Policia e Kosovës ka bërë të ditur se gjatë ditës së djeshme në gjithë territorin e vendit kanë ndodhur 25 aksidente trafiku, prej të cilave 9 kanë përfunduar me persona të lënduar dhe 16 të tjera me dëme materiale.
Policia ka bërë të ditur se ndaj të gjithë pjesëmarrësve qw kanw thyer rregullat në trafik ka shqiptuar gjithsej 1128 gjoba kundërvajtëse.
Tani që ka nisur edhe kompletimi final i Odave të Gjykatës Speciale, me emërimet e stafit të gjykatësve, njohësit e fushës së drejtë- sisë dhe analistët politikë presin edhe ndonjë “tërmet” në skenën politike të Kosovës, me zbardhjen e aktakuzave të para dhe arrestimeve që mund të ndodhin. Zhvillimet dramatike në vend, me fillimin e punës së kësaj Gjykate, janë të pritshme sipas analistit të së drejtës Blerim Burjani.
“Po, është e mundshme dhe pritet një stuhi e furishme që të ndodhë shume shpejt, dhe madje tash thuhet që kjo të ndodhë gjatë muajit mars. Në këtë muaj pritet se do të ndodhin edhe ngritjet e aktakuzave të shumta, prandaj kuptohet se do të ketë ndikim të madh në politikën vendore, në veçanti për individë të shumtë të të dy taborëve politikë, pozitë dhe opozitë”, theksoi ai.
” PDK-ja pritet të ketë probleme më të mëdha, kjo do të shtyjë këtë subjekt të reformohet politikisht brenda strukturave politike, ngase ky subjekt deri më tash i ka rezistuar sistemit gjyqësor dhe shpeshherë thuhet se ky subjekt është anarkik dhe kontrollues i buxhetit dhe i posteve publike”, u shpreh Burjani. Sipas tij, mund të priten ndryshime të dukshme në skenën politike vendore, por e keqja është se ende s’ka një alternativë të re intelektuale që do të dilte për të bërë ndryshime. “Po duket sikur inteligjenca është shumë e heshtur, përderisa kjo klasë politike, pozitë dhe opozitë, është anarkike dhe përfituese nga buxheti i qytetarëve”, potencoi Burjani
Kokat mund të lihen në fund
Analisti Hidajet Ahmeti konsideron se themelimi i Gjykatës Speciale është një fyerje e luftës së drejtë të UÇK-së. Ai dyshon që paraprakisht është përgatitur edhe terreni që kjo Gjykatë të merret fillimisht me figura që kanë më pak ndikim në opinion dhe kështu koka politike e vendit të blejë kohë, duke sakrifikuar të vegjlit. “Emërimet e reja në Gjykatën Speciale janë një mesazh i qartë se shumë shpejt do të fillojë funksionalizimi i kësaj Gjykate. Gjykoj se me funksionalizimin e Gjykatës Speciale do të këtë një tronditje në skenën politike kosovare, por besoj se ngritja e akuzave do të fillojë nga bishti, duke filluar me njerëzit që kanë më pak ndikim në skenën politike kosovare . Edhe nëse në sirtarët e kësaj Gjykate janë dosjet e njerëzve me ndikim në skenën politike kosovare, Gjykata Speciale nuk do ta ketë guximin që të fillojë nga ata, pasi mund të ngrihen tensionet në opinionin publik, që potencialisht mund të shkaktojnë destabilitet brenda shtetësisë së brishtë të Kosovës. Kokat e dyshimta të krimit, për të cilat ka filluar Gjykata Speciale, do të mbeten për në fund, me qëllimin që të ruhet stabiliteti institucional e politik brenda Republikës së Kosovës”, u shpreh ai. Sipas tij, dihet botërisht se akuzat e eurodeputetit Dick Marty drejtonin gishtin te presidenti i tanishëm Hashim Thaçi .
“Të “vërtetat” e pathëna asnjëherë nuk tronditën opinionin publik kosovar. Kjo ishte baza që ka filluar hetimi për këto krime të supozuara, duke e sjellë Kosovën në një gjendje sikleti për ta pranuar një Gjykatë ndërkombëtare për të gjykuar krimet e supozuara të UÇK-së. Nuk ka dyshim se skena politike kosovare do të pësojë ndryshime radikale, ku do të këtë lëvizje elektorale’, tha analisti Hidajet Ahmeti.
Qytetarët e Kosovës as gjatë këtij viti nuk mund të lëvizin të lirë në zonën Schengen. Pasi që autoritetet e Kosovës nuk i kanë përmbushur kërkesat që dalin nga udhërrëfyesi për vizat. Kushti që ua mundëson qytetarëve liberalizimin nëpër vendet e Bashkimit Evropian është ratifikimi i Marrëveshjes së Demarkacionit me Malin e Zi në Kuvendin e Kosovës.
Madje ratifikimi, sipas kryeministrit Isa Mustafa, duhet të përfundojë deri në fund të këtij muaji në mënyrë që qytetarët të pajisen me viza. Por, ky mesazh i Mustafës nuk iu ka bërë përshtypje partive opozitare të cilat mbeten të njëjtat karshi Demarkacionit, shkruan “Zëri”.
Sipas përfaqësuesve të Qeverisë gjasat për lëvizje të lirë në zonën Schengen ekzistojnë vetëm nëse Demarkacioni kalon në kuvend këtë muaj.
“Ne kemi gjasa për liberalizim nëse Demarkacioni kalon këtë muaj në Kuvend”, ka thënë këshilltari i kryeministrit Mustafa, Bajram Gecaj.
Sipas tij, ende ekziston shpresa për ratifikimin e Marrëveshjes me Malin e Zi brenda muajit shkurt.
“Shpresa vdes e fundit”, është shprehur Gecaj. /Zëri/
IMER MUSHKOLAJ
Serbët kosovarë nuk duhet parë si aleatë të Beogradit, në përpjekje për ta shkatërruar shtetësinë e Kosovës. Qeveria e Kosovës duhet të vendosë një dialog të brendshëm me ta dhe të mos i jep mundësinë Beogradit që t’i manipulojë dhe të marrë vendime në emër të tyre. Shqiptarët si shumicë kanë përgjegjësi për ta, siç duhet ata të kenë përgjegjësi për shtetin në të cilin jetojnë
Serbët e veriut të vendit, të cilët duan të marrin patentshoferë të Republikës së Kosovës, nuk e kanë këtë mundësi. Qeveria e Kosovës nuk ka hapur asnjë zyrë në veri, në të cilën qytetarët që jetojnë në atë pjesë mund t’i kryejnë këto shërbime.
Ky është vetëm një shembull i thjeshtë, por mjaft domethënës, për të treguar se sa institucionet kosovare janë të përkushtuara për integrimin e vërtetë të serbëve që dëshirojnë të jetojnë në Kosovë dhe që e pranojnë Kosovën shtet. Në mungesë të një zyre të tillë, serbëve të veriut iu mbetet si zgjidhje të pajisen me dokumente të Serbisë, të cilat pastaj nuk njihen nga Prishtina.
Këtë shqetësim dhe të tjera si ky i ka paraqitur para pak ditësh në Prishtinë një aktiviste e shoqërisë civile nga veriu i vendit, teksa ka folur për integrimin e serbëve në institucionet dhe shoqërinë kosovare. Ata nuk mund të jetojnë gjatë gjithë kohës të varur dhe peng i Beogradit, andaj duhet bërë sa më shumë përpjekje që të ndihen si të gjithë qytetarët tjerë të Kosovës, me kujdesin dhe përgjegjësinë e shtetit të ri.
* * *
Gjatë gjithë javëve të fundit, kur politika dhe mediat krijuan një psikozë lufte në Kosovë, kjo nuk ndikoi tek serbët e veriut. Pavarësisht përpjekjeve për të krijuar situata të paqena dhe ndjenjë pasigurie, këto nuk janë reflektuar në jetën e përditshme të serbëve, e as në marrëdhëniet e tyre me popullatën shumicë, shqiptarët.
Serbët kosovarë e përjetojnë ndryshe qasjen e politikës kosovare, e ndryshe disponimin e shqiptarëve. Andaj edhe integrimi i tyre duhet të zhvillohet në dy rrafshe: atë politik dhe atë shoqëror.
Integrimi politik, juridik, institucional është në interesin e tyre, në përfitimin e të drejtës për t’u trajtuar të barabartë me të gjithë të tjerët. Ky integrim do të forcohej edhe më shumë po që se Beogradi do t’i ndalte përfundimisht pagat për ta dhe të gjithë të punësuarit në arsim, shëndetësi etj. të paguheshin nga Prishtina. Në këtë mënyrë do të rritej përgjegjësia e instiucioneve kosovare karshi tyre, sikurse edhe përgjegjësia e tyre karshi institucioneve.
Qeveria e Kosovës ka dështuar që me serbët të vendos një dialog të brendshëm, të domosdoshëm, në mënyrë që t’i zgjidhë problemet. Në vend të kësaj, Prishtina ia ka mundësuar Beogradit që të bisedojë e të marrë vendime në emër të tyre. Kjo është e rrezikshme.
Serbët kosovarë janë qytetarë të shtetit të Kosovës dhe iu takon institucioneve përkatëse të kujdesen për ta. Shqiptarët janë shumicë dhe iu takon të përkujdesen për pakicat, në këtë rast edhe për serbët. Serbët nuk duhet parë si aleatë të Beogradit në përpjekje për ta shkatërruar shtetësinë e Kosovës. Ata duhet parë si qytetarë të këtij vendi të cilët, me angazhim të sinqertë të institucioneve, mund të kthehen në qytetarët lojalë.
* * *
Problemi më i madh i institucioneve në raport me serbët kosovarë është ndërtimi i besimit. Për shkak të gjithë asaj çfarë ka ndodhur, serbët kanë pak besim në gjithçka që ka të bëjë me shtetin e Kosovës. Andaj duhet të punohet shumë në këtë aspekt, në mënyrë që ata të binden se Kosova është shtet edhe i tyre. Kjo mund të arrihet me angazhimin më të madh të të gjithëve, me qasje konstruktive e gjithëpërfshirëse, e jo me qasje përjashtuese.
Serbët tashmë janë pjesë e institucioneve, edhe e atyre të sigurisë. Në këtë mënyrë ata po japin kontributin e vet, kontribut ky që do të rritet viteve në vazhdim. Por, më e rëndësishmja është që ata të mos shihen si armiq të shtetit të Kosovës, por si shtetbërës. Të shihen si njerëz që kanë zgjedhur të jetojnë në Kosovë – nëse jo bashkë me shqiptarët dhe të tjerët, së paku pranë shqiptarëve dhe të tjerëve.
Çështjet e brendshme diskutabile dhe problemet me serbët, institucionet e Kosovës duhet t’i zgjidhin në bashkëpunim dhe në marrëveshje me ta. Për to duhet të vendoset në Prishtinë. Nuk ka kurrfarë arsye që për të tilla çështje të diskutohet me Beogradin, aq më pak në Bruksel.
Natyrisht, Beogradi e ka të drejtës që të interesohet dhe t’i ndihmojë serbët kosovarë, por kurrsesi t’i kthejë në “mish për top” për interesa të veta.
Prishtina ka interes që serbët të ndihen qytetarë të barabartë të këtij vendi. Shqiptarët e kanë një interes të tillë. Kjo është e mundshme – vetëm duhet më shumë angazhim e sinqeritet. Më shumë seriozitet. Serbët janë tonët, të Kosovës, jo të Serbisë./Gazeta Express/
Kryetari i Komunës së Rahovecit, Idriz Vehapi dhe Munib Durguti, drejtor i DShMS-së, gjatë ditës janë takuar me drejtorin e qendrës së dializës në QKUK dhe udhëheqës i dializës në nivel të Kosovës, Ibrahim Rrudhani. Qëllimi i takimit ishte për të parë më afër se deri ku kanë arritur përgatitjet, ku do të vendosen aparatet të cilët shërbejnë për funksionimin e qendrës së analizës.
Në takim ishin edhe drejtori i spitalit të Prizrenit, Afrim Avdaj, dhe Agron Sadiku drejtor i kompanisë “MEDITECH”.Ibrahim Rrudhani, drejtor i qendrës së dializës në QKUK dhe udhëheqës i dializës në nivel të Kosovës, u shpreh se është bërë punë e mirë në përgatitjen e dokumentacionit dhe vendit ku do të vendoset qendra e dializë dhe kjo do të jetë në të mirë të gjithë pacientëve të cilët janë në dializë.
Ndërsa kryetari i Komunës së Rahovecit, Idriz Vehapi tha se ky është një projekt që nuk duhet të hezitohet që të përkrahet dhe sigurisht që hapja e qendrës së dializës do të jetë në të mirë të pacientëve të dializës, të cilët janë në Komunën e Rahovecit, pasi që siç e dimë pacientët tanë shërbimet e dializës i kryejnë në spitalin e Prizrenit.Kurse, Agron Sadiku, drejtor i kompanisë “MEDITECH”, konfirmoj se ne si kompani jemi të gatshëm që të bëjmë furnizimin e qendrës së dializës në Rahovec , me pajisjet te nevojshme të cilat duhet që kjo qendër të funksionalizohet.
E, Munib Durguti, i njoftoj të gjithë të pranishmit në takim se investimet në infrastrukturë ku do të vendosën aparatet e dializës janë drejt fundit dhe objekti do të jetë i gatshëm shumë shpejt. Ai u shpreh se një pjesë e stafit është trajnuar dhe janë certifikuar, vlera e përgjithshme e investimeve infrastrukturore është 126 mijë eurove.
Të enjten është mbajtur seanca e parë e rregulltë për këtë vit e Kuvendit të Prizrenit, në të cilën janë shqyrtuar dhe miratuar disa pika të rendit të ditës, ndërsa disa tjera janë lënë për një takim të radhës, për shkak të numrit të madh të tyre.Në fillim të seancës të së enjtes, disa kuvendarë kërkuan që pikat të cilat kishin të bënin me raportin e pesë organizmave dhe institucionëve të ndryshme të shtyhen për një seancë tjetër, kërkesë kjo që u miratua me shumicë votash nga anëtarët e Kuvendit. Më pas është shqyrtuar propozimi i Planit të Punës së Kuvendit, ku kuvendarët e opozitës më disa propozime shtesë kanë përkrahur sikurse edhe pozita miratimin e këtij Plani i cili kaloi me shumicë votash.
Më pas , Kuvendi ka diskutuar edhe për shqyrtimin e propozimvendimit për ndryshimin e emërtimit të disa projekteve në buxhetin e vitit 2017, ku ndër tjerash u përmend projekti për varrezat e reja të qytetit në afërsi të fshatit Landovicë.
Me këtë rast, kryesuesi I Kuvendit, Kujtim Gashi, bëri të ditur se realizimi i këtij projekti të rëndësishëm do të filloj gjatë muajit mars, ndërsa për çështjen e pagesës së shpenzimit të varrimit të qytetarëve ai tha se do të mbulohen shpenzimet e të gjithë atyre që ndërrojnë jetë, jo vetëm kategoritë e rasteve sociale.
Pas miratimit të kësaj pike, kuvendarët kanë shqyrtuar edhe propozimrregulloren për transparencë, ku gjithashtu disa kuvendarë të opozitës kanë paraqitur kërkesa plotësuese për këtë propozimrregullore, ndërsa zyrtari komunal për informim, Ymer Berisha, tha se ky dokument në të cilin kanë dhënë kontribut edhe anëtarët e Kuvendit dhe shoqëria civile, do t’i shërbej në mënyren më të mirë të mundshme çështjes së transparencës së kërkuar. Kuvendi i Prizrenit në mbledhjen e sotme ka shfuqizuar një vendim që ka marrë më herët për marrjen në pronësi të pronave të ish sistemit, sipas një kërkese të MAPL-së , pasi që për një çështje të tillë pritet të marr vendim qeveria/TV Prizreni/
Kuvendarja e Nismës në Prizren, Ganimete Hoxha-Babuna, tha se moszgjedhja e drejtorit të shkollës “Naim Frashëri” në fshatin Vlashnje, është një veprim i shëmtuar
“Që 7 vite shkolla nuk ka drejtor, udhëhiqet me ushtrues detyre të drejtorit, jo se nuk ka kandidat të kualifikuar të cilët janë pjesëmarrës të konkursit, por thjesht nuk e përmbushin kriterin politik dhe milatantesk të cilën e kërkon partia në pushtet”, tha Hoxha-Babuna në seancën e Kuvendit të Prizrenit.
“Deri kur do të vazhdoni në këtë mënyrë, me arbitraritet dhe shkelje ligjore ?”.
“Pyetja konkrete është përse u anulua konkursi i fundit (shkurt 2017), përse u thirren kandidatët në intervistim dhe nuk u mbajt intervista?”
“Kërkojmë një raport me shkrim, nga Drejtori i arsimit, kush kane qenë pjesëmarrësit, cilët kritere nuk i kanë plotësuar dhe cila është baza ligjore e anulimit të konkursit”.
“Po ja bëj me dije publikisht, se nëse do të tentohet që përems emërimit të ndonjë militanti politik, siq kan vepruar gjerë më tani, ta pushtojnë shkollën në fshatin Vlashnje, duke emëruar ushtrues të dhunshëm të drejtorit, kësaj radhe partia në pushtet do ta ketë të pamundshme sepse do të përballen me një rezistencë të fuqishme të prindërve dhe qytetarëve të Vlashnjes, sepse mjaft më kanë abuzuar me kulturën dhe vlerat qytetare të këtyre banorëve”./PrizrenPress.com/
Emri i Hatim Baxhaku është duke u diskutuar nga LDK-ja, si kandidat për kryetar të Prizrenit
Kryetari i Degës së LDK-së në Prizren, Haxhi Avdyli, konfirmon se në këtë subjekt politik, kanë filluar diskutimet nëse kandidatura e Baxhakut, do të rikthente fitoren e LDK-së në Prizren.
“Kemi filluar diskutimet me anëtarësinë tonë nëse kandidatura e deputetit më të votuar në LDK-në e Prizrenit, dr. Hatim Baxhakut do ishte kandidaturë fituese për Prizrenin”, tha Avdyli për PrizrenPress.
Sipas tij, diskutimet janë shumë produktive.
“Unë dhe Hatimi e kemi vënë LDK-në mbi ambiciet personale”, tha ai.
Kryetari Avdyli, premton se në kohën e duhur LDK-ja në Prizren, zyrtarisht do të dalë me emrin e kandidatit për Prizrenin.
“Ky është debat I brendshëm I LDK-së. Unë, e as dr. Hatimi nuk pot hemi Unë, Unë, por NE “.
Avdyli shprehet optimist se LDK-ja sivjet do të fitojë në Prizren.
“Fitorja e LDK-së është imperativ i kërkuar si nga anëtarësia dhe qytetarët, prandaj jemi duke punuar shumë për fitore”.
“Zakonisht LDK e ka pasur traditë që kryetari I Degës të jetë edhe kandidat për kryetar të qytetit, por unë si kryetar po dua ta jap një shembull për politikën kosovare. Interesi i përbashkët për fitore dua që të dominojë mbi ambicien personale”.
“Me fitoren e LDK-së, menaxhimi i qytetit do të ndryshojë. Unë do jem në ekipin politik më të ngushtë në ndonjë pozitë që do të kontribuoj për të ndryshuar qytetin”/PrizrenPress.com/
Një fëmijë është shkelur me veturë në Prizren. Aksidenti ka ndodhur për shkak pakujdesisë së vozitësit.
Viktima ka pësuar lëndime trupore.
Pas trejtimit mjekësor, ai është lëshuar në shtëpi./PrizrenPress.com/
Policia e Kosovës mëngjesin e sotëm ka arrestuar deputeten e VV’së Aida dërgutin.
Arrestimi sipas policisë është bërë në bazë të urdhëarrestit të lëshuar nga organet e drejtësisë.
Ky është njoftimi i plotë i policisë për arrestimin e saj:
Policia e Kosovës bazuar në mandatin ligjor që ka është e obliguar në zbatimin e urdhërarresteve të ligjshme të lëshuara nga organet e drejtësisë dhe bazuar në këtë, sot me 09.02.2017 në orët e mëngjesit ka realizuar zbatimin e një urdhërarresti në zonën e përgjegjësisë së stacionit policor Vushtrri.
Njësitet relevante policore të stacionit policor Vushtrri, bazuar në urdhëresë, kanë ndaluar deputeten e RKS-së znj. A. D., të cilën e kanë njoftuar mbi arsyen e ndalimit dhe bazuar në urdhëresë të njëjtën e kanë shoqëruar në Gjykatën Themelore në Prishtinë.
Vlen të potencohet se znj. A.D. ka bashkëpunuar dhe kooperuar mirë me zyrtarët policorë dhe e njëjta është shoqëruar në gjykatë, ashtu siç parashihet me urdhëresë.
Bashkangjitur mund të gjeni urdhëresën e lëshuar nga Gjykata Themelore në Prishtinë.