Sot në Malishevë, organizuar nga shoqatat e dala nga lufta e UÇK-së dhe Komuna e Malishevës, është mbajtur një marsh protestues, kundër arrestimit të ish kryeministrit të Kosovës, gjeneralit Ramush Haradinaj. Në këtë marsh, u kërkua lirimi i Ramush Haradinajt, pasi lufta e tij dhe e UÇK-së, ka qenë luftë e pastër dhe çlirimtare, luftë e cila është dëshmuar shumë herë. Në këtë marsh, u kërkua nga institucionet vendit që ta ndërpresin dialogun me shtetin serb, deri në njohjen e shtetësisë së Kosovës dhe heqjen e akuzave ndaj çlirimtarëve.

Në këtë marshim, që filloi nga hyrja e Malishevës, e deri në qendër të qytetit në “Sheshin e Dëshmorëve”, morën pjesë mijëra qytetarë të Komunës së Malishevës, deputetë të Kuvendit të Kosovës, strukturat komunale të Malishevës, si dhe përfaqësuesit e subjekteve politike në Malishevë dhe veteran të luftës së UÇK-së.

Në fjalimin e tij, nënkryetari i Komunës së Malishevës, Rexhep Mazreku, tha se “liria jonë, nuk ka kuptim, kur neve na burgosen çlirimtarët”. “Ne i bëjmë thirrje shtetit mik të Francës, që ta liroj Ramush Haradinajn, dhe të mos bien në kurthet e shtetit serb”. Mazreku, gjithashtu foli edhe për figurën e Ramush Haradinajt dhe angazhimin e tij ushtarak dhe politik.

Ndërsa deputeti i Kuvendit të Kosovës nga radhët e “NISMA për Kosovën”, Enver Hoti, tha se “Ramush Haradinaj, është vet liria”. “Shprehim indinjatën tonë për arrestimin e Ramush Haradinajt, ndaj të cilit përfundimisht në vitin 2012, në Hagë, është vërtetuar se lufta e tij dhe e UÇK-së, ka qenë çlirimtare dhe e pastër. Ne ju bëjmë thirrje Francës dhe INTERPOL-it, që të mos bien në kurthet e mashtrimeve serbe”, tha mes tjerash deputeti Hoti.

Shefi i grupit parlamentar të AAK-së, në Kuvendin e Kosovës, Pal Lekaj, pasi i falënderoj qytetarët e Malishevës, për mbështetjen e dhënë, tha se “Ramushi, Fatmir Limaj, Lahi Ibrahimaj dhe të tjerët, e kanë dëshmuar pastërtinë e luftës dhe se ata vet, janë të pafajshëm”. “Deri kur kështu do të ndiqen ata që vunë gurëthemelin e shtetit të Kosovës. Nuk guxon askush të luaj me luftëtarët e lirisë, siç është njeriu që dha gjithçka për lirinë e vendit. Andaj, ne i themi Francës, që të mos bie pre e urdhrave serbe”, tha Lekaj, i cili në fund tha se “Kosova është e varfër pa Ramushin, pasi Ramushi është vet Kosova”.

Përfaqësuesi i degës së AAK-së në Malishevë, Bashkim Krasniqi, bëri thirrje për lirimin e Ramush Haradinajt dhe për ngritjen e akuzave për krimet serbe gjatë luftës në Kosovë. Ai më pas, tha se “Ramush Haradinaj, dy herë e ka mbrojtur luftën e UÇK-së në gjykatën ndërkombëtare, por kjo i pengon Serbisë, sepse pushka e Ramushit, ishte zjarr për ta”.

Edhe Sinan Gegaj, i cili foli në emër të shoqatave të dala nga lufta e UÇK-së, në Malishevë, kërkoi lirimin e Ramush Haradinajt, pasi lufta e UÇK-së dhe e vet Ramushit, ka qenë e pastër dhe e cila është dëshmuar nga vet këto shtete, siç është edhe Franca. Gegaj, pasi kërkoi, lirimin e Ramush Haradinajt, “kërkoi nga institucionet e vendit, që të ndërpritet dialogu më shtetin serb, deri në njohjen e shtetësisë së Kosovës nga ana e Serbisë dhe heqjen e të gjitha akuzave ndaj çlirimtarëve”./PrizrenPresss.com/

Ani pse pushteti legjislativ, ekzekutiv dhe gjyqësor, formalisht e juridikisht, por edhe me Kushtetutë, janë të ndarë nga njëritjetri, në praktikë nuk po funksion kështu, për shkak të ndikimeve politike që janë në sistemin juridik të Kosovës, qoftë në prokurori apo në gjykatë. Kështu të paktën kanë vlerë- suar analistët, njohësit dhe opozitarët e vendit, të cilët kanë thënë po ashtu se pavarësia institucionale në Kosovë është vetëm ajo që shkruhet në letër, sepse në praktikë realiteti e ka dëshmuar të kundërtën. Ndaj është shtuar edhe çështja se çfarë mund të pritet nga institucionet e tjera, të cilat fatkeqësisht nuk po arrijnë assesi që të jenë të pavarura nga Qeveria dhe politika në praktikë!? Analisti Shefqet Dibrani, në një prononcim për gazetën “Kosova Sot”, ka thënë se degradimi i drejtësisë deri në këtë shkallë ka bërë që të lulëzojnë krimi dhe korrupsioni dhe bashkë me to edhe dështimi i të gjithë sektorëve shtetërorë, kulturorë dhe atyre ekonomikë, derisa, sipas tij, sot vendi ynë përcillet prej skandaleve më të ndryshme dhe përveç ndonjë spektakli mediatik, pas dy-tre ditësh heshtën edhe lajmet, ndërsa e keqja shkon duke bërë udhën e vet, sa pothuajse çdo gjë është infektuar me viruset kancerogjene. “Por, të mos hamendësohemi se pa një drejtësi të mirë nuk do të kemi as sistem politik, as sistem arsimor, dhe bashkë me to as kulturë, as bujqësi dhe as ekonomi të zhvilluar, pas për t’ia shtypur frerin së keqes duhet të funksionojë sistemi i drejtësisë dhe siguria të jetë në nivel”, tha Dibrani

Nepotizmi, korrupsioni, krimi i organizuar

Sipas Dibranit, Kosova është në krizë më shumë për shkak të një sistemi të kalbur, i cili është bërë imun ndaj së keqes, për të mos akuzuar se është bërë edhe vetë pjesë e së keqes, e cila ka lulëzuar në të gjitha anët. Tutje, Dibrani ka rikujtuar një proverb popullor, i cili siç tha na mëson se “peshku kalbet nga koka”, teksa e keqja e vendit tonë janë pa dyshim Qeveria dhe bordet apo drejtoritë përcjellëse, të cilat e kontrollojnë funksionimin e Qeverisë, ndërsa, sipas tij, në anën tjetër, vendi ynë po vuan nga e keqja që e ka kapluar Qeverinë. “Kjo pasi në qeveri i kemi nepotizmin, korrupsionin, krimin e organizuar, prandaj çfarë mund të presim nga institucionet e tjera, nga drejtoritë dhe bordet që menaxhohen nga Qeveria, ose nga organizata joqeveritare, të cilat monitorojnë punën e Qeverisë, të cilat më sa duket nuk janë të pavarura, sepse reagimi dhe kritikat e tyre më shumë duken si një harmoni e marrëveshjes në mes tyre dhe Qeverisë sesa të kenë atë pavarësinë që e proklamojnë, e cila për fat të keq nuk gjendet as te prokuroria, sikurse pak ka dallime në mes të pushtetit legjislativ dhe atij ekzekutiv. D.m.th. pavarësia institucionale në Kosovë është vetëm ajo që shkruhet në letër, sepse në praktikë realiteti e ka dëshmuar të kundërtën”, ka thënë ai. Por, Dibrani mendon se Kosova është një vend që ka ditur të kopjojë ligje të mira dhe ato t’i diskutojë dhe t’i miratojë në Parlament, derisa po ashtu në Kosovë mund të dëgjojmë siç tha se jemi shembull pozitiv në rajon dhe më gjerë, por në praktikë po dëshmohet e kundërta, qoftë me nivelin e drejtësisë, me sistemin e arsimimit dhe sigurinë, e cila kryesisht është në pus pa fund.

Politika ndikon në emërimet në drejtësi

Deputetja e opozitës nga radhët e AAK-së, Time Kadriaj, thotë se kërkesë e çdo Raporti të Progresit, por edhe të gjitha raporteve të tjera ndërkombëtare e vendore, ka qenë dhe është që politika të qëndrojë larg gjyqësisë dhe prokurorisë, si dhe sistemit juridik në përgjithësi, por në fakt, sipas saj, është krijuar një praktikë e keqe, ku këto institucione të pavarura po udhëhiqen ose po diktohen nga njerëzit që merren me politikë. “Këtë e shohim edhe nga vetë emërimet e gjyqtarëve dhe prokurorëve, ku ekskluzivisht është e përzier partia dhe njerëzit që udhëheqin këto dikastere kaq të rëndësishme, që gjithmonë emërohen njerëz politikë, ata që i shërbejnë politikës, pra në fakt ata që i shërbejnë pushtetit, derisa të njëjtit edhe shfrytëzohen për nevojat e pushtetit, ndërsa në momentin kur nuk u shërbejnë më pushtetarëve kemi parë se të njëjtit largohen në forma të ndryshme”, ka theksuar për gazetën “Kosova Sot” deputetja e opozitës nga radhët e AAK-së, Time Kadriaj. Deputeti nga Nisma për Kosovën, Zafir Berisha, mendon se në letër në fakt janë të ndara edhe ekzekutivi nga legjislativi, si dhe nga organet gjyqësore, por për fatin e keq në praktikë nuk është ashtu dhe kjo, siç tha, jo vetëm në këtë rast, pasi edhe në raste të tjera përzierja në punët e ndara të njëri-tjetrit e ka përcjell Kosovën që nga paslufta, e veçanërisht vitet e fundit, ku tashmë është thënë edhe në opinion ndërhyrja e politikës në organet e drejtësisë si shtyllë e ndarë e shoqërisë. “Andaj, kjo praktikë natyrisht që e pengon zhvillimin e demokracisë, por edhe vendosjen e ligjit dhe rregullit në shtet, në këtë rast kur kemi parasysh se organet e drejtësisë duhet të merren me dukuritë devijuese, duke përfshirë edhe krimin e organizuar që jo rrallëherë është e implikuar edhe politika në të”, ka spikatur ai për gazetën “Kosova Sot”.