Nga Beqë Cufaj

Jemi në prag të një drame të madhe. Duke e ditur që ky proces i zgjedhjes së të parit të Kosovës kurrë s’ka kaluar me lehtësi- që nga koha e Ibrahim Rugovës e deri tek traumat e fundit me marrëveshjen Hashim-Isë-Behgjet kur si “kompromis” për një a dy vite qe zgjedhur Atifetja. Dhe ajo tash po i mbush rrumbullak pesë vite në këtë post falë tradhtisë së Hashimi ua bëri Isës e Behgjetit. E vetmja herë kur Kosova e kaloi lehtë me Presidentin qe kur Fatmir Sejdiu në fund të vitit 2007 e mori këtë post pa trauma për dy arsye: Hashimi dhe PDK ishin më tepër se të uritur për pushtet dhe Qeverisje dhe presioni ndërkombëtar pas rënies së koalicionit LDK-AAK-Pakicat, qe aq i madh pasi që Kosovën e priste detyra e shpalljes së pavarësisë. Pra, pos intermexo-s me Sejdiun i cili si erdhi lehtësisht e lëshoi atë post edhe më shumë budallakisht, në Kosovë, ta zgjedhësh dikënd President dmth. shumë më tepër se të bësh politikë.

Prandaj del edhe kjo zgjedhja e Hashimit të jetë kaq e komplikuar. I vetmuar në fronin e tij të politikës së Kosovës, Hashimi është prototipi i politikanit të cilin ish-miqë e kolegë të tij nga politika por edhe nga e kaluara e përshkruajnë si një politikan autokrat i cili çkado që ka afër e shtërngon, shfrytëzon, harxhon dhe hedhë anash. Për këtë, kohëve të fundit janë të panumërta teskte, kujtime, komente, rrëfime e trajtesa të cilat japin profilin e një politikani i cili veç me faktin që tash 17 vjet është akitivisht në politikë: njeh çdokënd dhe e din sakëtisht se kujt çka i ka borxh për vendin që e ka në Kosovë.

Ajo që çudit me këtë rast: janë të panumërta trajtesat dhe diskursi kundër zgjedhjes së tij President. Dhe janë të pakta për të mos thënë për t’i numëruar me gishtërinjë qasjet afirmative (serioze) pro Hashimit President.

Hashimi është njeriu më i fortë në politikën e Kosovës por për këtë ka kundër pothuajse krejt prominencën e Prishtinës përfshirë këtu edhe partitë politike që nga opozita e deri tek LDK e cila gadi gadi në mënyrë të dhunshme do ta jep votën për të. Nëse e jep.

Në trajtesat pro Hashimit President jo pak prej tyre bëjnë një blasfemi agresive për këdo që shprehet kundër zgjedhjes së tij në postin e të parit të shtetit. Duke filluar nga etiketimet për “dorë të zgjatur” të Beogradit e deri tek cytje nga shërbime sekrete e agjentura të shteteve perëndimore. Thuajse po e jetojmë kohën e luftës së ftohtë. Jemi në post dialog me Beogradin dhe çkado që vjen nga Beogradi kundër Hashimit mund të vie edhe kundër Ramushit, Albinit, Fatmirit. Edhe mund të ketë dorë Beogradi në këto marrëzi siç ishte ajo me atë nigerianin e organeve apo siç vazhdon të jetë budallallëku me Dick Martyn por si në rastin e parë ashtu edhe të dytin është vet Hashimi ai që i ka fajet më të mëdha. Thënë shqip: për nigerianin le ta pyet Behgjetin. Për Dick Martin le t’i kujtohet teatri me Medicus-in. Përtej këtyre në pledoajetë për Hashimin janë edhe ato melmesat patetike për “rrugën” e tij të gjatë dhe sakrificat për t’u bërë ky që është. Në sytë e tyre Kandidati, dhe mundësisht, edhe Presidenti me një biografi politike në traditën e Rugovës apo edhe burrave tjerë të mëdhenjë të kombit është Hashimi. Krejt këto janë qasje të legjitime të mbrojtësve dhe adhuruesve të tij. Por janë sa të pavend aq edhe jashtëkohore këto patetizma sa njeriu, normali, qoftë ai edhe anëtar PDK-je e ka të pamundshme t’i gëlltisë. Jetojmë në vitin 2016 dhe rrethanat e politikës dhe të vet Hashimit dallojnë shumë për vet atë. Hashimi Kryeministër i Qeverisë së Përkohshme në vitet 1999-2000… Hashimi dhe PDK-ja në Pushtet me LDK por për këtë me Kryeministër Bajram Rexhepin. Hashimi në opozitë derisa LDK qeveriste me AAK. Dhe Hashimi si dy herë Kryeministër i dy qeverive me të cilat dha aq shumë premtime të cilat s’i përmbushi. As vet mandatet e tij e lëre më premtimet. Është më tepër se herët të supozohet se cili do të jetë roli i tij në historinë e re të Kosovës. Nëse do të hapet ndonjë kapitull me të apo do të përfundojë si ndonjë fusnotë tragjike e Republikës… Do ta tregojnë vitet dhe dekadat në vijim.

Krahasuar me pledoajetë pro Hashimit kemi një mori të tërë trajtesash kundër Hashimit President. Nga autorë prominentë në Prishtinë përmes “kurzschluss”-ave në forma hakmarrjesh personale e deri tek analiza të qarta të cilat tregojnë se sa e dëmshme do të ishte zgjedhja e tij. Pa u ndalur me emra dhe tituj të caktuar duhet thënë që është pothuajse argëtuese të shijohen fletrrufetë kundër tij. Dhe kjo mori vërshuese kundërshtarësh të Hashimit nxjerr në pah një element qenësor: elitat në Prishtinë janë kundër zgjedhjes së tij President. E thonë ata që kanë punuar me të dhe s’ndjejnë obligim ndaj tij. E shkruajnë dhe botojnë ata që janë patriotë dhe e duan këtë vend duke e parë zgjedhjen e tij si një kërcënim të drejtpëdrejt për rregullimin e brendshëm politik, të tashmen e të ardhmen me një president të izoluar dhe aspak të mirëpritur në qendra të botës.

Frikësuese dhe për këtë sidomos për Hashimin brengosëse është heshtja. Heshtja e atyre që ky ka kujtuar që u ka bërë mirë. Gazetarë, shkrimtarë, publicistë e çka jo tjetër të cilët për vite i ka rehatuar me punëra për ta e familjarë të tyre dhe tashti kur i duhen më së shumti- ata po heshtin. Janë ata pra të cilët atij sot i duhen më shumë se kurrë dhe s’po i dalin krah por janë strukur në apartamentet dhe punërat e tyre të cilat me kutin e tij, ua ka dhënë vet Kandidati.

Duhet të jetë pra kjo heshtje një hakmarrje për të. Heshtje që flet vet. Dhe çmim për monetën që Hashimi e ka patur dhe ka qe një dekadë e gjysmë si armë në politikën që bën në Prishtinë.

Por për monetën e Hashimit herë tjetër. Edhe ashtu Drama as që ka filluar. Jemi ende në prolog. Pro et Contra Hashimit.

/© GazetaBlic.com/