Ka ndërruar jetë dr. Gani Demolli, themeluesi i shërbimit shëndetësor “Nënë Tereza”. Ai vdiq të martën, pas një sëmundje të shkurtër, por të rëndë.
Humanisti Gani Demolli, gjatë viteve të rënda të pushtimit serb u kishte ndihmuar shumë njerëzve që t’i mundnin sëmundjet.
Për punën e vështirësitë, por edhe ngadhënjimin e përkushtimit të tij human, ai la dy libra.
Varrimi i tij do të bëhet sot, në orën 15:00 në varrezat e qytetit të Prishtinës.
Sot në mëngjes, deri sa po pinte kafe në një lokal pranë “Shtëpisë së Bardhë” – Kuvendit Komunal në Prizren, u arrestua asambleisti i Lëvizjes Vetëvendosje! Artan Abrashi. Ai po pinte kafe me një nga qytetarët aktivë të Prizrenit, të cilët po kërkojnë dorëheqjen e Ramadan Mujës, pas dënimit të këtij të fundit nga Gjykata. Kjo edhe supozohet që është arsyeja e arrestimit.
“Një arrestim i tillë nga ana e policisë, është puro politik. Artan Abrashi si asambleist, ka të drejtë të hyjë e të dalë në të gjitha objektet e Komunës së Prizrenit, ka të drejtë të rrijë e të pijë kafe afër këtyre objekteve, ka të drejtë të takojë qytetarët e Prizrenit dhe është e drejtë e besa edhe obligim moral, qytetar e intelektual i tij që ta luftojë politikisht Ramadan Mujën dhe të ngjashëm si ai. Arrestimi apo kidnapimi, thënë më mirë, i tij, tregon se si Hashim Thaçi e ka shndërruar Policinë e Kosovës, në polici politike, në mbrojtjen e pushtetit të tij dhe hajdutëve të tij, të shpërndarë nëpër Kosovë”, thuhet në njoftimin e VV-së.
Për më tepër, Policia e Kosovës arrestoi edhe aktivistët Selman Sokoli, Shpend Zyba, Drilon Zyba, Bujar Muçaj, Avni Dakaj, si dhe asambleistin e Lëvizjes Vetëvendosje! në Therandë, Leonard Shala, të cilët u solidarizuan me qytetarë e Prizrenit në bllokimin e hyrjes së Komunës.
Lëvizja Vetëvendosje! proteston ashpër kundër kësaj sjellje të Policisë dhe kërkon lirimin e menjëhershëm të të gjithë të arrestuarve. Në burg duhet të shkojë Ramadan Muja dhe vartësit e tij e jo qytetarë dhe aktivistë të Lëvizjes Vetëvendosje!
Instituti Kosovar për Kërkime dhe Zhvillime të Politikave (KIPRED) ka reaguar ndaj arrestimit të protestuesve në Prizren, të cilët kërkonin dorëheqjen e kryetarit të Komunës së Prizrenit, Ramadan Muja.
“Sot, para fillimit të protestës së paralajmëruar në hyrje të objektit të Kuvendit Komunal në Prizren, ende pa filluar asnjë aktivitet, janë arrestuar Kastriot Jahaj nga KIPRED, Lirim Krasniqi iniciatorë i protestës së djeshme dhe Artan Abrashi aktivist i Lëvizjes Vetëvendosje. Policia ka arrestuar personat në fjalë, të cilët dje në mënyrë paqësore dhe pa provokime kishin protestuar para Kuvendit Komunal në Prizren duke kërkuar dorëheqjen e kryetarit të Komunës së Prizrenit, Ramadan Muja i cili është dënuar me dy vjet burgim me kusht që ai të mos kryejë vepra të tjera penale gjatë tre vjetëve të ardhshëm. Arrestimi posaçërisht i një mënyre të tillë është e papranueshme, është akt jodemokratik, cenim i drejtpërdrejt i lirisë individuale dhe i asociimit si një e drejtë e garantuar kushtetuese”, thuhet në reagim.
Sipas KIPRED, sjellja e tillë e organeve shtetërore është indikator i instalimit të diktaturës policore në Kosovë. Ky institut e dënon, siç thotë, “këtë akt joligjor që është thellësisht akt jodemokratik në kundërshtim me të drejtat elementare të njeriut, këtë politizim të policisë dhe ndërhyrje politike në drejtësi”.
“Kërkojmë lirimin e menjëhershëm dhe të pakushtëzuar të Kastriot Jahaj dhe të arrestuarve të tjerë dhe marrjen e menjëhershme të masave nga Inspektorati i Policisë së Kosovës për këtë akt të paprecedent kundër lirisë individuale”.
Ndaj arrestimit ka reaguar edhe Dega e Lidhjes Demokratike të Kosovës në Prizren që përmes një komunikate thotë se është e shqetësuar për arrestimet që iu bënë protestuesve nga ana e Policisë së Kosovës.
“LDK-ja i konsideron arrestimet si goditje kundër vlerave te lirisë, demokracisë, dhe atak ndaj vlerave të qytetarisë prizrenase. LDK-ja në Prizren kërkon me ngulm lirimin sa ma pare të të gjithë protestuesve paqësorë”.
Lidhja Demokratike e Kosovës (LDK) në Prizren ka reaguar kundër arrestimeve të protestuesve.
“Dega e Lidhjes Demokratike të Kosovës, në Prizren është e shqetësuar për arrestimet që iu bënë sot protestuesve nga ana e Policisë së Kosovës. LDK-ja i konsideron arrestimet si goditje kundër vlerave te lirisë, demokracisë, dhe atak ndaj vlerave të qytetarisë prizrenase”,thuhet në reagimin e LDK-së.
“LDK-ja në Prizren kërkon me ngulm lirimin sa ma pare të të gjithë protestuesve paqësor”
“Lidhja Demokratike e Kosovës, iu bene thirrje te gjithë anëtarëve dhe simpatizantëve, që më 19.03.2014(e mërkure), të dalim te sheshi “Shatërvan” nga ora 12:00, dhe te protestojmë ne mënyrë paqësore , kundër regjimit kleptokrat që është instaluar ne Komunën e Prizrenit”
“Edhe një here e bëjmë të qartë qëndrimin tonë si LDK, se i dënuari nga Gjykata, Ramada Muja duhet të jap dorëheqje sa më parë”./PrizrenPress.com/
?Festivali i nëntë ndërkombëtar i muzikantëve të rinj “DAM Festival 2014″ do të hapet më 29 mars në Prishtinë dhe do të zgjasë deri më 8 prill. Ky festival, sivjet pritet të ofrojë një program të pasur muzikor, ku veprat e tyre do t”i interpretojnë artistë nga vendet e ndryshme të botës.
Kjo ngjarje kulturore tradicionale, për 11 ditë rresht do të sjellë për publikun kosovar nëntë koncerte, të cilat do të mbahen në Sallën e Kuqe të Pallatit të Rinisë, Teatrin Oda, Teatrin Kombëtar dhe Bibliotekën Kombëtare të Kosovës.
Në këtë edicion do të prezantohen artistë nga Kosova, Maqedonia, Shqipëria, Japonia, Franca, Turqia, Gjermania, Kroacia dhe SHBA-të.
Mbrëmë në Prizren ka ndodhur një grabitje në barnatoren “City Pharm”, e cila gjendet në rrugën “Rifat Ukimeri”, njofton Policia në Prizren.
Sipas raporteve hetimore thuhet se i dyshuari i moshës rreth 20-25 vjeç, pasi kishte hyrë në barnatore ka kanos punëtoren me mjet të mprehtë (thikë) dhe nga arka ka grabitur rreth 300 euro para e më pas ka ikur në drejtim të panjohur.
Pas informimit të policisë janë kryer veprime operative për kapjen e autorit por pa sukses. /PrizrenPress.com/
(E plotësuar) Është shtuar numri i protestuesve të arrestuar para “Shtëpisë së Bardhë”. Zëdhënësi i PK-së, Hazir Berisha tha se arrestimi i tyre është bërë pasi policia u ka dhënë ultimatum që të shpërndahen. “ Deri më tash janë arrestuar nëntë protestues”,konfirmoi Berisha për “PrizrenPress”.
Ai tha se tre të arrestuarit e parë të mëngjesit janë marrë nga policia për shkak veprimeve që kanë bërë dje gjatë protestave.
“Ata janë futuar që të paraqiten në polici, mirëpo nuk iu janë përgjigjur ftesës”, tha Berisha. Ndërkaq, pas arrestimit të aktivistëve janë shpërndarë edhe qytetarët që ishin mbledhur para ” Shtëpisë së Bardhë” ./PrizrenPress.com/
Arrestohen sërish protestuesit kundër Mujës
Protestuesit aktiv “Për Prizrenin” nuk kanë arritur sot të bllokojnë hyrjen e “Shtëpisë së Bardhë”. Ata janë arrestuar nga policia ende pa i koordinuar veprimet dhe bllokuar hyrjen. Të arrestuarit janë: Kastriot Jahaj, Lirim Krasniqi dhe asambleisti i VV-së, Artan Abrashi.
Protestuesit kanë kërkuar edhe një herë dorëheqjen e kryetarit Ramadan Muja. Ata kanë paralajmëruar se përkundër arrestimeve, protestat kundër Mujës nuk do të ndalën.
Protestë gjithëpopullore edhe parlajmëruar edhe për të mërkurën në ora 12:00 në “Shatërvan”. /PrizrenPress.com/
Takimi i radhës ndërmjet kryeministrit të Kosovës dhe atij të Serbisë pritet të mbahet pas konsolidimit të institucioneve të reja në Serbi.
Bekim Çollaku, këshilltar politik i kryeministrit, Hashim Thaçi tha se nuk është me rëndësi për Kosovën, se kush është fitues i zgjedhjeve në Serbi, transmeton rtk. Sipas tij, pavarësisht përbërjes të re të Qeverisë, procesi i dialogut vazhdon të jetë kusht për Serbinë.
Studentet kosovarë të cilët janë të interesuar për studime në Universitetin e Sheffieldit, do të kenë mundësinë e përfitimit të këtyre bursave.
Kjo fal nënshkrimit të marrëveshjes së bashkëpunimit i cili do të bëhet sot nga Ministri i Arsimit, Shkencës dhe Teknologjisë, Ramë Buja dhe Ioannis Ververidis, rektor i Fakultetit Ndërkombëtar të Universitetit të Sheffieldit – City College.
Kjo marrëveshje do të nënshkruhet në ambientet e MAShT.
Universiteti i Prishtinës “Hasan Prishtina”, ende nuk ka nxjerrë rezultatet e fituesve të bursave për këtë vit akademik. Ndërkohë, konkursi për ndarjen e bursave ka qenë i hapur për të aplikuar nga 20 dhjetori i vitit të kaluar deri më 15 janar të këtij viti, por ende studentët nuk kanë marrë përgjigje. Vonesat për ndarjen e bursave janë bërë për shkak të vakuumit institucional. Nga rektorati thonë se gjatë kësaj jave do të vihen në vi të gjitha punët e lëna përgjysmë.
Studentët të cilët kanë aplikuar për të përfituar bursa për vitin akademik 2013-2014, ende nuk kanë marrë përgjigje se kush janë përfituesit. Ata janë ankuar disa herë, por ende nuk e dinë se kur mund të shpallen rezultatet.
“Jam studente e Fakultetit të Edukimit. Kam aplikuar për bursë në fillim të këtij viti, mirëpo ende nuk kemi marrë ndonjë përgjigje adekuate nga krerët e fakultetit”, thotë një studente.
Nënkryetari i Parlamentit të Studentëve, Besart Morina, tha për Radio Kosovën, se në takimin që kanë zhvilluar me ushtruesin e detyrës së rektorit, kanë kërkuar që të përshpejtohet procedura e bursave për studentët. Ai arsyetoi se është zgjatur ky proces, për shkak të problemeve të fundit që ndodhën në Universitetin e Prishtinës.
“Në ditën që është emëruar ushtruesi i detyrës, në takimin e parë kemi kërkuar që sa më shpejt të formohet komisioni i cili të bëjë përgatitjen e duhura sa më shpejt, në mënyrë që të dalë rezultati i studentëve bursistë. UP, siç e dinë të gjithë pat hyrë në krizë institucionale dhe nuk ka pasur mundësi që të shqyrtohen aplikacionet.”
Ndërkohë, këshilltari për media në rektoratin e Universitetit të Prishtinës, Ardian Gola, tha për Radio Kosovën, se tashmë prorektorët kanë filluar punën e tyre dhe pritet që gjatë kësaj jave të vihen në vi të gjitha punët e lëna për gjysmë, pasi dihen edhe arsyet e vonesave. Universitetit të Prishtinës, në bazë të vendimit të Këshillit Drejtues, të datës 20 dhjetor 2013, ka shpallur konkurs për ndarjen e bursave universitare për vitin akademik 2013/2014, të cilat ndahet për studentët e studimeve bachelor dhe master. Studentët të cilët do të përzgjidhen nga komisioni do të përfitojnë nga 900 euro bursa për këtë vit akademik.