Policia e Kosovës ka dalë me versionin e vet të zhvillimit të ngjarjeve sot në dhe përreth Kuvendit.

Komunikata e plotë

Informacion i Policisë së Kosovës lidhur me veprimet policore te Kuvendi i Republikës së Kosovës

Ora: 16: 00
Policia e Kosovës, si institucion i zbatimit të ligjit, lidhur me seancën e Kuvendit të Republikës së Kosovës, si dhe bazuar në vendimin e mëhershëm të kryesisë së Kuvendit të Republikës së Kosovës, ka bërë planifikimet e nevojshme policore, duke ndërmarrë masat e nevojshme ligjore për ofrimin e sigurisë dhe ushtrimin e kontrollit, bazuar në procedurat e parapara ligjore dhe rregulloren e Kuvendit të Republikës së Kosovës.

Ende pa filluar seanca e Kuvendit të Kosovës e cila ishte e paralajmëruar të filloj në ora 16:00, në hapësirën e Kuvendit, në korridor pranë zyrës së Krye parlamentarit, nga një deputet është hedhur një mjet i dyshuar i cili dyshohet se është gaz lotsjellës.

Zyrtarët policor kanë arrit të identifikojnë deputetin që dyshohet për hedhjen e mjetit të dyshuar, dhe menjëherë kanë reaguar duke larguar mjetin e dyshuar nga ambienti i Kuvendit të Kosovës.

Po ashtu, pas hyrjes së deputetëve në sallën e Kuvendit të Kosovës, në momentin e përgatitjes së fillimit të seancës, përsëri nga një deputet është hedhur një mjet i dyshuar i cili po ashtu dyshohet se është gaz lotsjellës.

Ndërsa, sa i përket rrethanave dhe situatës së krijuar në sallën e Kuvendit të RKS-së, ku është hedhur mjeti i dyshuar, Policia e Kosovës në konsultim dhe koordinim me prokurorin kompetent në dy lokacionet do të ndërmarrë të gjitha veprimet e nevojshme ligjore për hetimin dhe verifikimin e mjetit të dyshuar.

Bazuar në kompetencat dhe autorizimet ligjore që ka Policia e Kosovës, janë kryer të gjitha veprimet ligjore të kontrollit, duke përfshirë edhe ndaj të gjitha personaliteteve dhe nuk është hasur në asnjë element apo mjet të dyshuar, mirëpo mbetet të verifikohen të gjitha elementet se si është futur mjeti i dyshuar brenda në Kuvend , sepse mjeti plastik mund të mos jetë detektuar.

Policia e Kosovës është duke ndërmarrë veprimet e saja hetimore drejt zbulimit se si është futur mjeti i dyshuar në sallën e Kuvendit të Kosovës, dhe kohën se kur ka mund të jetë futur ky mjet i dyshuar.
Njëkohësisht gjatë kohës së zhvillimeve brenda në Kuvendin e Kosovës, një grup prej rreth 150-200 personave kanë qëndruar jashtë rrethojave të Kuvendit duke protestuar, ku disa prej tyre kanë hedhur disa mjete piroteknike dhe boca me ngjyrë të përcjella me tym dhe zjarr.

Njësitet relevante policore kanë vepruar duke ndërmarrë masat e nevojshme policore, për parandalimin hedhjeve të tilla dhe për të ofruar siguri pranë objektit të Kuvendit të Republikës së Kosovës.

Më pastaj pas një kohe të qëndrimit para Kuvendit, protestuesit kanë filluar të shpërndahen dhe numri i protestuesve është zvogëluar gradualisht.

ORA 20:00

Ndërsa disa minuta para orës 20:00, në kohën kur pritej të ri-fillonte seanca e Kuvendit të Kosovës e cila ishte shtyrë për këtë kohë, protestuesit sërish janë kthyer para Kuvendit të Kosovës dhe të njëjtit kanë filluar të hedhin mjete të ndryshme drejt objektit të Kuvendit, duke përfshirë mjete piroteknike, fishekzjarre dhe boca me ngjyrë e tym, duke përfshirë edhe boca me zjarr.

Kurse në rrugën “Agim Ramadani” afër mensës së studenteve disa persona të dyshuar kanë vendosur në rrugë disa goma të automjeteve të cilat kanë tentuar të ju vejnë zjarrin me qëllim të bllokimit të tërësishëm të rrugës, mirëpo është bllokuar vetëm njëra korsi e rrugës.

Protestuesit të cilët kanë qenë para Kuvendit të Kosovës, kanë vazhduar me qëndrimin e tyre duke protestuar dhe në vazhdimësi duke hedhur mjete të ndryshme drejt objektit të Kuvendit të Kosovës, pasi që seanca e Kuvendit ishte shtyrë sërish.

Edhe në këtë rast njësitet relevante policore kanë vepruar duke ndërmarrë masat e nevojshme policore, ku me prezencën e tyre kanë parandaluar bllokimin e rrugës dhe djegien e gomave të cilat ishin të lyera me lëndë djegëse, dhe pas përfundimit të vend shikimit të vendit të ngjarjes nga njësitë policore ato janë larguar dhe qarkullimi i automjeteve ka filluar të lëviz pa pengesa.

Ora 23:30

Me vendim të Kryesisë së Kuvendit të Kosovës, bazuar në Rregulloren e Kuvendit të Kosovës është kërkuar hyrja e personelit të sigurimit në seancën e Kuvendit të Kosovës, të cilët konform autorizimeve ligjore kanë formuar kordon sigurie brenda në seancë.

Gjatë kohës sa seanca kishte filluar, jashtë objektit të Kuvendit protestuesit kishin filluar të shfaqin
dhunë duke hedhur mjete të ndryshme dhe koktej mollotovi drejt objektit të Kuvendit duke rrezikuar jetën e zyrtarëve policor dhe me këtë rast njësitet relevante policore janë detyruar të përdorin gaz lotsjellës për shpërndarje të turmës.

Vlen të potencohet se deri në këtë moment nuk ka ndonjë deputet të arrestuar e as të lënduar.

Policia e Kosovës të gjitha veprimet e mëtutjeshme do ti ndërmarrë konform autorizimeve ligjore, konform vlerësimit të situatës dhe konform vendimit të prokurorit kompetent, thotë raporti nga Policia.

Kryetari i Kuvendit të Kosovës, Kadri Veseli, nëpërmjet një postimi në Facebook ka kërkuar falje për fjalët e thëna sonte në seancën e Kuvendit.

Ai e ka fyer me fjalë banale deputeten Albulena Haxhiu pasi që kjo iu kishte drejtuar me fjalët “Ti je kriminel”. Veseli ia kishte kthyer “Ma hangsh…”.

“Në Seancën plenare të mbajtur sonte, në një moment gjatë përpjekjeve për të qetësuar situatën e krijuar jam shprehur në mënyrë joadekuate, shprehje me të cilën mund të preken nënat dhe motrat tona. Dëshiroj t’ju kërkoj falje atyre nga thellësia e zemrës, duke filluar nga nëna ime, bashkëshortja ime dhe të gjitha nënave dhe motrave të Kosovës sonë”, ka shkruar Veseli në Facebook.

Derisa kryetari i Kuvendit, Kadri Veseli po tentonte të udhëhiqte seancën e Kuvendit, përkatësisht në momentin që dha një pauzë, një deputete, me gjasë e opozitës i është drejtuar atij me “kriminel…”.

Si përgjigje, kryekuvendari Veseli ia ka kthyer asaj: “Ma hanksh…”.

Se për çfarë e kishte fjalën Veseli nuk mund të kuptohej sepse në atë moment edhe është ndalë mikrofonin.

“Largohu nga ai vend, së bashku me horrat e tu”, i ka thënë Ramush Haradinaj, Kadri Veselit.

(E plotësuar) Seanca e Kuvendit ndërpritet sërish, meqë opozita hodhi prapë gaz lotsjellës në sallën e Kuvendit.

Dyshohet se gazi u hodh nga deputeti i LVV-së, Albin Kurti, në kohën kur Kryeparalamentari Veseli ka nis seancën e Kuvendit. Ndërkaq, Donika Kadaj Bujupi thuhet t’ia ketë dhënë atë Kurtit.

Sigurimi hyn në Kuvend (Foto)

Sigurimi ka hyrë në seancën e Kuvendit për të siguruar kushtet për t’u mbajtur seanca.

Vendimin për të hyrë në sallën e Kuvendit e ka marr kryesia.

“Në kryesi sapo u morr vendimi që policia të futet brenda Kuvendit”, tha Dërguti.

Ajo tha se policia do të veproj pas çdo veprimi të opozitës.

Lideri i Lëvizjes Vetëvendosje, Visar Ymeri, ka shkruar një status në Facebook në lidhje me ngjarjet e ditës së sotme në Kuvendin e Kosovës.

“Koalicioni qeverisës e bojkotoi vazhdimin e seancës së caktuar në ora 20″.

“Tash po thonë që do të ketë seancë rreth orës 22”.

“Kjo është seancë e inatit, sepse nuk është as e rregullt e as e zakonshme. Cila na qenka ajo pikë kaq urgjente që po u dashka të diskutohet domosdoshmërisht sot, të premten, në mesnatë?”

“Ky koalicion nuk e qeverisë Kosovën, por e shpenzon atë gjatë ditës, ndërsa po synon ta cungojë atë natën”, ka shkruar Ymeri.

Shefi i grupit parlamentar të PDK-së, Adem Grabovci, ka deklaruar se seanca sipas tij patjetër do të mbahet dhe se deputetët e pozitës nuk do të largohen pa u mbajtur seanca.

“Seanca patjetër do të mbahet ashtu siç është e paraparë në rendin e ditës. Ne nuk dalim nga Kuvendi pa u mbajtur seanca”, ka precizuar Grabovci për Rrokum TV.

Ndryshe Grabovci kërkoi nga qytetarët që të shohin sipas tij veprimet e akterëve dhe të gjykojnë atë që po ndodh si shkak i opozitës.