Kryesia e Kuvendit të Kosovës ka caktuar seancë të jashtëzakonshme për zgjedhjen e Presidentit të Kosovës.

Pas përfundimit të mbledhjes, Kryeparlamentari Kadri Veseli ka deklaruar se Kuvendi do të mblidhet këtë të premte, në orën 11:00.

Ai ka thënë se janë dy kandidatë: Hashim Thaçi dhe Rafet Rama, deputeti i PDK’së.

Sipas Veselit, ky do të jetë një moment historik dhe i veçantë, ndërsa ka premtuar se procesi do të jetë transparent dhe gjithpërfshirës.

“Të premten, në orën 11:00, Kosova do të kalojë një nga momentet më të veçanta. Kemi zgjedhjen e Kryetarit të Shtetit”.

“Pas një kohe shumë të gjatë,  patëm mbledhjen me kolegët e Opozitës. I inkurajoj ata të jenë pjesë e këtij procesi. Megjithatë, ajo që ndodhi brenda po i kalon të gjithë kufijtë e një normaliteti. Kjo që po ndodh është e re në Kosovë, por nuk është e panjohur”.

Veseli ka ftuar qytetarët të kenë përgjegjësinë për ruajtjen e familjeve të tyre.

“Ka një vendosmëri të fanatizmin për të arritur qëllimet e veta në mënyrën e vet. Kisha ftuar qytetaret familjarët që ta ruajnë njëri-tjetrin”.

“Ne nuk do të ndalemi duke thirrur Opozitën që të jetë pjesë e  vendimmarrjes në Kuvendin e Kosovës. Mirëpo, nuk do të kenë suksese ata që mendojnë se shteti ligjor në Kosovë nuk funksionin. Të na imponohet nuk ka mundur as Serbia, shtet 22 milionësh. Kur e ka tepruar, i kemi thënë mjaftë”, ka thënë Veseli.

Liderët opozitarë kanë mbajtur një konferencë për media nga sheshi i Prishtinës ku po qëndrojnë me tenda në protestë kundër Qeverisë dhe zgjedhjes së Hashim Thaçit president.

Ramush Haradinaj i AAK-së dhe Fatmir Limaj i Nisma-s për Kosovën kanë thënë se pozita po tenton ta trafikojë një seancë ilegalë në mënyrë që të zgjidhet Thaçi president.

Ata kanë bërë thirrje që shumica të mos ta bëjë këtë sepse një veprim i tillë do ta thellonte edhe më shumë krizën,njofton Klan Kosova.

Lideri i AAK-së ka thënë se nëse thirret një seancë e re deputetët do të marrin pjesë në seancë.

Kurse Limaj ka shtuar se çfarëdo që bën ky Kuvend është ilegale dhe nuk është legjitime.

Në këtë paraqitje nuk ka marrë pjesë lideri i Lëvizjes Vetëvendosje, Visar Ymeri,mungesën e tij e sqaruan kolegët e tij, ata thanë se Ymeri kishte disa takime me strukturat e partisë së tij – kështu që me marrëveshje në paraqitje për media kanë dalë vetëm dy liderët e tjerë.

Kryeparlamentari Kadri Veseli ka mbyllur seancën plenare, pasi kanë përfunduar të gjitha pikat e parapara për rendin e ditës, duke u thënë deputetëve “mirupafshim në seancën e radhës”.

Pa Opozitën dhe pa gaz lotsjellës, deputetët e Pozitës sot punuan në qetësi.

Në këtë seancë, u miratuan një varg projektligjesh, si ai për ratifikimin e Marrëveshjes për Hua ndërmjet Qeverisë së dhe Bankës Europiane për Rindërtim dhe Zhvillim për projektin e rehabilitimit të rrugës hekurudhore 10.

Po ashtu, u miratua Projektligji për Arsimin e Lartë, propozim-amendamenti nr. 25 në Kushtetutën e Kosovës, i ri-proceduar nga Qeveria, raporti për Ligjin për Policinë, si dhe raporti për Ligjin për Inspeksionin bujqësor

Deputetët nuk e miratuan Projektligjin për ratifikimin e Marrëveshjes së kredisë Kosovë-Unicredit Bank Austria AG për financimin e Projektit të modernizimit të shërbimeve të kardiologjisë invazive në QKUK.

Ndërsa shqyrtimi i raportit të Komisionit për Zhvillim Ekonomik, Infrastrukturë, Tregti dhe Industri lidhur me mbikëqyrjen e zbatimit të Ligjit për standardizimin, është shtyrë për një seancë tjetër.