Kryetari i Komunës së Prizrenit, Ramadan Muja,ka uruar të gjithë qytetarët, me rastin e Vitit të Ri.

“Qeveria komunale gjatë vitit 2014, do të jetë e përkushtuar, që në bashkëpunim të ngushtë me qytetarin, ta vazhdojë rrugën e realizimit të projekteve të nisura për Prizrenin Evropian”.

“Komuna e Prizrenit do ketë në fokus të saj zhvillimin ekonomik, duke i fuqizuar politikat e biznesit privat, me synim hapjen e vendeve të reja të punës”.

“Viti i Ri 2014, uroj që të përmbushë të gjitha pritjet tuaja qytetarë të respektuar”./PrizrenPress.com/

Objekti afaristë “TEA” në Prizren është  djegur  mbrëm nga zjarri. Zëdhënësi i PK-së, Hazir Berisha tha se zjarri në këtë objekt afaristë ka shpërthyer rreth orës 18:25 minuta  në rrugën “Jusuf Gërvalla”.

“Me datën 29 dhjetor, rreth orës 18:25 minuta, policia e Prizrenit është informuar se në rrugën “Jusuf Gërvalla” ka shpërthyer një zjarr i madh i cili ka për fshirë objektin afarist (salloni i dasmave dhe restoranti veror) e “TE-A ” .

“Dy Njësi  të Zjarrfikësve kanë lokalizuar zjarrin. Policia e përkrahur nga hetues rajonal dhe krim teknika kanë kryer procedurat hetimore në vendin e ngjarjes. Përpos dëmit material i cili thuhet të jetë rreth 150 000 euro të lënduar nuk ka pasur”. /PrizrenPress.com/

Kryetari i LDK-së, Isa Mustafa konsideron se viti 2013 për Kosovën është karakterizuar me një dinamizëm në shumë fusha.

“Viti 2013 u karakterizua me një dinamizëm të veçantë në shumë fusha. Situata ekonomike në vend erdhi duke u keqësuar ndërkaq problemet sociale gjithnjë e më shumë preokupuan qytetarët. Të gjitha këto, si dhe funksionimi i dobët i shtetit mbeti nën hijen e dialogut me Serbinë në Bruksel. Ky vit përfundoi me zgjedhjet lokale, në të cilat LDK-ja doli fituese në shumë komuna të rëndësishme dhe arriti të rreshtohet si parti prijëse me votat e fituara nga qytetarët”, ka thënë Mustafa për Bota sot.

Mustafa ka thënë se do të punojë me përkushtimin më të madh që LDK t’i fitojë zgjedhjet nacionale, të cilat do të mbahen vitin e ardhshëm.

“LDK është parti e vlerave, e cila në radhët e saj ka anëtarë dhe ekspertë me dije dhe ekspertizë nga fusha të ndryshme. Me njerëz të tillë jam i sigurt, se jo vetëm që e meritojmë dhe do ta qeverisim vendin nga viti i ardshëm, por se Kosovën do ta qeverisim më mirë dhe më përgjegjësi të plotë”, tha Mustafa.

Kryeministri i Kosovës, Hashim Thaçi në Ditën e Veteranëve të Ushtrisë Çlirimtare të Kosovës tha se shoqëria dhe shteti ende nuk kanë bërë sa duhet për veteranët dhe familjet e tyre.

Ai në një postim në rrjetin social Facebook tha se sot shënohet Dita e Veteranëve e Ushtrisë Çlirimtare të Kosovës, dita e njerëzve meritorë për lirinë dhe pavarësinë e vendit tonë.

“Si bashkëluftëtar juaji jam krenar me të gjithë ju, shumë prej të cilëve i njoh, por të gjithë jeni heronjtë të heshtur, të gjallë të përditshmërisë sonë, duke u ballafaquar me sfida jetësore me dinjitet, edhe pse shoqëria dhe shteti ynë i ri ende nuk kanë bërë aq sa duhet për ju dhe familjet tuaja. Ju, të nderuar veteranë, me vetëmohim të pashoq u rreshtuat në rrugën e vështirë të lirisë së Kosovës”, shkruan Thaçi.

“Si bashkëluftëtar juaji, e kam parë me sytë e mi guximin dhe trimërinë tuaj. Kam parë solidaritetin mes jush duke ndarë fatin dhe kafshatën e bukës me njëri tjetrin. E kam parë gatishmërinë tuaj flijuese në beteja për t’u dalë në ndihëm bashkëluftëtarëve që kishit pranë. Kam parë kur në supe keni bartur ushtarët e plagosur në beteja. Kam pasur nderin që të jem me ju kudo dhe në çdo kohë” u shpreh kryeministri.

Ai tha se tani, si kryeministër i vendit, e ndjen përgjegjësi morale dhe shtetërore të jetë gjithmonë krah jush.

“Një veteran nuk duhet të jetë në gjendje që të zgjedh midis blerjes së barërave për shërim apo librave që u duhen fëmijëve për shkollim. Prandaj, Qeveria e Kosovës është angazhuar që secili prej jush të ketë trajtim dinjitoz nga shteti ynë i ri, duke marrë statusin ligjor të merituar me të drejta të plota. Disa prej jush po ballafaqoheni edhe me procese gjyqësore, me akuza të pambështetura, por e vërteta gjithmonë do të del në shesh. Lufta e Ushtrisë Çlirimtare të Kosovës ka qenë e drejtë dhe drejtësia e saj do të fitojë. Në këtë fundvit, duke ju dëshiruar shëndet dhe lumturi, më lejoni që të shpreh urimet më të sinqerta për ju dhe familjet tuaja!”, shprehet kryeministri, Thaçi.

Zgjedhjet lokale të këtij viti dëshmuan se partitë politike nuk mund të llogarisin më në të kaluarën e tyre të “lavdishme”, por duhet të punojnë në shërbim të qytetarëve, duke zgjedhur problemet e tyre ditore nëpër komuna.
Zgjedhjet lokale treguan një rënie të besimit te lidershipi aktual i Kosovës. Analistët pilitikë, luhatjen e madhe në vota e shohin si një sfidë serioze për mbijetesën e liderëve.

Kryetari i PDK-së dhe kryeministri i Kosovës, Hashim Thaçi, përkundër premtimit të investimeve milionëshe për kandidatët e tij në zgjedhjet e këtij viti, ka shënuar humbje serioze, e cila i paralajmërohet si sinjal i keq për zgjedhjet e vitit që vjen, shkruan Kosova sot. PDK-ja doli me disa komuna më pak, duke humbut kështu shtylla të rëndësishme si Gjilanin, Ferizajin, Mitrovicën, Lipjanin, Malishevën.

Humbës i madh në këto zgjedhje mbetet edhe kryetari i LDK-së, Isa Mustafa. Partia e tij humbi këtë herë bastionin kryesor, Prishtinën. Ndërsa, LDK-ja i është afruar PDK-së me marrjen e 9 komunave të Kosovës.

Lajm i keq ishin këto zgjedhje edhe për kreun e AAK-së, Ramush Haradinaj. Ai gati sa ka filluar të harrohet në bastionin e tij në rajonin e Dukagjinit, sepse humbi katër komuna të këtij rajoni: Pejën, Gjakovën, Rahovecin dhe Suharekën.
Me rezultatin e këtyre zgjedhjeve nuk mund të krenohet as Albin Kurti, lider i Lëvizjes “Vetëvendosje”. Një kombinatorikë interesante e votës së lirë qytetare arriti që ta nxjerrë fitues kandidatin e VV në komunën e Prishtinës, për të qeverisur një mandat të ri 4 vjecar. Por në nivel nacional lëvizja VV radhitet partia e katërt me vetëm 60 mijë e 966 vota.
AKR-ja e Behxhet Pacollit, sfidoi votuesin me fitoren e dy kandidatëve për kryetarë komunash, në Gjakove dhe në Mitrovicë, por kjo fitore e brishtë nuk i siguron shumë të rehatshëm kryetarit pacolli./Kosova sot/

Deputeti Fatmir Limaj ka thënë se Kosova gjatë vitit 2013 në aspektin e përgjithshëm është ballafaquar me sfida si në planin social, politik dhe atë ekonomik.

Ai ka thënë se në zgjedhjet lokale qytetarët me votën e tyre shprehën pakënaqësinë me gjendjen aktuale në Kosovë.

Limaj ka thënë se nuk është i kënaqur me jetën parlamentare në Republikën e Kosovës për faktin se partitë politike nuk kanë qenë shumë aktive. Ai ka shtuar se do ta vazhdojë aktivitetin e tij politik, duke paralajmëruar se mund ndodhin ndryshime pozitive në 2014-n.

Në intervistën e parë për mediet e shkruara dhënë gazetës “Epoka e re”, Limaj ka thënë se qeverisja aktuale më shumë ka shpenzuar energji me dialogun në Bruksel. Ai ka thënë se që në fillim ka qenë skeptik në kabinetin qeverisës të Thaçit.

Limaj ka folur edhe për procesin e tij gjyqësor në rastin “Kleçka”.

Kosova ende nuk ka helikopterë, të cilët do të ndihmonin në situata emergjente, kontroll kufitar e çështje të tjera të nevojshme.
Përfaqësues të institucioneve shtetërore, përgjegjëse për një situatë të tillë thonë se Kosova deri tani nuk ka pasur mundësi financiare, por që kanë krijuar bazën ligjore të nevojshme dhe infrastrukturën që kjo Njësi të ketë vendstacionimin.

Ata vlerësojnë se me asnjë mjet të menaxhimit të situatave emergjente nuk mund të reagohet sikur me helikopterë që mund të shpëtohen jetët e njerëzve, kontrollohet kufiri, kontrollohet komunikacioni, veprohet ditën dhe natën, dhe në kërkim-shpëtim të jetëve të njerëzve, të furnizohen njerëzit atje ku nuk ka asnjë lloj mënyre të furnizohen me medikamente dhe ushqim në rast se izolohen nga bora e madhe, vërshimet, rrëshqitjet, dëmtimi i rrugëve etj.

Në Ministrinë e Punëve të Brendshme thonë se për formimin e Njësisë së Helikopterëve në kuadër të Policisë së Kosovës janë 62 ekspertë të kësaj fushe që nga pilotët, teknikët, inxhinierët, dhe ekipe të tjera mbështetëse të nevojshme për të jetësuar këtë Njësi.

Inxhinieri i aviacionit, njëherit edhe zëvendësministri në Ministrinë e Punëve të Brendshme, Ismet Ibishi, thotë për Kosovapress, se para dy vjetëve ka nisur angazhimin për formimin e kësaj Njësie, duke punuar me ekspertë për procedurat paraprake, duke e cilësuar si jashtëzakonisht të nevojshme.
Ibishi deklaron se i ka dhënë shumë rëndësi kësaj çështje dhe shpreson që Qeveria e Kosovës të jetësoj Njësinë për helikopterë gjatë vitit të ardhshëm, duke e funksionalizuar në kuadër të Policisë së Kosovës.

Kjo Njësi do t’i ketë tre helikopterë, të cilët, sipas Ibishit, dy prej tyre duhet të jenë dy motorësh, duke treguar se është si kriter dhe nuk tolerohen më në vend të urbanizuar të operojnë helikopter tjerë, dhe një i mesëm për reagim në situata emergjente.

Ai shprehet i bindur se disa shtete donatore i kanëtreguar gatishmërinë për të dhënë donacion, dhe për të ndihmuar Kosovën sa i përket fushës së aviacionit.
Zëvendësministri Ibishi tregon se deri tash transporti i doganierëve në veri është bërë me helikopter të EULEX-it, kurse për situata emergjente nuk kanë pasë asnjë mbështetje, por që pret të nënshkruajnë një marrëveshje më Ministrinë e Punëve të Brendshme të Shqipërisë për menaxhim të situatës nga ajri me ndihmën e helikopterëve të Shqipërisë, si zgjidhje e përkohshme.

“Problemi mesa kuptoj unë është në buxhetin e konsoliduar të Kosovës, nuk shoh tjetër arsye ose problem të mundshëm. Po mendoj që, edhe shpresoj që Qeveria në krye me kryeministrin në vitin që vjen, jam i sigurt t’u ja ditë rëndësinë të gjithë, se sa do të thotë për Kosovën, sa është e rëndësishme kjo Njësi, besoj edhe jam i sigurt që Qeveria e din dhe shpresoj që vitin e ardhshëm të gjejë mënyrë për të jetësu këtë Njësi. Me donacione, me një pjesë të buxhetit, me mënyrat të cilat ekspertët, gjegjësisht njerëzit autoritativ që kanë të bëjnë me buxhetin, të gjejnë mënyrë që të jetësojnë këtë Njësi. Sepse, për shtetin, është mbi të gjitha prioritet dhe unë shpresoj që kjo të ndodhë vitin e ardhshëm”, thotë ai.Edhe komandanti i Forcës së Sigurisë së Kosovës, gjeneral-lejtnant Kadri Kastrati, vlerëson se Njësia e Helikopterëve, aktualisht, mund të funksionojë në kuadër të Policisë.

“Kosova, në përgjithësi, nuk i ka kapacitetet e aviacionit të ngritura. Ne si grup drejtues për rishikimin e sektorit të sigurisë, kemi aprovuar, si prioritet i kemi dhënë MPB-së dhe Policisë për arsye se ato kanë nevojë me tepër. Mirëpo, edhe ne, në të ardhmen, në strukturën e ardhshme e kemi në plan që duhet të ngritim kapacitetet e aviacionit apo helikopterëve, në rend të parë të kërkim-shpëtimit, që shumëherë është shfaqur nevoja për dislokim të shpejtë, qoftë ajo për borë apo vërshime, apo çështje tjera që kanë ndodhur”, thotë Kastrati për Kosovapress.

Sa i përket shëndetësisë në situatat kur është dashur të bëhet ndonjë ndërhyrje me helikopterë ju ka ardhur në ndihmë KFOR-i, thotë drejtori në Qendrën Emergjente në Qendrën Klinike Universitare të Kosovës, Basri Lenjani.
Që nga viti 2007 janë munduar t’i bindin institucionet relevante në nivel të shtetit për aero-ambulancë, por ende nuk kanë marrë përgjigje, dhe se duhet të krijohen kushtet për sigurimin e helikopterëve.

“Kosova duhet patjetër ta ketë një ose dy helikopterë për nevojat e Republikës së Kosovës, të cilën e parasheh Ligji për Shërbime Emergjente, që të paktën, domethënë, në qoftë se Qendrës Klinike Universitare i paraqitet nevoja për evakuim të shpejtë, e vetmja mënyrë me qëllim të shpëtimit të jetëve është sigurimi i një aero-ambulance”, thotë Lenjani për Kosovapress.

Në kuadër të Qendrës Klinike Universitare, Klinika Emergjente që nga viti 2007 ka rritë aktivitetet për avancimin dhe fuqizimin e shërbimeve emergjente, duke bërëplanin ideor, gjegjësisht për dizajnimin e ndërtesës së re për Klinikën Emergjente, dhe në kuadër të kësaj si aneks projekt kanë bërë propozimin për ambulancë ajrore.