Sot aktivistë dhe qytetarë të Prizrenit organizojnë mbrëmjen e bamirësisë për Manolja Kabashin, vajzën 22 vjeçare nga Prizreni, e cila aktualisht është duke u trajtuar për leukemi në një spital në Stamboll të Turqisë.

Mbrëmja e bamirësisë mbahet në Kinemanë Lumbardhi në Prizren dhe fillon në orën 19:00.

Gjatë mbrëmjes së bamirësisë do të performojnë dy bende muzikore, Kuarteti Pentagram dhe Jericho. Ndërsa në fillim të mbrëmjes do të organizohet edhe audicioni me piktura dhe fotografitë dhuruara nga piktorë dhe fotografë të njohur të Kosovës. Gjatë mbrëmjes do të keni mundësinë për të blerë njërën nga veprat artistike.

Të gjitha mjetet e tubuara do t’i dhurohen familjes së Manolja Kabashit për t’i mbular shpenzimet e shërimit.

Mbrëmja do të jetë e hapur për publikun, ndërsa hyrja do të jetë 5 euro. /PrizrenPress.com/

Kuvendi i Kosovës sot do të mbajë mbledhje të jashtëzakonshme, ku pikë e vetme e rendit të ditës do të jetë zgjedhja e qeverisë së re.

I mandatuar për ta udhëhequr qeverinë e ardhshme të Kosovës është lideri i AAK-së, Ramush Haradinaj, partia e të cilit është pjesë e PAN-it me PDK-në dhe Nismën, ndërsa në koalicion janë edhe AKR, Lista Serbe dhe partitë tjera të minoriteteve.

Për t’u zgjedhur Qeveria, duhet t’i ketë së paku 61 vota të deputetëve të Kuvendit të Kosovës.

Drejtoria Rajonale e Policisë në Prizren, ka shënuar të premten përvjetorin e 18-të të themelimit të saj.

Në një koktej rasti të organizuar nga drejtuesit e DRP-së në Prizren me rastin e këtij përvjetori, morën pjesë përfaqësues të institucioneve të ndryshme të drejtësisë dhe sigurisë, policisë kufitare të Shqipërisë dhe ata të institucioneve ndërkombëtare të sigurisë.

Para të pranishmëve, ka folur drejtori i policisë rajonale, Nexhmi Krasniqi, i cili tha se rezultatet dhe sfidat e përgjithshme që ka pasur ky institucion gjatë këtyre 18 viteve të zhvillimit të saj dhe profesionalizimit janë inkurajuese në shërbim të ofrimit të sigurisë për qytetarët.

“Edhe në të ardhmen priten rezultate edhe më të kënaqshme, dhe për një gjë të tillë, duhet të intensifikohet bashkëpunimi edhe me organet tjera përkatëse” , theksoi ai.

Drejtuesit e policisë në Prizren, thanë se Policia e Kosovës mbetet e përkushtuar në përmbushjen e vizionit dhe misionit të saj, në zbatimin e ligjit dhe Kushtetutës së vendit, garantimin e rendit dhe sigurisë, në mënyrë që të ofrojë një shërbim efikas policor dhe profesional ndaj të gjithë qytetarëve. /TV Prizreni/

Me rastin e tre vjetorit të vdekjes, në organizim të Kuvendit Komunal të Prizrenit, është përkujtuar veprimtari, Masar Shala.

Pjesë e këtij manifestimi përkujtimor ishin anëtarë të Kuvendit, bashkëveprimtarë, miq dhe familjarë të veprimtarit të ndjerë.

Kryesuesi i Kuvendit të Prizrenit, Kujtim Gashi, në fjalën e tij, tha se Masar Shalën do ta kujtojmë si ushtar, pjesëmarrës në themelimin e institucioneve shtetërore, dashamir të jetës sportive e kulturore në Prizren, si zë i kuvendarit të arsyeshëm në mbrojtje të interesit të i qytetarëve dhe si njeri të guximshëm me vizion dhe qëndrim të qartë.

“Edhe sot, edhe në këtë akademi, në mesin tonë është zëri dhe vizioni i Masar Shalës për ndërtimin e shtetit dhe qytetit të Prizrenit”, ka thënë Gashi.

Bashkëveprimtari i të ndjerit, prorektori i Universitetit të Prizrenit, Kadri Kryeziu, evokoi kujtime të veprimtarisë së përbashkët.

“Masar Shala ka qenë i pandalshëm në aktivitetin politik e kombëtar”, ka thënë Kryeziu.

Në emër të familjes, ka folur djali i të ndjerit, Duarti, i cili falënderoi të pranishmit për nderimin dhe respektin për jetën dhe veprën e babit të tij, për të cilin tha se kujtimi dhe krenaria i bën të fortë nga largimi i tij nga kjo botë.

I ndjeri , Masar Shala, kishte ndërruar para tre vitesh në Tiranë pasi vuante nga një sëmundje e rëndë. Ai ditëve të fundit të jetës së tij ishte shef i Grupit të Këshilltarëve të PDK-së në Kuvendin e komunës së Prizrenit. /TV Prizreni/