Lëvizja Vetëvendosje! në Prizren, ka shprehur shqetësimin e thellë për ndërprerjen e masës së paraburgimit ndaj Drejtorit të Arsimit Nexhat Çoçaj.

“Një veprim i tillë i hap rrugë rrezikimit, shantazhimit dhe frikësimit të dëshmitarëve kryesor në këtë proces”, thuhet në reagimin e VV-së.

“ Gjithashtu, vendimin e Gjykatës së Apelit për lirimin e të akuzuarve nga paraburgimi e konsiderojmë si vendim të ndikuar drejtpërdrejtë nga qarqet e pushtetit, pasiqë të arrestuarit tashmë kanë kërcënuar qeverinë Muja se në rast të mos lirimit nga masat e sigurisë, do t’i publikojnë të gjitha aferat korruptive të qeverisjes lokale në Prizren”.

“Lëvizja VETËVENDOSJE! në Prizren konsideron se institucionet e drejtësisë po shkelin mbi misionin e vetë duke u vënë në dispozicion të kërkesave antiligjore dhe agjendave politike të pushtetit”.

“ Mirëmbajtja e një pushteti kriminal duke ia lehtësuar betejat me drejtësinë është thellësisht kontradiktore me qëllimin e drejtësisë. Prandaj, për çdo kanosje, shantazhim, rrezikim të dëshmitareve apo zhdukje dhe dëmtim eventual të dëshmive, përgjegjësia do të rëndojë drejtpërdrejtë mbi kolegjin e gjyqtarëve që e morën këtë vendim”./PrizrenPress.com/

Një kolegj penal i Gjykatës së Apelit të Kosovës ka aprovuar pjesërisht ankesat e mbrojtësve të të pandehurve N.Ç, R.E., E.SH., dhe F.K., duke e ndryshuar aktvendimin e Gjykatës Themelore në Prizren të datës 03 nëntor duke i ndërprerë paraburgimin Drejtorit të Arsimit në Komunën e Prizrenit, Nexhat Çoçajt.

Kolegji vendosi që të pandehurit Çoçaj t’i ndërpritet paraburgimi dhe e njëjta masë t’i zëvendësohet me atë të ndalimit për t’iu afruar vendit apo personit të caktuar, deri me 02.12.2015.

Vendim i njëjtë u mor edhe për personat e tjerë, të cilëve u ishte shqiptuar masa e arrestit shtëpiak.

Të gjithë këta po dyshohen nga ana e prokurorisë se në bashkëkryerje kanë kryer veprën penale: “Keqpërdorimi i pozitës apo autoritetit zyrtar” nga neni 422 par.1 dhe 2 nënpar.2.1 dhe 2.2 lidhur me nenin 31 të Kodit Penal të Republikës së Kosovës.

Sipas vlerësimit të Gjykatës së Apelit të Kosovës, del se ekziston dyshimi i bazuar se të pandehurit të lartcekur janë kryes të veprës penale për të cilën edhe dyshohen.

“Mirëpo nuk ekziston rreziku i ikjes, pasi që të pandehurit janë njerëz familjarë, kanë vendbanim të caktuar, jetë të rregullt të gjertanishme, janë shtetas të Republikës së Kosovës, ndërsa nuk kanë ndërmarrë asnjë veprim që do e bënte frikën “abstrakte” të prokurorit të bazuar për arratisjen e tyre”, thuhet në vendimin e ri të Gjykatës së Apelit të Kosovës

Po ashtu, Gjykata thotë se pretendimi se këto vepra penale kanë marrë hov në të gjitha poret e shoqërisë “nuk mund të jetë kusht për caktimin e paraburgimit”, ndërsa konstatimin e Gjykatës së shkallës së parë se kemi të bëjmë me recidivist të veprave penale, një vlerësim i tillë nuk është argumentuar dhe arsyetuar me prova bindëse.

“Megjithatë Gjykata e Apelit vlerëson së është i bazuar pretendimi i prokurorit të shtetit vetëm nga frika e bazuar se ata eventualisht mund të ndikojnë në të dëmtuar, dëshmitarë dhe bashkëpandehur dhe në këtë mënyrë mund të dëmtohet procesi gjyqësor që po zhvillohet ndaj tyre”, përfundon njoftimi për media i Gjykatës së Apelit

Kryetar i Odës Regjionale të Avokatëve në Prizren është zgjedhur Hajrip Krasniqi.

Krasniqi u votua nga 29 avokatë nga 45 sa ishin të pranishëm gjatë votimit.

Ai pati për kundërkandidate Bahrije Besimin që fitoi besimin e 15 avokatëve.

Besimi kontestoi zgjedhjen e Krasniqit, duke bërë të ditur se i zgjedhuri kryetar i Odës Regjionale mban edhe një pozitë tjetër.

Hajrip Krasniqi, është zgjedhur kryetar Degës Regjionale të Avokatëve ne Prizren.

“Hajrip Krasniqi për momentin është zëvendëskryetar i Odës së Avokatëve në nivel Kosove dhe konsideroj që është bërë një shkelje procedurale me guximin e tij që ia ka paraqitur kandidaturën degës rajonale këtu. Ai nuk do t’i realizojë dy postet, a do të ketë të drejtë ligjore t’i ketë dy poste, edhe si zëvendëskryetar i Odës së Avokatëve, edhe si kryetar i degës?” shtroi pyetjen Besimi.

Por Hajrip Krasniqi thotë se mbajtja e këtyre dy posteve nuk i kontestohet as me Ligjin mbi Avokatinë, por as me rregullore.

“Më 16 nëntor më skadon faktikisht posti i zëvendëskryetarit. Zgjedhjet që bëhen fillimisht në degët regjionale, pastaj do të pasojnë edhe zgjedhjet e Odës së Avokatëve të Republikës së Kosovës dhe që ligjërisht dhe me statut, me Ligjin mbi Avokatinë dhe rregulloren mbi punën e degëve regjionale, nuk kufizohet e drejta ime për kandidim,” tha Krasniqi.

Ai zgjedhjen në pozitën e kryetarit e lidhi me punën që ka bërë.

“Sot u rikonfirmua puna ime me vetë besimin që ma dhanë gjithë kolegët për këtë post të degës regjionale në Prizren,” tha Krasniqi.

Mbledhja ku u zgjodh kryetar Hajrip Krasniqi pati edhe debate në lidhje me çështje tjera.

Avokatët Rexhep Kabashi dhe Esat Gutaj thanë se mbledhja ka nisur mbrapsht, pasi kryesia e kaluar nuk ka dorëzuar ndonjë plan të punës së odës. Avokati Naim Qelaj kërkoi që votimi për kryetar të bëhet me vota të hapura, por një propozim i tillë nuk kaloi dhe u votua me vota të fshehura.

Dega Regjionale e Avokatëve në Prizren ka si anëtarë 62 avokatë./kallxo.com/

Tre persona janë përfshirë në një rrahje në fshatin Serbicë e Poshtme të Prizrenit.

“Janë arrestuar tre të dyshuar, dy meshkuj dhe një femër, pasi që të njëjtit pas një mosmarrëveshje familjare janë përleshur fizikisht në mes vete me ç’rast kanë pësuar lëndime trupore dhe të njëjtit kanë pranuar tretman mjekësor”,njofton Policia e Kosovës.

Me urdhër të prokurorit tre të dyshuarit janë dërguar në mbajtje. /PrizrenPress.com/