Të akuzuarit për grabitjen e farmacisë “Aspirin C” në Prizren, Jetmir, Labinot e Arjanit Gashi, të premten, para trupit gjykues në Gjykatën Themelore në Prizren, nuk e kanë pranuar fajësinë.

Të akuzuarit, pas konsultimit me mbrojtësit e tyre, kanë deklaruar se nuk ndihen fajtorë për veprën penale me të cilën i akuzon prokuroria.

Prokurori i rastit, Metush Biraj, në fjalën e tij hyrëse, ka thënë se me provat që janë grumbulluar gjatë fazës hetuese, do të vërtetohet pretendimi i organit të akuzës së të akuzuarit Gashi, kanë kryer veprën penale të grabitjes.

Mbrojtësi i të akuzuarit Jetmir Gashi, avokati Fatmir Jëlliqi, ka thënë se aktakuza nuk është e bazuar në prova të mjaftueshme materiale për të vërtetuar pretendimin e prokurorisë dhe se gjatë shqyrtimit do ta dëshmojë një gjë të tillë.

Avokati Esat Gutaj, i cili mbron të akuzuarin Labinot Gashi, ka thënë se me provat e pranuara nga prokuroria nuk ka bazë të mjaftueshme se i mbrojturi i tij, ka kryer veprën penale me të cilën ngarkohet. Gutaj, tutje ka shtuar se nga video incizimi i kamerave të sigurisë së farmacisë së grabitur, nuk mund të identifikohen personat që kanë kryer grabitjen.

Ndërsa, mbrojtësi i të akuzuarit Arjanit Gashi, avokati Hajrip Krasniqi, në fjalën hyrëse ka deklaruar se pasi ka parë provat me të cilat disponon prokuroria, ia ka sqaruar të mbrojturit të tij favoret që i gëzon me pranimin e fajësisë, por se i njëjti nuk është pajtuar që ta pranojë fajësinë.

Në këtë seancë ka dëshmuar edhe shitësja e farmacisë së grabitur, Bleona Qollaku, e cila ka thënë se në ditën kritike, rreth orës 23:00, dera e farmacisë është hapur me shpejtësi dhe njëri prej tre grabitësve, të cilët kanë qenë me maska dhe dorëza, ka thyer xhamin e shitëses.

E dëmtuara ka thënë se njëri prej grabitësve kishte pasur armë zjarri dhe me të e ka kërcënuar, ndërsa grabitësi që nuk kishte pasur asgjë në duar, ka hyrë në arkë, i ka marrë paratë, telefonin “Iphone 4S” dhe më pas të tre janë larguar me shpejtësi. Ajo ka shtuar se me të ka qenë edhe vëllai i saj 14 vjeçar, por se i njëjti me të dëgjuar zhurmën, nga frika, është fshehur në bodrum të dyqanit.

Kryetari i trupit gjykues, Artan Sejrani, në mungesë të dëshmitarit Shqipdon Gashi, ka shtyrë gjykimin për 27 shtator 2017, në ora 09:30.

Në këtë seancë dëshmitari Shqipdon Gashi, do të dëshmojë se si është gjetur tek ai, telefoni i grabitur nga barnatorja në fjalë dhe se nga kush e ka blerë telefonin.

Ndryshe, të pandehurit Gashi, akuzohen nga Prokuroria Themelore në Prizren se më 16 shkurt 2017, rreth orës 23, kanë hyrë me shpejtësi dhe nën kërcënimin e armës së zjarrit, kanë marrë nga arka rreth 750 euro dhe një telefon “Iphone 4S”.

Sipas aktakuzës, Labinot Gashi ka pasur në dorë një pistoletë, të cilën edhe ia ka drejtuar të dëmtuarës, ndërsa Arjanit Gashi ka pasur një sëpatë të vogël dhe ka qëndruar te dera e farmacisë, derisa i akuzuari Jetmir Gashi i ka marrë paratë nga arka.

Ata, sipas organit të akuzës, nga Peja në Prizren kanë ardhur me automjet të tipit “Fiat-Punto” të marrë me qira dhe pas grabitjes janë larguar me shpejtësi, në drejtim të panjohur./betimiperdrejtesi/

Hatim Baxhaku ka marrë sot mbështetjen e nëndegëve për të kandiduar për kryetar të Prizrenit.

Propozimi do t’i dërgohet liderit të LDK-së, Isa Mustafa.

“Pas debateve me të gjitha nëndegët është marrë vendim që të propozohet Hatim Baxhakun si kandidat për kryetar të Prizrenit”, thuhet në komunikatën e LDK-së në Prizren, transmeton PrizrenPress.

Vendimi është marrë në mënyrë unanime .

“Kryesia e Degës, si organ politiko-ekzekutiv, është unanime për këtë kandidat dhe ky propozim i Kryesisë do t’i drejtohet kryetarit të LDK-së, Akademik Isa Mustafa dhe njeherit Këshillit të Përgjithshëm për miratim”.

”Bashkërisht më propozimin e Degës për kandidatin , do t’i bashkëngjiten edhe procesverbalet e të gjitha nëndegëve, kryesive të nëndegëve, ku propozimi në fjalë, deri tani ka përkrahjen e 39 nëndegëve apo 90 për qind dhe strukturave të tjera”.

Baxhaku ka marrë përkrahjen edhe nga Forumi i Rinisë dhe Forumit të Gruas./PrizrenPress.com/

Lëvizja Vetëvendosje në Prizren, ka shpallur të hapur aplikimin për kandidat për kryetar të Komunës së Prizrenit.

Aplikimi bëhet nga ora 10:00-15:00.

“Njoftohen të gjithë aktivistët e Lëvizjes VETËVENDOSJE, Qendra në Prizren, se në bazë të nenit 83 të statutit të Lëvizjes VETËVENDOSJE dhe nenit 80 të rregullores për zgjedhjet e brendshme, shpallet i hapur aplikimi për kandidat për kryetar të Komunës së Prizrenit nga radhët e Lëvizjes VETËVENDOSJE!”, thuhet në njoftimin e VV-së në Prizren.

Aplikimi bëhet pranë zyreve tona në Rr. Adem Jashari, nga ora 10:00-15:00.

Afati për aplikim është i hapur 48 orë nga dita e njoftimit.

Ankesa e banorëve të rrugës “Janina”, e sidomos lagjes së kësaj rruge, “Gurishte”, është një nga ankesat jetike të jesh ose mos të jesh. Sidomos në këto ditë vere, kur vapa përcëllon gjithkah. Janë jo më pak se 30 familje të kësaj lagjeje që ankohen për mungesën e ujit të pijshëm, por çka është edhe më e keqja, është fakti se atje s’ka as rrjet të ujësjellësit e as të kanalizimit.

Vapa ua vështirëson jetën

Tashmë ata banorë gjenden në hallin e madh të vapës dhe mungesës së ndriçimit publik të rrugës së paasfaltuar, bile as me zhavorr nuk e kanë të shtruar. Përfaqësuesit e këtyre banorëve, Idriz Sertolli dhe Besim Kastrati, të zhgënjyer me neglizhencën e komunarëve, të cilët kanë harruar këtë lagje me 30 familje dhe për ta u bie ndër mend vetëm kur ka ndonjë fushatë zgjedhore.”Vetëm në fushatë erdhën dhe na premtuan se do të na sjellin rrjetin e ujësjellësit, se do të na i asfaltojnë rrugën, pastaj na premtuan edhe ndriçimin publik. E vërteta, ndriçim publik pati pak kohë, por tani e dy muaj s’ka më asnjë natë ndriçim. Por, ajo që na shqetëson të gjithëve në këtë lagje është mungesa e ujit, të jetosh pa ujë s’paska gjë në botë më vështirë. Kjo as që mund të quhet jetë, kemi hapur puse, por në këto ditë vape, kur kjo lagje është gurishtë, s’kemi ujë, sepse janë shterur puset”, thotë Besim Kastrati për “Kosova Sot”.

18 vjet me mungesë uji

Edhe banorët e rrugës “Janina”, si: Faik Asllani dhe Hysen Xhemallari thanë se nuk kanë ujë. Faik Asllani pohon se tani tetë vjet kanë ujë të pijshëm me reduktime të mëdha, kurse Hysen Xhemallari shtoi se mungesa e ujit dhe reduktimet drastike janë tani e 18 vjet radhazi. Derisa prof. Hasan Bala po ashtu me mllef flet për mungesën e ujit të pijshëm në këto ditë me vapë.

“Nëse dëshironi të shihni sesi në Prizrenin tonë të bukur e të dashur, ‘të dyzet burimeve simbolike’ ka njerëz që digjen për një pikë ujë, si banorët e Etiopisë afrikane në këto ditë me temperatura të larta gushti, ejani në rrugën ‘Anton Pashku’ dhe binduni”, tha Bala për “Kosova Sot”, dhe shtoi se duke mos pasur mundësi të ndërmarrë diçka tjetër për zgjidhjen e një problemi me rëndësi absolutisht jetike për njeriun: mungesën e ujit të pijshëm dhe ndoshta do ta dëgjojë ndonjë vesh ‘jo i shurdhët’ nga faktorët kompetentë. Lidhur me të gjitha këto jep sqarime shtesë inxhinieri nga “Hidroregjioni jugor” Lumni Sallahu,i cili tregon se ky problem i lagjes “Gurishte” duhet të zgjidhet nga Komuna e Prizrenit. “Pasi aty të shtrihet rrjeti, ne do të kemi mundësi pastaj të interesohemi për furnizim me ujë të pijshëm”, tha Sallahu,duke shtuar se mungesa e ujit në rrugën “Janina” së shpejti do të rregullohet dhe atyre banorëve do t’u sigurohet uji i pijshëm.

“Tash jemi në impelemtim të një projekti, që lidhet me mundësinë e furnizimit me sasi më të mëdha të ujit. Ju jeni dëshmitarë se tani në këto ditë vape, vetëm Prizreni, hiç atje ku s’kemi rrjet, ka ujë të pijshëm. Ka edhe ndonjë reduktim të rrallë, si puna e rrugës “Janina”, mirëpo pas angazhimit maksimal që jemi duke bërë dhe pas mundësisë që të ndalojmë keqpërdorimet e shumta që janë duke u bërë me ujin e pijshëm, besoj se Prizreni është më i furnizuari me ujë të pijshëm”, tha Sallahu për “Kosova Sot”.

Komunarët vetëm premtojnë

Edhe drejtori i Shërbimeve Publike në Komunën e Prizrenit, Sulltan Badallaj, lidhur me këtë temë thotë se së shpejti do ta zgjidhin çështjen e furnizimit me ujë të lagjes “Gurishte”. “Sa i përket lagjes “Gurishte”, ne shpresojmë se atje brenda këtij muaji ekspertët tanë do të shkojnë ta përfundojë projektin e rrjetit të ujësjellësit dhe më së largu brenda një muaji e gjysmë atje do të ketë ujë të pijshëm”, tha Badallaj për “Kosova Sot” dhe shtoi se pjesë të tjera të infrastrukturës do të rregullohen shumë shpejt. Banorëve të lagjes “Gurishte” u mbetet vetëm të shpresojnë në premtimet e zyrtarëve komunalë, sepse vapa e këtyre ditëve dhe mungesa e ujit të pijshëm ua ka vështirësuar jetën, edhe ashtu të rëndë.

(Kosova Sot)

Shqyrtimi gjyqësor, i paraparë të mbahej të enjten, kundër Remzi Shalës, i cili akuzohet nga Prokuroria Speciale e Republikës së Kosovës për krime lufte ndaj popullsisë civile, nuk është mbajtur pasi që avokati Natal Bullakaj, ka rast vdekje në familje.

Mbrojtësi i të akuzuarit, avokati Natal Bullakaj, ka njoftuar të pranishmit se një ditë më parë i ka vdekur nipi i sapolindur dhe se nuk është në gjendje që të përfaqësojë të akuzuarin, andaj ka kërkuar që kjo seancë dhe ajo e së premtes të shtyhen.

I akuzuari, Remzi Shala, nuk ka pranuar që atij t’i caktohet një avokat tjetër zëvendësues me arsye se i njëjti nuk është i njohur me rastin penal dhe provat e prokurorisë, andaj ka kërkuar që seanca të shtyhet për një datë tjetër.

Prokurori i rastit, Haki Gecaj dhe përfaqësuesi i palës së dëmtuar, avokati Asdren Hoxha, janë pajtuar që seanca të shtyhet.

Trupi gjykues, i kryesuar nga gjyqtarja Raime Elezi, ka vendosur që kjo seancë dhe ajo e së premtes të shtyhen për 19, 20 dhe 22 shtator 2017, duke filluar nga ora 09:00.

Remzi Shala, akuzohet nga Prokuroria Speciale se gjatë kohës së luftës në Kosovë, më 26 qershor 1998, duke vepruar si pjesëtar i Ushtrisë Çlirimtare të Kosovës (UÇK), së bashku edhe me disa pjesëtarë tjerë të paidentifikuar, kanë marrë nga shtëpia e tij, viktimën Haxhi Përteshi.

Sipas aktakuzës, Remzi Shala, i cili ishte i vetmi pa maskë në kokë, së bashku edhe me 5-6 pjesëtarë tjerë të UÇK-së, të maskuar, nën dyshimin se i ndjeri ishte bashkëpunëtorë i forcave serbe, kanë shkuar në fshatin Duhël dhe të njëjtin e kanë dërguar në një vend të panjohur.

Në aktakuzë thuhet se djali i viktimës, Agron Përteshi, i kishte parë ata të largoheshin, së bashku me babin e tij, në drejtim të fshatit Grajqevc dhe pas disa dite trupi i pajetë i të ndjerit ishte gjetur në afërsi të rrugës afër qendrës së fshatit Duhël./betimiperdrejtesi/

Kryeprokurori i Prokurorisë Themelore në Prizren, Admir Shala, sot ka pritur në takim Ambasadorin e Mbretërisë së Bashkuar në Kosovë, Ruari O’Connell.

Sipas njoftimit për media, në këtë takim fillimisht ambasadori O’Connell i uroi kryeprokurorit Shala për detyrën e re. Me këtë rast, kryeprokurori Shala falënderoi ambasadorin O’Connell për përkushtimin dhe bashkëpunimin e tij në fushën e sundimit të ligjit.

Kryeprokurori Shala shprehu përkushtimin e tij në luftimin e krimit dhe korrupsionit, si dhe në mbrojtjen e Trashëgimisë Kulturore të Qytetit të Prizrenit.

Në anën tjetër, Ambasadori O’Connell ka ripërsëritur qëndrimin e Mbretërisë së Bashkuar për përkrahjen dhe bashkëpunimin në forcimin e sistemit të drejtësisë.