Policia e Kosovës ka arrestuar tre persona, dy meshkuj dhe një femër shqiptare në Suharekë, pasi që për të njëjtit dyshohen se kanë kryer veprën kriminale ‘marrje me prostitucion’.

Policia bën të ditur se gjatë intervistimit të dyshuarit kanë pranuar se kanë kryer veprën kriminale.

Të njëjtit janë dërguar në gjykatën për kundërvajtje për procedurë të mëtejme. /PrizrenPress.com

Në fshatin Sallagrazhdë të Prizrenit ka ndodhur një aksident trafiku në mes të dy automjeteve me ngasës meshkuj.

Si pasojë e aksidentit lëndime trupore ka pësuar njëri nga ngasësit i cili pas marrjes së tretmanit mjekësor në spitalin e Prizrenit është liruar. /PrizrenPress.com

Sistemi i drejtësisë në Kosovë vijon të mbetet i përkeqësuar, duke bërë të pamundur kështu qasjen e qytetarëve në drejtësi. Prokuroria, gjykatat dhe policia ndikohen politikisht dhe i keqpërdorin detyrat, për të cilat janë të thirrur t’i kryejnë.

Problemet e akumuluara nën mandatin e UNMIK-ut, i cili i ngriti këto tre institucione, kanë mbetur të pandryshuara dhe të pazgjidhura edhe pas shpalljes së pavarësisë së Kosovës, por edhe pas vendosjes së misionit të EULEX–it, pasi ky i fundit tashmë ka treguar se ka dështuar.

Gjykatat janë shndërruar në institucione të pabesueshme me mijëra lëndë të grumbulluara ndër vite dhe të përcjella nga reputacion për favorizime dhe korrupsion. Ndërsa prokuroria një hap e hedh përpara dhe dy tre hapa të tjerë shkon prapa, pasi çështje të ndjeshme ku janë të përfshirë zyrtarë të lartë i fillon me bujë, por që në fund pajtohet me shuarjen e tyre. Që do të thotë se edhe për institucionin e prokurorisë jobesueshmëria mbetet e përhapur, ndërkohë që nuk mungojnë zëra për sabotim të punë së tyre nga oficerët hetues, për të cilët thuhet se kanë lidhje me politikën.

Sipas analistit Leon Duhanaj, Prokuroria e Shtetit, në qoftë se dëshiron dhe ka vullnetin për të bërë kthesa, të cilat nuk janë aspak të lehta, duhet që së pari të tregojë gatishmëri dhe guxim për hapa konkretë.

“Prokuroria e Shtetit duhet t’i ngre aktakuzat publikisht dhe nëse pushtetit vendor i mungon guximi apo gatishmëria për drejtësi atëherë kjo të kërkohet nga faktori ndërkombëtar”, ka thënë ai. /Kosova Sot

Deputeti i Lëvizjes Vetëvendosje, Rexhep Selimi ka një selam për kryeministrin e Kosovës, Isa Mustafa.

Selimi në një prononcim për RTV Dukagjinin ka thënë se shefi i qeverisë i ka vetëm dy rrugë, dorëheqjen ose tërheqjen e nënshkrimit nga marrëveshjet e fundit të arritura në Bruksel, përfshirë atë për “Zajednicën” dhe demarkacionin e kufirit me Malin e Zi.

Se a do të ketë protesta në vend, sipas Selimti është në dorën e vet kryeministrit Isa Mustafa.

Ai ka thënë se i vetmi njeri që mund të shmang protestat është kryeministri i Kosovës, Isa Mustafa duket se e ka zgjedhur se do të ketë protesta në këtë vend.

Ai ka paralajmëruar ballafaqim të fuqishëm të opozitës me pozitën të martën ne Kuvendin e Kosovës.

Rexhep Selimi, ish-komandat i UÇK ka thënë se Lëvizja Vetëvendosje nuk dëshiron që të vijë në pushtet me dhunë, siç pretendohet nga shumica por që VV dëshiron që përmes votës të marrë timonin e ekzekutivit. /Telegrafi

Pretendimet e të dyshuarit Bernard Përlazri, se e ka vrarë Hekuran Morinën dhe ka plagosur vëllain e tij Fadil Morinën në vetëmbrojtje, janë hedhur poshtë nga një dëshmitar i cili e ka parë nga afër tërë ngjarjen.

Bernard Përlazri që gjendet në arrati prej ditës kur në qendër të Prizrenit kishte vrarë Hekuran Morinën e plagosur rëndë vëllain e tij Fadil Morinën, në një intervistë për Gazetën Express para disa ditësh, kishte pohuar se vrasjen e kishte kryer në vetëmbrojtje duke treguar se ishin familja Morina, që sipas tij, kishin tentuar të shtinin në drejtim të Përlazrit dhe shoqëruesve që ishin në veturë.

RTV Dukagjini ka siguruar një video – dëshmi ekskluzive në të cilën dëshmitari në kushte anonimiteti rrëfen në detaje ngjarjen, ku një person mbeti i vrarë dhe disa të tjerë u plagosen, për shkak të fajdeve.

Në këtë video, dëshmitari tregon se si dorasi dhe viktima ishin duke ecur me veturat e tyre ballëpërballë. Ka qenë Përlazri me disa shoqërues ai që e ka ndalur veturën duke i dalë përpara Hekuran Morinës, dhe ka nxjerrë revolen duke shtënë në ta. Fillimisht, sipas dëshmitarit, ka pasur të shara.

Dëshmitari ka përshkruar në detaje edhe llojet e veturave, duke e përshkruar krejt çfarë ka parë si në filmat aksion.

Vrasje që ka tmerruar jo vetëm Prizrenin, pretendohet se ka ndodhur pasi që i dyshuari Bernard Perlazri pretendonte se babai i tashmë viktimës, Hekuran Morina, i kishte marrë 70 mijë euro me fajde për t`i kthyer në afat prej gjashtë muajsh. Kjo ishte mohuar nga familjarët e Morinës.

Përlazri, pak ditë para se të kryente aktin ishte liruar nga paraburigimi ku kishte qëndruar afër katër muaj.

Protesta nga familjarët e Hekuran Morinës, në kërkim të drejtësisë, drejtori I policisë në Prizren i suspenduar bashkë me shefin e hetimeve, kanë qenë epilogu pas skenave të tmerrshme që kishin ndodhur në qendër të Prizrenit.

Vrasja për fajde në Prizren është ngritur si çështje edhe në Kuvendin e Kosovës nga deputet që vijnë nga ky qytet. /RTV Dukagjini-Telegrafi/

https://youtu.be/_eMTsC51jtk