Kryetari i fshatit Randobravë, Hazer Shala, flet me admirim për shumë investime që janë bërë në këtë fshat, mirëpo shprehet se banorët kanë shumë kërkesa, por më me urgjencë janë kanalizimi i ujërave të zeza, si dhe bërja e një shtëpie të kulturës dhe ambulancës,raporton Gazeta Kosova Sot

Kërkesë me prioritet për banorët e Randobravës është kanalizimi kryesor për ujërat e zeza. Sipas kryetarit të këtij fshati, Hajzer Shala, kjo është urgjente, siç është urgjente edhe ndërtimi i një ambulance, pasi 2500 banorë për një injeksion udhë- tojnë 5 km në një drejtim. Ai shprehet për “Kosova Sot” se edhe ish-objekti i shkollës së vjetër mund të adaptohet si shtëpi e kulturës, ku të rinjtë mund të kryejnë aktivitete kulturore. Shala shprehet se banorët e këtij fshati kryesisht merren me bujqësi dhe për këtë qëllim ka nevojë që të ndihmohen banorët që merren me vreshtari, blegtori dhe me serra, ku do të punësohej forca rinore.

Punëtorë të vyer Edhe pse kuvendarja e KK të Prizrenit nga ky fshat, Sehare Maliqi, e ka ngritur disa herë si nevojë ambulancën, ajo nuk është ndërtuar deri më sot. Randobrava është një fshat agrar, që ka mbi 2500 banorë, të cilët meritojnë të kenë një ambulancë.

“Ka plot fshatra që kanë më pak banorë e kanë ambulanca”, tregon Shala për gazetën.

Dr. Shpresa Goçaj, nga Drejtoria për shëndetësi, është shprehur për gazetën se e ka këtë kërkesë dhe beson se do të gjejnë mundësi që ta ndërtojnë atë ambulancë. Ndërsa, Shala tregon se dikur fshati krenohej me njeriun e madh, Arif Hoxha, njëri nga atdhetarët e këtushëm, e pastaj nga këtu në këtë frymë ishin frymëzuar edhe kaq shumë dëshmorë e martirë lirie, ku 22 prej tyre ranë dëshmorë për të mos vdekur kurrë.

Vreshtat po pakësohen Sahit Osmani, mësimdhënës nga ky fshat, tregon se banorët e këtij fshati janë punëtorë të vyer dhe me punën e tyre arrijnë ta ndërtojnë fshatin.

“Para lufte Randobrava ishte një fshat i harruar dhe siç thuhet as shteti nuk e dinte ku gjendej Randobrava, ngase pushteti i atëhershëm nuk bëri asnjë investim”, u shpreh ai. Por, tani i ka rrugët e asfaltuara dhe jetohet mirë. Ajo që dallon këtë fshat është kultivimi i hardhisë së rrushit. Banorët e këtushëm janë vreshtarë të njohur në gjithë Përdrininë. Shefki Mustafa, banor i këtushëm, tregon se e ardhmja e këtij fshati shihet me një shpresë të mirë.”Dikur këtu ka qenë e vështirë, ndoshta më së vështiri në gjithë Përdrininë, të jetohet, tani kemi kushte më të mira. Por, na duhet më shumë ujë, na duhet një shtëpi e kulturës, e cila ndihet nevojë e domosdoshme për këta banorë”, tregon ai.

Banorët thanë se vreshtaria po zhduket, sepse banorët nuk po ndihmohen sa duhet. Fshati ka pasur rreth pesë hektarë me hardhi e sot janë pakësuar ata. Megjithatë, fshati ka një mori serrash me perime. Sipas Hajzes Shalës, ikja e banorëve nga ky fshat ka lënë pasoja, por ata që shkuan në perëndim i mbajnë familjet. “Ajo që më brengos tej mase është fakti se një numër i konsideruar i të rinjve për fat të keq kanë ikur në perëndim. Numrin e të rinjve të ikur ende s’e kemi të saktë, por ai është treshifror dhe kjo vërtet është brengosëse. Pastaj ajo që na brengos është fakti se kryesisht ikin djemtë dhe krahu i punës mbesin vajzat”, u shpreh ai.

(Kosova Sot)

I akuzuari për përvetësim në detyrë dëshiron marrëveshje me prokurorinë.

Arben Ramadani, avokati i Nexhmedin Bellanicës, të akuzuarit për përvetësim të 15,155 eurove nga NTP “Frutti” kërkoi në gjykatë marrëveshje për pranim fajësie me prokurorinë.

Kërkesën për negociim të kësaj marrëveshjeje Ramadani e përmendi pasi të mbrojturit të tij iu lexua aktakuza.

“Seancën e kemi orientu në mbrojtjen në drejtimin mbi marrëveshjen e pranimit të fajësisë. Kërkuam shtyrje të seancës pasi që është në favor të mbrojtjes dhe të ligjit që i akuzuari të negociojë një marrëveshje mbi pranimin e fajësisë, e cila do të negociohet në Prokurorinë e Shtetit,” tha avokati Ramadani.

Prokurori Genc Nixha u pajtua që të akuzuarit dhe mbrojtësit të tij t’ u jepet mundësia që të lidhet marrëveshja mbi pranimin e fajësisë.

Nexhmedin Bellanica në këtë proces gjyqësor ngarkohet për përvetësim në detyrë.

Bellanica akuzohet se si përfaqësues tregtar i NTP “Frutti” që gjendet në fshatin Reqan të Prizrenit pas shitjes dhe shpërndarjes së lëngjeve ka marrë për vete shumën prej 15 mijë e 155 euro, të cilat të holla nuk i ka deponuar në llogarinë e të dëmtuarës “Frutti”, ku ishte i obliguar t’ i dorëzonte.

Sipas aktakuzës, Bellanica këtë përvetësim e ka kryer në vazhdimësi prej vitit 2012 e deri në maj të vitit 2014.

Seanca e ardhshme e këtij gjykimi ku do të jetë e pranishme edhe pala e dëmtuar, u caktua më 24 tetor. /Kallxo.com

Komuna e Prizrenit, që nga hyrja në fuqi e Udhëzimit Administrativ 05/2015, nuk ka adaptuar rregulloren komunale për transparencë me këtë udhëzimin. Me iniciativën e KDI-së, sot është mbajtur punëtori që kishte për qëllim adaptimin e Rregullores komunale për transparencë me Udhëzimin e ri Administrative 01/2015 për transparencë në komuna.

Në kuadër të këtij takimi pjesëmarrësit dhanë sugjerimet e tyre për plotësim të mëtejme të draft Rregullores, ku KDI në partneritet me organizatat do ta përpunojë draftin fillestar për të proceduar në faza tjera deri tek miratimit të saj në Kuvendin e Komunës. /PrizrenPress.com/