputet sa ka parlamenti.

Mirëpo, nëse kjo dështon në dy rundet e para, atëherë, në rundin e tretë presidenti mund të zgjidhet me 61 vota. Kundër-kandidati i Hashim Thaçit për postin e Presidentit pritet të jetë Rafet Rama, po nga PDK-ja, kandidaturë kjo për ta plotësuar formën procedurale të zgjedhjes së të parit të vendit. Hashim Thaçi, para se të nisë procedura e zgjedhjes së presidentit, duhet të japë dorëheqjen nga posti i kryetarit të partisë, pasi kështu e parashikon Kushtetuta e Kosovës.

Ndërkohë, partitë politike opozitare lëvizja Vetëvendosje, Aleanca për Ardhmërinë e Kosovës (AAK) dhe Nisma për Kosovën, tashmë janë mobilizuar siç thonë “për të mos e lejuar zgjedhjen e Hashim Thaçit president të Kosovës. Kundërshtimi i tyre do të jetë brenda kuvendit dhe po ashtu me protesta në rrugë.

Këto subjekte politike tashmë kanë vendosur tenda përballë qeverisë dhe parlamentit dhe me protestuesit brenda dhe jashtë tyre po tentojnë, siç thonë, ta bllokojnë zgjedhjen e presidentit të dhe po ashtu do të vazhdojnë të protestojnë 24 orë në ditë deri në rrëzimin e qeverisë.

Tre liderët opozitar, Visar Ymeri, Ramush Haradinaj dhe Fatmir Limaj, thonë se protestat e opozitës kundër qeverisjes aktuale do të vazhdojnë deri në zbatimin e kërkesave të tyre: rrëzimin e qeverisë Mustafa.

“Protestat që po vazhdojnë, janë kundër regjimit që ka bërë uzurpimin e posteve publike. Do ta fillojmë protestën tonë të vazhdueshme kundër këtij regjimi antikushtetues, kundër këtij regjimi antirepublikë dhe kjo protestë do të vazhdojë deri në momentin e largimit të kësaj qeverie”, thotë lideri i lëvizjes Vetëvendosje Visar Ymeri.

“Fillon një etapë e re e kundërshtimit të vazhdueshëm, të përhershëm këtu në shesh. Ky aktivitet i kundërshtimit opozitar në sheshin e kundërshtimit tashmë është bërë me të gjitha përgatitjet e duhura, nënkupton qëndrim të përhershëm në tend”, thotë Ramush Haradinaj, kryetari i AAK-së.
Kosovo Parlament Tränengas Polizei Pristina

Situata politike në Kosovë sa vjen e tensionohet e nuk kanë munguar as incidentet.

Gjatë natës së të martës dhe ditës së mërkurë, persona tash për tash të panjohur i dogjën veturën private njërit prej ministrave në qeverinë e Kosovës, Memli Krasniqit, ministër i Bujqësisë dhe po ashtu dogjën veturën private zëvendësministrit të pushtetit lokal, Bajram Gecaj.

Askush nuk e ka marrë përgjegjësinë për këto akte, sikundër që policia nuk i di autorët. Qeveria e Kosovës këto akte i ka cilësuar akte të paprecedentë kriminale.

“Ky akt i paprecendent kriminal, i ndodhur në vazhdën e sulmeve që janë kryer së fundi kundër bartësve legjitim të institucioneve të Kosovës dhe ministrit Krasniqi, nga grupe anarkiste parapolitike, synon të krijojë atmosferë të dhunës dhe frikës, si dhe të pengojë punën e Qeverisë së Kosovës dhe rezultatet konkrete të Ministrisë së Bujqësisë si një ndër sektorët prioritar për zhvillimin ekonomik të vendit”, thuhet ndër të tjera në reagimin e qeverisë.

Prania ndërkombëtare në Kosovë është e shqetësuar me zhvillimet që po ndodhin tash e sa muaj me pothuaj një bllokadë totale të parlamentit. Përfaqësuesi i i BE-së në Kosovë, Samuel Zbogar, u bën thirrje të dy kampeve politike që të përmbahen në retorikën e tyre, sepse, kjo mund të nxisë dhunë.

“Ne kemi shprehur shqetësim për dhunën në Kuvend dhe për gazin lotsjellës në Kuvend, ashtu siç u kemi bërë thirrje edhe liderëve politikë për të kontrolluar retorikën e tyre, e cila mund të nxisë edhe dhunë. Ne nuk kemi opsion të preferuar politik në Kosovë. Qytetarët e Kosovës i votojnë liderët e tyre dhe ne punojmë me ta. Punojmë me Qeverinë, me Kuvendin. Nuk është që ne zgjedhim partitë. Ne luajmë me ‘top’ dhe jo me ‘lojtarët’. Dhe topi ynë që të lëvizim Kosovën para. Ky është interesi ynë.”, ka thënë Samuel Zbogar për mediat lokale. /Deutche Welle/

Kryeministri i Kosovës, Isa Mustafa ka kërkuar që populli – shoqëria cilvil, institucionet, bizneset – të punojnë së bashku në rrugën e gjatë të vendit drejt të qenit anëtare e barbartë në familjen e madhe të shteteve.

Ai ka thënë se përparimi i Kosovës është i dukshëm, i vlerësuar edhe nga faktorët ndërkombëtar, por që duhen eliminuar dallimet në kontekst të rrugës përpara të vendit.

Postimi i plotë i Mustafës në Facebook:

Shumë nga miqtë tanë po na bëjnë vërejtje se Kosova ka arritur shumë vitin e fundit, por se nuk i kemi afirmuar këto të arritura.

Është, MSA, marrëveshja e parë kontraktuale që u lidh vitin që shkoi me BE-në, e cila mundëson integrimin tonë në ekonominë dhe demokracinë evropiane. Në fund të vitit të kaluar organizata prestigjioze amerikane Korporata e Sfidave të Mileniumit (MCC) e radhiti Kosovën ndër vendet që përfiton prej fondeve të saj (qindra miliona dollarë).

U nënshkrua marrëveshja për investimin më të madh privat amerikan në Kosovë, mbi në miliard euro, për ndërtimin e TC Kosova C. Janë arritur marrëveshje për investime të rëndësishme me Bankën Evropiane për Rindërtim dhe Zhvillim.

Vlerësimet e Fondit Monetar Ndërkombëtar janë se Kosova ka stabilizuar tërësisht buxhetin e saj, për dallim prej shumë vendeve në regjion dhe vendeve të tjera. Janë rritur për 25% ndihmat sociale, janë rritur mjetet për pensione për kontributdhënës mbi 25% dhe janë rritur pagat mesatarisht për 6% përmes aplikimit të shtesave për përvoja të punës.

Janë përafruar krejtësisht kushtet për liberalizim të vizave. Nuk ka raste dhe afera të korrupsionit nga qeveritarët. Jemi kujdesur për krijimin e kushteve më të mira për organet e drejtësisë, për gjyqtarë dhe prokurorë. Prandaj, nuk ka arsye të mos jemi bashkë të gjithë, pozitë dhe opozitë, gra e burra, të rinj e të moshuar, institucione, shoqëri civile e biznese, për të quar proceset përpara, për ta ndërtuar një shtet të fortë, të respektuar me perspektivë euroatlantike.

Më së paku kemi nevojë të ndahemi në patriotë e tradhtarë, në akuzues dhe të korruptuar, sepse njihemi të gjithë. Më së shumti kemi nevojë të punojmë në ndërtimin e institucioneve tona demokratike me njerëz tanë, këta që jemi.

“Vota për zgjedhjen e Thaçit president do ta pezmatojë jashtë mase elektoratin e LDK-së, sepse për herë të tretë LDK-ja po vepron në kundërshtim të plotë me vullnetin e këtij elektorati. Kjo me siguri do t’i hakmerret keq në zgjedhjet e ardhshme”, u shpreh deputeti Adem Salihaj

Zhvillimet në PDK po priten në mënyra të ndryshme në LDK. Disa, që mezi presin ta votojnë Hashim Thaçin për pozitën e presidentit të vendit, e varin shpresën që me ardhjen e Kadri Veselit në krye të PDK-së, si një figurë me të kaluar të dyshimtë në drejtimin e SHIK-ut, do ta kenë më të lehtë që ta mundin këtë parti në proceset e ardhshme zgjedhore. Por, ka zyrtarë të tjerë dhe analistë politikë që mendojnë se e kaluara e deritanishme e këtij koalicioni do ta dëmtojë papërmirësueshëm LDK-në, duke nxitur rrjedhje të reja të elektoratit drejt partive të opozitës aktuale.

Deputeti i LDK-së, Adem Salihaj, që vazhdimisht ka qenë i zhgënjyer me koalicionin PDK-LDK dhe kundërshtar i fuqishëm, thotë se pas kësaj “martese” të padëshirueshme politike me SHIK-un nuk pret më ditë të mira dhe perspektivë elektorale për LDK-në, pavarë- sisht ndryshimeve të mëdha që mund të ndodhin në PDK me shkuarjen e Thaçit në Presidencë dhe marrjen e timonit të PDK-së nga Kadri Veseli. Ai shpreh drojën se elektorati i LDK-së në zgjedhjet e reja do të synojë të mbështesë subjekte të tjera politike, jo më për LDK-në.

“LDK-në pa dyshim e ka dëmtuar shumë koalicioni me PDK-në dhe fillimisht edhe votimi i Kadri Veselit për kryetar të Parlamentit. Duhet thënë hapur se edhe vota për zgjedhjen e Thaçit president do ta pezmatojë jashtë mase elektoratin e LDK-së, sepse për herë të tretë LDK po vepron në kundërshtim të plotë me vullnetin e këtij elektorati. Kjo me siguri do t’i hakmerret keq në zgjedhjet e ardhshme”, u shpreh ai..