Organet komunale të Prizrenit do të bëjnë përpjekje për të gjetur një mënyrë për kthimin e vitit “1878” në emblemën e Komunës.

Kjo çështje është diskutuar të premten në seancën e Kuvendit të Komunës dhe anëtarët e këtij organi janë pajtuar që së pari të krijojnë Komisionin statutar, i cili do të merret me propozimin e ndryshimeve në statutin e Komunës së Prizrenit, përfshirë këtu emblemën e Komunës, shkruan sot Koha Ditore.

Gjatë këtyre diskutimeve është vënë në pah fakti se lidhur me emblemën e Komunës së Prizrenit me vitin 1878 ka një vendim të Gjykatës Kushtetuese, porse sipas tyre kjo padrejtësi duhet të korrigjohet.

Para miratimit të rendit të ditës së mbledhjes së KK-së, këshilltarja e “Vakatit”, Memnuna Ajdini, ka vlerësuar se çështja e emblemës së Komunës së Prizrenit është e kryer, madje me një vendim të Gjykatës Kushtetuese dhe ka shprehur bindjen se nuk duhet të jetë në rend të ditës.

Lëvizja Vetëvendosje do të mbajë sot një protestë paqësore me moton “Një popull s’i nënshtrohet një njeriu”.

VV ka akuzuar presidentin Thaçi se po dëshiron t’ia japë Serbisë edhe Ujmanin e Trepçën, gjë që siç kanë thënë ata nuk mund ta lejojnë.

“Protesta e sheshi bëhen hapësirat e vetme dhe të domosdoshme për të shprehur bindjet dhe vullnetin tonë në mbrojtje të vendit”, thuhet në njoftimin e Vetëvendosjes.

Protestuesit do të nisen nga qytete të ndryshme drejt Prishtinës, duke filluar nga ora 10:00, për të cilët VV ka siguruar transport falas.

Ata do të takohen te Biblioteka Kombëtare për të vazhduar në Sheshin ‘Skënderbeu”, dhe do të përfundojë me një koncert në Sheshin “Zahir Pajaziti”./Telegrafi/

Një zjarr ka shpërthyer pak më parë në Vërmicë. Flaka dhe tymi që ka dalë aty ende nuk dihet se ka ardhur.

Në një video shihet se nga Vërmica po del një flakë e madhe.

Na Policinë e regjionit të Prizrenit kanë treguar se kanë dalë në terren së bashku më zjarrfikësit. Ata thonë se ende nuk kanë informata se nga ka ardhur ky zjarr.

“Nuk kemi informata se nga erdhi zjarri. Ajo që dihet tani ekipet tona janë në terrin dhe po punojnë në shuarjen e tij. Nuk ka ndonjë rrezik për banorët”, kanë thënë në Policinë e Prizrenit.

Sot në varrezat e fshatit Carrallukë, me nderime më të larta nga FSK-ja, dhe nën përcjelljen e familjarëve dhe mijëra bashkëluftëtarëve, përfaqësuesve të institucioneve qendrore dhe lokale, dhe qytetarëve të shumtë, është varrosur veterani i luftës së Ushtrisë Çlirimtare të Kosovës, invalidi i luftës dhe ish mësuesi, Skënder Krasniqi-komandant Plaku.

Paraprakisht, në shtëpinë e kulturës “Tahir Sinani” në Malishevë, nga ora 15:00, janë bërë homazhe për Skënder Krasniqin, ndërsa nga ora 16:00, është mbajtur edhe një mbledhje komemorative, ku krahas familjes, morën pjesë edhe deputet të Kuvendit të Kosovës, zyrtarë dhe përfaqësues të institucioneve nga niveli qendrorë dhe lokal, përfaqësues të FSK-së, Policisë së Kosovës, zyrtarë të partive politike në vend dhe në nivel lokal, dhe qytetarë të shumtë nga të gjitha viset shqiptare.

Në këtë mbledhje komemorative, është vlerësuar lartë jeta dhe veprimtaria e Skënder Krasniqit, në fushën e arsimit dhe në veçanti në luftën e lavdishme të Ushtrisë Çlirimtare të Kosovës, ku baca Skënder, ishte njëri ndër themeluesit e celulave dhe njësive të para në Komunën e Malishevës. Skënder Krasniqi, gjithashtu ishte edhe njëri nga përgjegjësit, gjatë transformimit të UÇK-së në TMK, ku gjithashtu luajti rol të rëndësishëm, deri në pensionimin e tij. Shtëpia e tij, ishte njëra ndër bazat e para të UÇK-së, ndërsa vet Skënder Krasniqi, me tërë familjen e tij, ishin të inkuadruar në luftën çlirimtare të UÇK-së.

Kryetari i Komunës së Malishevës, Ragip Begaj, duke folur në këtë mbledhje komemorative, tha se “Skënder Krasniqi, nuk u ndal kurrë së punuari për vendin, deri në momentin e ndarjes nga jeta”. Më pas, kryetari Begaj, ka kujtuar edhe momentet e tij, para, gjatë dhe pas luftës, me Skënder Krasniqin, duke e çmuar lartë angazhimin e tij, në shërbim të atdheut dhe kontributin e tij në luftën çlirimtare.

Kujtime nga veprimtaria e Skënder Krasniqit, i kanë shpalosur edhe Gjeneral Enver Cikaqi, i cili foli për rolin që luajti baca Skendë, në luftën çlirimtare dhe në transformimin në TMK, ku ka lënë gjurmë të pashlyeshme.

Edhe bashkëluftëtarja Shqipe Krasniqi, ka kujtuar momente nga lufta, kur, sipas saj, edhe në momentet më të vështira, Skënder Krasniqi, nuk u dorëzua asnjëherë.

Në këtë mbledhje komemorative, në emër të Organizatës së Veteranëve të Luftës së UÇK-së, ka folur edhe Hysni Gucati, përderisa Skënder Krasniqin e vlerësoi si një burrë trim, i cili dallohej për burrërinë e tij të treguar gjatë dhe pas luftës.

Në emër të familjes, të pranishmit, i ka falënderuar për pjesëmarrje dhe për nderimet e bëra, djali i tij, Arben Krasniqi.

Skënder Krasniqi, është varrosur sot, në ora 17:00, në varrezat e fshatit Carrallukë.

Feriz Hoti, i akuzuar për vrasje dhe armëmbajtje pa leje, është liruar sot nga Gjykata Themelore e Gjakovës.

Në shpalljen e aktgjykimit, nga kryetari i trupit gjykues, Hoti për të dy veprat lirohet në mungesë të provave nga aktakuza e Prokurorisë.

Gjykata e liroi të akuzuarin edhe nga obligimi i shpenzimeve procedurale.

Me këtë vendim, gjykata ia ndërpreu Hotit edhe paraburgimin, pasi që tashmë kanë pushuar të gjitha arsyet ligjore për të cilat ishte caktuar.

Kryetari i trupit gjykues, Gëzim Pozhegu, e udhëzoi palën e dëmtuar që brenda 15 ditëve ta bëjë parashtrimin e ankesës.

Në sallë të gjykimit ishin të pranishëm të gjitha palët, përveç prokurorit Ali Uka.

Hoti akuzohej se këto vepra i ka kryer natën e 17 majit 2017 në Ratkoc të Rahovecit, kur ka qëlluar drejt disa personave që po tentonin të hynin dhunshëm në dyqanin e tij duke e lënë të vrarë Hamdi Jusufin.

Në seancën e kaluar, pas rihapjes së gjykimit pas dëshmisë së dëshmitarit Muhamet Kiqmari, i akuzuari Feriz Hoti ishte deklaruar i pafajshëm.

Ai kishte kërkuar nga gjykata lirimin e tij, duke i shprehur keqardhje të dëmtuares Nazife Jusufi.

Në aktakuzë thuhet se Feriz Hoti pasi që dëgjoi zhurmën që po shkaktonin Hamdi Jusufi, Muhamet Kiçmari, Liridon Sylejmani dhe Evan Potera që po tentonin të thyenin derën e marketit “Rama-F” për të vjedhur brenda tij, doli nga oborri i shtëpisë dhe me armë filloi ndjekjen e tyre.

Sipas aktakuzës, katër personave që po tentonin të vidhnin në lokalin e tij, Hoti në fillim u kishte kërkuar të ndalen duke i sharë, e më pas kur ata kishin vazhduar të ikin, ai vazhdoi të gjuajë drejt tyre me pushkën automatike “AK 47”.

Në aktakuzë përshkruhet edhe momenti kur i akuzuari e qëllon tani të ndjerin Hamdi Jusufi.

“Në të shtënën e fundit qëllon tani të ndjerin Hamdi në pjesën e kokës dhe nga plaga e marrë vdes në vend të ngjarjes”, thuhet mes tjerash në aktakuzë.

Kuvendi i Komunës së Malishevës, sot ka vazhduar me mbajtjen e seancës së dhjetë të rregullt, ku në mesin e disa vendimeve të marra, pas shqyrtimit të kërkesës së Komitetit për Familje të Dëshmorëve, Invalid, Veteran të luftës së UÇK-së dhe Martirë të luftës, mori vendim që të ndalohet varrosja e veteranëve të luftës, në varrezat e dëshmorëve në Kleçkë dhe Malishevë, bëhet e ditur përmes një komunikate për media.

Po ashtu në mbledhjen e dhjetë të saj, KK i Malishevës, vendosi që të emërtoj një rrugë në Tërpezë, me emrin “Afrim Mehmet Krasniqi”, si dhe ka vendosur që Rregulloren për Taksa, Ngarkesa dhe Gjoba komunale ta dërgojë në dëgjim publik.

“Vendimet e tjera të marra nga KK i Malishevës, në dy ditë mbledhje, janë edhe këto: emërimi i tre anëtarëve në Komitetin për Barazi Gjinore, emërimin e tre anëtarëve në Komisionin për shqyrtimin e çështjes së 32 banesave apo familjeve, në lagjen “Mirëdita” në Malishevë, disa rekomandime nga komiteti për bujqësi, si dhe kërkesën e një qytetari për ndërrim destinim të tokës, nga tokë bujqësore në tokë ndërtimore”, thuhet në komunikatë.

Në mbledhjen e dhjetë të rregullt, janë shqyrtuar edhe projekt buxheti komunal, për vitin 2019, në lexim të parë, pastaj raporti gjashtë mujor i drejtorisë për bujqësi, përfundimi i vitit shkollor 2017-2018 dhe përgatitjet për fillimin e vitit të ri shkollor 2018-2019, raporti gjashtë mujor i punës së drejtorisë për Mbrojtje dhe Shpëtim, si dhe një kërkesë tjetër e Komitetit për Familje të Dëshmorëve, Invalid, Veteran të luftës së UÇK-së dhe Martirë të luftës.