Pas një kohe të gjatë në paraburgim është liruar nga kjo masë sigurie i akuzuari për narkotikë Nazim Fanaj

Pas pranimit të fajësisë, i akuzuari Nazim Fanaj u lirua nga paraburgimi, duke iu caktuar masa për paraqitjen në stacionin policor në Prizren.

Në këtë gjykim, Nazim Fanaj, Arsim Fazliu dhe Naser Miftari akuzohen që me bashkëpunim kanë kryer veprën penale blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.

Në seancën e sotme, Fanaj i cili gjendej në paraburgim që nga nëntori i vitit 2015, e pranoi fajësinë, ndërsa dy të akuzuarit e tjerë Fazliu dhe Miftari u deklaruan të pafajshëm për veprat penale për të cilat ngarkohen.

Avokati i të akuzuarit Fanaj, Arsim Bilalli, i propozoi trupit gjykues që të mbrojturit të tij t’i hiqet masa e paraburgimit dhe të mbrohet në liri si rezultat i pranimit të fajësisë dhe pendesës së thellë.

Këtë propozim prokurorja e rastit, Javorka Prlinçeviq e konsideroi si të bazuar.

Si rezultat, trupi gjykues mori aktvendim që Fanajt t’i ndërpritet masa e paraburgimit dhe atij kjo masë t’i zëvendësohet me paraqitje në stacionin policor.

Më tutje, prokurorja Prlinçeviq bëri të ditur provat e propozuara në aktakuzë, të cilat do t’i paraqesë në seancat e radhës.

Këto prova përfshijnë raportin e ekspertizës së forenzikës, raportin nga vendi I ngjarjes së bashku me fotografitë edhe CD, transkriptet e përgjimeve telefonike dhe mesazhet e shkruara në mes të të dyshuarve.

E për këto prova, avokati i Naset Miftarit, Selman Bogiqi, tha se nuk e formojnë figurën e veprës penale.

“Në këtë aktakuzë nuk ka dhënë asnjë fakt relevant apo provë se i mbrojturi im së bashku me Arsim Fazliun kanë kryer veprën penale”, shtoi Bogiqi.

Kësaj iu bashkëngjit edhe avokati Behar Ejupi, i cili tha se i mbrojturi i tij nuk i ka kryer veprat penale për të cilat akuzohet, si dhe theksoi se “në fjalën hyrëse nuk dëgjuam nga prokuroria që do të kemi ndonjë provë e cila do të vërtetojë dyshimin e bazuar mirë”.

Ndërkaq seanca e radhës do të mbahet në muajin maj, ku edhe do të prezantohet CD-ja, provë të cilën do ta paraqesë prokurorja Prlinçeviq.

Në bazë të aktakuzës, Nazim Fanaj së bashku me Arsim Fazliun dhe Naser Miftarin pas një marrëveshjeje paraprake gjatë kohës që Nazim Fanaj ka qëndruar në restorantin “Univers” në Vërmicë, personi NN e ka vendosur sasinë e narkotikut në bagazhin e veturës së Fanajt, të cilin paraprakisht e kishte marrë në kompaninë Rent a Car “Prizreni”.

Më pas, sipas aktakuzës, Fanaj ishte nisur me makinë, së bashku me narkotikët në bagazh të cilët kishte pasur t’ia dorëzonte të akuzuarve Arsim Fazliut dhe Naser Miftarit të cilët po e prisnin në qytetin e Podujevës.

Pasi Fanaj kishte qenë në vëzhgim të policisë, ai u ndalua nga zyrtarët policorë në fshatin Sllatinë, ndërsa gjatë kontrollit të makinës kishin gjetur 16 paketime të mbushura me marijuanë me peshë rreth 15 gramë.

Nazim Fanaj akuzohet për blerje, posedim, shpërndarje dhe shitje të paautorizuar të narkotikëve, substancave psikotrope dhe analoge.

Ndërkaq, të akuzuarit Fazliu e Miftari, ngarkohen me veprën penale organizimi, drejtimi apo financimi i trafikimit të narkotikëve apo substancave psikotrope, pasi që prokuroria pretendon se kanë angazhuar Nazim Fanajn që ta bëjë transportimin e marijuanës. /Kallxo.com/

Inspektori i Sektorit të Inspektimit për Arsim (SIA) në Prizren, Qemajl Bytyqi, gjatë gjykimit të drejtorit në Drejtorinë Komunale për Arsim (DKA) në Suharekë, Sherif Berisha, tha se pas inspektimit që kanë bërë në atë drejtori, kanë gjetur se konkursi për mësimdhënës ka mangësi.

Bytyqi këtë deklaratë e ka dhënë të mërkurën, në Gjykatën Themelore në Prizren, ku ishte ftuar të dëshmonte në rastin ndaj Berishës, i cili po akuzohet për keqpërdorim të pozitës apo autoritetit zyrtar.

Dëshmitari Bytyqi deklaroi se DKA-së i kishin dhënë afat për të evituar mangësitë e konkursit, por pas inspektimit të serishëm është vërejtur se ato parregullsi nuk janë evituar.

I njëjti tha se në konkursin për mësimdhënës, nuk ishte përcaktuar lloji i lëndës për të cilën kërkohet mësimdhënësi, por se ishte cekur në përgjithësi që kandidati duhet të posedojë diplomë të fakultetit të bujqësisë. Sipas deklarimit të tij, DKA-ja ka pasur afat të ankesës brenda 8 ditëve por të njëjtën nuk e shfrytëzuar.

Në këtë seancë ka dëshmuar edhe Fatmire Elshani, nga ankesa e të cilës edhe ka filluar ky rast penal. Ajo ka thënë se kishte konkurruar në konkursin për mësimdhënës në shkollën profesionale “Abdyl Rama” në fshatin Shirokë të Suharekës, por megjithëse kishte pasur përgatitjen e duhur profesionale, nuk ishte pranuar në punë. Ajo pastaj kishte bërë padi civile të cilën padi edhe e ka fituar në shkallë të parë, por vendimi është ankimuar nga DKA-ja dhe ende gjendet në Gjykatën e Apelit.

Para dëgjimit të dëshmitarëve, prokurorja e rastit, Ervehe Gashi, ka lexuar aktakuzën, për të cilën i akuzuari Berisha është deklaruar edhe një herë i pafajshëm.

Në fjalën hyrëse, prokurorja Gashi deklaroi se pas administrimit të provave dhe dëgjimit të dëshmitarëve, do të vërtetohet se i akuzuari ka kryer veprën penale me të cilën ngarkohet.

Ndërsa mbrojtësi i të akuzuarit Berisha, avokati Brahim Sopa, tha se rasti penal ndaj klientit të tij është i parakohshëm pasi që një procedurë gjyqësore është duke u zhvilluar sa i përket këtij rasti. Ai ka thënë se edhe një shkresë e Ministrisë së Arsimit e mbështet idenë se kallëzimi penal i bërë nga SIA ka qenë i parakohshëm, pasi që nuk janë shterur të gjitha mjetet juridike.

Gjatë kësaj seanca, trupi gjykues i kryesuar nga gjyqtari Xheladin Osmani ka bërë edhe leximin e shkresave të lëndës. Ndërkaq, seancën për dëgjimin e të akuzuarit, e caktoi për 15 maj 2017, në ora 9:30.

Në dhjetor 2016, Prokuroria Themelore në Prizren, ka ngritur aktakuzë ndaj Sherif Berishës, të cilin e ngarkon me veprën penale “keqpërdorim i pozitës apo autoritetit zyrtar”.

Sipas aktakuzës, Berisha, në cilësinë e drejtorit të DKA-së në Suharekë, nuk ka respektuar një rekomandim të SIA-s në Prizren, për anulimin e konkursit për mësimdhënës.

SIA kishte rekomanduar që konkursi për rekrutimin e mësimdhënësve për shkollën e mesme profesionale “Abdyl Rama” në Suharekë, të anulohet dhe të ri-shpallet në afat prej 8 ditësh.

Sipas organit të akuzës, me këto veprime i akuzuari ka kryer veprën penale të keqpërdorimit të detyrës zyrtare dhe ka shkelur rëndë të drejtat e personave tjerë, konkurrues në konkursin në fjalë.

Berisha poashtu është duke u gjykuar edhe në një rast tjetër penal, në të cilin akuzohet se ka punësuar, pa konkurs, rreth 9 mësimdhënës, në shkollat e Komunës së Suharekës./etimiperdrjtesi/