Partitë opozitare kanë vlerësuar se protesta e cila do të mbahet sot, në ora 14:00 do të jetë më masivja që nga paslufta.

Visar Ymeri, udhëheqës i lëvizjes Vetëvendosjes, ka thënë ditë më parë se qytetarët e Republikës nuk e ka ndërmend as ta tolerojnë një qeveri që rrezikon rendin kushtetues për t’ia krijuar Serbisë hapësirën për ndërhyrje politike dhe territoriale në Kosovë e as ta tolerojë faljen e tokave të Kosovës, një shteti të tretë, siç është rasti me Malin e Zi.

Ish-lideri i Vetëvendosjes, Albin Kurti ka thënë se pushteti aktual është në panik, ndërsa populli është entuziast dhe i guximshëm dhe sipas tij, ndryshimet po vijnë pikërisht prej popullit.

Ai tha se protesta e nesërme do të jetë më masivja që nga përfundimi i luftës.

Kreu i Aleancës për Ardhmërinë e Kosovës, Ramush Haradinaj një ditë më parë iu ka bërë thirrje grave të opozitës që të marrin pjesë në protestën e nesërme.

”Ju duhet të merrni pjesë patjetër në këtë protestë duke marrë parasysh gjendjen e gruas në Kosovë” ka shtuar ai.
Ai garantoi se protesta do të jetë e qetë dhe paqësore.

Edhe kryetari i NISMË-s, Fatmi Limaj, ka kërkuar që protesta të jetë paqësore.

“Do të protestohet për shtet me sovranitet dhe do të kërkohet dorëheqja e këtij koalicioni aktual qeverisës që refuzon të jep përgjegjësi për shkeljen e Kushtetutës, me nënshkrimin e marrëveshjeve që ka bërë”, ka thënë Limaj.

Deputeti i Nismës Zafir Berisha nuk do tw kishte besuar se në 8 vjetorin e Pavarësisë së Kosovës, do të protestojë në rrugë. Ai tregon se në ditën kur e ka nënshkruar Deklaratën e Pavarësisë, nuk i ka shkuar as në mendje se do të vije një ditë që të mbrojë me protesta.

“Para 8 viteve kur kam nënshkruar në Deklaratën e Pavarësisë kurrë nuk më ka shkuar mendja se pas 8 viteve të shpalljes së Pavarësisë së vendit do të ketë nevojë me dalë në rrugë me protestu në mbrojtje të sovranitetit të vendit, sovranitet i cili po rrezikohet nga klasa e papërgjegjshme politike me marrëveshje të dëmshme sic është projekti serbe “Zajednica””, thotë Berisha,shkruan PrizrenPress.

Pavarësisht kësaj, Berisha ka uruar qytetarët për Ditën e Pavarësisë.

“Me rastin e 8 vjetorit të Pavarësisë së Kosovës, uroj këtë festë të gjithë qytetarëve të Kosovës duke shpresuar që festat me simbolikë si kjo do të jenë motivuese për angazhimin tonë në shtet ndërtim”.

“Përpjekjet e qytetarëve të Kosovës, për liri dhe pavarësi të cilat kulmuan me luftën e lavdishme të UÇK-së, na obligojnë të gjithëve, si qytetar, subjekte politike por edhe institucionale që në frymën e këtyre angazhimeve të punojmë edhe më shumë për një jetë më të mirë në shtetin tonë ndaj të cilit kemi obligim”./PrizrenPress.com

Akademik Rexhep Qosja sot ka reaguar ashpër ndaj zhvillimeve më të reja në Kosovë: Mbledhjet e Kuvendit që mbahen në prani shumë të madhe të policëve, arrestimet e deputetëve të opozitës.

Qosja në këtë reagim ka kërkuar ngritjen e zërit kundër Qeverisë aktuale të Kosovës.

Ky është reagimi Qosjes: Regjimi i sotëm në Kosovë ka hyrë në fazën e përdorimit të metodave fashiste në pushtetin që po zbaton dhe këto metoda fashiste nuk po i përdor vetëm sot. Papërgjegjshmëria, shantazhet, gënjeshtrat, kërcënimet, përjashtimet prej pune të familjarëve të kundërshtarëve politikë janë vetëm disa përbërës të metodave fashiste të këtij pushteti. Dëshmi e përdorimit të metodave fashiste në pushtetin e Kosovës sot janë mbledhjet e parlamentit në të cilat gati sa deputetë marrin pjesë policë në uniforma dhe në veshje civile Dëshmi posaçërisht e egër e zbatimit të metodave fashiste në pushtetin e Kosovës janë burgosjet e deputetëve dhe të aktivistëve të Opozitës që tash e sa kohë po urdhëron Qeveria e Kosovës. Këto metoda fashiste, u panë sidomos dje dhe sot: dje – kur, dy ditë para protestës së Opozitës, u thirrën në seancë gjyqësore ish kryetari i Vetëvendosjes, Albin Kurti, deputetja e Vetëvendosjes, Albulena Haxhiu, deputetja e AAK-së, Donika Kada Bujupi, dhe deputeti i Vetëvendosjes, Faton Topalli dhe sot – kur në orën 6 të mëngjesit, një ditë para protestës së Opozitës, me urdhër të gjykatësit të Gjykatës Themelore të Prishtinës, u arrestua shefi i grupit Parlamentar të Vetëvendosjes, Glauk Konjufca, dhe shtatë aktivistë të tjerë të Vetëvendosjes.

Metodën fashiste të arrestimit të tyre e bënë sa brutale aq edhe komike si “0vonesa” ashtu edhe arsyeja e arrestimit të tyre: ata u arrestuan sepse në vitin 2009 i paskan rrotulluar disa xhipa të EULEX-it dhe i paskan rrotulluar për shkak se EULEX-i kishte bërë marrëveshje me Policinë Serbe! Nuk ka dyshim se qëllimi i arrestimit të tyre është dobësimi sa më i dukshëm i protestës së nesërme në njërën anë, kurse frikësimi i pjesëmarrësve si dhe i atyre që kanë menduar të marrin pjesë në protestë, në anën tjetër. Kur burgosen aq lehtë, e në mënyrë aq fashiste krerët e opozitës, çka mund t’u ndodhë qytetarëve të tjerë! Populli shqiptar i Kosovës, inteligjencia shqiptare e Kosovës, inteligjencia shqiptare në përgjithësi nuk guxojnë ta heshtin këtë rikthim të metodave fashiste në pushtetin e Kosovës.

Është detyrë politike, është detyrë morale, është detyrë kombëtare, është detyrë historikë e popullit shqiptar të Kosovës, e inteligjencies shqiptare të Kosovës, e inteligjencies shqiptare në përgjithësi të ngre zërin kundër kësaj të keqeje fashiste që po ia sjell Kosovës qeveria e sotme e kryeministruar prej ish – shërbëtorit politik të Sllobodan Millosheviqit, i cili shtetin e Kosovës, si po shihet, me metodat e tij fashiste, po e bën “ranç” tij privat. Të këqijat politike parandalohen vetëm para se të institucionalizohen. E zbatimi i metodave fashiste në pushtetin e sotëm të Kosovës ka hyrë në fazën e institucionalizimit.

Opozita e  Bashkuar në Prizren,  ka ftuar bashkëqytetarët që t’i bashkohen protestës së nesërme në  Prishtinë.

Zyrtarja e VV-së, Drita Millaku, tha se protesta e nesërme, që do të organizohet nga Opozita e Bashkuar është në vazhdën e kundërshtimit të keqqeverisjes nga pushteti, i cili po e rrezikon të ardhmen e shtetit.

“ I bëjë thirrje qytetarëve  që masovisht nesër të jenë pjesë e protestës”.

Edhe Sabri Micaj nga Bashkimi Demokratik, Sinan Alija nga Nisma për Kosovën dhe Korab Qerreti nga AAK, ftuan bashkëqytetarët që të përkrahin protestën e opozitës, e cila është vënë në mbrojtje të sovranitetit të tërësishëm të vendit, pasi që qeveria aktuale po e rrezikon të ardhmen e fëmijëve tanë, theksuan ata.

Nisja e organizuar për në Prishtinë do të bëhet nga ora 11:30 minuta nga Stacioni i Autobusëve në Prizren./TVPZ/

Kryetari i Komunës së Prizrenit,Ramadan Muja ka uruar gjithë qytetarët në 8 vjetorin e Pavarësisë së Kosovës.

“Komuna jonë më shumë evenimente shënon përvjetorin e tetë të Pavarësisë së Republikës së Kosovës dhe ftojmë të gjithë qytetarët për pjesëmarrje në aktivitete të përbashkëta”, ka thënë Muja.

Në vijim japim të përimtuar agjendën e aktiviteteve
E mërkurë, 17.2.2016
10,00 – Homazhe te “Varrezat e Dëshmorëve dhe “Monumenti i Lirisë”
11,00 – Seancë solemne (Shtëpia e Bardhë)
12,00 – Koncert i SHMM “Lorenc Antoni” (Shtëpia e Kulturës “Xh. Berisha”)
14,00 – “Turneu i Pavarësisë” në futboll (Stadiumi i qytetit “Përparim Thaqi”)
19,00 – “Koncerti i Lirisë” i AKV “Lidhja e Prizrenit” (Sheshi i Shatërvanit)
20,30 – Shfaqje teatrore “Shërbëtori i dy zotërinjve”-TP (Shtëp. Kult.”Xh. Berisha”)