Veteranët e luftës së fundit në Kosovë, përkundër gjendjes së rëndë ekonomike që shumica i jeton çdo ditë, janë të shqetësuar me fryrjen e listave të “kolegëve” të tyre. Ata kërkojnë që të zbatohet ligji dhe të bëhet verifikimi i të gjithë emrave veç e veç me qëllim që listat të pastrohen nga emrat e futur pa meritë.

Kështu tha Xhevdet Qeriqi, kryetarë i Këshillit për Mbrojtjen e të Drejtave të Veteranëve, në një intervistë ku ka folur për gjendjen e rëndë të veteranëve dhe pritjet e tyre nga institucionet e vendit.

Ai tregon se veteranët tash e 16 vjet pas luftës janë të lënë anash nga secila qeveri e vendit. Qeriqi kujton shumë nga shokët e luftës, që sot janë në pozita të larta shtetërore, e që i kanë lënë ata pas dore pasi i kanë shfrytëzuar vetëm në fushata zgjedhore.

“Jo vetëm unë por shumë veteranë e ndjejmë veten që jemi të lënë anash, kjo nuk do koment. Kjo shihet, vërehet që 16 vjet jemi të lënë anash, do të thotë, më tepër veteranët janë keqpërdorur nëpër fushata zgjedhore dhe çdo herë në secilën fushatë që është mbajtur edhe nga bashkëluftëtarët tanë të cilët janë në qeveri, çdo herë është premtuar, ju jeni dëshmitarë dhe asnjëherë nuk është realizuar. Mendoj që kjo është arsyeja që kjo ju ka konvenuar që veteranët të vazhdojnë të jetojnë në këtë gjendje”, ka thënë Qeriqi.

Zvarritja e këtij procesi, dhe lënia pas dore e shumë veteranëve të luftës nga ana e institucioneve të Kosovës, i ka detyruar ata që jo rrallë herë të protestojnë.

“Unë mendoj se protesta është mjeti i fundit por ne kemi qenë të detyruar dhe sikur të mos ishin protestat, veteranët do të ishin aty ku kanë qenë më herët, nuk do ta gëzonin asnjë të drejtë, por presioni ynë i vazhduar dhe eskalimi i atyre situatave ka bërë që të përshpejtohen këto procese”, tha Qeriqi.

Ai gjithashtu kërkon që listat e veteranëve të hetohen, duke propozuar që veteranëve t’u kërkohet edhe një dokument shtesë.

“Ne kemi kërkuar të bëhet një hetim i pavarur brenda këtyre listave dhe gradualisht të hetohen. E kemi diskutuar sidomos me zv. Kryeministrin pasi që ka qenë pjesë e luftës, edhe ai ka qenë i shqetësuar me këto fryrje, dhe kemi kërkuar që të ketë kritere, të kërkohet edhe një dokumentacion shtesë që ua kam propozuar unë. Kjo është në të mirë të dy anëve sepse po dëmtohet buxheti po gjithashtu edhe imazhi. Shpresojmë se do të reflektojnë, në të kundërtën u kam treguar edhe në takim që kam pasur me ta se në rast se këto kërkesa nuk realizohen, atëherë ne jemi të detyruar të protestojmë”, tha ai.

Qeriqi tregoi se shumë nga njerëzit që sot janë në politikë mund t’i gjejmë edhe në listat e veteranëve, bilës thotë se këtë e kanë arritur pa e bërë as edhe një ditë në luftë.

“Ka emra konkretë nga të gjitha zonat… mua më njoftojnë veteranët e luftës. Janë në dijeni institucionet e shtetit, por pse nuk po veprojnë, kishte me qenë mirë t’i pyesni ata. Ka raste të shumta, jo pak por shumë, të cilët fare nuk kanë qenë në luftë. Ka raste që i njoh edhe unë vet personalisht, dhe sot ata po i gëzojnë këto të drejta dhe pse nuk po u takojnë. Nuk kemi një listë të saktë, por ka dhe njoh njerëz, jo vetëm unë por secili veteran me të cilin takohem njeh njerëz që nuk kanë qenë në luftë, por nuk është e interesuar prokuroria të merret me këto raste. Edhe vet prokuroria është në dijeni. Tani po bëhen edhe publike sidomos në rrjete sociale publike, dhe asnjëherë nuk po reagon askush. Është dashur të hetohen nga ana e prokurorisë por për fat të keq nuk po ndodhin këto. Gjë që jemi të revoltuar sepse po e dëmtojnë imazhin e veteranëve po ashtu edhe në buxhetin në këto kategori si dhe buxhetin e shtetit”, tha Qeriqi.

Megjithatë ai nuk e ka një listë të saktë të personave të rrejshëm që sipas tij janë në listat e veteranëve.

Por është edhe një kategori e njerëzve të cilët kanë ndihmuar Ushtrinë Çlirimtare të Kosovës në forma të ndryshme dhe që nuk kanë përfituar asnjë benificion nga institucionet e shtetit.

Ish-kryeministri i Kosovës, Hashim Thaçi, gjatë fushatës së tij elektorale kishte premtuar që edhe kjo kategori do të shpërblehej, por e gjitha kjo deri më tani ka mbetur vetëm një premtim.

“Nuk dua të ia mohoj askujt kontributin që ka dhënë, nuk jemi vetëm ne veteranët që kanë dhënë kontribut, por kanë dhënë mërgimtarët dhe qytetarët e këtij vendi, edhe fëmijët e këtij vendi. Mendoj që janë kriteret brenda ligjit që është miratuar për veteranët e luftës ku qartësohen të drejtat e secilit për kontributin që ka dhënë. Ka qenë premtim i ish-kryeministrit Thaçi se edhe ata do të gëzojnë të drejtat e tyre që u takojnë por shpresoj se pas premtimeve ata t’i gëzojnë ato të drejta”, tha ai.

Kryetari i Këshillit për Mbrojtjen e të Drejtave të Veteranëve, Xhevdet Qeriqi ishte parë edhe në protestat e opozitës më 9 janar. Për këtë ai është shprehur se nuk ka marrë pjesë si përfaqësues i veteranëve por si qytetar i thjesht i këtij vendi i cili është i pakënaqur me zhvillimet fundit, njofton KP.

Përndryshe, veteranët e luftës kanë protestuar më 1 shkurt para Qeverisë së Kosovës ku kanë kërkuar që 4.000 veteranëve, të cilëve nuk i kanë dalë pensionet që u takon me ligj, t’u paguhet. Kjo protestë u bë shkak që kryeministri Mustafa t’i thërras në takim përfaqësuesit e veteranëve ku u premtoi se së shpejti kjo do të rregullohet. Ndërsa veteranët kanë paralajmëruar protestë nëse nuk plotësohen kushtet e tyre.

(Kosova Sot)

Krimi dhe korrupsioni i lartë nga pushtetarët po e shkatërrojnë dhe po e fundosin shtetin. Autorët dhe sajuesit e krizës po i përcjellë nga afër hija e burgut

“Sikur të kishte mundësi që kjo Prokurori brenda natës të burgoste me dhjetëra oligarkë të krimit ekonomik dhe politik, atëherë shpresat e popullatës do të ngjalleshin automatikisht se në këtë vend do të bëhet mirë. Vetëm kur të bëhet shthurja e këtij rrjetëzimi kaq të organizuar kriminal dhe vetëm kur të vihen përpara përgjegjësisë fajtorët kryesorë, të cilët duhet sa më parë të eliminohen nga jeta publike dhe politike, vetëm atëherë do të ketë stabilitet Kosova”, shprehet analisti Shefqet Dibrani

Republika e Kosovës mund të shpëtojë vetëm nëse arrestohen “peshqit e mëdhenj”, e këtë duket se nuk mund ta bëjnë prokurorët kosovarë, por e vetmja shpresë është Gjykata Speciale në Holandë, por edhe Prokuroria Speciale që mund ta çlirojë Kosovën nga të korruptuarit dhe të inkriminuarit që e kanë kapur fort shtetin. Pengesat që po i vë politika, kryesisht pushteti shumëvjeçar, lidhen shumë me Gjykatën Speciale për ta shtyrë sa më shumë që është e mundshme këtë gjykatë, e cila në listën e saj ka njerëzit më “të fortë” të pushtetit e të tej inkriminuar. Në Shqipëri po bëhet Byroja kombëtare e hetimeve që është një ndihmesë që vjen nga SHBA-ja, kurse në Kosovë Specialja përmes hetuesve të vet dhe prokurorit special mund ta pastrojë këtë vend nga krimi e korrupsioni, krimi i organizuar e për të bërë shtet ligjor.

Njohësi i mirë i çështjeve të sundimit të ligjit, Shefqet Dibrani, mendon se është krejt normale se vetëm Prokuroria dhe Gjykata Speciale mund ta pastrojë politikën nga bosët që kanë kapur shtetin. “Po sikur të kishte mundësi që kjo prokurori brenda natës të burgoste me dhjetëra oligarkë të krimit ekonomik dhe politik, atëherë shpresat e popullatës do të ngjalleshin automatikisht se në këtë vend do të bëhet mirë. Vetëm kur të bëhet shthurja e këtij rrjetëzimi kaq të organizuar dhe vetëm kur të vihen përpara përgjegjësisë fajtorët kryesorë, të cilët duhet sa më parë të eliminohen nga jeta publike dhe politike, atëherë do të ketë stabilitet Kosova, e cila hëpërhë është në një situatë shumë të rëndë, me tendenca për t’u krijuar një gjendje tamam anarkike, e cila do t’i ketë pasojat e shumta. Por, secili qytetar duhet të jetë i vetëdijshëm se kjo gjendje kaq e rënduar ka ndodhur pikërisht nga frika e themelimit të Gjykatës Speciale, e cila po shpresojmë se do të veprojë shpejt dhe pa hezitime”, mendon ai.

Autorët dhe sajuesit e krizës po i përcjellë hija e burgut

Sipas Dibranit, është shqetësuese heshtja dhe lënia në veprim të lirë e përgjegjësve të situatës, të cilët tashmë i drejtojnë dikasteret më të rëndësishme shtetërore, ku nuk ka vlerë bota njerëzore më shumë sesa interesat e tyre materiale. “Sot, Kosova ka një elitë politike shumë të papërgjegjshme, e cila është në gjendje ta shkatërrojë Kosovën për t’i ruajtur privilegjet e tyre. Pikërisht frika dhe paniku nga Gjykata Speciale i ka vënë në lëvizje të gjitha grupet e interesit, të cilat edhe pse nuk e thonë, ndihen mjaft të shqetësuara, sepse janë të vetëdijshme për të kaluarën e tyre kriminale, qoftë në aspektin politik, por edhe në krimin ekonomik, që si duket Gjykata Speciale i ka parasysh që të dyja…/kosova sot/