Sot në Malishevë, është mbajtur një sesion shkencor me temën “Folklori në krahinën e Llapushës”. Ky sesion shkencor është mbajtur në kuadër të festivalit folklorik “Oda e Llapushës”, edicioni i pestë, ndërsa në këtë sesion me prezantimet e tyre janë paraqitur, prof.Dr. Zymer Neziri, prof,Dr. Adem Zenujllahu, prof.Dr. Sabahudin Cena dhe Dr.sc. Mehmet Rukiqi.

Prof.Dr. Zymer Neziri është paraqitur me kumtesën “Eposi i Kreshnikëve në pesë shtete të Ballkanit, në fillimin e shekullit XXI: krahina e Llapushës”, ku i ka trajtuar dy vëllime me këngë, të hulumtuara, të shënuara dhe të incizuara nga dymbëdhjetë këngëtar të kësaj krahine. Këto vëllime janë të realizuara në kuadër të projektit E5 për eposin shqiptar.

Prof.Dr. Adem Zenujllahu është paraqitur me kumtesën “Salih e Feriz Krasniqi-rapsodë të papërsëritshëm nga krahina e Llapushës”, ku e ka trajtuar repertorin e këtyre dy rapsodëve nga rrethi i Malishevës, përkatësisht fshati Drenoc, ndërsa këtë rreth, autori e vlerëson si njëra ndër krahinat me më së shumti rapsod. Në këtë temë, autori ka folur për këngët e Salih e Feriz Krasniqit, të cilët i kënduan jetës, trimërisë, burrërisë, dashurisë, dhembjes, tragjikes dhe krenarisë së popullit shqiptar, gjatë historisë.

Prof.Dr. Sabahudin Cena, është paraqitur me kumtesën “Tradita e rapsodimit epik-heroik në arealin e Llapushës”, ku i ka trajtuar tri bazamente poetike të kësaj krahine të njohur rapsodësh:bazamenti lirik rural, vajtimet, bazamenti epik heroik Eposi i Kreshnikëve, bazamenti paladik. Në kuadër të këtyre, sipas autorit, dallohen nënte tipe: tipi biografik, kronologjik, fragmentar, mobilizues, numërues, syzhetor, modeluar, kombinuar dhe interogativ.

Ndërsa Dr.sc.Mehmet Rukiqi, është paraqitur me kumtesën “Rapsodët nga krahina e Llapushës”, ku ka folur për këngëtarët që dikur dhe sot, kënduan këngë nga treva e Llapushës. Sipas tij, rapsodët e kësaj krahine kultivuan, kënduan dhe bartën këngën popullore, gjeneratë pas gjenerate, deri në ditën e sotme.

Ministri i Kulturës, Rinisë dhe Sportit, Kujtim Gashi, së bashku me ministrin e Kulturës së Maqedonisë, Asaf Ademi, kanë vizituar Parkun Arkeologjik “Ulpiana”.
Ministri Gashi, ka thënë se Ministria e Kulturës, do të vazhdojë edhe më tutje të mbështesë punimet dhe gërmimet në parkun arkeologjik, pasi që është një trashëgimi e rëndësishme kulturore për Kosovën.

“Jemi dakorduar të dalim pak te parku arkeologjik Ulpiana për të parë me afër procesin e gërmimeve qe po ndodhë që një kohë të gjatë këtu që do të vazhdoj edhe me tutje dhe për të treguar përkushtimin tonë që edhe vizitat e zyrtarëve të larte i sjellim në këtë aset të trashëgimisë kulturore për të treguar përkushtimin tonë”, ka thënë Gashi.

Gashi tha se ky park po merr pamje të bukur, dhe se tani po shtohet si një pikë turistike, ku gjatë këtij viti do të ketë mbi 18 mijë vizitorë.

“Ulpiana tani po merr pamje jashtëzakonisht të bukur, një monument shumë i rëndësishëm i trashëgimisë kulturore dhe tani po shtohet edhe si pikë turistike ku gjatë vitit 2018 kemi mbi 18 mijë vizitorë dhe kjo tregon se sa kanë qenë të rëndësishme investimet MRKS në këtë lojalitet të trashëgimisë kulturore”, ka thënë tutje Gashi.

Ndërkaq, homologu i tij Asaf Ademi, ka thënë se gjatë takimit me ministrin Gashi, kanë biseduar rreth bashkëpunimit në mes të dy vendeve në aspektin e kulturës.

“Pata kënaqësinë që bashkë me ministrin dhe stafin e parkut Ulpiana të jem dëshmitarë të një pune cilësore të realizuar këtu dhe të shpreh habinë time qe edhe sa shumë punë ka për të u bere duke marrë parasysh qe vetëm 2% i punëve janë bere ndërsa gjithçka qe është bëre është mahnitëse e dëshmon per një trashëgimi kulturore”, tha Ademi./

Me ftesë të ministrit të Kulturës, Kujtim Gashi, po qëndron në Kosovë, në vizitën e tij të parë zyrtare, në cilësinë e ministrit Asaf Ademi, Ministër i kulturës së Maqedonisë, i cili mori këtë detyrë para një muaji.

Fillimisht Gashi e uroi homologun e tij nga Maqedonia, Ademi, për marrjen e detyrës duke i dëshiruar mbarëvajtjen në punën dhe arritjen e synimeve.

Gjatë takimit të dy ministrat kanë diskutuar për mundësitë e thellimit të bashkëpunimit midis dy ministrive në fushën e kulturës, trashëgimisë kulturore dhe atë të së drejtës së autorit, nëpërmjet institucioneve të kulturës, duke krijuar edhe hapësira dhe mundësi për intensifikim e shkëmbimit të aktiviteteve kulturore edhe ndërmjet skenës së pavarur kulturore të të dyja vendeve.

Ministrat u dakorduan që të fillojnë procedurat për përgatitjen e një kalendari të përbashkët kulturor mes Kosovës e Maqedonisë, i cili orientimisht pritet të nënshkruhet në muajin shtator