Juria e organizatorit të festivali “Zambaku i Prizrenit” në përbërje: Xhevdet Gashi, Besnik Krajku, Krist Lekaj dhe Osman Goranci (për tekst), ka përzgjedhur këngët që do të jenë pjesë e edicionit të 29 të festivalit të këngës së vjetër qytetare “Zambaku i Prizrenit”.

Drejtori i Studio Helix, Istref Krasniqi njofton se pas organizimit të suksesshëm të edicionit të vitit të kaluar të “Zambakut të Prizrenit”, këtë vit interesimi i kompozitorëve për pjesëmarrje në edicionin e 29 kanë qenë shumë i madh.

“Organizimi i suksesshëm i edicionit të kaluar nga Studio Helix ia ka kthyer namin festivalit dhe këtë vit në adresën tonë kanë ardhur 25 këngë, nga të cilat juria ka përzgjedhur 15 këngë. Juria e ka përzgjedhur një këngë më shumë këtë vit, sepse tradicionalisht në festival paraqiten 14 këngë. E kemi bërë këtë përjashtim sepse kompozimet që kanë arritur janë me vlera të mirëfillta të natyrës së festivalit” shprehet Krasniqi.

Krasniqi i falënderon të gjithë kompozitorët për pjesëmarrje dhe shpreh keqardhje që rregullat e festivalit kërkojnë numër të caktuar të këngëve.

“Edhe këngët që kanë mbetur jashtë edicionit të 29 kanë vlera, por juria ka përzgjedhur kompozimet më të mira” tha Krasniqi.

Krasniqi shprehet i bindur se festivalit “Zambaku i Prizrenit” po i kthehet rëndësia që e kishte, prandaj, edhe për faktin se vitin e ardhshëm është edicioni jubilar i 30, do t’i propozoj Kuvendit Komunal që “Zambaku i Prizrenit” të mbahet dy netë.

“Sivjet “Zambaku i Prizrenit” do të jetë edhe më cilësor dhe vitin e ardhshëm presim interesim edhe më të madh të kompozitorëve, prandaj ky festival e meriton që të rritet dhe vitin e ardhshëm të mbahet për dy net” shprehet i bindur Krasniqi.

Krasniqi njofton se edhe për festivalin “Fluturat” dhe Rrock live, kanë arritur kompozime të mirëfillta dhe janë përzgjedhur këngët.

Edicioni i 29 i festivalit “Zambaku i Prizrenit”, edicioni i 19 i festivalit Fluturat dhe Rrock live do të mbahet në fund të muajit shtator.

Këngët e përzgjedhura për edicionin e 29 të festivalit “Zambaku i Prizrenit”

1. Lum Halabaku me këngën “Shpresë”

2. Gjergj Kaqinari me këngën “Shekëlqimi në bar”

3. “Besim Berisha me këngën “Balada me numër X”

4. Tomor Berisha me këngën “O Zambak lule në parajsë”

5. Arsim Kryeziu me këngën “Vitet po kalojnë”

6. Menan Kiseri me këngën “Kujtimet e rinisë”

7. Nexhat Rexha me këngën “Trëndafilin une e zgjodha”

8. Gazmend Kraja me këngën “Zambaku e lulebora”

9. Ylli Kalaja me këngën “Sytë e zi vetull gjilpanë”

10. Nexhat Macula me këngën ” “Loti”

11. Ylli Ramzoti me këngën “Peisazh pranveror”

12. Artan Bakija me këngën “Elegji për dashurinë”

13. Shefqet Hoxha me këngën “Gradu ljubavi” (Qyteti i dashurisë)

14. Hysein Kazaz me këngën “Ugurlar Olsun”

15. Edon Ramadani me këngën “Violina e vjetër”

As edhe një hap konkret nuk është bërë për realizimin e idesë që para objektit të Fakultetit të Arteve të Universitetit të Prishtinës, të vihet një bust i aktorit Faruk Begolli, i cili ishte edhe ligjërues i këtij institucioni.

Ka kaluar gati një vit prej kur aktori e producenti Fatmir Spahiu e kishte shpalosur idenë që Begolli të nderohet me një bust, shkruan sot “Koha Ditore”.

Ideja ishte përkrahur edhe nga dekani i Fakultetit të Arteve, regjisori Agim Selimi. Por sot e asaj dite nuk është bërë asgjë në këtë drejtim.

Madje, kjo iniciativë nuk është diskutuar as në gushtin e këtij viti, kur edhe u shënua 10-vjetori i vdekjes së aktorit që u lind në Pejë më 14 shkurt 1944.

Dekani i Fakultetit të Arteve, Agim Selimi ka thënë se nuk ka diçka konkrete për këtë nismë…

“Politikanët e vrasin kulturën sepse e përçmojnë kulturën, por edhe sepse ia kanë frikën”. Një libër për “vrasësit e kulturës” për t’u përkthyer edhe në shqip: Në librin po përkthehet tanimë në disa gjuhë, “Dobia e të padobishmes. Manifest. Me një ese nga Abraham Flexner” (2013), profesori dhe filozofi kalabrez Nuccio Ordine, i njohur deri më parë si specialist i Giordano Bruno-s, ka mbledhur duke i thirrur në ndihmë mendimtarët e mëdhenj të të gjitha epokave për t’u ngritur kundër shkatërrimit të kulturës.

Nga parathënia e tij: “Dija përbën në vetvete një pengesë kundër delirit të të plotfuqishmërisë së parasë dhe të utilitarizmit. Gjithçka mund të blihet, afërmendsh. Që nga parlamentarët deri te gjyqtarët, që nga pushteti deri te suksesi: çdo gjë ka një çmim. Por jo dija: çmimi që duhet paguar për të ditur është i një lloji krejt të veçantë. As edhe një çek i bardhë nuk të mundëson të fitosh mekanikisht atë që mund vetëm të jetë fryti i një përpjekjeje individuale dhe i një pasioni të pashtershëm. Në fund të fundit, pa motivime të mëdha të brendshme, as titulli më prestigjioz i fituar me të holla nuk të sjell asnjë dije të vërtetë dhe nuk të shkakton asnjë metamorfozë të vërtetë të shpirtit”, transmeton zeri.info.

* * *

“Por ka edhe diçka më shumë. Vetëm dija mund t’i sfidojë një herë e mirë ligjet e tregut. Unë mund t’i ndaj bashkërisht me të tjerët dijet e mia pa u varfëruar për vete. Mund t’i mësoj një nxënësi a një studenti teorinë e relativitetit ose të lexoj tok me të ndonjë faqe të Montaigne-it duke i dhënë jetë mrekullisë së një procesi virtuoz gjatë të cilit pasurohen edhe ai që jep, edhe ai që merr”.

* * *

“Nëse e lëmë të vdesë “produktin falas”, d.m.th. kulturën, nëse heqim dorë nga fuqia gjeneruese e ‘të padobishmes’, nëse dëgjojmë vetëm këngën zindjellëse të sirenave që na joshin të ndjekim përfitimin, atëherë do të jemi të aftë vetëm të prodhojmë një kolektivitet të sëmurë dhe të pakujtesë që, i rravguar, do ta humbë më në fund kuptimin e vetvetes dhe të jetës. Dhe, në atë moment, kur shkretëtirëzimi i shpirtit do të na ketë tharë krejt, do të jetë përnjëmend e vështirë të përfytyrojmë që një ‘homo sapiens’ injorant të mund të lozë ende ndonjë rol në detyrën për ta bërë më njerëzor njerëzimin”.

Nga: Nuccio Ordine, La utilidad de lo inútil. Manifesto. Con un ensayo de Abraham Flexner, ed. Acantillado 2013.