Ashtu sikurse në shumë fusha të tjera të dështimit të sistemit shtetëror, njësoj edhe në atë të drejtësisë, e ka përfshirë sindromi i joprofesionalizmit dhe mosditurisë. Por, ekspertët thonë se pasi sistemi i drejtësisë është më i ndjeshëm, është dashur që sidomos prokurorët të tregoheshin shumë më të kujdesshëm dhe më profesionalë, qoftë për t’i hetuar apo trajtuar rastet si duhet, por edhe për t’iu shkuar hetimeve deri në fund, ngase sipas tyre mostrajtimi i përplot aktakuzave e ka bërë të dështuar tërësisht sistemin e drejtësisë, pa të cilin nuk ka zhvillim demokratik e as zhvillim ekonomik,shkruan gazeta Kosova Sot.

Ndaj së këndejmi është shtruar edhe çështja se përse prokuroria jo rrallëherë tregohet shumë joprofesionale në hartimin e plot aktakuzave, duke ia ‘huq’ shpesh edhe qëllimisht, por mbase edhe nga mosdija e objektit të akuzës. Por pse është ky nivel i dobët dhe hipokrit i disa prokurorëve dhe çfarë hapash duhet ndërmarrë prokuroria e shtetit për ti aftësuar prokurorët e tillë? Avokati Tomë Gashi, në një prononcim për gazetën “Kosova Sot”, ka thënë se për të qenë prokuror, përveç njohurive të përgjithshme dhe përvojës e shkollimit adekuat që duhet t’i kesh, po ashtu, sipas tij, duhet të kesh edhe shkathtësi të caktuara juridike, gjë kjo që vlen edhe për gjyqtarët përveç prokurorëve. Por, Gashi thotë se nëse prokurori qëllimisht e ‘huq’ përpilimin e akuzës që ajo të jetë e mbështetur në ligj dhe t’i ketë të gjitha provat e bashkangjitura që do ta vërtetojnë fajësinë e dikujt, atëherë pra, siç tha, nëse kjo bëhet qëllimisht mund të jetë keqpërdorim i punës së prokurori.

Mungojnë shkathtësitë juridike

Gashi beson se në shumicën e rasteve nuk ka keqpërdorime të tilla, por ka paaftësi për shkak të mungesës së shkathtësive të caktuara juridike, se thënë thjesht puna e prokurorit është një lloj zanati i veçantë. “Përndryshe, nëse kryeprokurori Aleksandër Lumëzi arrin deri te njoftimet se mund të ketë abuzime të ligjit, të cilën mund ta bëjnë prokurorë të caktuar, atëherë janë të parapara masat disiplinore që mund të udhëhiqen ndaj tyre deri edhe në largimin apo përjashtimin e tyre, gjë që në Kosovë për shkak të paaftësive unë nuk mbaj mend se deri më tani është shkarkuar ndonjë gjyqtar apo prokuror, edhe pse për një pjesë të tyre do duhej të ndodhte një gjë e tillë”, ka thënë ai.

“Por, unë gjithmonë jam i bindur se shumica e gjyqtarëve dhe prokurorëve janë të ndershëm, ndërsa aftësitë e tyre janë çështje që të tjerët duhet t’i vlerësojnë, por sido që të jetë paaftësia e nivelit të caktuar, të dëshiruar dhe të nevojshëm për ta kryer punën e prokurorit atëherë definitivisht e bën të padenjë që ta mbajë postin e caktuar. Por, e tërë kjo është çështje e zyrës së Aleksandër Lumezit për t’i vlerësuar prokurorët e Kosovës, ndërsa në anën tjetër është çështje edhe e kryetarit të Gjykatës Supreme të Kosovës, por edhe Këshillit Gjyqësor të Kosovës që ta vlerësojë punën e gjyqtarëve”, ka deklaruar avokati Tomë Gashi.

Të kërkohet llogari

Arton Demhasaj, nga organizata “Çohu”, thotë se shpeshherë ndodh që nga ana e Prokurorisë qysh në start kur duan ta dështojnë lëndën ata ngenë aktakuza shumë të rënda, duke i modifikuar ato shumë rëndë, në mënyrë që të mos pranohet ajo dhe për rrjedhojë të mos mundet që të argumentohet dhe si e tillë ajo më pas hidhet poshtë komplet. Ndërsa, sipas Demhasajt, në disa raste, kur ka shumë materiale dhe fakte për të bërë aktakuzë shumë të rëndë, ata (prokuroria) nuk shkojnë për ta modifikuar ashtu, por e bëjnë lehtë, në mënyrë që ajo më pastaj të përfundojë me shqiptimin e ndonjë dënimi me kusht apo dënimi me gjobë dhe si e tillë ajo thjesht nuk e merr epilogun e duhur. Por, megjithatë, Demhasaj thotë se kjo nuk është shumë e shprehur, pasi janë vetëm disa raste që dyshohet se kanë vepruar kështu dhe se nuk mund të thuhet se të gjithë prokurorët ngritin aktakuza të tilla, ngase siç tha ka prokuror të mirë që e hartojnë dhe argumentojnë lëndën mirë dhe e cila më pastaj arrin deri në gjykatë.

“Pra, në këtë drejtim kryeprokurori i Shtetit ka një lloj përgjegjësie që nëse rezulton se një pjesë e madhe e aktakuzave që ngritin prokurorët nëpër prokurori të njëjtat hidhen poshtë nga ana e gjykatave, kësisoj ai duhet të kërkojë njëfarë llogarie nga prokurorët se ku qëndron problemi i kësaj, por edhe të bëhet ndonjë studim brendapërbrenda Prokurorisë së shtetit lidhur me atë se cili është problemi i hedhjes poshtë të aktakuzave”, ka thënë Demhasaj.

Rasti i një grabitjeje shumë të rëndë që kohë më parë ndodhi në fshatin Damjan të komunës së Gjakovës, që është pjesë e trevës së Hasit të Thatë, me ç’rast, siç u tha në raportin policor, në një shtëpi ishin vjedhur rreth 130 mijë euro të holla kesh dhe stoli në vlerë prej rreth 30 mijë eurove, edhe një herë e ka aktualizuar nivelin e sigurisë së qytetarëve të komunës së Gjakovës, e në veçanti të atyre që jetojnë në zonat rurale. Përfaqësuesit e fshatrave në institucionet komunale shumë herë deri më tash janë ankuar se janë në hall të madh me hajnat, të cilët gjithnjë e më shpesh plaçkitin shtëpitë, ndërsa më të rrezikuarat janë shtëpitë e mërgimtarëve që, për shkak se pronarët e tyre jetojnë dhe veprojnë në diasporë, kanë ngelur të zbrazëta. Shih për këtë disa herë është kërkuar që patrullimet e policisë nëpër zonat rurale të jenë sa më të shpeshta, ndërsa ka edhe raste që është kërkuar që në disa fshatra të formohen nënstacionet e policisë, të cilat mendohet se do ta shtonin nivelin e sigurisë, shkruan gazeta Kosova Sot.

Mungesa e nënstacionit të policisë thuajse po i stimulon hajnat

Një kërkesë e tillë ka ardhur edhe nga treva e Hasit të Thatë, respektivisht nga qendra e kësaj treve, fshati Rogovë. Kjo kërkesë është përsëritur nga disa zyrtarë të këtij fshati, por gjithsesi se më së shpeshti është potencuar nga Ilhami Shala, këshilltar komunal që vjen nga ky fshat. “Rogova, si fshat i madh, ka shumë nevojë të ketë një nënstacion të policisë, gjë që e kemi kërkuar shumë herë, por gjithnjë na është thënë se mungon kuadri i mjaftueshëm. Mungesa e një stacioni të tillë, si duket po e stimulon dukurinë e thyerjes dhe plaçkitjes së shtëpive në fshatin tonë, në shumicën e rasteve të shtëpive të bashkatdhetarëve tanë që jetojnë e punojnë në Perëndim. Fjala vjen, për vetëm rreth dy muaj, kemi pasur më shumë se 20 raste të plaçkitjeve të tilla”, ka thënë Shala. Se hasjanët e Rogovës vërtet nuk ndihen të sigurt e pohon edhe banori i kësaj treve, Valmir Gashi, i cili, siç thotë, është i brengosur për sigurinë e familjeve të kësaj treve.”Vërtet ndihemi shumë të rrezikuar edhe në familjet tona edhe në shtëpitë tona. Kjo është pasojë e shumë rasteve të grabitjeve që kanë ndodhur nëpër shtëpitë e këtij dhe fshatrave përreth. Duhet thënë se posaçërisht janë të rrezikuara shtëpitë ku nuk banojnë njerëz, respektivisht pronarët e të cilave jetojnë në kurbet dhe shtëpitë i kanë lënë të zbrazëta”, ka thënë Valmiri.

Pak shpresa për jetësimin e kërkesës së hasjanëve!

I nxitur nga kjo situatë dhe nga kërkesat e vazhdueshme të hasjanëve, Islam Gashi, kryetar i Këshillit Lokal të fshatit Rogovë, thotë se si struktura të fshatit nuk kanë qëndruar duarkryq. “Hasjanët janë të bindur se ky problem më së miri do të zgjidhej me krijimin e një nënstacioni të policisë në këtë fshat. Në takimet që kemi pasur me strukturat komunale dhe ato të policisë, kemi bë kërkesa që të gjendet mënyra që të ndalet kjo hajni që po shkakton kaq shumë shqetësim dhe frikë tek hasjanët. I jemi drejtuar edhe Ministrisë së Punëve të Brendshme të Kosovës me kërkesën për ta hapur një nënstacion policor në fshatin tonë, aq më parë kur një nënstacion i tillë në Rogovë ka funksionuar edhe para luftës së fundit.

Një nënstacion i policisë jemi të bindur se do të përmirësonte situatën jo vetëm në Rogovë, por edhe në tërë trevën e Hasit, sepse edhe në viset e tjera të Hasit ka probleme të kësaj natyre”, ka thënë Gashi. Mirëpo, si duket, kërkesa e hasjanëve për një nënstacion policor në fshatin Rogovë ka pak gjasa të përmbushet shpejt. Këtë e thotë edhe Ahmet Hasi, drejtor i Drejtorisë Rajonale të Policisë në Gjakovë. “Aktualisht rajoni i Gjakovës ka vetëm një nënstacion policor, në Ponoshec. Nuk kemi pasur mundësi buxhetore për nënstacione të tjera, por njëkohësisht edhe kemi vlerësuar se nuk është interesi që në të gjitha këto treva të hapim nënstacione të tilla. Tash janë krijuar rrethana të reja dhe PK është e pajisur me mjetet më moderne që e shtojnë shumë mundësinë e intervenimit nga stacioni bazë, në cilindo prej fshatrave”, ka thënë Hasi.