PDK dhe Blloku Opozitar LDK-AAK-Nisma, bashkë me Vetëvendosjen dhe partitë tjera parlamentare, do të ballafaqojnë sot në Gjykatën Kushtetuese argumentet e tyre lidhur me seancën konstituive të 17 korrikut, në të cilën Isa Mustafa u zgjodh Kryeparlamentar, ndërsa PDK e kontestoi menjëherë atë.

Seanca dëgjimore është thirrur nga Kushtetuesja, bazuar në kërkesën e PDK’së lidhur me kushtetutshmërinë e zgjedhjes së Kryeparlamentarit.
PDK do të përfaqësohet nga Arsim Bajrami, LDK-AAK-Nisma nga Vjosa Osmani, ndërsa Vetëvendosje nga Albulena Haxhiu dhe Armend Shkoza.
Njohës të çështje juridike kanë pohuar se pas kësaj seance dëgjimore, Gjykata Kushtetuese nuk do të duhej të vonohej më shumë se 2-3 ditë për ta bërë publik vendimin e saj lidhur me këtë çështje.

Vendimi i Kushtetueses pritet ta zhbllokojë ngërçin politik në të cilin ka hyrë vendi, që prej mbajtjes së zgjedhjeve të përgjithshme më 8 qershor.

Informacionet e publikuara në media për dekonspirimin dhe vrasjen e një bashkëpunëtori të Agjencisë Kosovare të Inteligjencës në luftën e Sirisë, mbesin ende të pa konfirmuara nga institucionet kosovare. Të mërkurën askush nga mekanizmat shtetërorë nuk ka reaguar përkitazi me raportimet për një rast të tillë.

Gazeta Tribuna ka bërë përpjekje që të kontaktojë me kreun e Agjencisë Kosovare të Inteligjencës (AKI), Bashkim Smakaj, po kontakti më të ka qenë i pamundur. Ndërsa ministri në largim i Punëve të Brendshme, Bajram Rexhepi, ka thënë se nuk ka informacione sa i përket dekonspirimit dhe vrasjes së bashkëpunëtorit të Agjencisë Kosovare të Inteligjencës.

“Nuk jemi në dijeni dhe kjo nuk është punë e jona. Agjencia Kosovare e Inteligjencës është agjenci e pavarur. Nuk është kompetencë e imja. AKI-ja i përgjigjet Kuvendit dhe jo Ministrisë së Punëve të Brendshme”, ka thënë Rexhepi../tribuna/

Betejës kushtetuese për postin e kryetarit të Kuvendit po i vjen fundi. Sot, para trupit të gjyqtarëve të Gjykatës Kushtetuese, përfaqësuesit e PDK-së në njërën anë dhe ata të bllokut LDK, AAK dhe Nisma në anën tjetër pritet t’i ballafaqojnë argumentet e tyre në lidhje me zgjedhjen e Isa Mustafës në seancën e 17 korrikut në postin e kryetarit të Kuvendit.

PDK pretendon se Mustafa ishte zgjedhur në mënyrë antikushtetuese në postin e kryekuvendarit, kurse blloku i treshes LDK, AAK dhe Nisma të kundërtën. Ashtu siç kanë paralajmëruar palët, në krye të ekipit të PDK-së para Kushtetueses do të jetë deputeti Arsim Bajrami, kurse ekipin e bllokut LDK, AAK dhe Nisma do ta kryesojë deputetja Vjosa Osmani.

Seanca dëgjimore pritet të jetë vetëm një nga zhvillimet mbi bazën e të cilave Kushtetuesja më pas do ta marrë vendimin. Sipas procedurave, paneli i gjyqtarëve do t’i dëgjojë argumentet e të dy palëve dhe më pas do të mblidhet për të vendosur. Ndonëse afati ligjor për marrjen e vendimit nga Kushtetuesja rrjedh deri më 18 shtator, pritjet janë që konkluzioni të merret nëse jo të enjten, të paktën këtë të premte./tribuna/

Se Gjykata Kushtetuese po paraqitet si institucion i cili mund të prodhojë kriza, ky më nuk përbën lajm.

Me një vend vakant në këtë gjykatë dhe me një gjyqtar të përjashtuar nga rastet politike, kjo gjykatë ka rrezikuar aq shumë sa fatin e institucioneve të Kosovës e ka lenë në dorë të shëndetit të gjyqtarëve.

Për analistin Albert Krasniqi nga KIPRED-i, kjo situatë nuk është e mirë, por sipas tij, gjykatës nuk i duhen gjyqtarë të cilët nuk mund të gjykojnë në të gjitha rastet. Këta gjyqtarë, sipas tij, duhet zëvendësuar me gjyqtarë të tjerë menjëherë pasi të fillojë punën legjislativi.

“Tani në këtë moment nuk është mirë të rrezikohet që në mungese të një prej anëtarëve gjykata të mos mund të marrë vendime.

Në këtë formë është rrezikuar funksionaliteti i plotë i Gjykatës Kushtetuese. Kam frikë që këto raste munden edhe me ndikuar kinse gjykata po tregohet që është e paanshme dhe personat e tillë i gjykon, në mënyrë që vendimi që do ta marrë për çështjen e kryeparlamentarit të mos lë hapësirë për dyshime se ka qenë i njëanshëm ose jo”, ka thënë Krasniqi./tribuna/

Dastid Pallaska, njohës i sistemit të drejtësisë ka thënë se Gjykata Kushtetuese vendimet i merr në bazë të argumenteve të shkruara dhe se seanca e nesërme vetëm sa ka zgjatur procesin e kësaj lënde.

“Organizimi i kësaj seance është një prej faktorëve që kanë ndikuar në zgjatjen e procedurës së shqyrtimit të kësaj lënde, për arsye se organizimi i një seance të tillë dëgjimore kërkon kohë. Në këtë seancë dëgjimore nuk do të marrin pjesë vetëm parashtruesi i kërkesës dhe pala tjetër, por të gjitha partitë. Në fakt unë mendoj se gjykatorja e Gjykatës Kushtetuese është tejet e ngushtë për të akomoduar të gjitha palët që do të kenë nesër të drejtë të paraqiten para Gjykatës Kushtetuese”, ka thënë Pallaska për RTK.

Por a pritet t’i jap zgjidhje përgjigjja e Kushtetutës situatës së krijuar në vend, Pallaska thotë se vendimi i Kushtetueses është shumë i rëndësishëm, por nuk ka dashur të paragjykoj se cili mund të jetë vendimi i saj.

Lëvizja Vetëvendosje ka me mbetë e paluhatshme prej qëndrimeve e kërkesave të veta.

Nëse blloku e donë bashkëqeverisjen me Vetëvendosjen, atëherë duhet me u thënë po kërkesave e kushteve që i ka vënë Lëvizja e Kurtit.

Kështu ka thanë në nji intervistë për televizionin Rrokum, Shpend Ahmeti, ish nënkryetari i Vetëvendosjes, njëherit kryetari i komunës së Prishtinës.

Ahmeti, duke fol për këmbënguljen e Vetëvendosjes me marrë timonin e bisedimeve me Serbinë, ka arsyetu këtë qëndrim.

Simbas Ahmetit, Vetëvendosje ka sakrifikue dhe rrezikon të ketë rënie në vota qysh kur lëshoj pe dhe nisi negociatat për koalicion me bllokun.

Por, përkrahja e Vetëvendosjes nuk ka me mungu , nëse blloku e krijon Qeverinë, edhe nëse Lëvizja e Kurtit ka me mbetë në opozitë.

Kjo përkrhaje, thotë Ahmeti ka me u dhënë veç për çështjet e rëndësishme dhe me interes nacional.

Por, edhe nëse pranon bashkëqeverisjen, Vetëvendosje, nuk garanton përkrahje absolute.

Sa i përketë emnimeve të drejtorëve në Komunën e Prishtinës, nga qytetet tjera, i pari i kryeqytetit Ahmeti, e ka quejt të ligjshëm vendimin e tij.

Ahmeti përseri ka premtu se mbrenda 3 vjetëve Prishtina ka me u furnizue me ujë 24 orë.

Sipas tij, në fund të këtij mandati kanë me u vrejt ndryshime në të gjitha fushat