UEFA në vazhdimësi ka përcjellë paraqitjen e të gjithë futbollistëve në Euro 2016, duke vlerësuar ata ndeshje pas ndeshje.

Sulmuesi i Francës, Antonie Griezmann deri me tani është futbollisti më i mirë i këtij kampionati, i ndjekur nga bashkëlojtari i tij Dimitri Payet dhe Gareth Bale

Griezmann përveç që është në finale me Francën, ai është edhe golashënuesi më i mirë me 6 gola, 3 më shumë se sa Ronaldo që është në vendin e dytë.

Portugezi po ashtu do të luaj në finale me Portugalinë, por është i renditur vetëm si lojtari i shtatë në Euro 2016.

Klubi italian, Juventus thuhet se tashmë ka bërë ofertën zyrtar në adresë te Arsenalit për Alexis Sanchez.

‘Zonja e Vjetër’ prej kohësh është duke e kërkuar sulmuesin kilian, dhe sipas mediave italiane, Juve ka bërë gati ofertën 30 milionë euro për ish-anëtarin e Barcelonës.

Kampionët e Italisë duan ta përforcojnë repartin e sulmit për edicionin e ri, dhe 27 vjeçari është në listën e torinezëve.

Raportohet se Sanchez është i prirur për tu kthyer në Itali, ku kishte kaluar pesë sezone mjaft të mira me Udinese, por mësohet se Arsenali nuk është i përgatitur për të pranuar asnjë ofertë nën vlerën 34 milionë euro.

Sonte në orën 21:00, do të zhvillohet finalja e Euro 2016. Portugalia e yllit botëror Ronaldo do të vihet përballë Francës, nikoqire dhe favorite për titull kampioni.

Dëshira për sukses është e madhe tek të dyja palët. Portugezët duan të hyjnë në histori, duke e fituar për herë të parë titullin e kampionit të Evropës dhe në këtë mënyrë edhe ta përmirësojnë gabimin e bërë në vitin 2004, kur dështuan t’i gëzohen këtij trofeu para tifozëve të vet, duke humbur në finale nga Greqia. Në anën tjetër francezët duan ta rikthejnë lavdinë, duke fituar titullin e tretë.

Për Portugalinë lajm i mirë është rikthimi i Pepes, i cili mungoi në ndeshjen e fundit, ndërsa Franca do të luaj me formacionin e saj më të mirë dhe ka të gjithë lojtarët në dispozicion.

Portugezët do të kenë një mision shumë të vështirë por Fernando Santos ka besim te skuadra e tij dhe ëndrron që përfaqësuesja që ai drejton, t’i bëjë Francës atë që i bëri Greqia, Portugalisë në 2004-ën.

“Jam një tifoz portugez dhe dua të fitoj. Franca gjatë kësaj periudhe ka ndryshuar mënyrën e lojës por edhe ne jemi rritur shumë dhe kemi futbollistë që dinë si fitohet. Ndaj Gjermanisë ata zhvilluan një ndeshje shumë të mirë. Kanë në skuadër individë që bëjnë diferencën por gjithashtu luajnë shkëlqyer edhe në grup. Kam thënë gjithmonë që skuadrat favorite për t’i shkuar deri në fund Europianit ishin tre Gjermania, Spanja dhe Franca. Blutë luajnë në shtëpinë e tyre dhe normalisht janë favoritë por të fitosh është një tjetër gjë. Lexoj dhe dëgjoj që thonë se kjo nuk është finalja më e mirë e mundshme, por dëshirat nga e vërteta ndryshojnë shumë”, ka theksuar Santos.

Në anën tjetër, Didier Deschamps, 16 vjet më parë në Rotterdam, udhëhoqi Francën si kaipten drejt fitimit të kampionatit evropian që ishte i dyti në histori për gjelat. Në 10 Korrik të 2016-tës, tashmë si trajner Deschamps do të kërkojë të përsërisë atë sukses të 16 viteve më parë që këtë herë ndoshta do të kishte akoma edhe më shumë vlerë pasi kompeticioni zhvillohet në Francë, dhe finalja luhet në stadiumin legjendar St Denis.

“Është gjithmonë e vështirë të fitosh tituj ose më saktë të fitosh trofe. Të arrish te suksesi me skuadrën kombëtare është një mision shumë më tepër i ndërlikuar se të fitosh me klubet, sepse me ekipet përfaqësusese trofetë për t’u fituar janë vetëm 2 dhe për ta realizuar dicka të tillë duhet të luash ndaj skuadrave më të mëdha të Botës. Ne jemi gati për finalen ndaj Portugalisë dhe duam të fitojmë. Futbollistët e mi ndihen të privilegjuar që mbrëmjen e të Dielës do të zbresin përpara publikut të tyre në Paris me synimin për të fituar trofeun e kampionit të Evropës”, ka theksuar Deschamps.