Në Ditën botërore të lirisë së shtypit, me 3 maj, Bashkimi Evropian i ka kujtuar të gjithë ata që kanë humbur jetën, janë burgosur dhe kanë vuajtur pasoja të padrejta për ushtrimin e së drejtës së lirisë dhe shprehjes.

Përmes një kumtese, BE ka vlerësuar se në shtetet demokratike, liria e shprehjes duhet të përfshijë idetë që mund të ofendojnë, tronditin ose trazojnë shtetin apo çfarëdo pjese të popullsisë, duke përfshirë ideologjitë, fenë si dhe satirën, duke mos përfshirë nxitjen publike të dhunës dhe urrejtjes.

“Sot po festojmë Ditën Botërore e Lirisë së Shtypit. Një medie e lirë, e shumëllojshme dhe e pavarur është esenciale në çdo shoqëri demokratike. Pa liri të shprehjes dhe liri të mediave, një qytetari e informuar, aktive dhe e angazhuar është e pamundur. BE-ja do të dëshironte t’i nderojë ata të cilët humbën jetën, u burgosën ose vuajtën pasoja të padrejta për ushtrimin e të drejtës së lirisë së shprehjes. Ne e ripohojmë përkushtimin tonë në promovimin dhe mbrojtjen e lirisë së shprehjes dhe lirisë së mediave në mbarë botën, ndërsa vazhdojmë të promovojmë sigurinë e gazetarëve dhe punëtorëve të tjerë të medieve”, thuhet në kumtesë.

Sipas BE-së, teknologjitë informative dhe komunikuese (TIK) tanimë janë pjesë e jetës së përditshme dhe sigurojnë mundësi të reja për përmbushjen e të drejtave të njeriut dhe për zhvillim shoqëror dhe ekonomik.

Qasja jodiskriminuese tek informacionet dhe lirinë e shprehjes, vlerëson BE se duhet të sigurohet dhe mbrohet për të gjithë individët, si online ashtu edhe offline.

“Interneti duhet të mbes një rrjet i vetëm, i pandarë, që i nënshtrohet ligjeve të njëjta dhe normave të aplikueshme në fusha të tjera në jetën tonë të përditshme ku individët mund të përfitojnë nga të drejtat e tyre dhe kompensimet gjyqësore kur këto të drejta shkelen. Këto parime janë njohur nga Konkluzat e Këshillit të BE-së mbi Qeverisjen e Internetit të 27 nëntorit 2015 dhe Konkluzat e Këshillit për Diplomacinë Kibernetike të 11 shkurtit 2015”, thuhet tutje në kumtesë.

BE-ja është shprehur edhe më tej e përkushtuar në fuqizimin e përpjekjeve ndërkombëtare që nxisin promovimin e lirisë së shprehjes dhe mirëpret mandatin për procedurat e reja të veçanta të Kombeve të Bashkuara mbi të drejtën e privatësisë.

Pas gati një viti kur Këshilli për Punë të Jashtme miratoi Udhëzimet e BE-së për të Drejtat e Njeriut mbi “lirinë e shprehjes online dhe offline,” BE-ja është e vendosur të vazhdojë të shfrytëzojë të gjithë instrumentet e jashtëm të duhur financiarë të BE-së për të mbrojtur dhe promovuar lirinë e mendimit dhe shprehjes dhe për të mbështetur lirinë e mediave dhe pluralizimin.

Sindikata e Bashkuar e Arsimit të Kosovës ka njoftuar mbrëmë se edhe sot do të vazhdojë greva nëpër shkolla.

Këshilli Qendror Grevist i SBASHK-ut pas raporteve të marra nga Këshillat Komunale greviste të SBASHK-ut dhe analizave të bëra nga ta dhe nga vet Këshilli Qendror Grevist ka konstatuar se edhe në llogaritjet që janë bërë sot dhe pagat që janë procesuar për të punësuarit në arsim ka shumë gabime në llogaritjen e përvojës së punës të mbi 90 përqind e të punësuarve ku iu mungojnë 7 vite të përvojës së punës si dhe nuk është bërë ndryshimi i pagesës për muajt janar,shkurt dhe mars të vitit 2015

“Për këto gabime të lëshuara edhe në këto lista te pagave të cilat u punuan dhe u procesuan sot deri në këtë moment që ne po lëshojmë këtë komunikatë nuk kemi informata as nga MASHT e as nga MF por as ndonjë prononcim publik pse kanë ndodhur këto gabime prandaj: Këshilli Qendror Grevist i përkrahur nga të gjitha Këshillat greviste Komunale dhe nga Këshilli grevist i Universitetit i njofton të gjithë punonjësit arsimor se greva e përgjithshme edhe nesër mbahet me të njëjtin orar sikurse edhe sot”, thuhet në komunikatën e sindikalistëve të arsimit.

Kjo e fundit i ka bërë thirrje Qeverisë që në afat optimal t’i përmbushin edhe këto lëshime që i kanë bërë në mënyrë që mos të humbet mësimi.

Një ditë më parë, Qeveria ka bërë të ditur se pagat e mësimdhënësve kanë dalë me rritje ndërsa, grevistët kanë thënë se nuk janë paguar në mënyrë retroaktive që nga fillimi i vitit.