Pas përpjekjes së dështuar të presidentes së vendit, për pajtim mes pozitës dhe opozitës në takimet që i mbajti në fillim të kësaj jave, ekspertët e fushës së sundimit të ligjit dhe të Kushtetutës, konsiderojnë se klasa politike në pushtet po sillet me një papërgjegjshmëri të madhe dhe shumë përjashtuese në raport me opozitën, për ruajtjen me çdo kusht të pushtetit të vet kriminal.

Profesori i së Drejtës, Muhamet Kelmendi ka adresuar fillimisht kritika në vetë mënyrën e përpjekjes për pajtim politik nga ana e presidentes , e cila, sipas tij, vetëm sa i ka kontribuar thellimit të dallimeve mes pozitës dhe opozitës, kurse roli i saj kushtetues ka rënë në provim.

“Presidentja nuk është e përcaktuar me Kushtetutë vetëm që t’i thërrasë palët dhe t’i dëgjojë ato, por është e thirrur që të japë alternativën dhe të arrihen kompromise të duhura në funksion të stabilizimit të vendit, dhe në drejtim të gjetjes së daljes nga ngërçi politik, në të cilin e kanë futur aktualisht Kosovën me sjelljet e tyre pozita dhe opozita. Po shihet se sjellja nga ana e Qeverisë ka të bëjë me një ngulfatje të plotë të sistemit politik dhe shoqëror, që është duke e bërë vetë Qeveria “Mustafa” me partnerin e koalicionit, Thaçin”, u shpreh Kelmendi. /Kosova Sot

Gjykata Themelore në Prishtinë gjatë ditës së premte pritet që ta lëshojë urdhrin për arrestimin e deputetëve të Lëvizjes “Vetëvendosje”, Albin Kurti e Albulena Haxhiu, pasi këta të fundit kanë refuzuar kërkesën e Prokurorisë për t’u intervistuar lidhur me hedhjen e gazit lotsjellës në Kuvendin e Kosovës.

Kryeprokurori i Prokurorisë Themelore në Prishtinë, Ymer Beka, ka konfirmuar për gazetën “Zëri” se deputetëve Albin Kurti e Albulena Haxhiu para disa ditësh u është dërguar thirrja për t’u marrë në pyetje nga Prokuroria dhe u është caktuar një afat ligjor se deri kur do të mundë të paraqiten tek organi i akuzës. Ky afat, sipas tij, ka qenë 22 tetori dhe deri në këtë datë asnjëri nga deputetët nuk janë paraqitur.

“Deri sot (e enjte) ka qenë afati i rregullt që e ka lejuar prokurorja e rastit Besa Limani. Pas mosparaqitjes së të dyshuarve, Prokuroria në bazë të ligjit, do t’i drejtohet gjykatës me kërkesën për lëshimin e urdhrit të arrestit për dy personat në fjalë”, ka bërë me dije Beka.

Prokuroria është duke zhvilluar hetime edhe ndaj një deputeti tjetër të kësaj Lëvizjeje “Vetëvendosje”, Faton Topalli, si dhe shefes së grupit parlamentar të Aleancës për Ardhmërinë e Kosovës, Donika Kadaj-Bujupi. Derisa Kurti e Haxhiu dyshohen për hedhjen e gazit lotsjellës në seancën e 8 tetorit, Kadaj-Bujupi e Topalli dyshohen për vepra të njëjta të paligjshme të kryera gjatë seancës së mbajtur më 15 tetor.

Sipas kryeprokurorit Beka, kërkesa për urdhërarrest do të bëhet, ndërsa mbetet në duar të gjykatës se kur do ta lëshojë urdhrin e arrestit. /Zëri

Kuvendi i Kosovës pritet sërish që sot të përballet me “betejën” e radhës së opozitarëve, të cilët me çfarëdo forme do ta pamundësojnë zhvillimin e punimeve të legjislativit, ku nuk përjashtohet mundësia e përdorimit të gazit lotsjellës dhe përleshjes në mes ligjvënësve.

Spektri politik opozitar që tashmë është bashkuar në një front të përbashkët nuk lëkundet nga qëndrimet e veta, për të bllokuar punën e Kuvendit.

Pavarësisht se janë dhënë sinjale se presidentja e vendit, Atifete Jahjaga, do ta dërgojë në Gjykatën Kushtetuese përmbajtjen e marrëveshjes për Asociacionin e Komunave Serbe, një nismë e tillë nuk pritet t’i zmbrapsë opozitën rreth zhbllokimit të punës së Kuvendit.

Opozita thonë se nuk u beson vendimeve të Gjykatës Kushtetuese dhe sipas këtij blloku, vetëm nëse tërhiqen marrëveshjet e arritura atëherë mund të vazhdojë puna në Kuvend.

Zyrtarë të “Vetëvendosjes” deklarojnë se iniciativa eventuale e presidentes Jahjaga për ta dërguar në Kushtetuese përmbajtjen e marrëveshjes për “Zajednicën”, siç e quajnë nuk do t’i tërheqë nga bllokada e punës së Parlamentit.

“Gjykata Kushtetuese është institucion i kapur nga pushteti. Ne nuk besojmë në kredibilitetin dhe legjitimitetin e këtij institucioni. Pranueshmërinë e lëndëve dhe vendimet e saj, kjo gjykatë i merr në bazë të interesave partiake të partive në pushtet e jo në bazë të Kushtetutës së vendit”, kanë thënë zyrtarë të kësaj partie. /Zëri