Aksioni i nisur nga EULEX-i, paralajmërim për mafio-politikën. Para drejtësisë, të gjithë do të japin llogari

Aksionin e ditës së mërkurë nga EULEX-i dhe Policia e Kosovës, për kapjen e një grupi të madh kriminal dhe nxjerrjen para drejtësisë, përfaqësues të politikës kosovare, institucioneve antikorrupsion dhe nga shoqëria civile, po e shohin si një paralajmërim serioz edhe për kokat e tjera të politikanëve mafiozë, që gjithsesi do të duhej jo vetëm t’i trembë, por edhe t’i nxjerrë para drejtësisë të gjithë politikanët që kanë bërë pasuri të madhe të paligjshme me korrupsion e krim të organizuar. Sido që të jetë, për të arritur qëllimin e plotë të kësaj nisme, kërkohet akoma një vullnet më serioz politik për mbështetje nga institucionet e Kosovës.

“Koha për goditjen e krimit dhe korrupsionit ka qenë pardje, por një gjë e tillë nuk do të ndodhë derisa do të mungojë vullneti politik i institucioneve vendore për luftë të vërtetë ndaj këtyre dukurive të shëmtuara. Kurse vullneti politik do të mungojë derisa vendi të udhëhiqet nga struktura të korruptuara e të involvuara në krim të organizuar, por një gjë e tillë nuk do të ndodhë as me pjesëtar të EULEX-it të korruptuar”, tha për “Kosova Sot” deputeti nga partia më e madhe parlamentare në opozitë, Lëvizja “Vetëvendosje!”, Ismail Kurteshi.

Sipas Kurteshit, EULEX-i shumë herë ka premtuar kapjen e “peshqve të mëdhenj”, por përherë ata i rrëshqitnin nga duart dhe aksionet përfundonin pa rezultate ose, çka është edhe më keq, kriminelët dhe të korruptuarit dilnin të pafajshëm.

“Bazuar në punën dhe deklarimet pompoze në të kaluarën, që kryesisht përfunduan në spektakle mediatike pa asnjë rezultat, ose me rezultate tragjike-komike, as tani nuk priten rezultate konkrete në luftën kundër krimit dhe korrupsionit as nga aksioni, as nga deklarimet e fundit të EULEX-it e as të zyrtarëve të lartë të vendit. Megjithatë, nuk është e largët dita kur ndryshimet pozitive në këtë vend do të ndodhin dhe secili do të japë llogari para organeve të drejtësisë”, tha për deputeti Kurteshi.

Më optimist në shkuarjen përtej këtij rasti në ndjekjen e krimit të organizuar dhe korrupsionit, si dhe konfiskimin e pasurisë së fituar me veprime të kundërligjshme është shprehur kreu i Antikorrupsionit Hasan Preteni.

“Bindja ime, që më ka udhëhequr tërë këtë kohë, është se do të vijë koha që keqpërdorimi i besimit dhe keqpërdorimi i pasurisë do të ndëshkohen”, tha Preteni për “Kosova Sot”.

Me këtë optimizëm i sheh zhvillimet vijuese edhe Ariana Qosaj-Mustafa nga Instituti KIPRED.

“Hetimet dhe ngritja e aktakuzave për rastet e “peshqve të mëdhenj” sikur që njihen, janë gjithmonë të mirëseardhura. Posaçërisht në kontekstin e Kosovës, kur e dimë se pozitat në pushtet iu kanë garantuar politikanëve të profilit të lartë me një lloj imuniteti edhe prej hetimeve. Shpresojmë se këtë herë rasti do të shkojë deri në fund me dëshmi të mjaftueshme para gjykatës, që të marrin edhe vendim meritor”, ka thënë ajo.

“Kemi pasur përvoja të hidhura, sepse shumë aktakuza janë ngritur në të kaluarën, por pastaj në mungesë të provave janë liruar”, tha Qosaj- Mustafa për “Kosova Sot”.

Deputeti i Nismës Zafir Berisha ka shtruar një pyetje për kryetarin e Kuvendit të Kosovës, Kadri Veselin. Ai dëshiron të dijë nga Veseli, se mesazhi përgëzues për dorëheqjen e Azem Sylës, a vlen edhe për kryetarin e Prizrenit, Ramadan Mujën?

“Kadri Veseli e paska përgëzuar Azemin për dorëheqjen e tij si deputet i Kuvendit të Kosovës. Kadri, a vlen edhe për kryeplakun e Prizrenit”,pyet Berisha, transmeton PrizrenPress.

Kryetari i Kuvendit të Kosovës, Kadri Veseli e ka mirëpritur dorëheqjen nga të gjitha përgjegjësit institucionale të deputetit i cili gjendet në arrati, Azem Sylës.

“Prandaj, unë inkurajoj të tjerë aktorë politikë dhe funksionarë të lartë shtetërorë, që gjenden para akuzave apo kanë çështje të tilla të hapura me drejtësinë, që të ndjekin rrugën e njëjtë dhe të tërhiqen nga detyrat e rëndësishme që kanë në mënyrë që ta lënë drejtësinë sa më të lirë në përmbushjen e detyrës së vetë”, ka thënë Veseli.

Ndërkaq, deputeti Zafir Beisha thotë se kryetari i Prizrenit, Ramadan Muja është i dënuar për krim të organizuar, korrupsion e keqpërdorim të detyrës zyrtare.

“Kadri ai (Ramadan Muja), vazhdon me qenë në pozitën e të parit të qytetit”./PrizrenPress.com/

Këshilltarët komunalë të Prizrenit, në mbledhjen e sotme, kanë miratuar të gjitha propozim-vendimet e paraqitura për shqyrtim nga organi më i lartë legjislativ i komunës së Prizrenit.

Pika që më së shumti ka zgjuar debat, ka qenë propozim-vendimi për ndryshimin dhe plotësimin e Planit Rregullues Urban “Qendra e re” të qytetit.

Njëri nga hartuesit e këtij Plani Rregullues, Iftiman Llutfiu ka dhënë shpjegime të hollësishme, duke thënë se rreth këtij Plani, për befasi të tij kanë qenë të interesuar jashtëzakonisht edhe banorët që jetojnë në zonën “Qendra e re”, që kap një sipërfaqe të gjerë nga Parku i Qytetit deri në lagjën “Bajram Curri”.

Këtë plan e kanë përkrahur partitë e koalicionit qeverisës PDK-AAK dhe partitë e vogla, por jo edhe ajo e komunitetit boshnjak, NDS. Sqarimet e tyre kundërshtuese të këtij plani nga Bashkimi Demokratik i ka dhënë, Shani Berisha, ndërsa nga LVV, Arbër Rexhaj.

Kuvendarët e LDK-së, Mybera Mustafa dhe Salajdin Fanaj kanë pasur vërejtje pasi që rreth këtij plani nuk është konsultuar grupi i ekspertëve, pjesë e të cilit janë dy anëtarë të këtij subjekti politik, por ata thanë se përkundër kësaj, kuvendarët e subjektit më të madh opozitar për nga numrat në Kuvendin e Prizrenit, do t’ia jap dritën e gjelbër këtij plani.

Me 22 vota për, 6 kundër dhe 2 abstenime është miratuar me shumicë votash ky Plan, sikurse edhe kërkesa e Bankës Qendrore të Kosovës për dhënien në shfrytëzim të pronës komunale, hartimi i hartave zonale, si dhe para kuvendarëve është publikuar raporti i punës së Këshillit të Trashëgimisë Kulturore në Prizren.

Kryesuesi i Kuvendit, Kujtim Gashi ka paralajmëruar në fund të mbledhjes së sotme se me propozim të kryetarit të komunës, Ramadan Muja (nuk ishte i pranishëm në seancën e sotme), Kuvendi i Komunës së Prizrenit, së shpejti do të marrë vendim për mbulimin e shpenzimeve të varrimit për të gjithë qytetarët e Prizrenit. /TV Prizreni/

Një i mitur, i gjinisë mashkullore, ka pësuar lëndime trupore pasi aksidentalisht ka rënë në lumë nga kati i tretë i ndërtesës në Suharekë.

Për rastin ka njoftuar Policia e Kosovës, raporton PrizrenPress.

Sipas Policisë, rasti ka ndodhur dje rreth orës 19:22, në rrugën “Brigada 123”.

I njëjti pas trajtimit mjekësor në spitalin e Prizrenit është dërguar në QKUK.

Njësitë policore janë duke hetuar rastin. /PrizrenPress.com/

Policia e Kosovës njofton se dje janë arrestuar tre persona, dy në Prizren e një në Suharekë. Arrestimi i tyre është bërë në bazë të urdhëresës së lëshuar nga Gjykata Themelore e Prizrenit, raporton PrizrenPress.

Rasti i parë ka ndodhur në rrugën “Joni”, ndërsa rasti i dytë në rrugën “Wiliam Walker”, në Prizren. I pari është dërguar në vuajtje të dënimit në burgun e Prizrenit, ndërkaq i dyti në burgun e Dubravës.

Kurse, rasti i tretë ka ndodhur në fshatin Matiqevë të Suharekës. I njëjti është dërguar në mbajtje. /PrizrenPress.com/