Gjykata Speciale për krime lufte në Kosovë do të vendoset në Holandë. Kjo është konfirmuar nga ambasadori i Holandës në Kosovë Robert Bosch.

Në një intervistë për RTV 21 ai bëri të ditur se kjo ishte kërkesë drejtuar Holandës dhe kjo e fundit dha përgjigje pozitive. Bosch parashikon se Gjykata Speciale nuk do të mund të bëhet para verës së vitit të ardhshëm.

“Gjykata Speciale mund të formohet vetëm nëse bëhen ndryshimet kushtetuese në vend sepse për të pasur një Gjykatë dhe për ta mbajtur atë në një vend tjetër përkatësisht në Gjykatën Ndërkombëtare Holandeze pasi në këtë moment ju nuk mund të bëni një Gjykatë në një shtet tjetër. Unë nuk pres që formimi i kësaj Gjykate të arrihet shumë shpejt”, ka deklaruar ai.

Zyrtarët e Lidhjes Demokratike, e ata të Partisë Demokratike, vazhdojnë me shpreh qëndrime të ndryshme për postin e kryeministrit.

Por, burime të besueshme të Televizionit Rrokum mbrenda grupeve punuese për ndamjen e resoreve ministrish dhe planin qeverisës, thonë se nuk asht definitive posti i kryeministrit.

Simbas këtij burimi, pozita e të parit të qeverisë po diskutohet, dhe marrëveshja edhe në grupet punuese, dhe se marrëveshja për këtë nuk asht arritë.

Gjithnji simbas këtij burimi, nëse kryeministër ka me qenë kryetari i Lidhjes Demokratike, Isa Mustafa, atëherë PDK ka me i drejtue 8 ministri, ndërsa LDK 7.

Ndërsa katër ministri, asht vendos me iu lanë në drejtim partive minoritare.

Por, në rast PDK nuk lëshon pe, dhe vazhdon me insistue që Hashim Thaçi me mbet kryeministër, atëherë, ai ka me drejtue qëverinë edhe për dy vjetët e ardhshme, derisa presidentes aktuale, Atifete Jahjagës t’i kaloj mandati.

Pastaj në 2016, Thaçi, kandidon për postin e Presidentit, ndërsa në karrigen e kryeministrit vendos Isa Mustafa, apo Lutfi Haziri.

Televizioni Rrokum ka sigurue edhe disa nga emnat e mundshëm për ministra, të cilët janë diskutue në takimin e fundit të grupit punues.

Disa prej ministrave t’ardhshëm të qeverisjes PDK-LDK, janë Bardhy Meta – Ministër i Zhvillimit Ekonomik, Sadri Ferati -Ministër i Punës dhe Mirëqenies Sociale, Valon Murtezaj, Ministër i Punëve të Jashtme, Skender Hyseni – Ministër për Integrime Europiane.

Grupi punues ka mbet me vendos ndërmjet dy emnave për Ministër të Shëndetësisë Bekim Haxhiu dhe Bajram Rexhepi.

Blerand Stavileci ka gjasë me mbetë si Ministër i Bujqësisë, apo me u emnue ministër i Administratës Publike.

Memli Krasniqi, aktualisht ministër i kulturës, ka mundësi me drejtue ministrinë aktuale, megjithëse, Ministria e Kulturës, asht njana nga 4 ministritë që mundet me iu lanë partive të minoriteteve.

Agim Çeku ka me vazhdue me mbetë Ministër i Forcës së Sigurisë.

Ndërsa Ministrinë e Arsimit PDK po synon me ia besue Ferid Aganit, kryetar i Partisë së Drejtësisë.

Grupet punuese, kanë me u mbledh edhe të Hanën, me diskutu për resoret e tjera ministrore.

Televizioni Rrokum, po ashtu ka mësue se seanca për përmbylljen e konstituimit të Kuvendit nuk ka me u mbajt deri në fund të javës që vjen, përkatësisht deri në ndamjen e tanë resoreve ministrore.

Ka shumë gjëra në marrëveshjen për qeverisje në mes të LDK-së dhe PDK-së që Naser Rugovës nuk po i pëlqejnë. Por anëtari i LDK-së thotë se kjo nuk e anashkalon faktin e madh se për herë të parë që nga viti 2001, LDK merr përsipër udhëheqjen e Qeverisë së Kosovës.

“Nuk janë të paktë ata që kritikojnë LDK-në dhe akuzojnë për “tradhti” e të ngjashme, por po të njëjtit nuk duhet të harrojnë se në çdo rast të mundshëm kanë bashkëpunuar me të tjerë kundër LDK-së. Shembujt e garës për Prishtinën dhe qytete të tjera janë shumë të freskëta për t’u injoruar. Po të njëjtit po ashtu nuk duhet të harrojnë se LDK nuk mund të jetë parti që pranon të nënshtrohet pas apetiteve të mëdha të partive të vogla”, ka thënë Rugova.

Sipas tij LDK e meriton që të sprovohet në udhëheqjen e vendit, pikërisht për atë se, në emër të stabilitetit, vazhdimisht ka bërë sakrifica në dëm të vetes.

“Koalicioni me PDK-në ngrit shumë pikëpyetje dhe për këtë, gjatë procesit zgjedhor që na pret brenda LDK-së, duhet të reflektojë anëtarësia jonë dhe vetëm ajo. Liderët e partive të tjera nuk kanë asnjë të drejtë që të deklarohen për anëtarësinë e LDK-së. Formimi i qeverisë në asnjë mënyrë nuk i amniston të gjithë ata që janë përgjegjës për rezultatet jo të kënaqshme me 8 Qershor”, ka thënë Rugova.

Rugova thotë se në LDK janë të vetëdijshëm se partneri i tyre, PDK, është dikush që shquhet për mungesë korrektësie.

“Por kjo vetëm sa na nxit të jemi më vigjilentë dhe të vëmendshëm”, thotë Rugova.

Rugova kujton se vazhdimisht ka kërkuar që LDK të marrë jo vetëm postin e Kryeministrit, por edhe përgjegjësinë për udhëheqjen e vendit.

“Kjo shumicë parlamentare , ku sigurohet një shumicë dërmuese shqiptare në Kuvendin e Kosovës, që nuk mund të shantazhohet nga numrat e listës SRSPKA, ka shumë sfida përpara vetes dhe shumë përgjegjësi ndaj të ardhmes së vendit tonë. Kemi përgjegjësi të ruajmë raportet me miqtë tanë dhe të mbrojmë autoritetin dhe kredibilitetin e shtetit. Sot është rasti ynë për të dëshmuar veten”, ka thënë Rugova, teksa ka porositur kolegët e tij të partisë se para se të merren me shpërthime emocionale duhet të mendojnë për atë se të tjerët janë në gjah për anëtarësinë e LDK-së, por, në të njëjtën kohë, nuk i pranojnë vlerat tona.

“LDK është lokomotivë. Kjo fjali gjithnjë ishte sllogani im dhe tani LDK ka rastin të dëshmojë veten. Kemi mësuar shumë nga e kaluara dhe nëse edhe kësaj here nuk dimë të mbrojmë vlerat tona, të realizojmë premtimet që i kemi dhënë elektoratit dhe të çojmë përpara vendin tonë, atëherë nuk besoj se do të kemi rast tjetër. Po e përsëris edhe njëherë. Kam shumë dilema për këtë koalicion, por në të njëjtën kohë kam shumë besim se, të gjithë ne në LDK, më në fund jemi mbushur mend dhe do të dimë të mbrojmë si parimet tona ashtu edhe interesin e vendit”, ka thënë Rugova.

Kryetari i AAK-së, Ramush Haradinaj, ka reaguar ndaj pohimeve të kreut të Vetëvendosjes, Albin Kurti. Ky i fundit ka thënë se PDK-ja nuk e pranoi ofrimin e Ramush Haradinajt dhe të AAK-së në fillim të kësaj jave dhe kësisoj e refuzoi për së dyti, duke e pasur për qëllim jo vetëm përdorimin e Haradinajt për shkatërrimin e LAN-it por edhe poshtërimin e Haradinajt e të AAK-së.

“Kryetari i Vetëvendosjes, Albin Kurti, por edhe kolegët e tjerë e dinë shumë mirë se këtij koalicioni i kam shërbyer me besnikëri prej ditës së parë deri në të fundit. U kam shërbyer të gjithëve e ndoshta më së shumti Vetëvendosjes. Është për keqardhje që për pak vota më shumë të shkelni mbi çdo parim. Ne jemi parti e djathtë dhe sigurt kurrë nuk do të jemi të majtë, por të paktën në situata të tilla është më mirë të mendoni përtej koncepteve denigruese dhe aq më parë kur na pret një punë e përbashkët në ndaljen e ‘kapjes së shtetit’”, ka shkruar Ramush Haradinaj në reagimin e tij.

Bashkimin e dy fuqive partiake më të mëdha në vend, nuk e kanë mirëpritur analistët politikë në Kosovë.

Tradhtia që u është bërë partive të Bllokut nga lideri i LDK-së, Isa Mustafa, nuk arsyetohet, sipas analistëve, raporton KTV.

Halil Matoshi e Petrit Zogaj, pohojnë se ky koalicion pos që është i çuditshëm, ai është edhe i dëmshëm.

Sipas Petrit Zogajt, ekziston një tendencë për zbehje të koalicionit nga zërat e pakënaqur në partinë e Isa Mustafës. E analisti Halil Matoshi, beson se zërat e pakënaqur në LDK do të vazhdojnë të rriten.

Pas pesë muajsh të ngërçit politik, liderët e PDK-së Hashim Thaçi dhe ai i LDK-së, Isa Mustafa, vendosën që të lidhin një koalicion për bashkëqeverisje, ku në të ardhmen pritet të përfshihen edhe pakicat.

Tashti pritet që të dyja partitë partnere të hartojnë edhe programin qeverisës dhe të kërkojnë nga Kuvendi votat për formimin e Qeverisë.

Deri tashti ende zyrtarisht nuk është njoftuar se kush do të jetë udhëheqës i Qeverisë. Derisa LDK-ja insiston që kryeministër të jetë Isa Mustafa, në PDK thonë se grupet punuese do të vendosin gjatë ditëve në vazhdim.

Sekretari i Lëvizjes Vetëvendosje, Dardan Molliqaj ka fajësuar edhe liderin e AAK-së, Ramush Haradinaj për mos heqje dorë të kryeministrit.

Ai në një prononcim për Zëri, ka thënë se insistimi i dy liderëve për postin e kryeministrit ka qenë gabim në të dyja anët.

“Mendoj që insistimi i dy liderëve për postin e kryeministrit ka qenë gabim në të dyja anët dhe po mendoj që ka pas interesa të dyja anëve. Nuk jam i sigurt se nëse t’i jepej mundësia Isa Mustafës për postin e kryeministrit do të ndalte për të shkuar te PDK”, ka thënë Molliqaj.

Sipas tij, Ramush Haradinaj do të duhej të jepte shembull dhe të hiqte dorë nga ky pozicion.

“Mendoj se Haradinaj do të duhet të jepte shembull dhe të hiqte dorë nga ky pozicion edhe nëse kjo vetëm do të dëshmonte që Isa Mustafa ka pas gjithsesi të jetë me PDK ”, ka thënë Molliqaj.

Molliqaj tha se ky vendim nuk ka qenë një shembull jo i mirë i dy liderëve.

Lideri i Lëvizjes Vetëvendosje, Albin Kurti, gjatë një tubimi me qytetarë në Viti, ka nxjerrë detaje nga takimet me liderët e LAN-it. Ai ka thënë se, gjatë takimeve të krerëve të LAN-it, Fatmir Limajn u pati treguar se Thaçi është njeri sadist, “pra ai kënaqet duke i parë të tjerët teksa vuajnë”. Por sipas Kurtit, “përderisa Thaçi qenka sadist, i bie që Isa Mustafa me gatishmërinë për nënshtrim është mazohist”.

Kurti, deri dje partner me Isa Mustafën, e akuzon këtë të fundit për tradhëti ndaj Bllokut, për çështje postesh dhe për t’u mbrojtur nga dosjet, të cilat ja ka dërguar në prokurori Komuna e Prishtinës, e drejtuar nga Vetëvendosje.

Në një tubim me qytetarë në Viti, Kurti ka thënë se, koalicioni LAN është prishur për çështje postesh, ndërsa ujdia e Mustafës me Thaçin është ndrequr për çështje dosjesh.

“Për pesë muaj rresht asnjërin prej 63 deputetëve që kishin formuar shumicën parlamentare as nuk i frikësoi e as nuk i bleu dot PDK-ja, por kreu i LDK-së Isa Mustafa u shit te Hashim Thaçi. Të shënojë autogol nga penaltia mund të bëjë vetëm një njeri i talentuar për dobësi si Isa Mustafa”, ka thënë Kurti, transmeton lajmi.net.

Kurti tha që Mustafa bëri ujdi e jo marrëveshje sepse ai nuk bëri negociata para marrëveshjes, por qeveria u nda përgjysmë si plaçkë pas nënshtrimit ndaj Thaçit.

“Kjo shpejtësi e ujdisë vjen nga ato 70 lëndë në prokurori të krimit ekonomik e urbanistik të komunës së Prishtinës kur atje ishte kryetar Isa Mustafa e të cilat ambasadorja amerikane Jacobson ia futi në frigorifer për ngrirje të cekët. Dy ditë pasi që Ambasadorja amerikane iu tha krerëve të LAN-it që edhe ju jeni të korruptuar andaj s’keni pse të distancoheni nga Thaçi, ajo shkoi te u.d. i kryeprokurorit të Kosovës, Sylë Hoxha, i cili është po ashtu i kapur: në njërën anë e mbajnë peng në pozitën e ushtruesit të detyrës e, në anën tjetër, vëllau i tij, Elez Hoxha, është në burg për korrupsion i dënuar me katër vjet pasi që si gjykatës ka marrë ryshfet”, ka thënë lideri i Vetëvendosjes.

Kurti tha se tani Shtetet e Bashkuara të Amerikës, po e dëmtojnë Kosovën.

“Shtetet e Bashkuara të Amerikës na kanë ndihmuar shumë në kohë lufte për çlirim por tash Ambasada Amerikane nuk po e ndihmon Kosovën në kohë paqe për zhvillim dhe demokratizim. Përkundrazi”.

Sipas Kurtit, PDK e ka poshtëruar Haradinajn dhe AAK-në.

“PDK-ja nuk e pranoi ofrimin e Ramush Haradinajt dhe të AAK-së në fillim të kësaj jave dhe kësisoj e refuzoi për së dyti atë duke e pasur për qëllim jo vetëm përdorimin e Haradinajt për shkatërrimin e LAN-it por edhe poshtërimin e Haradinajt e të AAK-së”.