Universiteti “Ukshin Hoti” në Prizren rrezikon që të hyjë në krizë institucionale. Në fund të këtij muaji, përkatësisht më 28 tetor, rektorit aktual Ramë Vataj i skadon kontrata, ndërkohë që vendimi i Këshillit Drejtues të këtij universiteti për zgjedhjen e rektorit të ri është pezulluar nga Gjykata Themelore e Prizrenit, shkruan sot Koha Ditore.

Rektorati i UPZ-së ka vlerësuar se në këtë situatë KD i UPZ-së duhet të emërojë një ushtrues të detyrës së rektorit.

Por edhe për emërimin e u.d. të rektorit sipas dispozitave të Statutit të UPZ-së nevojiten dy të tretat e votave të anëtarëve të KD-së, i cili në muajt e fundit ka qenë i ndarë në dy tabore sa i përket çështjes së zgjedhjes së rektorit të ri të UPZ-së.

Prandaj, kompromisi në këtë organ drejtues shihet si mundësi e vetme për të krijuar një zgjidhje të përkohshme për autoritetin kryesor menaxhues të Universitetit. Një gjë të tillë e ka konfirmuar edhe rektorati i UPZ-së, duke vlerësuar se kompromisi i palëve është i nevojshëm, për hir të institucionit dhe studentëve.

Kamber Maloku, babai i Çlirim Kamberit, të riut që u rrah brutalisht në Novi Sad, ka shprehur zhgënjimin e tij me reagimin e institucioneve të Kosovës, për rastin e djalit të tij.

Babai i Çlirim Malokut, Kamberi ka rrëfyer për RTV Dukagjinin, se si e kishte marr lajmin për rrahjen brutale që katër serb, i kishin bërë djalit të tij, në Novi Sad të Serbisë. Ai thotë se djali i tij është rrahur nga nacionalistët serbë, vetëm se ka folur shqip.

Ai thotë se me djalin e tij ka fol përmes telefonit.

“Çlirimi është vendosur në Novi Sad qe 20 ditë, por ai është kthyer në Kosovë për shkak të një dasme, dhe tani është rikthyer atje qe nja 5 ditë. Ka shkua atje me mësua zanatin si bukëpjekës. Pasi ka mbarua orarin e punës në mbrëmje kanë dalë me pi kafe me një shok që ka punua bashkë. Ata dy i kanë rrahur ndërsa një i tretë ka ikur. Unë kam dëgjuar përmes telefonit pasi vet nuk kamë qenë atje. Djali nuk ka ditur asnjë fjalë serbisht, prandaj kjo rrahje ka ndodhur për këtë arsye. Ata në lokal kanë folur, kanë bërë shaka diçka në shqip, prandaj janë rrahur”, tha Maloku.

Ai shprehet i mllefosur ndaj përfaqësuesve të institucioneve të Kosovës, duke thënë se edhe Vuciqi kishte reaguar përpara tyre.

“Më përpata pari ka reagua Vuçiqi në këtë ngjarje, sesa liderët tanë si Thaçi ose Ramushi. Ata asnjëri nuk ka reagua, përveç një Vlora Çitaku, edhe pse lajmet i kanë dhënë gazetarët. Unë nuk di çfarë të them vetëm se marre për liderët tonë që janë në atë vend e që nuk interesohen”, tha më tej Kamber Maloku.

Ai shtoi se kushtet e rënda e kishin detyruar Çlirimin të shkojë në Serbi për të punuar, ndërkaq u shpreh i mërzitur për këtë situatë.

Reagime të shumta, ka pasur edhe nga familjarë dhe shoqëria e Çlirimit, që i kanë uruar atij shërim të shpejtë dhe kthim në Kosovë.

https://web.facebook.com/infoboxrtvdukagjini/videos/286171688666752/

Kryetar i Komunës së Prizrenit, Mytaher Haskuka, ka vizituar sot familjen e Çlirim Malokut, 19-vjeçari nga Kosova që ishte sulmuar fizikisht në Novi Sad të Serbisë.

Sipas Haskukës, familjarët e Çlirimit e kanë njoftuar se gjendja e tij është stabilizuar dhe se ai sot ka biseduar me babanë e tij, Kamberin.

Haskuka ka theksuar se rasti i Çlirimit dhe i një shokut të tij për fat të keq nuk është i pari por nuk do të jetë as i fundit.

Ai ka thënë se asnjëherë deri më tani nuk kanë reaguar institucionet qendrore në mbrojtje të qytetarëve tanë.

“Për dallim prej nesh, po të ndodhte një rast i tillë në Kosovë, ndaj një qytetari me origjinë serbe, me siguri shteti fqinj do të thirrte mbledhje të jashtëzakonshme Këshillit të Sigurimit në OKB”, ka shkruar Mytaher Haskuka në profilin e tij në Facebook.

Ky është postimi i plotë i Mytaher Haskukës:

“Sot vizitova familjen e Çlirimit (Maloku) i cili është sulmuar në Novi Sad vetëm pse ka folur shqip. Nga familjarët e kuptova se gjendja e tij është stabilizuar dhe sot ka biseduar me babain e tij Kamberin.

Ky nuk është sulmi i parë ndaj shqiptarëve në Serbi dhe fatkeqësisht nuk do të jetë as i fundit, ngase asnjëherë deri më tani nuk kanë reaguar institucionet qendrore në mbrojtje të qytetarëve tanë – një veprim që obligon me ligj përfaqësuesit e shtetit tonë në botë. Për dallim prej nesh, po të ndodhte një rast i tillë në Kosovë, ndaj një qytetari me origjinë serbe, me siguri shteti fqinj do të thirrte mbledhje të jashtëzakonshme Këshillit të Sigurimit në OKB.

Këto raste janë pasojë e mosndryshimit të politikave të Serbisë ndaj shqiptarëve dhe Kosovës. Në mungesë të reagimit intitucional shtetëror dhe vazhdimsisë së politikave hegjemoniste të Serbisë ndaj Kosovës ftoj qytetarët të shprehin mospajtimin e tyre ndaj këtij sulmi. Mënyra më e mirë e reagimit fillimisht është bojkoti i produkteve serbe.

Nëse nuk mbrohet dinjiteti ynë qytetar, rastet të tilla do të na përsëriten”, ka shkruar Haskuka./Telegrafi/