Ndeshja vendimtare e gjysmëfinales së play-offit të Superligës në basketboll mes Ponte Prizrenit dhe Pejës është ndërprerë pas pjesës së parë.
Pikërisht pas mbylljes së pjesës së parë ka ndodhur një përleshje e madhe, derisa lojtarët ishin duke u larguar nga parketi për të shkuar në zhveshtore.
Në përleshje janë përfshirë lojtarët e të dy skuadrave, ku kanë shkëmbyer goditje, ndërsa është dukur të jenë përfshirë edhe persona të tjerë.
FBK-ja nuk ka dhënë ndonjë njoftim për këtë takim të ndërprerë. Rezultati pas 20 minutave lojë ishte 49:48 në të mirë të Pejës.
Peja është ankuar në faqen zyrtare se basketbollistët dhe stafi i saj janë sulmuar pas fundit të pjesës së parë.
“Ngjarje të tmerrshme në përfundim të pjesës së parë! Derisa ekipi ishte duke u larguar drejt zhveshtoreve për pushimin e pjesës së parë, shikuesit dhe një pjesë e stafit dhe lojtarëve të ekipës vendase na janë vërsulur si më keq ndaj ekipës sonë. Ka edhe të lënduar nga kjo përleshje!” – thuhet në reagimin e KB Pejës në Facebook.
Rezultati në seri është 2:2, ndërsa fituesi i ndeshjes shkon në finale.