Kreu i AAK-së, Ramush Haradinaj me bashkëpunëtorë i shoqëruar nga drejtuesit e degës së AAK-së, sot kanë realizuar aktivitete të shumta në Prizren.

Pas takimit në zyret e degës së këtij subjekti politik në Prizren, ata më pas kanë vijuar me vizita disa objekteve zejtare, duke u ndalur në Butikun e mirënjohur të veshjeve “Arijeta”, me ç’rast Ramush Haradinaj, është pritur ngrohtësisht nga pronari, Masar Kuksi me familje si dhe punëtoret e këtij objekti. Me këtë rast, Haradinaj ka pasur fjalë miradije për punën në këtë objekt, me theks të veçantë, për mënyren e punimeve të veshjeve tradicionale dhe atyre kombëtare shqiptare.

Ndërkaq, pronari i këtij objekti, Masar Kuksi, para liderit të AAK-së shprehu shqetësimet e komunitetit të biznesit, por njëkohësisht edhe besimin se një ditë Ramush Haradinaj do t’i marr frenat e Qeverisë, dhe gjërat sipas tij do të lëvizin më mbarë jo vetëm për bizneset.

Pas kësaj, Ramush Haradinaj ka marrë pjesë në aktivitetin e shpërndarjes së librezave për 60 të rinj prizrenas të cilët aderuan në AAK. Haradinaj, gjeti kohë përveç tjerash që të shoqërohet me qytetarë duke pirë çaj në një nga çajtoret tradicionale prizrenase në lagjen “Terzimahallë”. /TV Prizreni/

Me një solemnitet të madh, është bërë hapja zyrtare e xhamisë në fshatin Lubizhdë të Prizrenit.

Pjesë e këtij solemniteti të përurimit të xhamisë ishin qindra banorë të Lubizhdës dhe fshatrave përreth, drejtues të Këshillit të Bashkësisë Islame në Prizren dhe zyrtarë të BIK-ut, përfaqësues të subjekteve politike dhe kreu i Meshihatit të Bashkësisë Islame të Serbisë, Mevludin Dudiq.

Për rëndësinë e këtij objekti kanë folur imami i Gërnçarit, Anell Avdija dhe ai i Lubizhdës, Amir Ademi. Ndërsa përfaqësuesi i këtij lokaliteti, Nehat Vehapi, tha se kjo xhami madhështore është ndërtuar fal diasporës, të cilët edhe një herë dëshmuan veten pas ndihmës që i bënë luftës në Kosovë, edhe për ndërtimin e këtij objekti.

Në emër të Këshillit të Bashkësisë Islame të Kosovës në Prizren, ka folur kryemami, Ali Vezaj, i cili tha se ky objekt i bukur duhet t’i shërbejë banorëvë të këtij lokaliteti që të gjejnë qetësi shpirtërore, dhe shtoi se ky është një vend i ri i bashkimit të myslimanëve.

Ndërkaq, Resul Rexhepi, sekretar i përgjithshëm i BIK-ut, këtë objekt e vlerësoi si vepër madhështore e atyre që mundësuan ndërtimin e tij, dedikuar besimtarëve për t’i kryer obligimet ndaj Krijuesit.

Një fjalë rasti para të pranishmëve ka mbajtur edhe kreu i Meshihatit të Bashkësisë Islame të Serbisë, Mevludin Dudiq, i cili tha se të gjithë muslimanët e Ballkanit krenohen me Prizrenin. Ai bëri thirrje publike për binjakëzimin e komunës së Novi Pazarit dhe asaj të Prizrenit, iniciativë kjo e nisur kohë më parë.

Shuma e projektit të realizimit të këtij objekti nuk është bërë e ditur, ndërsa sipas asaj që u tha, 90% e financimit është bërë nga diaspora. Pjesë e këtij solemniteti ishin edhe ilahitë dhe leximi i pjese të Kur’anit nga nxënës të Medreseve dhe nga Lubizhda. /TV Prizreni/

Një fëmijë është lënduar në Prizren. Policia e Kosovës bën të ditur se fëmija është goditur me veturë në rrethana të panjohura, raporton PrizrenPress.

“Në rrugën “Kadri Zeka”, një i panjohur duke lëvizur me veturë, në rrethana të panjohura ka goditur këmbësorin (fëmijë). Viktima ka pësuar lëndime trupore dhe i njëjti është dërguar për tretman mjekësor në Spitalin e Prizrenit, ku më pas është liruar në shtëpi”, njofton PK-ja.

Po ashtu, një tjetër këmbësor është goditur nga një i panjohur në rrethana të panjohur në rrugën “Brigada 123”, në Suharekë. Viktima është dërguar për tretman mjekësor në Emergjencën e Suharekës. /PrizrenPress.com/

Policia e Kosovës njofton se është arrestuar një person në Rahovec, pasi që ka kanosur gruan e tij, raporton PrizrenPress.

I dyshuari me urdhër të prokurorit është dërguar në mbajtje. /PrizrenPress.com/

Një aksident ka ndodhur para pak çastesh tek vendi i ashtuquajtur “Rrethi i ri” në Prizren, raporton Indeksonline.

Sipas lexuesve të Indeksonline, një makinë e tipit Golf 4, është ndeshur me një shtyllë dhe ka dal në shiritin e kundërt.

Sipas tyre, nuk ka të lënduar nga ky aksident.

Deputeti i Lidhjes Demokratike të Kosovës dhe pjesëmarrësi në luftën e Koshares, Anton Quni ka thënë se Ministria e Mbrojtjes së Republikës së Kosovës është krijuar me dispozita Kushtetuese. Ai ka thënë për Indeksonline se Forcat e Armatosura të Kosovës kanë ekzistuar, sepse sipas tij, ka pasur një hierarki ushtarake.

“Ministria e Mbrojtjes e Republikës së Kosovës është krijuar me vendim te Qeverisë së Kosovës, sipas dispozitave kushtetuese të Republikës së Kosovës. MMRK ka ngritur kapacitetet ushtarake dhe ka ngarkuar njësitë operative me mision luftarak:

-mbrojtja e popullatës nga invadimi dhe terrori i forcave ushtarako-policore dhe paramilitare serbe;

-çlirimi i territorit të Kosovës nga po ato forca. Për këto arsye MMRK ka rekrutuar kuadrat ushtarake, ka ngritur infrastrukturën ushtarake, i ka siguruar fondet legale si dhe ka ushtruar komandimin dhe kontrollin mbi njësitë operative”, ka thënë Quni për Indeksonline.

Quni, që ishte ushtar i FARK-ut, ka thënë se personalisht është angazhuar nga ministri i mbrojtjes, dhe e konsideron si epror.

Sipas Qunit, çdo mohim i FARK-ut, është edhe mohim i Ushtrisë Çlirimtare të Kosovës.

“Unë personalisht jam ngarkuar me detyre nga ministri i mbrojtjes kolonel Ahmet Krasniqi dhe në zinxhirin komandues, ai ishte eprori im superior. Çdo mohim i rolit dhe peshës politike, ushtarake dhe historike të UÇK-së në kuadër të Forcave te Armatosura të Republikës së Kosovës është mohim i të vërtetës dhe nuk i shërben fare trajtimit korrekt të periudhës së viteve 1998 – 1999. Është e rëndësishme për vendin, për proceset që kanë ndodhur dhe po ndodhin që të thuhet e vërteta dhe të njihet kontributi i të gjithëve për të gjitha këto procese”, ka theksuar Quni.

Ditë më parë në media nënkryetari i Kuvendit dhe njëri nga udhëheqësit e UÇK-së, Xhavit Haliti, deklaroi se nuk ka pasur kurrë FARK dhe për këtë ka fakte.