Dy persona janë arrestuar në Prizren.
Arrestimi i tyre është bërë me urdhër të Gjykatës Themelore të Prizrenit.
Ata janë dërguar në vuajtje të dënimit./PrizrenPress.com/
Mytaher Haskuka viziton Arkivin e Prizrenit
Kandidati i Vetëvendosjes për kryetar të Prizrenit, Mytaher Haskuka, ka vizituar Arkivin e Prizrenit.
Ai thotë se arkivat janë bazament i civilizimit dhe meritojnë trajtim të dinjiteteshëm
Postimi i plotë në Facebook
Pak persona dinë për Arkivën e Prizrenit, e cila arkivon dokumentet shtetnore nga regjioni i Prizrenit, ku ka edhe dokumente nga viti 1792.
Sot së bashku me deputetin Arber A. Rexhaj dhe kryetarin Artan A. Abrashi vizituam këtë institucion ku me drejtorin dhe stafin biseduam për rëndësinë e arkivës dhe për problemet në funksionimin.
Problemet imidiate ishin, mungesa e objektit dhe hapsirës së mjaftueshme, mungesa e aparaturave për digjitalizim. Të gjithë u pajtuam që arkivat janë bazament i civilizimit dhe meritojnë trajtim të dinjitetshëm
Prizren: Shtatë të akuzuarit për fajde nuk e pranojnë fajësinë
Të akuzuarit për fajde, detyrim, kanosje dhe armëmbajtje pa leje, Pal Morina, Engjëll Thaqi, Albert Kala, Nue Karica, Bernard Perlazeri, Gjon Kushnini dhe Eduard Morina, të mërkurën, sërish janë deklaruar të pafajshëm ndaj akuzave me të cilat ngarkohen.
Kjo ka ndodhur pasi që shqyrtimi ka rifilluar për arsye se kjo seancë është mbajtur tre muaj nga seanca e kaluar, e që sipas procedurës penale ashtu duhet të veprohet.
Palët në procedurë kanë qëndruar pranë të gjitha seancave të mbajtura deri më tani dhe janë pajtuar që deklaratat e dhëna nga të dëmtuarit të lexohen.
Më pas është vazhduar me administrimin e provave, ku janë administruar disa procesverbale nga bastisjet e bëra në pronat e të akuzuarve, në të cilat janë sekuestruar dokumente, telefona, automjete dhe armë zjarri.
Po ashtu, është lexuar një fletore pune e dorëzuar nga i dëmtuari Sefedin Kazazi, në të cilën shkruante se sa para ka marrë borxh, nga kush ka marrë dhe për borxhet e kthyera. Në njërën prej faqeve figuronin tre emra dhe një shumë prej 5 mijë eurosh, të cilën i dëmtuari Kazazi e ka paguar si borxh.
Në një faqe tjetër të kësaj fletoreje shkruhej një numër prej 10 mijë eurosh dhe tre nënshkrime dhe dy numra të telefonit.
I akuzuari Bernard Përlazeri ka thënë se ky shkrim ka të bëjë me një borxh prej 10 mijë eurosh që ai u ka dhënë familjes Kazazi dhe sipas tij, me këtë rast kanë nënshkruar ai dhe të dëmtuarit Sefedin dhe Ibrahim Kazazi.
Përlazeri po ashtu, ka polemizuar me prokurorin e rastit, Genc Nixha, duke thënë se padrejtësisht është duke u akuzuar, sepse ai thjesht i ka dhënë borxh të dëmtuarve dhe se ata vetë i kanë kërkuar borxhet.
Ndërsa, në një letër tjetër shkruhej shuma prej 109 mijë e 400 eurosh, për të cilën letër, i akuzuari Engjëll Thaqi ka thënë se tregon shumën të cilën ai ia ka dhënë Sefedin Kazazit për t’ia blerë shtëpinë. Ai ka thënë se marrëveshja për shitje ka qenë 150 mijë euro.
Në këtë seancë do të shikoheshin edhe DVD-të e lokalit të të dëmtuarit dhe fotoalbumet nga bastisjet e bëra në pronat e të akuzuarve, por një gjë e tillë është shtyrë për seancën e radhës.
Videot nga DVD-të patën probleme pasi që ishin pa zë, ndërsa fotografitë ishin pa ngjyra dhe nuk mund të dalloheshin objektet e fotografuar.
Me këtë rast, prokurori Nixha ka propozuar që seanca të ndërpritej dhe për seancën e radhës ai do të marrë nga hetuesit policorë origjinalet e fotove dhe videove e po ashtu, do të tentojë të sjellë hetuesin e këtij rasti, i cili do të sqarojë nëse ka pyetje rreth tyre.
Palët në procedurë janë pajtuar me propozimin e prokurorit, andaj kryetarja e trupit gjykues, Raime Elezi, ka ndërprerë shqyrtimin dhe i njëjti do të vazhdojë më 11 shtator 2017, nga ora 11:00.
Prokuroria Themelore në Prizren ka ngritur aktakuzë ndaj të akuzuarve në fjalë me pretendimin se ata përmes imponimit të fajdesë ndaj familjes Kazazi, kanë marrë prej tyre shuma të mëdha të parave dhe kanë tentuar t’ua marrin shtëpinë, me anë të kërcënimit me armë.
Sipas organit të akuzës, të akuzuarit Engjëll Thaqi dhe Albert Kala, kanë shkuar në shtëpinë e të dëmtuarve, u kanë bërë presion me armë, që të paguanin kinse një borxh prej 150 mijë euro, përndryshe duhej ta bartnin shtëpinë në emër të tyre.
Po ashtu, aktakuza i ngarkon grupin se kanë shfrytëzuar pozitën e vështirë financiare të personave të ndryshëm, u kanë dhënë para borxh atyre dhe më vonë u kanë kërkuar shuma më të mëdha.
Ibrahim Kazazi, më 11 janar 2017 është plagosur me armë zjarri nga dy persona, një ditë para se të fillonte dëshminë në këtë gjykim. I njëjti tani jep dëshminë përmes pajisjeve audio, nga një dhomë e veçantë në gjykatë.
Në këtë rast, përveç Ibrahimit, i dëmtuar është edhe babai i tij, Sefedin Kazazi, i cili ka përfunduar dëshminë e tij në këtë rast.
Në njërën nga seancat e këtij rasti, përderisa ishte duke dëshmuar Ibrahim Kazazi, të njëjtit i është përkeqësuar gjendja shëndetësore dhe seanca është ndërprerë.
Në seancën e radhës, i njëjti ka sjell me vete një dokument mjekësor i cili tregonte se ky i dëmtuar, nuk është në gjendje që të dëshmojë, me këtë rast dëshminë ka filluar ta japë, babai i tij, Sefedin Kazazi.
Në seancën e mbajtur në fund të majit, Sefedin Kazazi, në dëshminë e tij ka treguar se si ky grup kishte përfituar nga ai shuma të mëdha të parave.
Ai ka treguar se të akuzuarve u kishte dhënë para në shumë prej 1500, 5300, 9300, në emër të kinse borxhit që u kishte djali i tij, atyre.
Tutje ka thënë se të akuzuarit Pal Morina, i kishte dhënë para në shumë prej 5300 euro, në emër të një borxhi që ia kishte pasur djali i tij, Ibrahimi.
Ka përmendur edhe dy raste kur të akuzuarit Engjell Thaqi dhe Albert Kala, i kishin dhënë atij shumat prej 20 mijë dhe 25 mijë, kinse për të mbuluar borxhin që djali i tij kishte ndaj dy personave.
Ky i dëmtuar gjatë atij shqyrtimi, ka thënë se ato para nuk i kishte marrë asnjëherë, sepse të njëjtat para, Engjulli dhe Alberti i kishin marrë dhe ia kishin dhënë Bernard Perllazerit.
Përlazëri, po ashtu është duke u gjykuar për vrasjen e Hekuran Morinës, pas një konflikti për një borxh të pretenduar nga ai, prej 70 mijë eurosh./betimiperdrejtesi/
Ngjyrat e pëlhurës që pështjell realitetin tonë
Ditar Kabashi
1.
Ngjyrat janë jetë. Janë larushia e mjedisit. Kombinimi i tyre është objekt studimi për shumëkënd, nga disenjatorët e modës e gjer tek tifozët e klubeve sportive. Çdokush identifikohet me një ngjyrë apo me kombinim ngjyrash. Megjithatë, disa thonë se për shijet dhe ngjyrat nuk duhet diskutuar.
Rëndom, përveç të bukurës natyrë, ngjyrat zënë vend edhe në sendet që i prodhon dora e njeriut. Inventari i shtëpive a i zyrave, ushqimet me mbështjellësit e tyre, veshmbathjet e kështu me radhë, gjithçka i nënshtrohet perceptimit mbi ngjyrën. Këto kanë simbolikat e veta, të cilat njeriu ua dha që të mund të shprehë imagjinatën dhe idenë e vet. Identifikimi i të bardhës me paqen, i të kuqes me gjakun (ndonjëherë edhe me komunizmin, qe besa), i të kaltrës me demokracinë e një mor simbolikash të tjera, të përdorura shpesh për retorika boshe.
2.
Edhe pse përdoret në zhargonin e përditshëm, fjala “bez” nuk haset në fjalorin zyrtar të shqipes. “Beze”, po. Sikurse edhe “basmë”, “cipë”, “lahur”, etj. Natyrisht, edhe “pëlhurë”. Pazotësia për të bërë dallimin mes të folmes së lirë dhe ligjërimit zyrtar nuk është ndonjë çudi për personalitetet historike por të gjalla që gjenden tek ne. Aq më pak nëse janë në krye të vendit.
3.
Legjislacioni i secilit shtet rregullon çështjen e simboleve kombëtare e shtetërore. Edhe Kosova jonë ka një ligj që quhet “Ligji për Përdorimin e Simboleve Shtetërore të Kosovës”. Paramendoni, është ndër ligjet e para të nxjerra nga Kuvendi i Kosovës, pra qysh më 2008. Kur thuhet simbolet, mendohet në flamurin, stemën dhe himnin. Këto janë “karta e identitetit” për shtetin. Nenet 4-10 flasin ekskluzivisht për flamurin (përdorimin, vendosjen, renditjen). Se nenin 17 që rregullon sanksionet kundërvajtëse më mirë të mos e përmendim. Besoj se këtë e dinte mirë edhe ligjëruesi orator që ngriti në ekstazë shpirtërore e atdhetare të pranishmit në kultin fetar. S’ka si të mos e dijë, kur ka këshilltarët e përgatitur dhe, kur vetë ai, me përgjegjësi të lartë, përfaqëson unitetin e popullit të Republikës, të kësaj që gjithashtu e përfaqëson brenda dhe jashtë.
4.
Pëlhurat përdoren për të mbuluar diçka dhe mund të jenë shumëngjyrëshe. Të bardha apo të zeza. Mbase edhe të tejdukshme. Nuk di nëse është zbuluar ndonjë e tillë që të mund të fshehë korrupsionin, përfitimin e padrejtë ekonomik, nepotizmin, politizimin e cilitdo institucion publik, shfrytëzimin e figurave kombëtare e fetare për interesa ditorë dhe marifeteve të ngjashme që s’po shkoqiten qysh nga mbarimi i luftës.
Pra, mund të gjendet diku ndonjë pëlhurë që mbulon turpërimin që po i bëhet këtij vendi?
Unë nuk di. Duhet pyetur dikë që di, dikë që me meritë duartrokitet.
Në folenë e gjuhës
Shkruan: Musa Bushrani
Kur e lakove emrin kurora e gjuhës zuri vend mbi kokën tënde
Si me pas qenë hije Marashi
Erdhën zogj të tjerë plima-plima
Në lisin tënd çelën vezët e tyre ndërtuan foletë
Pastaj filloi shtegtimi i fjalës së re
Ramjet dhe ngritjet
I mbaje zogjtë e rinj në duar duke ua treguar kaltërsinë ae qiellit
Fluturon, fluturoje, fluturove, ke fluturuar, kishe fluturuar, pate fluturuar
Erdhi nata e mirë me u përshëndet me ty
Diku në stacionin e fjalëve
Kur po flatroje migrimin
Ndahet nga jeta profesori, Abdullah Zymberi
Është ndarë nga jeta prof.dr. Abdullah Zymberi.
Ai, ndërroi jetë pas një sëmundje të rëndë.
Zymberi, deri në pensionim, ka qenë ligjërues i Gjuhës, në Universitetin e Prizrenit./PrizrenPress.com/
Prizren: Cemil Luma dorëhiqet nga të gjitha funksionet dhe nga anëtarësia e KTAP
Me një letër drejtuar Zyrës për Regjistrimin e Partive Politike të Komisionit Qendror të Zgjedhjeve, njëri nga themeluesit e Partisë Turke të Drejtësisë së Kosovës (KTAP), në cilësi të Kryetarit të Degës së KTAP-së në Prizren, njofton për dorëheqje.
Në fillim të letrës Luma thotë: “në vitin 2013, në një kohë kur komunitetit turk në Kosovë tashmë nuk po arrinte të përfaqësonte interesat e saj politike përmes subjekteve politike dhe ballafaqohej me sfida të rënda, ne, një grup i veprimtarëve të komunitetit turk që jetojmë në Kosovë, vendosëm të themelojmë Partinë Turke të Drejtësisë së Kosovës (KTAP). Qëllimi i themelimit të KTAP-së ishte që të krijohen kushtet për zgjidhjen e problemeve të grumbulluara të komunitetit turk në Kosovë, përmirësimin e jetës së pjesëtarëve të komunitetit turk (përfshirë arsimin, shëndetësinë dhe zhvillimin ekonomik) dhe integrimin e plotë të komunitetit turk në shoqërinë kosovare njëkohësisht duke e ruajtur, kultivuar dhe promovuar vlerat e komunitetit turk në Kosovë”.
Sipas Lumës, “vazhdimi i tensioneve politike në mesin e komunitetit turk në Kosovë, veprimet e ulëta të personave të caktuar të cilët veprojnë në emër të komunitetit turk në Kosovë, dëmtimi i qëllimshëm i vlerave të komunitetit turk në Kosovë shkaktuan izolim të mëtejmë të komunitetit turk në Kosovë. Të gjitha këto veprime më detyruan që të distancohem nga veprimet e individëve dhe grupeve të caktuara të interesit të cilët në emër të përfaqësimit të popullatës turke të Kosovës kanë uzurpuar pozita dhe funksione dhe vazhdojnë t’i sjellin dëme të mëdha vetë komunitetit turk në Kosovë”.
Ai më tej në këtë letër thotë se jep “dorëheqje nga të gjitha funksionet dhe nga anëtarësia në Partinë Turke të Drejtësisë së Kosovës (KTAP). “Nuk dua të jem pjesë e proceseve, vendimeve dhe grupeve të cilat në vazhdimësi shkelin interesat e komunitetit turk në Kosovë. Nuk dua të jem pjesë e proceseve, vendimeve dhe grupeve të cilët në vazhdimësi shkelin ligjet e Republikës së Kosovës” thotë ai ndërsa më poshtë paraqet disa shqetësime personale.
“Krahas kësaj, shkruan Luma, dëshiroj të Ju njoftoj se që nga mbledhja e konstituive e Kuvendit të Partisë Turke të Drejtësisë së Kosovës (KTAP)e mbajtur në vitin 2013, asnjëherë më nuk është mbajtur mbledhja e organit më të lartë të KTAP-së. Duke vepruar në këtë mënyrë, Kryetari i KTAP-së z. Arif Bütüç ka shkelur të gjitha rregullat dhe procedurat e parapara për funksionimin e subjekteve politike dhe ka vepruar në kundërshtim me Statutin e KTAP-së. Andaj, Ju lus që të keni parasysh që dokumentet apo kërkesat të cilat janë dorëzuar gjatë kësaj periudhe në KQZ nga KTAP dhe të cilat kërkojnë miratim të Kuvendit të KTAP-së nuk janë autentike, nuk kanë validitet dhe si të tilla janë të falsifikuara”.
Cemil Luma në mandatin që po përfundon ishte për katër vjet anëtar i KK të Prizrenit si përfaqësues i këtij subjekti politik. /Gazetaere.com/
Në Prizren, mbrëmje bamirësie për Manolja Kabashin
Aktivistë dhe qytetarë të Prizrenit organizojnë mbrëmjen e bamirësisë për Manolja Kabashin, vajzën 22 vjeçare nga Prizreni e cila aktualisht është duke u trajtuar për leukemi në një spital në Stamboll të Turqisë.
Mbrëmja e bamirësisë mbahet më 9 Shtator 2017 dhe fillon në orën 19.00, në Kinemanë Lumbardhi në Prizren.
“Kjo mbrëmje përkrahet zyrtarisht nga dy shoqatat e afaritstëve të Prizrenit, derisa platforma mediale kallxo.com do të ofrojë mbulesën mediale. Përkrahëse të këtij organizimi janë edhe ndërmarrjet shërbyese hoteliere të qytetit, kafeteritë dhe depot e pijeve”, thuhet në njoftimin e grupit organizues, përcjell PrizrenPress.
“Gjatë mbrëmjes së bamirësisë do të performojnë dy bende muzikore, Kuarteti Pentagram dhe Jericho. Ndërsa në fillim të mbrëmjes do të organizohet edhe audicioni me piktura dhe fotografi të dhuruara nga piktorë dhe fotografë të njohur të Kosovës. Mbrëmja do të jetë e hapur për publikun, ndërsa për pjesën e audicionit ne kemi ftuar personalitete nga komuniteti afarist, partitë politike, institucionet publike, përfaqësitë diplomatike, organizatat e shoqërisë civile, akademia dhe media”.
“E gjithë mbrëmja do të transmetohet drejtpërdrejtë në platformën mediale kallxo.com, ndërsa të gjitha mjetet e tubuara do t’i dhurohen familjes së Manolja Kabashit për t’i mbular shpenzimet e shërimit”. /PrizrenPress.com/
Vetëvendosje! në Malishevë mobilizohet për zgjedhjet lokale
Lëvizjes Vetëvendosje! Qendra në Malishevë ka mbajtur dje takim me kandidatin për kryetar të Komunës së Malishevës dhe kandidatët për Kuvend Komunal, në përgatitje dhe mobilizim për zgjedhjet e 22 tetorit.
Në këtë takim ka marrë pjesë edhe lideri Albin Kurti.
“Takim i përbashkët me kandidatin për kryetar të Komunës së Malishevës dhe kandidatët tanë për Kuvend Komunal, në përgatitje dhe mobilizim për 22 tetorin, ditën kur mbaron qeverisja e prapambetur dhe fillon epoka e re për Malishevën dhe qytetarët e saj.
Të afërt me qytetarët, pranë tyre dhe bashkë me ta, do të sjellim ndryshimin e munguar por të shumëpritur”, thuhet në komunikatën e LVV-së në Malishevë. /PrizrenPress.com/
Në Prizren qytetari gjen dy pushkë në murin e oborrit
Një qytetar në Prizren duke pastruar disa mbeturina ka gjetur dy pushkë automatike AK-47, në murin oborrit të një shtëpie, pronë e serbëve.
“Ankuesi mashkull K/Shqiptar ka raportuar se duke pastruar disa mbeturina, në murin e oborrit të shtëpisë pronë e dy të dyshuarve meshkuj K/Serb, ka gjetur dy pushkë automatike AK-47 të dëmtuara dhe jashtë funksionit”, thuhet në raportin e Policisë, përcjell PrizrenPress.
Njësitet policore kanë dalë në vendin e ngjarjes dhe konfiskuar armët e cekura.
Sipas Policisë rasti është duke u hetuar./PrizrenPress.com/