Leotrim Gërmizaj është bërë pjesë e Aleancës Botërore të të Rinjve.

“U konfirmova si anëtari më i ri i Aleancës Botërore të Rinjve duke u bërë pikë kontakti i kësaj organizate globale për Kosovën”,shkruan Gërmizaj në Facebook.

“Së shpejti WYA Europe do jetë e pranishme edhe tek ne, duke e bërë Kosovën shtetin e parë nga vendet fqinje, me degë të veçantë të Ëorld Youth Aliance”.

“Grupi i aktivistëve të rinj që do t’i prijnë kësaj iniciative vullnetare por me shumë ndikim global, së shpejti do të finalizohet!”

WYA është një organizatë globale rinore që shtrihet në gjashtë kontinente dhe që ka status të veçantë brenda Organizatës së Kombeve të Bashkuara dhe brenda shumë mekanizmave ndërkombëtare./PrizrenPress.com/

Zafir Berisha nga NISMA për Kosovën ka konfirmuar se do të kandidojë për kryetar të Prizrenit në zgjedhjet lokale të tetorit, madje ka thënë se ai është oferta më serioze për këtë qytet, njofton Klan Kosova.

“Prej shtatorit po përgatitem, këto ditë po përgatisim platformën zgjedhore dhe listën e kandidatëve për asamblistë”, tha Berisha në Ballë për Ballë të Klan Kosovës.

“Jam i përgatitur, më shumë se asnjëherë që t’i futem garës, kësaj radhe me mbështetjen e qytetarëve do t’i japim fund keqqeverisjes në vend”.

Berisha premtoi se do t’ia kthejë identitetin qytetit të Prizrenit i cili sipas tij është nëpërkëmbur nga kjo garniturë politike.

Ndonëse partia në të cilën ai bën pjesë ka hyrë në koalicion me Partinë Demokratike të Kosovës, ai tha se vazhdon t’i qëndrojë prapa kritikave ndaj kësaj partie dhe kryetarit aktual të Prizrenit, Ramadan Mujës, duke thënë se nuk ka lëvizur nga ato fjalë.

“Nuk kam lëvizur nga ato fjalë, hajduti është hajdut”, tha Berisha.

“Ramadan Muja me bandën e vet, gjatë gjithë mandatit ka qenë nëpër gjykata. A mund të them që nuk ka qenë?”, shtoi ai.

Edhe vëlla ta kem, ajo që është, është. Nuk mund t’i ndryshojmë qëndrimet, mendimet dhe opinionet sipas shijes së politikës ditore”.

Ai tha që pa diskutim, në bazë të opinionit që e ka marrë dhe në bazë të punës së ekipit që ai ka, Berisha beson se është oferta më serioze për qytetin e Prizrenit.

“Nuk shoh konkurrent”, tha Berisha duke shtuar se me gjuhën e argumenteve, fakteve dhe programeve të kapshme e konkrete do të prezantohet në zgjedhjet lokale.

“Kësaj radhe do të triumfojë NISMA për Kosovën në Prizren”, përfundoi ai.

12 familje nga Balinca e Malishevës të cilët jetojnë afër rrugës magjistrale Prishtinë – Pejë e cila është duke u ndërtuar, janë në hall të madh, raporton KTV.

Si pasoi e punimeve që janë bërë në ndërtimin e nënkalimit, nga makineritë e rënda, thonë se u janë dëmtuar muret e disa shtëpive.

Pos kësaj ata ankohen se edhe punimet i kanë lënë në gjysmë Ministria e Infrastrukturës që sipas tyre qarkullimin me vetura e kanë të vështirësuar.

Thonë se aty nuk mund të jetojnë më nga rreziku që u kanoset ndërkaq kërkojnë që Ministria e Infrastrukturës t’ua shpronësojë shtëpitë e tyre.

Sipas tyre, nuk do ta lejojnë ndërtimin e mëtutjeshëm të këtij nënkalimi.

Shumë herë ata i janë drejtuar edhe Ministrisë së Infrastrukturës por kërkesat e tyre nuk janë marrë parasysh.

Sipas tyre Ministria nuk ka pranuar që shtëpitë e tyre t’i shpronësoi pavarësisht nevojës që ata duhet të largohen nga aty.

Ndërkaq Kohavisioni nuk ka arritur të marrë ndonjë përgjigje nga zyrtarë të Ministrisë së Infrastrukturës lidhur me këtë çështje.

Dëshmitarët e Prokurorisë Speciale, Misin Popaj, Maliq Gashi, Nijazi Zeneli, Skender Demaj, Faredin Qovanaj, Ismet Sinanaj dhe Ajdin Elshani, të mërkurën, kanë thënë se të akuzuarit nuk u kanë ndihmuar për të nxjerrë dokumente të udhëtimit në Serbi.

Këta dëshmitarë kanë dëshmuar në shqyrtimin gjyqësor ndaj Bajram Aliut, Samet Ramadanit, Zenel Halimit, Rufat Destanit, Hamëz Pistës dhe Kemajl Celinës, të cilët akuzohen se kanë krijuar grup të organizuar për kontrabandim me migrantë dhe falsifikim të dokumenteve të udhëtimit.

Dëshmitari Nijazi Zeneli, ka thënë se vëllai i tij ka dalë deri në Suboticë, ndërsa më pas e kishte telefonuar dhe i kishte thënë që duhet t’i japë disa personave 2800 euro në emër të tij, në mënyrë që të vazhdonte rrugën për në shtetet e BE-së.

Ai ka thënë se në Prizren, kanë ardhur disa persona me një veturë të tipit “Mercedes” dhe i kanë marrë paratë. Por, tha se të akuzuarit nuk i njeh dhe se asnjërit prej tyre nuk ia ka dhënë paratë.

Ndërsa, dëshmitari Faredin Qovanaj ka thënë se i akuzuari Bajram Aliu e kishte dërguar djalin e tij për të marrë një certifikatë të lindjes në Serbi, por se këtë e kishte bërë vetëm si shërbim me taksi, për të cilin shërbim edhe e ka paguar djali i tij.

Në mungesë të dëshmitarëve tjerë, kryetari i trupit gjykues, Skender Çoçaj, ka ndërprerë shqyrtimin dhe vazhdimin e të njëjtit e ka caktuar për 7 shtator 2017, në ora 09:00, ku pritet të vazhdohet marrja në pyetje e dëshmitarëve tjerë të propozuar nga organi i akuzës.

Ndryshe, ky rast zhvillohet në bazë të aktakuzës së Prokurorisë Speciale të Kosovës, e cila i akuzon të pandehurit Bajram Aliut, Samet Ramadani, Zenel Halimi, Rufat Destani, Hamëz Pista dhe Kemajl Celina, se kanë kryer krim të organizuar duke bërë kontrabandim me migrantë.

Organi i akuzës pretendon se të akuzuarit, që nga janari 2013 e deri në korrik 2014, duke vepruar si grup kriminal i organizuar, i kanë gjetur migrantët e interesuar për të dalë në mënyrë ilegale jashtë Kosovës dhe u kanë ndihmuar që të dalin. Sipas aktakuzës, ata u kanë rregulluar dokumentet e nevojshme për udhëtim dhe pas marrjes së pagesave deri në 5 mijë euro, i kanë dërguar ata përmes Serbisë, nëpër vende të ndryshme të Bashkimit Evropian./betimiperdrejtesi/

Fshati Gërnçar aktualisht numëron 1600 banorë dhe janë rreth 300 familje. Ato që e zbukurojnë këtë fshat janë dasmat dhe synetitë që ndodhin kryesisht gjatë verës, ku dallohen në gjithë Podgurin e Prizrenit. Të rinjtë dhe të rejat bartin rroba kombëtare dhe secila vajzë duhet t’i ketë ato para martesës. Para martese duhet të i kenë 20 palë rroba tradicionale. Fshati ka disa “Tajfe”, kështu quhen grupet e surlaxhinjve dhe tupanxhinjve. Profesori i parë në këtë fshat është Bajram Jakupi. Shkolla e këtushme ka 250 nxënës, tregon Refki Alija nga ky fshat.

Dasmat plot sharm

Në zonën e Podgurit të Prizrenit, në fillim të këtij shekulli, tradita ka qenë që zakonisht nusja e dhëndri nuk njiheshin me njëritjetrin. Fjalën e martesës e jepnin prindërit e tyre.

“Ditën e dasmës, krushqit vinin me kuaj për të marrë nusen. Nusja vinte hipur mbi kalë, me kokën të mbuluar me duvak, dhe kalin ia jepte babai ishte pjesë e pajës së saj. Kur nisej me krushqit për në shtëpinë e burrit, zakoni ka qenë që ta shoqëronte një mashkull nga familja, zakonisht vëllai i vogël. Kishte dhe nuse që vishnin fustan të bardhë e vello, por tradita ka qenë citjane të kuqe atllasi ose mëndafshi dhe xhokë të qëndisur e të shndritshme, shami me temina, dhe kokën të mbuluar me duvak. Flokët dhe gishtat i lyenin me kanë”, tregon profesor Sadri Bajra, etnolog.

Kënga e vallja nuk pushonin deri vonë. Një zakon shumë karakteristik i kësaj zonë ka qenë kur krushqit shkonin të merrnin nusen, zakoni e donte të ishin prezent njerëz shumë të zgjuar e të shpejtë në të menduar, sepse aty hidheshin batuta, ose kunja me njeri-tjetrin, nga ana e njerëzve të nuses dhe dhëndrit, që hidheshin e priteshin sa nga njëra anë në tjetrën dhe që ishin të krijuara aty për aty dhe që donin përgjigje të shpejtë.

Atmosfera e dasmave fillon shumë më përpara

Traditat e kësaj ane janë të lashta. Bajra thotë se atmosfera e dasmës fillon një javë para, të hënën. Fillojnë përgatitjet, njerëzit vijnë nga të gjitha anët dhe çdo natë bënin darkë, mblidheshin të gjithë. Të mërkurave merret paja e nuses dhe në shumicën e rasteve i mbledhin të gjithë fëmijët dhe shkojnë të marrin pajën. Kur niset makina hedhin sheqerka dhe oriz. Me pas bëhet adeti i zënies së bukës me qiqra. Të gjitha gratë mblidhen në dhomë rreth dhe këndojnë, fëmijët e shtëpisë e shtypin qiqrën dhe me pas gratë fillojnë të zënë bukën dhe e lënë të vijë deri të nesërmen në mëngjes.

Të enjten vajzat me mësallat e reja i dërgojnë bukën në furrë. Të enjten shkojnë gratë e fisit të djalit tek nusja për të parë dhe po ashtu për t’i çuar dhurata. Kur mbërrijnë në shtëpinë e dhëndrit, i mbulojnë me oriz e grurë. E ëma i pret tek dera me bukën, që ta verë nën dorën e nuses dhe me mjaltin. Ngjyen gishtat e nuses në mjaltë dhe ndesh cepin e derës. Më vonë i vënë nuses një djalë në prehër, ajo ka një mollë dhe çorape pastaj fillon dasma e vërtetë”, tregon Bajra. Fshati Gërnçar i Prizrenit shtrihet rrëzë bjeshkëve të Sharrit, me Lumëbardhin nën këmbë, është i pasur me një diversitet kulturor, etnik dhe fetar. Ajdin Bajrami tregon se fshati ka një traditë të trashëguar që para 500 vjetësh.

(Kosova Sot)

Këto fotografi që po i shihni janë bërë në qytetin e Prizrenit. Një tregtar i kafshëve, po tenton t’i shpëtojë lopët nga temperaturat e larta sepse kamioni i tij ishte stërngarkuar dhe për pasojë i kanë ngordhur.

Lajmi.net merr vesh se personit që i kanë ngordhur lopët është kasap në Prizren, që tregton me lopë.

Kanë qenë rreth 20 lopë që ka treguar një qytetar për Lajmi.net, ndërsa 8 i kanë ngordhur.

Lajmi.net ka siguruar disa fotografi nga vendi i ngjarjes ku shihen lopët e ngordhura dhe tentimi për t’i shpëtuar.

Ngjarja ka ndodhur në lagjen “Bajram Curri” në Prizren, ku në vendngjarje shihet se kanë dalë edhe zjarrfikësit për ta ndihmuar tregtarin që t’i shpëtojë lopët.

Zëdhënësi i Policisë së Kosovës për rajonin e Prizrenit Hazir Berisha ka thënë për Lajmi.net se qytetarët i kanë informuar Policinë e Kosovës dhe për raportin përfundimtar do të dihet pasi të bëhet ekzaminimi nga ana e Inspektoratit Komunal dhe veterinarëve.
“Sipas qytetarëve që e kanë informuar Policinë në Prizren thuhet se te tregu i kafshëve paska qenë një kamion me kafshë. Policia ka dalë në vendin e ngjarjes për të parë se çka është në pyetje. Ne nuk kemi më shumë mundësi të merremi me ato punë, po e kemi thirr inspektoratin komunal së bashku me veterinarët dhe ata do ta japin raportin përfundimtar”, ka thënë Berisha për Lajmi.net.