Deputeti i Kuvendit të Kosovës, Shaip Muja, u ka bërë thirrje pozitës dhe opozitës të ulen dhe të bisedojnë për tejkalimin e krizës politike.

Në këtë intervistë për “Epokën e re”, ai ka thënë se do të ishte gabim i madh nëse do të lejohej që dikush nga jashtë të vijë dhe ta menaxhojë situatën e dialogut.

“Edhe në këtë rast duhet të bisedojmë ndërmjet vete, sepse gabimi më i madh do të jetë nëse opozita do të lejojë që dikush nga jashtë të vijë dhe ta menaxhojë situatën e dialogut. Kjo do të jetë e dëmshme për të gjitha palët. Momentalisht pozita dhe opozita duhet të ulen dhe t’i marrin përgjegjësitë, dhe mbi bazën e debatit ta gjejnë mesataren e vlerësimit politik”, ka theksuar ai.

Muja ka thënë se marrëveshja për demarkacionin dhe ajo për asociacionin momentalisht janë pa efekte juridike dhe ka mundësi të rivlerësohen.

Sipas tij, opozita e ka arritur qëllimin, meqë asnjë deputet në Kosovë nuk e miraton demarkacionin në formën aktuale.

“Demarkacioni dhe asociacioni nuk janë Gjykatë Speciale. Kjo është një natyrë krejt tjetër e problemit dhe nuk e besoj se gjen ndonjë deputet të pozitës i cili më sy mbyllur do ta votojë çështjen e demarkacionit apo të asociacionit. Këto dy marrëveshje momentalisht janë pa efekte juridike dhe kemi mundësi t’i rivlerësojmë”, ka deklaruar Muja, duke shtuar se zgjidhja është brenda institucioneve.

“Qeveria proceduralisht ka bërë gabime të cilat duhet t’i pranojë publikisht, ndërsa opozita, në këtë rast Ramush Haradinaj, ka pasur të drejtë që nga aspekti procedural ta kontestojë marrëveshjen e demarkacionit. Unë kam propozuar të formohet një komision i jashtëm profesional, qoftë edhe me propozimin e Haradinajt, dhe ai komision t’i dëgjonte të gjitha palët. Në Komisionin për Planifikim Hapësinor është porta e cila, ose do ta çojë për ratifikim demarkacionin nëse del se kufiri është në rregull, ose do ta kthejë mbrapsht në Qeveri për ta rishikuar”, është shprehur Muja. /Epoka e Re

Tri partitë opozitare, Lëvizja Vetëvendosje!, Aleanca për Ardhmërinë e Kosovës (AAK) dhe Nisma për Kosovën, do të protestojnë të shtunën në Gjilan kundër dy marrëveshjeve, asaj përAsociacionin e komunave serbe dhe marrëveshjes për demarkacionin e kufirit me Malin e Zi.

Ky manifestim me moton “Për Republikën” është paraparë të mbahet në ora 13:00 në sheshin para Teatrit të Qytetit në Gjilan.

Opozita i ka ftuar qytetarët e Gjilanit që në mënyrë sa më masive t’i bashkohen këtij manifestimi në kundërshtim të këtyre dy marrëveshjeve.

Partitë opozitare konsiderojnë se Gjilani dhe Anamorava janë një prej rajoneve më të prekura prej decentralizimit etnik, i cili tashmë po shndërrohet në “Zajednicë” gjersa thekson se copëtimi i Anamoravës me krijimin e enklavave etnike serbe pengon zhvillimin infrastrukturor, ekonomik dhe shtetndërtues në këtë rajon .

Tri partitë opozitare, Lëvizja Vetëvendosje!, Aleanca për Ardhmërinë e Kosovës (AAK) dhe Nisma për Kosovën, javën e kaluar, të shtunën një javë, protestën nga Prishtina, të mbajtur më 28 nëntor në sheshin “ Zahir Pajaziti”, e zhvendosën në Gjakovë ku kundërshtuan këto dy marrëveshje.

Analisti Fatos Lubonja thotë se Qeveria nuk përmbyset me gaz lotsjellës, siç po vepron opozita, por nëpërmjet një lëvizjeje popullore Opozita duhet nëpërmjet një lëvizjeje popullore t’i bindë njerëzit në masë për të përmbysur Qeverinë, e jo duke përdorur sistematikisht gaz lotsjellës në Kuvend. Kështu ka deklaruar gjatë një interviste për gazetën “Zëri” analisti nga Shqipëria, Fatos Lubonja, duke i analizuar zhvillimet e fundit politike në Kosovë.

Ai, megjithatë, e vlerëson si të tepruar arrestimin e deputetëve në Kuvendin e Kosovës, të cilët nëpërmjet gazit lotsjellës e kanë bllokuar legjislativin, duke kundërshtuar kështu Marrëveshjen për Asociacionin e Komunave me shumicë Serbe, si dhe Marrëveshjen për Demarkacionin me Malin e Zi.

“Arrestimi i deputetëve është në dëm të demokracisë. Ata duhen liruar sa më parë, kurse për pengimin e hedhjes së gazit duhen gjetur mënyra të tjera”, ka thënë ai.

Duke folur për marrëveshjet e Qeverisë së Kosovës me Serbinë dhe Malin e Zi, Lubonja thotë se duke u nisur edhe nga përvoja e së kaluarës, retorika për mbrojtje të kufijve e të interesave të tokës më së shumti shërben për të manipuluar njerëzit, sepse, siç thotë ai, njerëzit para së gjithash duan të kenë sigurinë se kanë politikanë që sinqerisht mendojnë për të mirën e tyre.

“Dhe ka nga ata në opozitë që kur u ka ardhur mundësia të bëjnë diçka për njerëzit kanë treguar se kanë punuar thjesht dhe vetëm për interesat e tyre. Nëse ti nuk punon që një ditë njerëzit të ndjehen më mirë në kufirin këtej, por punon për të kundërtën, atëherë është e kotë që të flasësh për kufij”, ka shtuar ai. /Zëri