Zgjidhja e martesës me bashkëshortin e saj, që e dhunonte fizikisht dhe psikologjikisht, nuk u ka dhënë fund vuajtjeve të një gruaje në Tiranë.
Edhe pas divorcit, ishbashkëshorti ka vazhduar ta ngacmojë dhe bezdisë atë në mënyrë sistematike.
Marrja e një urdhri mbrojtjeje në Gjykatë e ka shpëtuar të dëmtuarën D.O. vetëm përkohësisht, pasi në përfundim të tij, ishbashkëshorti, Xhevdet N., 54 vjeç, riniste “terrorin”.
Ai nuk ka ngurruar edhe ta dhunojë, ta ofendojë, si dhe ndjekë atë nëpër rrugët e kryeqytetit.
Duke ndjerë frikë dhe pasiguri për jetën, e dëmtuara e ka kallëzuar ishbashkëshortin në Policinë e Tiranës.
Bazuar në këtë kallëzim, Xhevdet N. ka përfunduar si i pandehur në gjyq për akuzën e përndjekjes.
Pak ditë më parë ai u shpall fajtor nga Gjykata e Tiranës për këtë akuzës dhe u dënua me 5 muaj heqje lirie. Sipas vendimit, e dëmtuara D.O. është divorcuar nga i pandehuri rreth pesë vite më parë, për shkak se ai ishte alkoolist, i papunë dhe ushtronte dhunë sistematike ndaj saj në aspektin psikologjik.
Edhe mbas divorcit ai ka vazhduar ta ngacmojë në mënyrë sistematike këtë shtetase dhe ajo ka bërë kallëzim lidhur me sjelljet e tij dhe është pajisur edhe me urdhër mbrojtjeje nga Gjykata.
Mbas mbarimit të urdhrit të mbrojtjes, i pandehuri ka vazhduar përsëri që t’i dalë përpara asaj, duke fyer sistematikisht atë dhe shoqet e saj.
Referuar vendimit, në 16 tetor 2015 i pandehuri është konfliktuar me partnerin e ri të ishgruas.
Sapo është afruar drejt tyre, i pandehuri është konfliktuar me Arifin duke i thënë që “pse qëndron me këtë k…” dhe më pas e ka goditur me grusht në fytyrë duke i shkaktuar dëmtime fizike.
Të nesërmen e kësaj dite ai ka kërcënuar të njëjtin person, ndërsa ka ndjekur nga mbrapa ishbashkëshorten e tij në zonën e “Pazarit të Ri” dhe “Medresesë”, duke e frikësuar atë.
Ndodhur në këto rrethana, ajo është paraqitur e frikësuar në Polici dhe ka bërë përsëri kallëzim ndaj të pandehurit për “përndjekje”./ Panorama.al