Besnik Velija, i akuzuar për grabitje, ka dhënë fjalën e tij përfundimtare të premten në Gjykatën Themelore në Prizren.

Velija, ka deklaruar se po gjykohet padrejtësisht sepse, sipas tij, prokuroria nuk ka arritur të dëshmojë se ai ka kryer grabitje në rastin “Las Vegas” dhe “Western Union”, për të cilat raste ai është shpallur fajtor në shkallë të parë, por që kjo lëndë ishte kthyer në rigjykim nga Gjykata Supreme e Kosovës.

Ai ka thënë se është i pafajshëm në të dy rastet, duke shtuar se organi i akuzës ka fshehur provat të cilat atë e shfajësojnë. I akuzuari Velija, ka kërkuar përsëritjen e gjykimit edhe në rastin “Las Vegas”, pasi thotë se është dënuar padrejtësisht, e këtë e dëshmon sipas tij, edhe aktgjykimi i Gjykatës Supreme në këtë rast.

Po ashtu edhe mbrojtësi i të akuzuarit, avokati Blerim Mazreku, ka kërkuar nga trupi gjykues që klientin e tij ta lirojë nga akuza, sepse sipas tij, një gjë e tillë nuk është arritur të dëshmohet nga ana e prokurorisë.

Mazreku ka thënë se gjatë rigjykimit të këtij rasti, gjykata nuk ka mundur të mënjanojë parregullsitë e gjetura nga Gjykata Supreme e për të cilat e ka kthyer rastin në rigjykim. Sipas tij, gjatë rigjykimit, gjykata nuk ka mundur të sigurojë deklaratën e të akuzuarit tjetër Remzi Kuqi, i cili është në arrati, nuk e ka dëgjuar të dëmtuarën dhe dëshmitarët tjerë, e po ashtu nuk ka administruar ndonjë provë tjetër.

Avokati Mazreku, ka theksuar se klienti i tij, akuzohet për dy raste të grabitjeve vetëm duke u bazuar ne instinktet e policisë dhe prokurorisë, të cilat kanë nxjerrë paralele sipas mendimit të tyre në mes ngjashmërive të rasteve “Las Vegas” dhe “Western Union”.

Por, ai ka thënë se një gjë e tillë mund të bëhet vetëm duke bërë ekspertiza profesionale nga profesionistë të fushave përkatëse që analizojnë dhe konkludojnë me siguri të plotë se kemi të bëjmë me të njëjtit persona.

Në anën tjetër, prokurori i rastit, Mehdi Sefa, ka qëndruar pranë aktakuzës duke shtuar se gjatë seancave të gjykimit të parë dhe rigjykimit, me administrimin e provave dhe dëgjimin e dëshmitarëve dhe ekspertëve është dëshmuar se i akuzuari ka kryer veprën penale për të cilën akuzohet. Prokurori Sefa, po ashtu ka kërkuar që pas plotfuqishmërisë së aktgjykimit në këtë rast, i akuzuari Velija të dëbohet nga vendi dhe t’i ndalohet për një kohë që i njëjti të hyjë në territorin e Kosovës.

Kryetari i trupit gjykues, Artan Sejrani, shpalljen e aktgjykimit  e ka caktuar për 31 korrik 2017, në ora 13:30.

Ndryshe, ky rast zhvillohet në bazë të aktakuzë së Prokurorisë Themelore në Prizren, sipas së cilës i akuzuari Besnik Velija ngarkohet me veprën penale të grabitjes në bashkëkryerje.

Sipas aktakuzës i akuzuari Velija së bashku me të akuzuarin tjetër i cili është na arrati,  Remzi Kuqi, kanë hyrë me dhunë në firmën “Nisa” e cila kryente shërbime të transferit të parave për “Western Union” dhe duke e kërcënuar me armë zjarri kanë marrë nga kasaforta rreth 2.500 euro.

I akuzuari Velija, më 4 maj 2016, është gjetur fajtor nga Gjykata Themelore në Prizren, me ç’rast është dënuar me 3 vite burgim efektiv.

Poashtu edhe Gjykata e Apelit më 16 shtator 2016, ka vërtetuar aktgjykimin e shkallës së parë dhe ka refuzuar ankesat e mbrojtjes si të pabazuara.

Por mbrojtja e të akuzuarit, ka atakuar vendimin e Apelit në Gjykatën Supreme, për shkelje të procedurës penale dhe ligjit penal, me ç’rast Supremja ka vendosur që rasti të kthehet në rigjykim në shkallë të parë.

Sipas Gjykatës Supreme në këtë rast nuk janë vërtetuar saktë provat nga vendi i ngjarjes pasi që sipas tij ekzekutorët kanë mbajtur maska dhe nuk mund të vërehen nga kamerat se kush janë. Tutje, në Aktgjykimin e Supremes, thuhet se as punëtorja e lokalit të sulmuar nuk ka mundur të bëjë identifikimin e personave që e kanë sulmuar, e poashtu i akuzuari tjetër është arratisur dhe nuk e ka inkriminuar të akuzuarin si bashkëkryerës.

Ndërsa, sipas Supremes, nuk është e mjaftueshme arsyetimi i gjykatës se i akuzuari ka pasur veshë një trenerkë me vija, e cila, poashtu është përdorur në një rast tjetër të grabitjes (Las Vegas) dhe se është vërtetuar se është e të akuzuarit në fjalë, për të cilin rast poashtu nuk ka vendim përfundimtar të çështjes.

Një shtetas i Serbisë i komunitetit goran është arrestuar në fshatin Vranisht të Dragashit, pasi që gjatë kontrollimit të shtëpisë së tij i është gjetur dhe konfiskuar një pistoletë me 28 fishek, një palë pranga, tre telefona mobil dhe disa dokumente të Republikës së Serbisë.

Me urdhër të prokurorit pas intervistimit i dyshuari është dërguar në mbajtje.

Kryetari i degës së LDK-së në Prizren, Haxhi Avdyli, ka thënë se në mbledhjen e LDK-së është kërkuar llogaridhënie për rezultatet e zgjedhjeve të 11 qershorit.

Avdyli ka folur edhe për ish-deputetin e kësaj nëndege në Kuvendin e Kosovës, Hatim Baxhakun, duke thënë se ai duhet të vlerësohet nga partia ngase nuk e kishte votuar Hashim Thaçin për President.

Ai, duke folur për mundësinë e kandidimit të Driton Selmanajt për kryetar të Prizrenit nga LDK-ja, ka thënë se kryesia e degës unanimisht e ka propozuar Hatim Baxhakun kandidat për Kryetar të Prizrenit.

Për Selmanajn ai ka thënë se është një personalitet i çmuar, por se kontributin e tij duhet ta japë në Kuvendin e Kosovës.

E, kur ka folë për votimin e kandidateve të PAN-it për kryetar të Kuvendit të Kosovës, Avdyli ka thënë se LDK nuk e voton Kadri Veselin, ngase sipas tij, ai nuk i ka udhëheq si duhet seancat e Kuvendit.

Më tej, ai ka thënë se “Kadri Veseli i ka prishe kontratat me LDK-në dhe i ka prish urat e bashkëpunimit”, ka thane Avdyli, në emisionin “Rrokum Roll” të TV Rrokum.

Ai gjithashtu ka thënë se nuk e votojnë as Ramush Haradinajn derisa është me PDK-në.

NISMA për Kosovën, dega në Prizren, ka akuzuar partnerët qeverisës të komunës për mos emërtimin e rrugëve dhe të shesheve nëpër qytet dhe fshatra përreth.

NISMA, përmes një reagimi dërguar mediave, ka thënë se qeveria e PDK-së dhe partnerëve të saj të koalicionit, të infektuar nga sëmundja e tenderomanisë, kanë lënë komunën e Prizrenit pa emërtimin e rrugëve dhe të shesheve.

“Të infektuar nga sëmundja e tenderomanisë, qeveria e PDK-së dhe partnerëve të saj të koalicionit kanë lënë komunën e Prizrenit si të vetmen në Kosovë, pa emërtimin e rrugëve dhe shesheve nëpër qytet dhe fshatra përreth. Derisa edhe qytetet më të vogla në Kosovë e kanë përfunduar vendosjen e tabelave me emra nëpër rrugë dhe sheshe, Prizreni akoma po vazhdon të mbetet peng në këtë drejtim. Krejt kjo si rezultat i ndikimit të njësive parapolitike për dhënien e tenderëve”, thuhet në reagimin e këtij subjekti politik, përcjell PrizrenPress.

“Prizreni sot, si dhe fshatrat e kësaj komune, jo vetëm që ende nuk kanë tabela me emërtime të rrugëve, po ashtu ky qytet po vazhdon me mospasjen edhe të shenjëzimit horizontal”.

“Arsyeja e shtyrjes e më shumë se një viti dhe anulimi i tenderit deri tek përshtatja për njerëzit e lidhur me parapolitikën e partive në pushtet, e bënë qeverisjen Muja dhe koalicionin qeverisës të diagnostikuar nga infektimi tenderoman”.

“Kuvendi Komunal përmes një komisioni në të cilin ka dhënë kontribut edhe Dega e NISMA në Prizren, para një viti ka miratuar vendimin për emërtimin e rrugëve dhe shesheve të qytetit dhe fshatrave, si kriter i kërkuar po ashtu edhe nga Bashkësia ndërkombëtare, por për fat të keq qeveritarët e korruptuar sikur në rastet tjera edhe në këtë rast, më shumë janë të interesuar për xhepat e tyre, sesa për shërbimin e nevojshëm ndaj qytetarëve”. /PrizrenPress.com/