Kopja e një letre të nënshkruar nga Albert Ajnshtajn u gjet rastësisht nga një nëpunës i Arkivit Kulturor Hebraik të Mynihut, që ishte fshehur mes dy gazetave të vitit 1961, sipas shtypit vendas.

Është një letër përshëndetëse e vitit 1932 dhe e shkruar nga shkencëtari për ditëlindjen e 50-të të ekonomistit hebre Julius Hirsch, origjinali i të cilit është ruajtur në trashëgiminë Hirsch të Institutit Leo-Baeck në Nju Jork.

“Letra ishte nënshkruar nga Ajnshtajni dhe kolegu ishte shumë i kënaqur për zbulimin”, sipas medias.

Mënyra e mbërritjes së letrës në arkivin e Munihut nuk është e qartë.Ajnshtajni kishte kaluar një pjesë të fëmijërisë dhe të rinisë në Mynih, por më 1932 ai kishte qenë në Berlin për pak kohë përpara se të shkonte në SHBA.

Poezi nga Nazim Hikmet

Shpirti im

mbylli sytë

avash avash

siç fundosesh në ujë

zhytu në gjumë

lakuriq dhe veshur me të bardha

më e bukura ëndërr

do të të presë

shpirti im

mbylli sytë

avash avash

përhumbu, si në harkun e krahëve të mi

në gjumin tënd mos më harro

mbylli sytë dalëngadalë

sytë e tu të kaftë

ku digjet një flakë e gjelbër

shpirti im.

Ministri i Kulturës, Rinisë dhe Sportit, Kujtim Gashi ka vizituar kullën e familjes së Fazli Boqollit në Raushiq. Gjatë kësaj vizite, ministri Gashi ka parë nga afër punimet që po bëhen në këtë kullë, investim i MKRS-së.

Ministri Gashi u shpreh i kënaqur me punimet që janë duke u realizuar në këtë kullë dhe tha se “Si ministri, kemi ndarë mjete të mjaftueshme sipas kërkesës së Qendrës Rajonale të Trashëgimisë Kulturore në Pejë, me qëllim që këtë kullë, por edhe kullat e tjera në rrafshin e Dukagjinit t’i restaurojmë, sepse këto kulla kanë domethënie jashtëzakonisht të madhe dhe historike të periudhave të ndryshme”.

“Ne jemi të përkushtuar që t’i ruajmë dhe t’i rikthejmë këto kulla në funksion, varësisht prej rolit që kanë pasur në të kaluarën dhe tani dhe besoj që edhe viti 2019 do të jetë vit i veçante sa i përket investimeve në këto kulla” ka thënë ministri Gashi.

Ministri Gashi i përgëzoj familjarët për bashkëpunimin, dhe gatishmërinë që këtë kullë ta rikthejmë në funksion, sepse në shumë lokalitete, kullat e tilla, tashmë janë shkatërruar. Por këto që ekzistojnë, jemi të interesuar si ministri që t’i funksionaliojme.

Ndërkaq, drejtoresha për Trashëgimi Kulturore në Pejë, Shpresa Gjonbalaj falënderoi ministrin për mbështetjen dhe angazhimin që ka shprehur për t’i parë nga afër punimet e restaurimit të kullës së Fazli Boqollit.

“Kjo kullë ka vlera të veçanta historike, ndihet për veprimtari patriotike, gjatë viteve të 90’ ky monument ka qenë në shërbim të lëvizjes për pajtimin e gjaqeve në krye me Anton Çettën. Në oden e kësaj kulle atëkohë janë pajtuar shumë gjaqe. Po ashtu, ka qenë edhe si shkollë shqipe në kohën e sistemit paralel në Kosovë. Gjithashtu, ka shërbyer edhe në punimin dhe riparimin e armëve në kohën e rezistencës çlirimtare për nevojat e UÇK-së” tha Gjonbalaj.

Ndërkaq kryefamiljari Fazli Boqolli falënderoi ministrin Gashi për kontributin dhe angazhimin që ka treguar për restaurimin e kësaj kulle me vlera historike po ashtu shprehu falënderim për të gjithë ata të cilën janë angazhuar rreth këtij restaurimi.

Kulla përmban karakteristikat e objekteve fortifikuese familjare, e që janë tipike edhe për ndërtimin e tipit të njëjtë në Rrafshin e Dukagjinit. Si ndërtim u realizua në gjysmën e dytë të shek. XVIII-të.

Monumenti disa herë ka pësuar djegie, fillimisht gjatë Luftës së Dytë Botërore. Është djegur e mandej është rinovuar pa humbur elementet bazë të kullës. Edhe gjatë luftës së fundit 1998/99, nga forcat serbe kulla u dogj, duke lënë vetëm muret të cilat në mungesë të intervenimit po rrënohen vazhdimisht. Për këtë arsye MKRS-ja për shkak të të vlerave saja si në aspektin arkitektonik, historik, shoqëror e shpirtëror e ka vlerësuar që sa më parë të intervenojë në këtë monument.