Fshatrat e Hasit të Prizrenit, janë bërë cak i hajnave.

Numri i vjedhjeve është shtuar.

Shqetësimi i banorëve të Hasit është ngritur edhe në Kuvendin e Prizrenit.

Shefi i Grupit të kuvendarëve të LDK-së Haziz Hodaj,ka kërkuar ndihmë nga kryetari i Prizrenit, Mytaher Haskuka.
“Kërkoj nga kryetari i Komunës që të thrras një mbledhje të Komitetit për Siguri për të diskutuar rreth këtij fenomeni”, tha Hodaj.

Sipas tij, banorët e fshatrave të Prizrenit, janë të terrorizuar nga hajnat.

“Familjet hasjane janë të terrorizuar nga hajnat”, shprehet Hodaj, shkruan “PrizrenPress”.

Hodaj tregon edhe një detaje intersante për “fatin” e hajnave.

“Kemi informacione se hajnat pas arrestimit lirohen pas dy dite “.

“Pas lirimit ata po e vazhdojnë hajnin”.

Ai ka ftuar policinë që të tregoi nëse ka hequr dorë nga hajnat.

“Nëse policia ka heq dorë nga hajnat, atëherë duhet të tregojë, sepse banorët vetorganizohen në mbrojtje të shtëpive të tyre”.

Muaj më parë fshati Tupec i Hasit ka qenë caku më i shpesht i hajnave. Për dy javë, në këtë fshat janë vjedhur disa shtëpi.

Ndërkaq, policia nuk ka raportuar se është kapur ndonjë hajn i këtyre shtëpive./PrizrenPress.com/

Drejtoria e Urbanizmit dhe Planifikimit Hapësinor të Komunës së Prizrenit bashkë me operatorin e kontraktuar për zhvillimin e Hartës Zonale të Komunës kanë nisur takimet me qytetarët për nevojat e hartimit të këtij dokumenti të planifikimit hapësinor, shkruan sot Koha Ditore.

Takimi i parë është mbajtur gjatë kësaj jave me banorët e lagjes “Jeta e re”, të cilët kryesisht kanë shprehur brengat e tyre rreth çështjes së mobilitetit, të cilat ndërlidhen edhe me praninë e trasesë së hekurudhës në këtë zonë.

Drejtori i Urbanizmit, Fatmir Memaj, para banorëve ka shpjeguar se Harta Zonale e Komunës është dokument i planifikimit hapësinor që përpilohet nga Komuna në bazë të Ligjit për Planifikimin Hapësinor. Sipas tij, për hartimin e këtij dokumenti është i nevojshëm edhe diskutimi me banorët, si obligim ligjor por edhe moral. “Jemi këtu për të dëgjuar opinionet tuaja për të pasur një planifikim sa më të mirë.

Harta Zonale është në fazën e hartimit fillestar. Ky është takimi i parë me banorët. Propozimet tuaja mund t’i paraqitni gjatë debatit, por mund t’i adresoni edhe me shkrim”, ka thënë Memaj, duke kërkuar nga të pranishmit që nevojat të shihen në mënyrë të arsyeshme. “Mendimet tuaja janë të vlefshme për procesin e planifikimit hapësinor”, ka deklaruar ai.

Edona Bytyqi, për 10 vjet, ishte e angazhuar në arsim si mësimdhënëse e lëndës së fizikës dhe kimisë.

Katër vitet e fundit, ajo u përzgjedh në pozitën e drejtoreshës së Shkollës Fillore të Mesme të Ulët, në Reshtan të Suharekës, raporton KTV.

Ndërkaq, pa paralajmërim, në zyrën e saj, i erdhi aktvendimi nga kryetari i kësaj komune, përmes së cilit u njoftua se i ndërpritet marrëdhënia e punës.

E vlerëson si një padrejtësi të madhe ndaj saj, pasi që në vendim nuk janë cekur fare arsyet e largimit, derisa beson se kjo është bërë për inate politike.

Për këtë është ankuar në Komisionin për Ankesa të kësaj Komune, i cili ka dalë në anën e saj duke e urdhëruar Kryetarin e Komunës që ta sistemojë atë në sistemin arsimor, ashtu siç e përcakton Udhëzimi Administrativ.

Vendimin e Komisionit të Ankesave nuk e ka respektuar Kryetari, i cili e ka lënë atë pa punë.

Ish kolegët e Edona Bytyqit thonë se ajo ka treguar një performancë jashtëzakonisht të mirë në punën e saj si drejtoreshë, për çka është dashur ta vazhdojë punën si mësimdhënëse.

Drejtori i Arsimit, Remzi Bytyqi, fajin për mossistemimin e kësaj mësimdhënëseje së cilës thotë se i ka përfunduar kontrata si drejtoreshë, ia hedh qeverisjes së kaluar.

Sipas tij, mësimdhënësja në fjalë, kur është avancuar në pozitë, nuk i është lëshuar vendim për ruajtjen e vendit të punës, derisa mohon se ka ndikuar pozicioni politik që ka ajo.

Pavarësisht kësaj, i pari i arsimit në këtë komunë thotë se po angazhohet gjatë gjithë kohës që e njëjta mësimdhënëse të punësohet sërish, pasi siç thotë, veç Udhëzimit Administrativ, si drejtori obligohen edhe me kontratë kolektive.

Sidoqoftë, kjo mësimdhënëse tashmë ka bërë edhe padi në Gjykatën Themelore të Prizrenit, dega në Suharekë, kundër Komunës, lidhur me këtë çështje.

Qendra e VV-së në Malishevë ka reaguar lidhur me akuzat ndaj drejtorit të gjimnazit “Hamdi Berisha”, Izet Hotit, i cili dyshohet të ketë marrë ryshfet.

Hoti po akuzohet se në Maj të këtij viti, si drejtor i gjimnazit “ Hamdi Berisha” në Malishevë, kishte keqpërdorur autoritetin e tij zyrtar duke kryer veprën e marrjes së ryshfetit.

Drejtori dyshohet se kishte kërkuar ryshfet në shumë prej 1.500 eurosh nga Gëzim Kastrati, menaxher i restorantit “Bimi-2”, për organizimin e mbrëmjes së maturës në këtë restorant – thuhet në aktakuzë.

Qendra e VV-së në Malishevë, nëpërmjet një komunikate ka thënë se kryetari i kësaj komune, Ragip Begaj, nga çerdhe të dijes, e ka kthyer arsimin në çerdhe të korrupsionit.

“Lëvizja VETËVENDOSJE! Qendra në Malishevë me shqetësim të madh ka përcjellë informacionet të cilat janë publikuar në media në lidhje me skandalin në të cilin është i përfshirë drejtori i gjimnazit “Hamdi Berisha” në Malishevë, Izet Hoti, ndaj të cilit, Gjykata Themelore në Gjakovë ka nisur një proces gjyqësor nën akuzën për keqpërdorim të pozitës zyrtare për marrje ryshfeti”, shkruhet në komunikatë.

Në reagimin e VV-së thuhet se qeverisja e Begajt në Malishevë po mbijeton me abuzime dhe skandale, duke thënë se qeverisjes së qeverisja e Nismës si në rrafshin qendror edhe në atë lokal përbën modelin më eklatant të keqqeverisjes që formë dhe mjet për mbajtjen e pushtetit e ka nepotizmin, shantazhin dhe keqpërdorimin e pasurisë publike për interesa klienteliste, partiake dhe te mafisë së biznesit.

“Edhe ky skandal ngjashëm si edhe shumë manipulime të tjera janë tregues i qartë i degradimit të vazhdueshëm të qeverisjes Begaj e cila jo vetëm në sektorin e arsimit, por në të gjithë sektorët tjerë ka vazhduar thellimin e problemeve dhe rritjen e keqpërdorimeve, duke u bërë njëherit shembull i një qeverisje e cila mbijetesën e saj e ka të lidhur ngushtë me abuzime dhe skandale”, shkruhet në komunikatë.

Më tej, VV në Malishevë kërkon nga kryetari Ragip Begaj dhe drejtori i Arsimit në këtë komunë që ta sqarojnë opinionin publik për këtë rast dhe më pas ta shkarkojnë Hotin.

“Lëvizja VETËVENDOSJE! në Malishevë, reagon ashpër ndaj akteve të tilla kriminale dhe kërkon urgjentisht nga Kryetari Begaj dhe Drejtori i Arsimit Blerim Thaçi, që të sqarojnë opinionin publik lidhur me zhvillimet e fundit në gjimnazin “Hamdi Berisha” dhe menjëherë të nisin procedurat ligjore për shkarkimin e drejtorit aktual të kësaj shkolle.
Në të kundërtën çdo përpjekje e tyre për ta kaluar në heshtje edhe këtë skandal do të nxisë rritjen e pakënaqësisë dhe reagimit qytetar për të cilën Nisma dhe Begaj do të mbahen përgjegjës”, thuhet në reagim.