Në përvjetorin e 103- të pavarësisë së Shqipërisë ‘Google’ ka ndryshuar logon e tij, duke vendosur flamurin kuqezi.
Pas simbolit kombëtar është vendosur edhe një peisazh shqiptar.
Të gjithë ata qytetarë brenda kufijve të Shqipërisë që klikojnë mbi flamurin kuqezi, shfaqen informacione që kanë lidhje me Pavarësinë e vendit tonë dhe festimet për këtë datë të rëndësishme historike.
Ceremonia e Pavarësisë në Sheshin e Flamurit në qytetin e Vlorës, mblodhi në qytetin bregdetar pak minuta pas orës 10:00 Presidentin e Republikës, Bujar Nishani, Kryeministrin Edi Rama, zv.kryetaren e Kuvendit, Valentina Leskaj, kreun e Bashkisë së Vlorës, Dritan Leli dhe drejtues të tjerë të lartë të vendit.
Krerët e Shtetit vendosën kurora me lule në Monumentin e Pavarësisë në Sheshin e Flamurit dhe pasi përshëndetën qytetarët e grumbulluar në shesh, vijuan me agjendën e festimeve.
Ndërkohë, thuajse në të njëjtën orë, në Tiranë drejtuesit më të lartë të opozitës i qëndruan traditës së vendosur prej tyre duke përkujtuar më 28 Nëntor Pavarësinë dhe Çlirimin.
Kryetari i PD-së Lulzim Basha, ish-kryeministri Berisha dhe zyrtarë të tjerë të lartë të Partisë Demokratike nderuan dëshmorët duke vendosur kurora me lule dhe përulur para tyre.
Tre persona kanë përfunduar në pranga, pasi që dyshohet se kanë kryer veprën penale të ‘vjedhjes së rëndë’. Sipas policisë, një person është arrestuar në qytetin e Suharekës, kurse dy të tjerë në Bubel të Malishevës.
Në rrugën “Brigada-123” të Suharekës është arrestuar një person nën dyshimin se i njëjti ka kryer tri vepra penale të vjedhjes në lokacione të ndryshme.
Me vendim të prokurorit i dyshuari pas intervistimit është dërguar në mbajtje.
Ndërsa në fshatin Bubel të Malishevës, policia bën të ditur se më 27.11.2015 janë identifikuar dhe arrestuar dy persona nën dyshimin se të njëjtit kanë kryer vjedhje në shtëpinë e viktimës. Me vendim të prokurorit të dyshuarit janë dërguar në mbajtje. /PrizrenPress.com
Tri partitë opozitare Lëvizja Vetëvendosje!, AAK dhe Nisma sot do të mbajnë një manifestim me moton “Me Republikën” me anë të së cilit kundërshtohet marrëveshja për themelimin e Asociacionit të komunave serbe që është nënshkruar në Bruksel nga kryeministri, Isa Mustafa.
Në manifestim, i cili është caktuar në Ditën e pavarësisë së Shqipërisë kundërshtohet edhe marrëveshja për demarkacionin e kufirit me Malin e Zi, i cili ende nuk ka shkuar në Kuvendin e Kosovës për ratifikim.
Tri subjektet opozitare kanë kundërshtuar këto marrëveshje me protesta si dhe me veprime të ndryshme edhe në Kuvendin e Kosovës.
Sipas përfaqësuesve opozitarë, manifestimi me moton “Për Republikën” do të jetë paqësor dhe masiv, dhe do t’i jep mesazh të qartë Qeverisë së Kosovës se këto marrëveshje duhet të tërhiqen.
Analistë dhe historianë që e njohin rëndësinë e kësaj feste kombëtare kanë thënë ditë më parë për KosovaLive se kjo datë mund të instrumentalizohet, por në anën tjetër edhe qytetarët e kenë të drejtën e tyre themelore të protestojnë.
Sipas tyre, shënimi i ditëve të veçanta, ajo e flamurit ose e pavarësisë kanë karakter manifestues dhe mobilizues, por nuk përjashtohen edhe protestat, të cilat lidhen me ngjarje të veçanta, siç janë ato që kanë të bëjnë me rrezikimet nga jashtë, të cilave u duhet mobilizimi kombëtar.
Po ashtu e sipas tyre, frikësimi i qytetarëve për të mos demonstruar qetësisht pakënaqësinë e vetë është shumëfish i dëmshëm edhe për vet qeverinë dhe se një gjë e tillë e vret qartë normën apo të drejtën e garantuar edhe me Kushtetutë elementare të standardit që e bënë demokracinë të pranueshme edhe për mentalitetin dhe etnopsikologjinë tonë sociale..
Manifestimi është paralajmëruar që të mbahet në sheshin “Zahir Pajaziti” në Prishtinë si dhe fillon në orën 14:00.
Komandanti legjendar Adem Jashari sot po të ishte gjallë do t’i bënte 60 vjet.
Ai ka lindur më 28 nëntor të vitit 1955 në Prekaz të Skënderajt.Ishte djali i tretë i Shaban Jasharit dhe Zahide Jasharit. Ka mbaruar shkollën e mesme teknike në Skënderaj.
Pas shuarjes së të gjitha institucioneve të Kosovës më 1990, ideja për t’u organizuar në aspektin ushtarak merr një dimension të ri, nga LPK-ja, e cila ende nuk vepronte krejtësisht publikisht. Me 3 nëntor të vitit 1991, në Shqipëri shkoi një grup veprimtarësh për t’i kryer ushtrimet e duhura ushtarake dhe për t’u stërvitur për luftën e armatosur.
Shërbimet sekrete serbe i bien në gjurmë formacionit të armatosur dhe policia serbe ia mësyn rrethimit dhe kapjes së tij. Më 30 dhjetor 1991 ekspedita policore – ushtarake serbe ndërmori aksion për zënien e grupit.
Pas kësaj përleshjeje me forcat e policisë serbe, tërë grupi i Adem Jasharit kalon në ilegalietet, deri në fillimet e luftës çlirimt are në Kosovë.
Intensifikimi i aksioneve të armatosura të UÇK-së fillon me sulmin e shtatorit 1997 në 12 stacionet policore.
Nga aksionet e armatosura kundër forcave policore që kryente UÇK-ja, pas shtimit të dhunës sistematike të forcave serbe nëpër Kosovë, kalohet në një fazë tjetër, të ndeshjes së drejtpërdrejtë me forcat serbe, pra në beteja, në fundin e nëntorit 1997, kur në Rezallë të Re luftohet me forcat e shumta të policisë serbe.
Në këtë betejë i ndërpritet rruga kolonës së armatosur rëndë të forcave serbe, që kishin mësyrë një sulm në fshatin Vojnik, ku një ditë më parë, patrullat e maskuara të policisë serbe ishin gjuajtur me armë zjarri nga njëri prej luftëtarëve të hershëm të UÇK-së, Abedin Rexha – Sandokani. Në këtë betejë printe Adem Jashari dhe luftëtarë të tjerë si Mujë Krasniqi, Rexhep Selimi, Sylejman Selimi, Ilaz Kodra, Ilaz Dërguti etj. Kjo është beteja e parë dhe f itorja e njësitit të UÇK-së. Kjo betejë bëri jehonë të madhe në opinionin publik.
Policia serbe kishte shenjuar që moti shtëpinë e Jasharëve. Më 5 mars 1998, që në orët e hershme, forca të mëdha të policisë serbe kishin mësyrë Prekazin. Një pikë zjarri, e stacionuar që herët në lokacionin e fabrikës së municionit, që ishte në afërsi të shtëpisë së Jasharëve, ishte përforcuar me mjete të rënda artilerike.
Përforcimet e forcave serbe kishin ardhur edhe nga drejtimi i Klinës, Mitrovicës dhe Gllogovcit. Sulmi mbi Jasharët nis rreth orës gjashtë të mëngjesit. Në shtëpi ndodheshin pothuajse tërë anëtarët e familjes. Sulmi mbi Jasharët dhe qëndresa heroike e tyre zgjatë tri ditë: më 5, 6 dhe 7 mars 1998.
Kjo luftë heroike, në historinë e re të Kosovës njihet me emrin Epopeja e Ushtrisë Çlirimtare të Kosovës. Për figurën e Adem Jasharit kanë shfaqur mendime edhe personalitete të rëndësishme. Administratori i parë ndërkombëtar i Kosovës, Bernar Kushner ka deklaruar se po të kishte Çmim Nobel për sakrificë për liri, ai do t’i takonte Adem Jasharit dhe familjes së tij.
Me vendim të ish presidentit të Kosovës, Fatmir Sejdiu, Adem Jashari është nderuar me titullin Hero i Kosovës.
Sot bëhen 18 vjet kur për herë të parë u panë publikisht pjesëtarë të armatosur të Ushtrisë Clirimtare të Kosovës.
Ditën e Pavarësisë së Shqipërisë në vitin 1997 në fshatin Llaushë të Skenderajt tre djem të rinj të veshur me uniforma dhe me armë automatike dolën dhe treguan kush janë ata.
E tërë kjo ndodhi në varrimin e mësuesit Halit Geci, i cili ishte vrarë dy ditë më parë nga forcat serbe.
Mujë Krasniqi (tash dëshmor i kombit), Rexhep Selimi dhe Daut Haradinaj dolën para masës së madhe që ishin mbledhur në Llaushë dhe treguan se Ushtria Çlirimtare e Kosovës ekziston përnjëmend.
Që nga ajo ditë, festës së Flamurit iu ka bashkangjitur edhe dalja publike e UÇK-së.
Edhe në Kosovë, edhe Shqipëri, 28 Nëntori gjen politikën shqiptare të ndarë. Secilën në mënyrën e vet.
Tri partitë opozitare në Kosovë kanë zgjedhur 28 Nëntorin për të protestuar – ndonëse këtë grumbullim të tyre në Prishtinë e quajnë “manifestim” – për Marrëveshjet e Asociacionit dhe Demarkacionit me Malin e Zi.
Pas gazit lotsjellës në Kuvend dhe pas përleshjeve me policinë rrugëve të Prishtinës, për ç’gjë kanë marrë kritika të ashpra nga faktori ndërkombëtar, liderët e VV’së, AAK’së dhe Nismës kanë premtuar se organizimi i tyre i sotëm do të jetë paqësor.
Visar Ymeri, Ramush Haradinaj dhe Fatmir Limaj konsiderojnë se Qeveria e Kosovës ka disa mundësi për dalje nga kjo situatë – të cilën ata e quajnë krizë, ndërsa partnerët e koalicionit qeverisës Hashim Thaçi dhe Isa Mustafa e vlerësojnë jo si krizë por si tentim të Opozitës për marrje të pushtetit me dhunë.
Sipas tyre, tërheqja e marrëveshjeve, referendumi, ose zgjedhjet e jashtëzakonshme, janë çelësi për kthim në normalitet. Të tri këto opsione janë hedhur poshtë nga Pozita.
Sot, të dyja palët, shënojnë të ndara Festën e 28 Nëntorit.
Po ashtu, në Shqipëri, edhe ky 28 Nëntor, siç raportojnë mediat shqiptare, e gjen sërish politikën shqiptare të ndarë mes Vlorës dhe Tiranës.
Presidenti Bujar Nishani dhe Kryeministri Edi Rama me anëtarët e kabinetit të tij qeveritar do të jenë sot në orën 10:00 në Sheshin e Flamurit në Vlorë në ceremoninë e përvitshme të ngritjes së flamurit dhe të festimeve për Ditën e Pavarësisë.
Opozita, ndërkaq, e cila feston më 28 Nëntor Pavarësinë edhe Ditën e Çlirimit, po në orën 10:00 do të zhvillojë homazhe në varrezat e “Dëshmorëve në Tiranë”. /Politiko.net
Kryetari i Prizrenit Ramadan Muja, ka uruar të gjithë qytetarët e Prizrenit, më rastin e 103 vjetorit të Pavarësisë së Shqipërisë.
“Urojmë që kjo festë e madhe kombëtare të festohet në çdo familje. Është rast i mirë që të reflektojmë të gjithë për rrugëtimin tonë kombëtar gjatë historisë, të jemi të gatshëm që të punojmë shumë, në realizimin e synimeve tona politike e kombëtare, në rrugën e integrimeve”, thuhet në urimin e Mujës./PrizrenPress.com/
Kryetari i Partisë Konservatore në Prizren Munir Basha ka uruar të gjithë qytetarët për Festën e Nëntorit.
“Me rastin e 28Nëntorit- Ditës së Flamurit dhe Pavarësisë së Shqipërisë, uroj nga zemra të gjithë Shqiptarët kudo që janë, festën më sublime dhe më të shënuar për gjithë Kombin”.
“Kjo datë e shënuar nuk simbolizon vetëm kurorëzimin e përpjekjeve tona për liri dhe pavarësi, por ajo është testament dhe udhërrëfyes në rrugëtimin tonë shekullor për realizimin e aspiratave tona kombëtare”.
Në këtë festë të madhe i kujtojmë me pietet dhe lutemi tek Zoti I Madhërishëm për shpirtrat e të gjithë atyre që sakrifikuan jetën e tyre për Shqipëri dhe shqiptari”.
“Zoti i bekoftë shqiptarët dhe Shqipërinë!/PrizrenPress.com/
Lidhja Demokratike e Kosovës(LDK) në Prizren, ka uruar qytetarët për festën e 28 Nëntorit.
“Dita e 28 Nëntorit është ngjarja më e shënuar dhe më e dashur në historinë moderne shqiptare, thuhet në urimin e LDK-së.
“Ky flamur plot krenari ka ditur t’i bashkojë shqiptarët në periudha edhe më të vështira përgjatë historisë herë- herë të dhimbshme 103 vjeçare”.
“ Historia na ka mësuar se ky popull nga Nëntori i Skënderbeut e deri më sot ka mundur t’i tejkaloi ndasitë dhe mosmarrëveshjet mes nesh për hir të interesit madhor kombëtar”.
“Andaj sot që jetojmë e gëzojmë lirinë e vendit tonë, duhet të jemi të përkushtuar që ta jetësojmë amanetin e dëshmorëve dhe të punojmë bashkërisht pa dallim për ardhmërinë më të mirë të fëmijëve tanë brenda kornizave të një shteti demokratik e sovran, siç e deshi edhe vet Presidenti historik Dr. Ibrahim Rugova dhe komandanti Adem Jashari”
“Dega e Lidhjes Demokratike të Kosovës në Prizren ju uron 28 Nëntorin të gjithë shqiptarëve anë e mbanë globit me porosinë për më shumë dashuri e unitet brenda shqiptar”./PrizrenPress.com/