Shefi i Zyrës së Greqisë në Kosovë, Dimitris Moskopullos ka thënë se vendimi i shtetit grek për të pranuar vizat e Shëngenit në pasaportat e Kosovës është një vendim që shënon për dy hapa tutje lëvizjen e Greqisë nga pozicioni i saj karshi Kosovës në raport me vizat. Ai në një intervistë për Radio Kosovën ka thënë se për shkak të problemeve me ndryshimet në sistemin grek si dhe të tërë vendeve anëtare të Shengenit nuk do të mund të lëshohen viza në pasaportë nga data 20 mars, siç ishte planifikuar.
Moskopullos ka thënë se nuk ka ende udhëzime se çfarë do të ndodhë me vizat valide që kanë qytetarët kosovarë në pasaportat e tyre ku shkruan minus Greqia. Por, ka qartësuar se me këto viza nuk mund të hyhet aktualisht në Greqi. Gjithashtu ai nuk e ka bërë të qartësuar nëse viza greke në pasaportën kosovare do të jetë e vlefshme vetëm për Greqi apo edhe për të tëra vendet e Shengenit.
Radio Kosova: Z. Dimitris Moskopullos: Qeveria greke ka vendosur që të lëshoj vizat Shengen në pasaportën e Kosovës. Ju lutem a mund të na sqaroni se çfarë përmban vendimi?
Moscopulis: Vendimi është që prej tani vizat greke që deri më tani janë lëshuar në mënyrë të ndarë, jo në pasaporta të kosovarëve ato do të fillojnë të lëshohen në faqe të pasaportës së Kosovës. Kjo do të bëhet në pasaportat e rregullta, të zakonshme të qytetarëve dhe në pasaportat diplomatike. Pra siç dihet deri më tani ne kemi lëshuar viza në një letër që ka vlejtur vetëm për shtetin greke që ka qenë si rezultat i mosnjohjes së pasaportës së Kosovës. Tani vizat Shengen do të lëshohen direkt në pasaportë.
Kur do të ndodhë kjo? Ne kemi si datë të fiksuar datën 20 mars, nëse gjithçka do të jetë në rregull me përgatitjet teknike. Megjithatë duket që ne nuk do të jemi krejt gati të fillojmë të lëshojmë viza në këtë datë, për shkak që kjo përbën një ndërmarrje të madhe të përgatitjeve teknike. Për shkak, se kjo kërkon ndryshime gjenerale në sistemin tonë të lëshimit të vizave, por edhe në sistemin e të gjitha vendeve anëtare të Shengenit. Për këtë arsye kam frikë që nuk do të jemi gati të fillojmë tamam në këtë datë. Pra kjo kërkon një procedurë goxha të ngatërruar që duhet ndjekur, për t’i risistemuar ndryshimet.
Radio Kosova: Çfarë do të ndodhë me vizat që kanë marrë tashmë kosovarët qoftë nga shteti grek qoftë nga vendet tjera ku shkuar p.sh minus Spanja , Greqia dhe Qipro?
Moskopullos: Kjo është një çështje shumë e rëndësishme që duhet t’a qartësojmë. Vizat që kanë aktualisht në pasaportat e tyre qytetarët e Kosovës, ku shkruan minus Spanja, Greqia apo Qipro janë valide sidomos për ato vende nga të cilat janë lëshuar. Në sistemin e ri nuk do të jetë më minus GR që do të thotë nuk vlen për Greqi. Por çfarë do të ndodhë tutje me këto viza që kanë aktualisht kosovarë ne nuk e dimë ende, ngase nuk kemi marrë ende udhëtime të plota se si do t’u qasemi atyre. Për të qartësuar dhe për të vendosur tutje rreth kësaj çështje do të zhvillohet konsulta të mëtejshme në mes të Greqisë dhe autoriteteve tjera të vendeve anëtare të Shengenit. Pra ato do të vendosin nëse do t’i lënë edhe më tej valide vizat aktuale që janë të lëshuara me sqarimet minus Greqia apo do t’i bëjnë të pavlefshme ato me të dhënat që më nuk do të jenë të përfshira.
Ndoshta do të ketë ndonjë marrëveshje rreth kësaj mes Greqisë dhe vendeve të tjera.
Çfarë dua të them tani për të parandaluar keqkuptimet apo keqinterpretimet është se qytetarët që do të ia mësyjnë kufirit grek me viza që shkruajnë se nuk janë valide për Greqi ata nuk do të mund të hyjnë aktualisht në Greqi.
Radio Kosova : Çfarë impakti mendoni që do të ketë ky vendim i Greqisë tek vendet tjera që nuk i kanë njohur pasaportat e Kosovës dhe po vështirësojnë lëvizjen e lirë?
Moscopulis : Së pari çdo vend vendos për vete rreth vizave dhe pasaportave. Tashmë Sllovakia ka vendosur të njëjtën gjë më herët me pasaportat e zakonshme (jo ato diplomatike). Ndërsa vendimi ynë shkon dy hapa tutje pra ne i njohim pasaportat dhe lëshojmë viza në të gjitha llojet e pasaportave për kosovarët. Ky është një zotim që Qeveria greke e ka kristalizuar. Ne nuk e dimë çfarë saktësisht do të thotë kjo për vendet tjera që nuk e kanë bërë ende këtë. Por ky është vendimi ynë që mendoj që do të kontribuoj pozitivisht në lëvizjen e lirë . Sa i përket vendeve ë tjera ne nuk mund të ua diktojmë se çfarë duhet të bëjnë.
Radio Kosova:Ju thatë se keni bërë dy hapa tutje çfarë do të thotë kjo në raportet mes të dyja vendeve?
Moscopulos: Çfarë dëshiroj të them është se ne po punojmë që t’ua bëjmë më të lehtë njerëzve lëvizjen dhe mundësinë për të parë të dyja vendet. Për të pasur mundësi që të rrisin kontaktet e njerëzve, të mundësojmë tregtinë e lirë dhe të përmirësojmë veprimet e përbashkëta. Ky mendoj që është një hap tejet i rëndësishëm për të bërë gjërat më të lehta për njerëzit dhe vendet . Aktualisht mund të ketë vështirësi derisa gjërat të vijnë në vend dhe të qartësohen, por ne i lusim qytetarët e Kosovës që të mos hezitojnë të kontaktojnë autoritete tona sepse ne do jemi në shërbim të tyre në çdo kohë. Mendoj që këto vështirësi do të harrohen shpejt ngase shumë shpejt qytetarët e Kosovës do të kenë mundësi të lëvizin shumë lirshëm për në Greqi.
Partitë opozitare në Prizren janë bashkuar për të kërkuar dorëheqjen e kryetarit të Komunës, Ramadan Muja. LDK, BD, LVV dhe PK, kanë paralajmëruar se nesër do të marrin pjesë në protestën kundër Mujës. Protesta mbahet në ora 12:00 në “Shatërvan”.
