Drejtoria e Shërbimeve Publike në Prizren në mbështetje të JAICA-s japoneze ka përfituar konsensus për Kornizën e punës së master-planit për menaxhimin e mbeturinave të ngurta në komunën e Prizrenit, me qëllim që të kemi një shoqëri më të shëndoshë. Kjo komunë ka hartuar planin pesë vjeçar të menaxhimit të mbeturinave duke synuar deri në vitin 2020 të mos ketë të tilla në këtë qytet. Drejtori i Drejtorisë së Shërbimeve Publike në Prizren Sulltan Badallaj thekson se ka pasur një shqetësim si drejtor se tashmë qytetarët e ndoshta edhe kompani të papërgjegjshme kanë krijuar rrethana për deponi ilegale duke derdhur sidomos mbeturinat të ngurta vend e pavend. Badallaj është shprehur për “Kosova Sot” se në Prizren janë krijuar deponi të egra sidomos për mbeturinat e ngurta.

Shkallë e ulët e grumbullimit të mbeturinave të ngurta

Badallaj tha se si drejtori bashkë me Drejtorinë e Inspektorateve kanë dalë në terren dhe kanë bërë evidentimin e këtyre rasteve. “Ne do të mundohemi të sensibilizojmë ata që mos të hedhin mbeturina të ngurta kudo, ose do të pasojnë gjobat”, është shprehur ai. Kurse drejtori i Inspektorateve në Prizren, Bujar Hasani, tregon se deponi të këtilla nga të pandërgjegjshmit janë krijuar tashmë duke shtuar se kanë menduar t’i vrojtojmë me kamerë, kurse dënimet do të jenë drakonike për ata që e keqpërdorin natyrën apo rasti si te shtrati i Lumbardhit. Ai ka thënë se po përgatisin planin afat gjatë të master-planit për menaxhimi e mbeturinave dhe në këtë plan janë edhe parashikimet e gjenerimit të mbeturinave në të ardhmen. Ai ka shtuar se Republika e Kosovës ka kërkuar nga Qeveria japoneze asistencë teknike në fushën mjedisore. Në përgjigje të kësaj, JAICA ka kryer studimin e Menaxhimit Mjedisor. Përmes rezultateve të këtyre studimeve, JAICA, ka gjetur se Menaxhimi i Mbeturinave të ngurta është njëra nga çështjet më kritike në Kosovë. Shkalla e grumbullimit të mbeturinave ka qenë tejet e ulët dhe shërbimi i grumbullimit nuk ka qenë i mjaftueshëm. Për mbeturinat e ngurta u caktua edhe lokacion në Zhur, por qytetarët dhe kompanitë pak po i përmbahen.

Situata të rënda në komunë

Kurse Drita Millaku, nga lëvizja ‘Vetëvendosje’, theksoi se krijimi i deponive të egra të mbeturinave të ngurta shkakton kaos për Prizrenin. “Ne vazhdimisht kemi kërkuar dhe kërkojmë, që ky kaos të ketë një zgjidhje. Sepse tashmë ato vërtetë janë duke krijuar situata të rënda për komunën tonë. Unë dua me këtë rast të akuzojë tri Drejtori, atë të Shërbimeve Publike, atë të Emergjencës dhe Mirëqenies për Punë Sociale”, është shprehur ajo. Shton se këto drejtori janë përgjegjëse për këtë situata të deponive të egra. Edhe njëri nga pronarët e kësaj deponie, Jakup Hoxha, nga Zhuri, tregon për gazetën se është detyrë e komunës këtë problem ta kryejë ashtu si duhet. Qeveria e Kosovës ka formuluar strategji për Menaxhimin e Mbeturinave për periudhën 10- vjeçare (2010-2020) si politika zhvillimore për Menaxhimin e Mbeturinave të Ngurta. Strategjia përmend arritjet e pakësimit të ndotjes mjedisore të shkaktuar nga mbeturinat, përmirësimin e shërbimit të grumbullimit në tërë vendin, realizimin e një cikli material të shëndoshë përmes 3R (ripërdorimit dhe riciklimit të Mbeturinave). Edhe shoqëria civile me këtë rast ka reaguar ashpër për mbeturinat e ngurta. Valon Xhabali nga “Ec Ma Ndryshe” thotë se krijimi i atyre deponive të egra e prish imazhin dhe natyrën e Prizrenit. Kreu i degës së LDK të Prizrenit, Haxhi Avdyli, theksoi se është urgjente eliminimi i të gjitha deponive të egra.

(Kosova Sot)

Zyrtari policor, Edmond Villa, në seancën gjyqësore të së premtes ku po gjykohen Shaqir Likaj dhe Hajdin Likaj për vrasjen e vëllait të tyre, Kujtim Likaj, ka thënë se kur kishte arritur në vendin e ngjarjes në fshatin Krajk, kishte parë dy trupa në tokë. I njëjti deklaroi se njëri prej trupave ishte i palëvizshëm, ndërsa tjetri murmuriste nga dhimbjet.

Dëshmitari Villa, deklaroi se fillimisht me një peshqir ka larguar armën afër të akuzuarit Shaqir Likaj, i cili poashtu kishte qenë i plagosur. Ai tha se pasi që e ka siguruar armën, ka ardhur emergjenca dhe e kanë marrë Shaqirin.

Në këtë seancë kishte për të dëshmuar edhe i dëmtuari Flamur Likaj, i cili është djali i të ndjerit, Kujtim Likaj, por i njëjti ka kërkuar që dëshmia e tij të merret në një seancë tjetër pasi që për arsye emocionale nuk është në gjendje të dëshmojë.

Poashtu në këtë seancë kishte për të dëshmuar edhe eksperti mjekoligjor Naim Ukaj dhe eksperti i balistikës Hazir Kelmendi. Mirëpo në seancë nuk ishte i pranishëm eksperti Ukaj, i cili ka lajmëruar gjykatën se do të mungojë për shkak të një mbledhje të rëndësishme. Ndërkaq, eksperti Kelmendi ka kërkuar që të deklarohet rreth ekspertizës së bashku me ekspertin Ukaj, pasi që kanë lidhshmëri ekspertizat.

Në këto rrethana, trupit gjykues, i kryesuar nga gjyqtari Xhevdet Elshani, ka miratuar kërkesat e të dëmtuarit Flamur Likaj dhe ekspertit Hazir Kelmendi, të cilët janë caktuar që të deklarohen në seancën e radhës të 15 majit 2017, më fillim në ora 9:00.

Ndryshe, ky rast zhvillohet në bazë të aktakuzës së ngritur nga Prokuroria Themelore në Prizren, me të cilën, të akuzuarit Shaqir dhe Hajdin Likaj, i ngarkon me veprën penale të vrasjes së rëndë, në bashkëkryerje.

Sipas aktakuzës, rasti kishte ndodhur pas mosmarrëveshjeve të mëhershme, dhe fjalosjes në ditën kritike në mes të akuzuarve dhe të ndjerit Kujtim Likaj. Fjalosja kishte të bënte lidhur me kalimin e veturave të dasmorëve në një rrugicë të përbashkët, nga e cila kanë filluar të shtinë me armë zjarri të akuzuarit dhe i ndjeri.

Me këtë rast, ka mbetur i vdekur Kujtim Likaj dhe është lënduar rëndë djali i tij Flamur Likaj. Poshtu edhe të akuzuarit kanë qenë të plagosur nga armët e zjarrit.

Aktakuza i ngarkon edhe të akuzuarit Hajdar, Isuf, Shpejtim dhe Shkëlqim Likaj, me veprën penale “pjesëmarrje në rrahje”./betimiperdrejtesi/

Tre persona janë arrestuar dhe dërguar në burgin e Prizrenit.

Arrestimi i  tyre është bërë me urdhër të Gjykatës Themelore në Prizren.

Komunikata pa ndërhyrje e Policisë së Kosovës

•    Rr. “Xhevat Berisha”, Prizren 04.05.2017-18:10. Në bazë të urdhëresës së lëshuar nga gjykata, është arrestuar një mashkull K/Shqiptar dhe i njëjti është dërguar në burgun e Prizrenit.

•    ANP Adem Jashari, Prishtinë 04.05.2017-23:00. Në bazë të urdhëresës së lëshuar nga gjykata, është arrestuar një mashkull K/Shqiptar dhe i njëjti është dërguar në burgun e Prizrenit.

•    PKK Vërmicë 04.05.2017-22:10. Në bazë të urdhëresës së lëshuar nga Gjykata Themelore Prizren, është arrestuar një mashkull K/Shqiptar dhe i njëjti është dërguar në mbajtje.

Tre persona të dyshuar për vjedhje janë arrestuar në Prizren.

Policia e Kosovës, njofton se të arrestuarit me vendim të prokurorit janë dërguar në mbajtje. /PrizrenPress.com/

Dibran Gashi që akuzohet se i mori nga xhepi telefonin të dëmtuarës më inicialet A. H. tha se këtë telefon e ka blerë.Kur doli para gjykatës në Prizren, Dibran Gashi, që akuzohet se i mori telefonin të dëmtuarës më inicialet A. H., duke thënë se atë telefon të përdorur e kishte blerë nga një person tjetër.

Prokuroria e shtetit akuzon Dibran Gashin se më datën 28 janar të vitit të kaluar në rrugën “Remzi Ademaj” në Prizren, të dëmtuarës A. H. për përfitim pasuror ia ka marrë nga xhepi telefonin e markës “Samsung”.

Në aktakuzë thuhet se e dëmtuara ishte duke ecur në rrugë, ndërsa i akuzuari e kishte shfrytëzuar pakujdesinë e saj për t’ia marrë telefonin.Por pasi iu lexua aktakuza nga prokurorja Sahide Sefa, Dibran Gashi mohoi fajësinë.

Ai u pajis me aktakuzën dhe provat mbi të cilat prokuroria e bazon atë, ndërsa gjyqtarja Teuta Krusha e njoftoi Gashin me të drejtat e tij, duke i treguar se ka afat prej 30 ditësh për të kundërshtuar provat e aktakuzës dhe për të kërkuar hedhjen poshtë të saj./Kallxo.com

Deputeti i Nismës Zafir Berisha thotë se lëvizja e lirë në BE, nuk i zgjidhë problemet e shumta në Kosovë.
Sipas tij, liberalizimi i vizave për qytetarët e Kosovës, është një veprim strategjik dhe politik i Bashkimit Evropian që megjithatë ka qenë dhe është shumë domethënës për shtetin e Kosovës dhe qytetarët e saj.

“Mirëpo, liberalizimi i vizave nuk nënkupton zgjidhjen e shumë problemeve siç janë ato ekonomike, politike e sociale, kjo nuk nënkupton që këto probleme të zgjidhen me “shkopin magjik””, shkruan Berisha në Facebook

“Kosova edhe pas liberalizimit të vizave do të ketë një president hajdut I cili në pozicionin që është ka ardhur me vota të kontrabanduara dhe metoda makiavelist”.

“Kosova do të ketë një kryeministër me 70 dosje në organet e drejtësisë për krim të organizuar dhe korrupsion, një kryeministër i cili ka bërë marrëveshje antikushtetuese dhe tepër të dëmshme me Serbinë në disfavor të vendit”.

“Kosova do të vazhdoj të lëngoj nga korrupsioni nga keqpërdorimi i parasë publike, nga tjetërsimi i pronës shoqërore, me shërbime shëndetësore jashtë standardeve, me arsim të përdhosur dhe me shërbime tjera publike të cilat janë privatizuar nga parapolitika e partive në pushtet dhe janë vënë në shërbim të individëve dhe grupeve të caktuara”.

“Kosova do të vazhdoj të jetë shtet jo funksional ku institucionet e Kosovës nuk kanë qasje në një pjesë të territorit të vendit, ku strukturat paralele serbe po e sfidojnë edhe më tej shtetin e Kosovës”./PrizrenPress.com/