Kryetari i Komunës së Malishevës, Ragip Begaj, ka pritur sot një delegacion nga Qendra e Rehabilitimit “Handikos” në Malishevë.

Kjo vizitë e Handikos, është bërë në kuadër të shënimit të Ditës Ndërkombëtare për Personat me Aftësi të Kufizuara dhe me këtë rast, ky delegacion i Handikos-it, e ka falënderuar kryetarin Begaj për mbështetje.

“Ne si komunë, jemi përpjekur gjithmonë që brenda mundësive buxhetore, t’ju ofrojmë mbështetje dhe të krijojmë kushte më të mira për qendrën e rehabilitimit, por kufizimet buxhetore, po na kufizojnë edhe neve si komunë, që ndoshta edhe të mos ju përkrahim sa duhet”, tha Begaj.

Ndërsa menaxherja e Qendrës së Rehabilitimit “Handikos” në Malishevë, znj.Feride Hoxha, e falënderoi kryetarin Begaj, për mbështetjen e vazhdueshme. “Ne ju falënderojmë për përkrahjen që na jepni dhe falë kësaj ne po përpiqemi t’ju ofrojmë shërbimet e nevojshme personave me aftësi të kufizuara”, tha Hoxha.

Në këtë datë, menaxherja e Handikos-it në Malishevë, shfrytëzoi rastin të shpreh pakënaqësinë e saj, për moskrijimin e kushteve në disa institucione, për qasje në objekte, për rreth 70 persona nga Malisheva, të cilët lëvizin me karrocë. /PrizrenPress.com/

Vendimi i miratuar nga KK i Prizrenit për shkëmbim të pronës komunale me atë të personit juridik “K-Group” nga përfaqësuesit e opozitës cilësohet si konflikt i interesi i nënkryetarit të Komunës, Lulzim Kabashi, si dhe përmbushje e pazareve politike që janë bërë në mes të PDK-së dhe AAK-së, si partnerë të koalicionit në nivel lokal.

Mirëpo, nënkryetari i Komunës, Kabashi, këto pretendime i ka quajtur shpifje dhe ka kërkuar nga opozitarët që paraprakisht ta lexojnë legjislacionin dhe të grumbullojnë informatat relevante para se ta akuzojnë dikë për shkelje të dispozitave ligjore.

Këshilltari i lëvizjes “Vetëvendosje”, Artan Abrashi, ka theksuar se shkëmbimi i pronës nuk është bërë për interes publik, ngase në prapavijë qëndrojnë motivet biznesore, ku është i përfshirë nënkryetari i Komunës, Lulzim Kabashi./Koha Ditore/

Edhe pse zyrtarisht dy partnerët e koalicionit nuk kanë konfirmuar ndarjen e përgjegjësive për bashkëqeverisje, megjithatë thuhet se Thaçi e Mustafa tashmë i kane ndarë ministrite, shkruan Zëri.

Marrëveshja për ndarjen e dikastereve qeveritare që ishte paralajmëruar se do të nënshkruhet në fillim të kësaj jave në mes të dy partnerëve të koalicionit PDK- LDK-së është shtyrë edhe disa ditë tjera për shkak të mungesës së liderit të PDK-së, Hashim Thaçi, i cili ka udhëtuar të marten drejt Neë York-ut për të marrë pjesë në mbledhjen e Këshillit të Sigurimit të OKB-së.

Presidentja Atifete Jahjaga ka mandat kushtetues deri në vitin 2016. Kjo është përgjigja që Zyra e Presidentes ka dhënë në lidhje me përfshirjen eventuale të postit të presidentit në marrëveshjen për ndarjen e pushtetit ndërmjet Partisë Demokratike të Kosovës dhe Lidhjes Demokratike të Kosovës.

“Bazuar në Kushtetutën e Republikës së Kosovës dhe në vendimin e Gjykatës Kushtetuese (korrik 2012) mandati i Presidentes së Republikës së Kosovës, zonjës Atifete Jahjaga, është 5 vjeçar dhe rrjedhimisht përfundon në vitin 2016?, ka thënë Arbër Vllahiu, këshilltar dhe zëdhënës i presidentes së vendit.

Nënshkrimi i deklaratës parimore ndërmjet Hashim Thaçit dhe Isa Mustafës për bashkëqeverisje në mandatin e ardhshëm u bë në prani të presidentes Jahjaga dhe ambasadores amerikane në Prishtinë, Tracey Jacobson. Por, prania e Jahjagës dhe Jacobsonit nuk është paraqitur qoftë nga forma e garantueseve apo bashkëpjesëmarrjes në marrëveshje. /Tribuna/

Mundësia për mbajtjen e zgjedhjeve të reja ende nuk është evituar.Marrëveshja e arritur në mes PDK-së dhe LDK-së për bashkëqeverisje, sado që teorikisht e ka shmangur këtë opsion, në kuptimin praktik e ka lënë të hapur atë.

Kjo për faktin se ende nuk dihet se si do të akomodohet shefi i PDK-së, Hashim Thaçi.

Në rast se ai nuk e siguron ardhjen në krye të shtetit, atëherë, e gjithë marrëveshja mund të bie poshtë.

Të paktën këto janë vlerësimet e njohësve të rrethanave politike në vend, sipas të cilëve për shkuarjen në zgjedhje të reja duhet të ketë një pajtim si nga ana e vendorëve edhe e faktorit ndërkombëtarë. /Tribuna/

Parlamentarët evropian, edhe ata nga Parlamenti Evropian, por edhe kolegët nga asambletë e vendeve anëtare, kanë mbështetur vazhdimin e procesit të zgjerimit të BE-së me vendet e Ballkanit Perëndimor gjatë një debati dyditësh të organizuar në Komisionin e politikës së jashtme të Parlamentit Evropian, shkruan sot Koha Ditore.

Ditën e dytë të debatit kanë folur edhe gjashtë ministra të jashtëm të vendeve të Ballkanit Perëndimor, përfshirë edhe ministrin e Kosovës, Enver Hoxhaj.

“Normalizimi i raporteve është larg nga momenti kur mund ta quajmë si punë të kryer. Prioritetet në dialog do të jenë këto – së pari përmbushja e të gjitha marrëveshjeve pa i rinegocijuar ato, së dyti, shpërbërja e të gjitha strukturave paralele, së treti, integrimi i serbëve të Kosovës në institucionet e shtetit, së katërti prania e Kosovës në nismat rajonale dhe ndërkombëtarë, përfshirë edhe në OKB, dhe së pesti njohja e ndërsjellë. Për ne është i rëndësishëm arritja e një Traktati të Paqes” tha ministri i jashtëm në largim Enver Hoxhaj.

Sipas tij, arritja e normalizimit të raporteve mes Kosovës dhe Serbisë përmes një “dokumenti obligues ligjor” do të duhej të jetë njohje e ndërsjellë.

“Në 3 deri 5 vjet të adresojmë të gjitha çështjet e hapura. Nuk jemi të interesuar të ekspoperojmë Kosovën në BE, por ta sjellim BE-në në Kosovë, ta europianizojmë Kosovën” tha ai.

AAK-ja ka vendosur që të mos e mbështesë më dialogun me Serbinë. Ka paralajmëruar edhe tërheqjen nga ekipi dialogues kosovar.

Ky subjekt politik që drejtohet nga Ramush Haradinaj, ndonëse në opozitë, gjatë gjithë mandatit të shkuar qeveritar e kishte mbështetur procesin e ndërmjetësuar nga Bashkimi Evropian. Madje nënkryetari i AAK-së, Blerim Shala, kishte pranuar të ishte koordinator i ekipit kosovar. Tash ai pritet të tërhiqet.

“Aleanca do të jetë opozitë dhe nuk merr pjesë në bisedime”, ka thënë të martën deputetja e AAK-së, Donika Kadaj-Bujupi, kur është pyetur për Shalën. “Në Parlament ekzistojnë votat e mjaftueshme në këtë konstelacion politik dhe është në përgjegjësi të tyre dialogu, por edhe të gjitha proceset e tjera”, ka shtuar ajo, në një prononcim për “Kohën Ditore”.

Qeveria e drejtuar nga PDK-ja ka drejtuar procesin dialogues me Serbinë. Ajo nuk kishte shumicën e kualifikuar në Kuvend, pra dy të tretat e të gjithë deputetëve, të nevojshme për të ratifikuar marrëveshjet që mbërriheshin. Por edhe me ndërhyrjen e faktorit ndërkombëtar PDK-ja arriti ta siguronte mbështetjen për dialogun edhe nga partia tjetër opozitare, LDK-ja

Astrit Haraqija thotë se kryetari siç e quan ai “në detyrë” i LDK’së, Isa Mustafa, kurrë nuk mund të bëhet një lider si Ibrahim Rugova. Ai ka thënë se në situatën e fundit, fitimtar është Thaçi i cili ka “luajtur një lojë” me të gjitha partitë. Por ai thotë se Vetëvendosjen e ka themeluar Hashim Thaçi dhe Kadri Veseli.

“Kadri Veseli dhe Hashim Thaçi e kanë themeluar Vetëvendosjen e Albin Kurtit. Kjo do të kuptohet.

“Udhëheja e LDK’së, ka dashtë që për teke të z. Mustafa që ka dashur të jetë diku, e kanë prishur një kontratë. LDK e presidentit Rugova ka qenë të ndërtojë shtet dhe institucione. Nuk mund të bëhet lider Isa Mustafa si Ibrahim Rugova sepse kojpa është dështim”, ka thënë Haraqija.

“Kadri Veseli dhe Hashim Thaçi e kanë themeluar Vetëvendosjen e Albin Kurtit. Kjo do të kuptohet.
Haraqija: Sali Berisha nuk lejoi që autostrada “Ibrahim Rugova” të njihej me këtë emër deri në Tiranë

Haraqija ka thënë se ai ka kërkuar që autostrada “Ibrahim Rugova” të quhej me këtë emër deri në Tiranë, por këtë nuk e ka lejuar Sali Berisha.

“Kam kërkuar që komplet autostrada të thirret autostrada “Ibrahim Rugova”.Z. Berisha nuk ka lejuar që autostrada të quhet “Ibrahim Rugova” deri në Tiranë”, ka thënë ai.

Haraqija në emisionin “Interaktiv” të KTV’sëm ka folur edhe për rastin e Ukë Rugovës, duke thënë se ai nuk e ka emëruar ambasadorin italian në Kosovë dhe se në shtëpinë e tij nuk është gjetur asnjë pasaportë e dikujt të huaj.

“Ukë Rugova akuzohet për keqpërdorim të detyrës zyrtare. Ukë Rugova nuk e ka emëru ambasadorin italian në Kosovë. Ukë Rugovës nuk iu kanë zënë pasaporta të dikujt në shtëpi”, ka thënë Haraqija.

Astrit Haraqija ‘dekoron’ gazetarin Xhemajl Rexha

Astrit Haraqija ka dekoruar gazetarin Xhemajl Rexha, për kontributin në gazetarinë kosovare.

Në intervistën e drejtpërdrejtë në “Interaktiv” të KTV’së, Haraqija ia dhuroi Rexhës një dekoratë me vulën e Dardanisë.

“Për hirë të festës, nuk është korrupsion, deri në 100 dollarë kam pasur dëshirë ta sjellë vulën e Dardanisë, për hirë të kontributit që keni dhënë për gazetarinë kosovare”, tha Haraqija derisa ia dorëzoi Rexhës dekoratën.

Kryetari i Partisë Demokratike të Kosovës, Hashim Thaçi nuk po mund të pajtohet në asnjë formë që ai të mbetet pa asnjë post të rëndësishëm qeverisës. Burime brenda PDK-së i kanë thënë Gazetës Blic se Hashim Thaçi qëllimisht e ka shtyrë marrëveshjen me Lidhjen Demokratike të Kosovës deri pas kthimit nga New Yorku.

Sipas këtyre burimeve, Hashim Thaçi po shpreson që gjatë vizitës në New York të loboj tek zyrtarë të lartë amerikan, në mënyrë që të ndikojnë tek Jahjaga, që kjo e fundit të jap dorëheqjen dhe kreu i PDK-së të vij në krye të shtetit.

“Thaçi gjatë kësaj vizite do të ketë takime edhe me zyrtarë të lartë amerikan. Në ato takime ai do të mundohet që të loboj që të vij në vend të Jahjagës, pra në krye të shtetit. Kjo ka qenë edhe arsyeja kryesore se përse nuk u nënshkrua marrëveshja me LDK-në para vizitës që do ta ketë në New York”, ka thënë ky burim brenda PDK-së.

Thaçi ka udhëtuar në mëngjes për në Neë York për të marrë pjesë në mbledhjen e Këshillit të Sigurimit të OKB-së, ku do të flitet edhe për Kosovën.

Nesër ndërkaq, bëhen saktësisht dy javë që prej se është nënshkruar marrëveshja ndërmjet Isa Mustafës e Hashim Thaçit për bashkëqeverisje, mirëpo ende nuk janë precizuar postet se kush çka do të ketë.

Për dallim nga zyrtarë të LDK-së, që në vazhdimësi po deklarojnë se atyre u takon posti i kryeministrit, nga PDK askush deri më tani nuk e ka thënë as edhe një fjalë për postin e kryeministrit.

Madje, zyrtarisht deklarojnë se ende nuk është ndarë as edhe një post i vetëm.

Hiq më pak se njeriu i dytë i PDK-së, Hajredin Kuçi i ka thënë Gazetës Blic se ende nuk është ndarë as edhe një post i vetëm, përfshirë edhe atë të kryeministrit.

Mirëpo, në anën tjetër, lideri i LDK-së, Isa Mustafa ka kërcënuar PDK-në duke thënë se nëse ai nuk do të bëhet kryeministër, LDK përfundimisht do ta prish koalicionin me partinë e Hashim Thaçit.

Kosova më 8 dhjetor i bën saktësisht 6 muaj që kur janë mbajtur zgjedhjet e parakohshme parlamentare dhe ende nuk ka arritur që t’i formoj institucionet./Gazeta Blic/