Manipulimi me listat e veteranëve të luftës së UÇK-së e ka sjellë buzë kolapsit financiar Kosovën. Këto abuzime të miratuara nga Qeveria, po cilësohen si një nga sjelljet më joserioze të kësaj klase politike në pushtet. Dyshohet se fryrja e listave është bërë përmes rrugëve korruptive dhe për qëllime elektorale, sa më shumë njerëz të futen në lista, aq më shumë vota për pushtetarët.

Megjithatë, kryetari i Komisionit qeveritar për verifikimin e statutit të veteranëve të UÇK-së, Agim Çeku, vazhdon të besojë se në këto lista nuk ka parregullsi aq të mëdha, sikur po raportohet në medie, dhe sikur po thuhet nga një grup i ishpjesëtarëve të UÇK-së, të cilët po vazhdojnë të protestojnë para Qeverisë, për shkak të moskryerjes së obligimeve, me arsyetim për mungesë buxheti, shkruan gazeta Kosova Sot.

Gjeneral Çeku thotë se u beson shumë komandantëve të tij, që e kanë bërë verifikimin e listave finale dhe e kanë dorëzuar në komision.

“Unë mendoj që kjo çështje mund të zgjidhet duke u rishikuar listat e përfituesve materialë, duke i rishikuar dhe hequr nga lista ata që janë duke përfituar pa të drejtë, sepse ne nuk e kemi pritur që të ketë një numër aq të madh të përfituesve, të cilët paraqiten dhe pretendojnë se janë të papunë. Pra, kjo listë e atyre që po përfitojnë pensione, të ardhura sipas ligjit, duhet të rishikohet me kujdes. Këtë e them, për faktin se që në fillim, kur i kemi pranuar të gjitha aplikacionet, vetëm 11 mijë aplikues patën deklaruar se janë të papunë, kurse tani në ndërkohë po dalin më shumë, po del se disa e kanë lëshuar punën vetëm për ta marrë pensionin dhe kjo ka qenë një situatë e papritur, që e ka bërë këtë çrregullim edhe të planifikimit buxhetor”, ka theksuar Çeku.

Abrashi: Nuk kemi para

Ministri i Punës dhe Mirëqenies Sociale, Arban Abrashi, ka informuar dje kabinetin qeveritar lidhur me mungesën e mjeteve te kategoria e pensioneve për veteranët e luftës.

“Ministria e Punës dhe Mirëqenies Sociale është në konsultime të vazhdueshme ditore me Ministrinë e Financave për gjetjen e këtyre mjeteve. Po flasim për mjete financiare vetëm për pagesën e muajit shtator, një minus prej 1.6 milion euro, të cilat jemi duke i kërkuar, por gjithashtu jemi në konsultime edhe për mjetet financiare për tremujorin e fundit me një faturë prej rreth 5 milionë euro në muaj. Besoj që shumë shpejt do të reagojmë për pagesën e këtij muaji, mungesën e fondit apo pagesave të pensioneve për muajin shtator, do të punojmë edhe për tremujorin tjetër për gjetjen e mjeteve shtesë”, u shpreh ai.

“Çështja e dytë që është ngritur në opinion ka të bëjë me pagesat e dyfishta të pensioneve. Ne kemi një rekomandim të Auditorit që të bëhen ndalesa për këto pensione. Mendojmë që ka paqartësi ligjore rreth kësaj çështjeje, por është dashur të veprojë administrata, shkaku i rekomandimit të prerë të Auditorit, por besojmë që gjatë javëve në vijim ne do të sjellim projektligj për skemat e pensioneve të ndryshme të financuara nga shteti ku do të definojmë edhe më qartë tek pensionet familjare dhe pensionet invalidore, sepse është prekur një numër i madh i familjeve të dëshmorëve të luftës, ku është ndërprerë njëra prej pensioneve. Prandaj, ne duhet të qartë- sojmë me propozimin e ri, të cilin shumë shpejt do ta sjellim në Kuvend”, tha ministri Abrashi. /Kosova Sot/

Nga sot (e premte), në Komunën e Malishevës po qëndron një delegacion nga qyteti i Sundernit nga Gjermania. Këtij delegacioni po i prinë i pari i Sundernit, Rahpl Brodel, i shoqëruar edhe nga drejtori për arsim i këtij qyteti dhe përgjegjësi për menaxhimin e ujërave.

Delegacioni, është pritur nga i pari i Malishevës, Ragip Begaj me bashkëpunëtor, ndërsa kjo vizitë zhvillohet në kuadër të bashkëpunimit të ndërsjellë, tash e disa vite me radhë.

Pas pritjes nga kryetari i komunës, delegacioni ka marrë pjesë edhe në seancën e rregullt të Kuvendit të Komunës së Malishevës, ku edhe ka mbajtur një fjalim rasti.

“Ne si popuj kemi një histori të përbashkët, pasi pas luftës, ne jemi ndihmuar nga miqtë tanë, dhe ashtu sikur kemi pasur ne nevojë për miq, ashtu keni nevojë edhe ju. Bashkërisht mund të punojmë dhe të shkëmbejmë përvojat tona”, tha mes tjerash kryetari Sundernit, Rahpl Brodel.

Kryetari i Komunës së Malishevës, Ragip Begaj, e ka falënderuar delegacionin nga Sunderni për vizitën në Malishevë, si dhe i ka falënderuar për bashkëpunimin e ndërsjellë mes dy qyteteve.

“Ne, nga lufta jemi dalë një vend tërësisht i shkatërruar, por me ndihmën e miqve ndërkombëtar, jemi ngritur, e në veçanti nga përkrahja e popullit gjerman, dhe për këtë ne ju falënderojmë dhe ju jemi mirënjohës”, tha Begaj.

Më pas, delegacioni nga Sunderni, të shoqëruar nga kryetari Begaj, kanë vizituar Qendrën e Kompetencës, gjimnazin, çerdhen për fëmijë, njësinë e Hidroregjonit Jugor dhe më pas edhe disa punime në ndërtimin e ujësjellësit për dymbëdhjetë fshatra të Malishevës.

Gjatë kësaj vizite tre ditore, do të vizitohen edhe vende tjera ku realizohen projekte të ndryshme, si dhe vendet turistike në Komunën e Malishevës dhe në vend.

Qëllimi i kësaj vizite, është vazhdimi i bashkëpunimit me dy qyteteve dhe shkëmbimi i përvojave, sidomos në fushën e arsimit dhe të menaxhimit të ujërave, pasi Sunderni, ka përvojë të mirë në këto dy fusha.

Në këtë pjesë të Gjermanisë, jetojnë dhe punojnë një numër i madh i shqiptarëve, sidomos nga Komuna e Malishevës, ku edhe është e formuar shoqata shqiptaro-gjermane, të cilën e drejton Fadil Bytyçi nga Shkoza e Malishevës, i cili edhe është iniciator i bashkëpunimit mes dy qyteteve. /PrizrenPress.com/

E premtja është dita e fundit që Indira Haliti doli para nxënësit e saj në Mamushë.

Kjo pasi që Drejtoria e Arsimit mori vendim ta largojë nga pozita e edukatores në institucionin parashkollor ‘Anadolu’.

Krejt kjo sipas saj i është bërë padrejtësisht. E nënshkrimet e tyre në ankesën e bërë i vënë vetëm 8 prindë bile sipas edukatores disa nga ta edhe u shantazhuan.

Haliti madje po thotë se gjithë këtë e nisi nënkryetarja për komunitete në Mamushë, Ganimete Sadiku. Atë, Haliti e akuzon se këtë veprim e ka ndërmarr në baza politike.

Por gjithë këto akuza i mohon Sadiku. Ajo e ka pranuar se jo gjithë nënshkruesit janë prindër të nxënësve të Halitit.

Me drejtorin e DKA-së në Mamushë, Klan Kosova nuk arriti të kontaktojë, pasi nuk ishte në komunë, e nuk u lajmërua për dy ditë as në telefon.

Por në vendimin për ta larguar Halitin nga puna, thuhet se pikërisht ankesat e prindërve janë arsyeja. As vet prindërit nuk kanë dashur të flasin para kamerave.

Prapa tyre, disa kanë thënë se e përkrahin edukatoren Haliti e disa jo. /Klan Kosova/

OJQ “Handikosi”, në partneritet me organizatën “Save The Children”, është duke e implementuar projektin ,,Edukimi cilësor gjithëpërfshirës për fëmijët me aftësi të kufizuara në edukimin parafillor dhe fillor, pa diskriminim”.

Projekti është trevjeçar tregon Ardita Sylbije- Gota. Ajo thotë se objektivat kryesore të projektit janë që deri në vitin 2018, së paku 45 deri në 50 fëmijë me aftësi të kufizuara të përfitojnë mundësi të përmirësuara për arsimin gjithëpërfshirës, të sigurt dhe me cilësi të mirë, si në edukimin parafillor, ashtu edhe në atë fillor, si dhe që këta fëmije me aftësi të kufizuara deri në vitin 2018 të regjistrohen dhe të përfitojnë nga cilësia e arsimit parafillor dhe fillor.

“Sa i përket arritshmërisë, me plot guxim mund të them se me ndihmën e pakursyer të zyrtarëve të Drejtorisë së Arsimit dhe mirëkuptimin e drejtorëve të shkollave, këtë vit në shkolla të rregullta janë përfshirë 16 fëmijë me aftësi të kufizuara. Kjo domosdo se na bënë krenarë që këta fëmijë të jenë të barabartë”, ka thënë ajo, shkruan gazeta “Kosova Sot”.

Kushtet e dobëta në shkolla

“Handikosi” tani me këto aktivitete bën promovimin e angazhimit në praktikë.

“Ne jemi bashkë me fëmijët me aftësi të kufizuara, të cilët prej shtatorit janë ulur për herë të parë në bankat shkollore. Kemi bërë edhe një vizitë në Drejtorinë e Arsimit, ku jemi takuar me drejtorin e Arsimit Zijadin Shemsedini, ku nga afër edhe kemi mësuar shumë gjëra sa i përket kësaj kategorie të këtyre nxënësve. Ne kërkojmë angazhimin e të gjithëve në rritjen e numrit të fëmijëve me aftësi të kufizuara në edukimin parafillor dhe atë fillor, sepse ky numër ende është i vogël në krahasim me numrin e fëmijëve që janë jashtë bankave shkollore”, ka thënë më tutje Gota.

“Për fat të keq, ka edhe shumë sfida që e përcjellin gjithëpërfshirjen, siç janë: mungesa e transportit të fëmijëve me aftësi të kufizuara në shkolla të rregullta, mungesa e mësuesve mbështetës, numri i madh i nxënësve në klasa, mungesa e asistentëve personalë, si dhe mungesa e statistikave të sakta se sa fëmijë në komunën e Prizrenit janë jashtë bankave shkollore etj.”, është shprehur ajo.

Përvojat e jashtëzakonshme të nënës dhe mësueses

Qamile Elshani është nënë e një fëmijë më aftësi të kufizuar dhe për “Kosova Sot” tregon përvojën e saj .

“Asgjë më të lumtur në botë nuk më bën se kur vajza ime shkon në klasë të parë në Piranë në shkollë fillore dhe me shokë e shoqe shoqërohet. Jemi nëna dhe zemra jonë bëhet mal, kur ajo bëhet e barabartë me fëmijët e tjerë”, theksoi ajo.

Kurse, këso kërkesa kanë edhe vetë fëmijët e të gjitha ato nëna që kanë fëmijët e këtillë. Mësuesja Selamie Thaçi, nga shkolla “Ardhmëria”, tregon se për pesë vjet ka pasur një nxënëse të kësaj kategorie dhe për “Kosova Sot” thotë se si ishte kjo eksperiencë.

“Më besoni se kam pasur përkushtim të madh ndaj asaj nxënëse, Diana Gashi. Ajo e meriton jo vetëm përkushtimin, por meriton shumë, ngase këta fëmijë dinë të duan, të respektojnë. Ajo tash lexon, shkruan dhe është e barabartë me fëmijët dhe shoqet e shokët e klasës. Ajo që më bën krenare është fakti se këtë dashuri ajo e ka kuptuar dhe ajo tani më konsideron si një nënë të dytë të saj, kurse prindërit e saj ishin tërësisht të përkushtuar ndaj saj dhe asaj asgjë në këtë botë nuk i ka munguar nga fëmijët e tjerë. Ajo është dhe do të mbetet dashuria ime më madhe në këto 21 vjet punë në arsim. Fëmijët e këtillë kanë aq shumë dashuri e respekt, saqë vetëm njeriu që punon me këta fëmijë e kupton pastërtinë shpirtërore të këtyre fëmijëve”, ka theksuar ajo për “Kosova Sot”. /Kosova Sot/