Në Prizren, përkatësisht në rrugën “Ismet Jashari”, është arrestuar një person i gjinisë mashkullore, pasi që i njëjti në bashkëpunim edhe me një të dyshuar tjetër, pas një mosmarrëveshje të mëhershme e kanë sulmuar fizikisht viktimën mashkull.
“Viktima ka pësuar lëndime të rënda trupore dhe i njëjti është dërguar në QKUK-Prishtinë për tretman mjekësor”, njofton Policia, përcjellë PrizrenPress.
Me urdhër të prokurorit i dyshuari është dërguar në mbajtje. /PrizrenPress.com/
Të gjithë emrat e mëdhenj, krenaritë e teatrit dhe të filmit që jetësojmë nëpërmjet një vizatimi homazh në portalin tonë, duke ngritur një bust çdo javë dhe vendosur me solemnitet në atë altar Shenjti që meritojnë, a nuk na lënë një shije trishtimi në fund? Ne ndalemi para tyre dhe i gjunjëzohemi me nderim, por a mjafton?
Violeta nuk u martua kurrë. Nuk u ankua kurrë. Nuk u mburr kurrë. Ndoshta ndaj dhe e donin të gjithë. Jo vetëm artdashësit, por gjithë kolegët. E çmonin. Vlerësonin çdo grimë a detaj rreth konceptit, dhe mënyrës se si ajo e lëshonte veten tek çdo rol, duke u kredhur si në det. Duke u mishëruar tek personazhi dhe më pas bërë një me të. Kadri Roshi, në një intervistë të vitit 1998, e quan ‘’Shkollë’’, këtë grua të rrallë. ‘’Të kuptosh fjalën sakrificë – thotë ai – mjafton të shohësh Violetën. Nëpërmjet saj, ti kupton ç’është vullneti për punë. Kupton ç’është ndershmëria’’. Ndërsa Sulejman Pitarka, po atë vit, shprehet: ‘’ Mbaj mend çdo herë që vinte në teatër, ishte si besimtari i devotshëm në një tempull.’’
Lindur më 6 mars të 1926 në Voskopojë të Korçës, Violeta do të kalonte një fëmijëri pa përralla. Një fëmijëri të vështirë. Një familje e varfër, uria e së cilës e njohu me ‘’udhën e punës’’. Vetëm 14 vjeçe?! Kështu vitet kalonin dhe Violeta e rritur para kohe po bëhej një zonjushë e vendosur. Do të ishte 20 vjeçe kur do të dëgjonte melodinë e fatit në vitin 1946, prej ku do të shquhej menjëherë talenti i saj në shkollën e parë dramatike të hapur pranë Teatrit të Shtetit, sot Teatri Kombëtar. Do të ishte ky rrugëtimi saj i gjatë i mendjes, shpirtit dhe dashurisë. Shtëpia e saj! Fati i saj.
Me një karrierë 60-vjeçare në themele të teatrit. Me 110 role të gdhendur e skalitur skenës dhe plot 16 të tjera në kinematografi. Ishte viti 1957 tek ‘’Orët e Kremlinit’’ rekordi i parë që do të thyente me interpretimin e tri roleve. Më pas do të shkëlqente në rolet protagoniste më 1959 ‘’Gratë gazmore’’, ‘’Morali i zonjës Dulska 1958. Me shumë sukses një Olimbi të paharruar tek ‘’Karnavalet e Korcës’’ 1964, Zyhranë tek ‘’Fytyra e dytë’’ 1968, Nicën tek ‘’Gjenerali i ushtrisë së vdekur’’ 1971, e shumë të tjerë.
Në vitin 1997, së bashku me ‘’Mjeshtren e madhe’’, profesoreshë Drita Pelinkun, bordi drejtues i Institutit Amerikan të Biografive do i vlerësonte për kontributin e dhënë dhe arritjet e karrierës ndër 500 udhëheqësit më me influencë të shekullit të XX.
Ishin mikesha të rralla. Gjithmonë e gjeje në shtëpinë e zysh Dritës, për të nisur ditën nën aromë kujtimesh në atë filxhanin e kafesë. Kështu i mbaj mend një ditë të mërkure të dyja, ndërsa më pas do të ma prezantonte për herë të parë:
‘’E di si jam njohur me Violetën? Kanë kaluar shumë vjet, por, për mua , ky takim mbetet nga ata të rrallët që të dhurojnë çelësin e shumë sekreteve. Isha në teatër kur shoh 3 vajza që po vinin, veshur bukur. Pas tyre Violeta, e cila me shumë çiltërsi më shtrengoi dorën. Mbante veshur një xhaketë burrash, një palë atlete lecke, flokët e prera drejt dhe nuk e di pse e paragjykova… artistët duhej të kishin imazh tjetër. E kush e dinte që pas kësaj vajze aq të varfër do të fshihej kjo artiste ikonë, nga ku më mbush shpirtin plot sa herë vjen këtu…’’
Violeta, me kulturën fenomenale të të dëgjuarit, buzëqeshte teksa duart i mbante mbledhur e më kthehet duke thënë: ‘’Vetëm ty kishte mbetur pa ta thënë. Ka 50 vjet që e tregon’’.
Jean-Paul thotë : Komedia është një ëngjëll që me një sy qan dhe me një sy qesh. Natyrisht, Violeta kishte lindur për komedi, duke e forcuar përmbajtjen estetike, psikologjike e shoqërore të teatrit. Mjeshtre e detajit, spontane, me një spontanitet që të nxit fantazinë tek e sheh. Me një energji që reflektohet në çdo temporitëm shfaqjesh dhe aq mirëkuptuese në zhvillimin e dialogjeve. Kjo ishte Violeta! E cila për shumëkënd mbetet ende teto Ollga.
E si mund të mos jetë prezent dhe sot në ditët tona ky kryerol i saj?
Pirro Milkani shprehet: Ekzigjenca estetike e filmit për staturën e saj bëri që kjo Ollgë të mos harrohej kurrë. Zakonisht ,- vazhdon ai, kur aktori identifikohet me rolin, është arsye suksesi. E dimë tashmë të gjithë që para se të ekranizohej, kjo ishte një vepër teatrale që luhej në Teatrin e Korçës. Por konvertimi i pjesës teatrale në film kishte ndryshime. Për shembull skena e Malos me Violetën, doli aq e bukur, pasi ky ishte marifet i saj. Sigurisht dhe teksti i Ruzhdi Pulahës bënë që ky film të ishte sukses i jashtëzakonshëm.
Violeta shkëlqeu në këtë rol, duke bërë të qeshë dhe atë që asokohe nuk dihej si do të reagonte: Enver Hoxhën. Ajo u vlerësua këtu dhe me medaljen e festivalit të filmit në vitin 1977. Kanë kaluar 40 vjet që atëherë dhe ti ende kërkon rrugësh magjinë e këtij karakteri, në një qytet me Ollga dhe pa zonja.
Vështirë të harrohet gjithashtu dhe teto Rita, tek ‘’Pallati 176’’, e cila ka fuqi hipnotizuese sa herë e sheh. Gjurma e së cilës theksohet çdo vit që kalon, falë psikoteknikës së shkëlqyer të kësaj gjiganteje të skenës.
24 orë para se të mbyllte sytë, Violeta Manushi, në prani të të afërmëve, ka thënë fjalët e fundit nëpërmjet një diktofoni, i cili mbetet vlerë e shenjtë në arkivin e Fondacionit ‘’Nermin Vlora’’.
‘’ Sikurse e shihni, unë jam nisur për udhë që nuk është e gjatë. Nuk jam pishman që po shkoj. Jetova 81 vjet e kusur. Për më tepër, jetova me nder! Kemi qenë të varfër, por nuk kemi lypur. Kemi jetuar me punë dhe me nder, duke lënë pas emrin e mirë.
Eja më puth, se po iki…’’
Por a mund të ikë një yll? /Konica.al
Presidenti i Shqipërisë, Bujar Nishani, nga sot do të fillojë vizitën zyrtare në Kosovë.
Nishani vizitën do ta fillojë me një takim me presidentin e Kosovës, Hashim Thaçi, ku para takimit në Sheshin “Ibrahim Rugova” do t’i bëhet pritje ceremoniale nga Grada e Nderit e FSK-së.
Bujar Nishani gjatë ditës do të pritet edhe nga kryeministri në detyrë, Isa Mustafa.
Kurse gjatë të premtes, në Asamblenë Komunale të Drenasit, mbahet ceremonia e seancës solemne, ku Presidenti Nishani do të shpallet “Qytetar nderi i Komunës së Drenasit”.
Presidenti i Shqipërisë Bujar Nishani do të shpallet të enjten Qytetar Nderi i Prizrenit.
Ky titull Nishanit do t’i ndahet për kontributin që i ka dhënë Kosovës.
Deputeti i LDK-së, Anton Quni të mërkurën në Kuvendin e Kosovës, ka mbajtur një fjalim ku ndër të tjera ka deklaruar se nuk tërhiqet nga skena politike pa i parë prapa grilave Kadri Veselin dhe Hashim Thaçin.
Në seancë, Qunit i janë përmendur edhe vëllezërit e tij, nga deputeti i PDK-së, Hajdar Beqa.
“E di se çka bëjnë edhe vëllezërit e tij, me çka merren, a punojnë ndershëm a merren me fajde a me çka”, ka thënë Beqa.
I kontaktuar nga klankosova.tv, Quni ka treguar se me se merren vëllezërit e tij.
“Vëllezërit e mi merren me punë normale”, ka thënë Quni.
“Ata merren me tregti”, ka shtuar ai.
Më tej Quni ka theksuar se për ato që ka thënë dje Hajdar Beqa duhet të tregoj vet se për çka e ka pasur fjalën.
Partia Demokratike e Kosovës, dega në Prizren duket se i është gëzuar shumë rrëzimit të Qeverisë së Isa Mustafës dhe hapjes së rrugës për zgjedhje të parakohshme. Këtë e ka bërë përmes një komunikate për media, shkruan PrizrenPress.
“Dega e PDK-së në Prizren përshëndet veprimet e sotme të Kuvendit të Republikës së Kosovës, ndërprerjen e një gjendje qeverisje pa vendime nga Isa Mustafa duke keqpërdorur në vazhdimsi legjitimitetin që ja dha PDK-ja.
Dega e PDK-së në Prizren i jep mbështetje dhe besim të plotë Kryetarit të saj, Kadri Veselit, dhe strukturave drejtuese të partisë, në zgjedhjet nacionle të cilat do të mbahen pas rrethanave të krijuara“, thuhet në komunikatë, përcjellë PrizrenPress.
Komunikata e plotë e PDK-së:
Dega e PDK-së në Prizren, sot ka mbajtur takimin e kryesisë së degës pas zhvillimeve të reja politke që kanë ngjarë në vend pas shkarkimit të Qeverisë së Republikës së Kosovës.
Dega e PDK-së në Prizren përshëndet veprimet e sotme të Kuvendit të Republikës së Kosovës, ndërprerjen e një gjendje qeverisje pa vendime nga Isa Mustafa duke keqpërdorur në vazhdimsi legjitimitetin që ja dha PDK-ja.
Dega e PDK-së në Prizren i jep mbështetje dhe besim të plotë Kryetarit të saj, Kadri Veselit, dhe strukturave drejtuese të partisë, në zgjedhjet nacionlae të cilat do të mbahen pas rrethanave të krijuara.
Koncepti i Fillimit të Ri i ndërtuar nga qytetarët e Republikës së Kosovës në bashkëbisedim me Kryetarin Kadri Veseli do të jetë projekt i fitorës dhe i triumfit të përpjekjeve shtetndërtuese të Partisë Demokratike të Kosovës.
PDK në Prizren fton gjithë anëtarësinë e saj dhe çdo qytetarë të komunës së Prizrenit për angazhim të përbashkët dhe për fuqizim të PDK-së në zgjedhjet nacionale.
PDK-Dega në Prizren
Datë:10.05.2017
Nën patronatin e kryetarit të Komunës së Rahovecit, Idriz Vehapi dhe komisionit organizativ, sot nis festivali tradicional kombëtar i folklorit “Anadrinia Jehon 2017”, i cili këtë vit mbahet për të 16-tin vit me radhë në fshatin Dejnë.
Festivali fillon me datë 11 në ora 19:00 dhe zgjat deri me 13 maj 2017, shkruan PrizrenPress.
Gjatë tri netëve garuese, festivalin “Anadrinia Jehon”, me këngët e tyre do ta nderojnë këngëtarët nga estrada; Qershore Tafallari, Fjolla Gashi, Valbona Krasniqi, Hamëz dhe Albrim Llapqeva.
Kjo është agjenda:
NATA E PARË:
1. SHKA “ANADRINI” – nikoqir
2. SHKA “TINGUJT E VENDLINDJES” Stagovë / Kaçanik
3. AKV “ILIRIDA” Shkup
4. SHKA “MUHARREM E XHEVAT QENA” Romajë
5. Rapsodët e Hasit; Haxhi Gjugja me grup.
NATA E DYTË:
1. SHKA “LAHUTA E MALËSISË” Gjilan
2. AKV “HAJVALIA” Prishtinë. (2 këngë)
3. AKA “ISA BOLETINI” Rogovë
4. Grupi “TRADITA” Prizren. Rapsodët; Tom Sokoli dhe Pjetër Bisaku. (2 këngë
5. Grupi folklorik “STELUSHI” Mat.
6. SHKA “ARDHMËRIA” Gjakovë
NATA E TRETË:
1. SHKA “BAJRAM CURRI” Krushë e Madhe
2. AKV ” HASAN PRISHTINA” Vushtri
3. Grupi polifonik “PAVARËSIA” Vlorë
4. AKV “XHAVIT HAZIRI” Obiliq
5. AKV “MITROVICA” Mitrovicë
6. AKV “ZËRI I KOSOVËS” Fushë Kosovë (mysafir)
Presidenti i Kosovës, Hashim Thaçi, pas takimit me përfaëqsuesit e partive politike, deklaroi se zgjedhjet e parakohshme do të mbahen me 11 ose 18 qershor.
Për këtë ai tha se do të vendos në ditët në vijim.
“Kam dëgjuar opinionin e 20 partive politike të Kosovës.Është një opinion që si President i vendit, në bazë të autrotietit dhe kompetencave të mia kushtetuese dhe ligjore do ta respektojë”.
“Në ditët e ardhshme si President i vendit do ta caktojë datën e zgjedhjeve. Mendoj se zgjedhejt do të jenë fer, të lira e demorkatike dhe të pranueshme nga të gjithë dhe do të mbahen me 11 ose 18 qershor për çak do t’ju njoftoj në ditët e ardhshme”, u shpreh Thaçi duke përmbyllur takimin me media pa iu përgjigjur pyetjes së gazetarëve për mosshkuarjen e LDK’së në këtë takim dhe paralajmërimit se s’do ta njeh atë si President./Politiko.net
Të mërkurën në Gjykatën Themelore të Prizrenit dëshmoi dëshmitari Xhevat Shishko, babai i të ndjerit Ferdi Shishko, i vrarë në mars të vitit 2015 në Prizren.
Dëshmitari para trupit gjykues deklaroi se djali i tij, Ferdi, disa herë kishte pasur probleme me qytetarë të ndryshëm.
Shishko, tha se ka qenë në dijeni edhe për konfliktin që kishte pasur djali i tij Ferdi me të akuzuarin Eshref Shemallarin, të cilin tha se e kishin rrahur shumë, por nuk e dinte se me kë kishte qenë Ferdi, ngase për rastin tha se vetëm kishte dëgjuar nga të tjerët.
Eshref Shemallari dhe Ejup Shemallari akuzohen se më 8 mars 2015, për shkak të një mosmarrëveshjeje të mëhershme, privuan nga jeta Ferdi Shishkon, Haki Thaqin dhe Bergin Ersoyn, që të tre nga Prizreni.
Dëshmitari tha se pas konfliktit që kishte pasur djali i tij, Ferdi, disa herë kishte dërguar njerëz sipas traditës për t’ia falur, mirëpo për dy vite me rradhë familja Shemallari e kishin lënë pa përgjigje.
“Kam kërku falje, i kom çu njerëzit me ma falë, njerëzit shkojshin e vinin po kurgjo, thojke jo e kam vëllaun në Gjermani. Sërish i kam çu njerëz, po ai kërkojke thojke vec kush e ka shti (Ferdin) me e rreh Eshrefin”, tha Xhevat Shishko.
Dëshmitari tha se Ferdin aksush nuk e ka shtyrë për t’u rrahur me Eshrefin, dhe se sipas fjalëve që i kishte thënë Ferdi gjithcka tha se kishte ndodhur rastësisht.
Të mërkuren ishte planifikuar që të dëgjohet edhe dëshmitari Ejup Shemallari, mirëpo për shkaqe shëndetësore ai nuk kishte ardhur në gjykatë.
Prokurori Genc Nixha insistoi që deklarata e dëshmitarit Shemallari mos të lexohet por të dëgjohet për seancën e radhës.
“Unë desha që sot të propozoj që të lexohet deklarata e dëshmitarit, ngase në deklaratën e tij i njëjti nuk ka kontestuar faktin se kanë shkuar njerëz në shtëpinë e tij, mirëpo siç ka deklaruar ‘kanë ardhë për të kërkuar falje për sulmin mirëpo jo edhe për t’u pajtuar’ në këtë rrethanë kisha dashtë ta pyes dëshmitarin se çka ai ka nënkuptuar me këtë”, tha prokurori.
Propozimin e prokurorit nuk e kundërshtoi mbrojtja, ndërsa trupi gjykues e refuzoi me arsyetimin se gjykata ka bërë mjaft përpjekje për ta ndëgjuar këtë dëshmitar.
Procedura gjyqësore vazhdoi me leximin e shkresave të lëndës.
Eshref Shemallari dhe Ejup Shemallari akuzohen për shkelje të Kodit Penal të Kosovës, pasi që më 8 mars 2015 rreth orës 14:10 minuta në Prizren në rrugën “Ismet Jashari-Kumanova”, pas një mosmarrëveshjeje paraprake të mëhershme, me dashje privuan nga jeta tani të ndjerët Ferdi Shishko, Haki Thaqi dhe Belgin Ersoj, të gjithë nga Prizreni.
Incidenti kriminal, i cili ishte temë e diskutimeve të shumta për shkak të të kaluarës recidiviste të të vrarëve, tashmë është drejt fundit të gjykimit në Gjykatën e Prizrenit./kallxo.com/
Kryeministri i Shqipërisë Edi Rama, në rubrikën e tij Amacord, ka uruar poetin dhe publicistin Sabri Hamiti për datëlindjen e tij, shkruan KultPlus.
Poeti dhe studiuesi Sabri Hamiti, sot feston datëlindjen e tij të 67-të.
I lindur më 10 maj 1950 në Dumnicë, Podujevë, shumë shpejt ai arriti të bëhet një ndër studiuesit më të dalluar të letrave shqipe.
Kryeministri i Shqipërisë Edi Rama, në rubrikën e tij Amacord, ka vendosur të ia uroj datëlindjen Sabri Hamitit duke e quajtur shembull të publicistikës dhe krenari të Kosovës dhe Shqipërisë.
“Sabri Hamiti është shembulli i publicistit dhe njeriut të angazhuar. Krenari e Kosovës dhe mbarë shqiptarisë. Gëzuar ditëlindjen mjeshtër, me respekt e mirënjohje”, shkruan Rama. /KultPlus.com
Rektori i Universitetit “Ukshin Hoti” në Prizren,Prof. Dr. Ramë Vataj, me bashkëpunëtorë, të mërkurën ka pritur një delegacion nga Universiteti Jemes Medison-Shtetet e Bashkuara të Amerikës. Në takim ishin edhe menaxhmenti i Universitetit “Fehmi Agani” –Gjakovë si dhe përfaqësuesit e MASHT. Kjo vizitë në UPZ ishte në vazhdën e vizitave që përfaqësues të këtij universiteti prestigjioz amerikan i kanë bërë universiteteve publike në Kosovë. Delegacioni i JMU-së përbëhet nga profesorët: JoAnne Breëster, Michael Stoloff, Vesna Hart dhe Ahmet Shala.
Rektori i UPZ-së, Prof. Dr. Ramë Vataj, prezantoi historikun e UPZ-së, strukturën menaxhuese, njësitë akademike si dhe të arriturat dhe sfidat e UPZ-së. Ai theksoi se megjithëse është universitet i ri është zhvilluar mjaftë mirë. Rektori Vataj shtoi se UPZ është i gatshëm për bashkëpunim në fushat e interesit të dyanshëm.
Po ashtu edhe Rektori i Universitetit “Fehmi Agani” në Gjakovë, bëri një prezantim të këtij universiteti.
Në anën tjetër, Michael L. Stoloff, dekan i asocuar në JMU foli përreth mundësive të bashkëpunimit në mes dy universiteteve, duke i vënë theks më të madh mundësive të shkëmbimit të studentëve për studime semestrale apo master si dhe për qasje në librari digjitale në mënyrë që të mundësohen më shumë burime për kërkime shkencore.