Drejtoria për Hetimin e Krimit të Organizuar, me 17 mars 2016, ka ndërmarrë operacionin policor, në rajonin e Prizrenit, nën dyshimin e bazuar se disa persona të dyshuar janë duke kryer veprat penale ‘mbajtje në pronësi të paautorizuar të armës’, ‘vjedhje e rëndë’ dhe ‘shpëlarje e parasë’.

Në një komunikatë të Policisë së Kosovës thuhet se gjatë operacionit është arritur të arrestohen pesë persona të dyshuar: V. N. lindur me 1973 m/sh/K, K. G. i lindur me 1979 m/sh/K, B. E. i lindur me 1983 m/sh/K, E. C. i lindur me 1967 m/sh/Sh dhe G. G. i lindur me 1970 m/sh/K.

Si prova materiale janë sekuestruar: 1 revole me 14 fishekë dhe 6 telefona celularë.

Të arrestuarit dyshohet se në bashkëveprim organizonin shkëmbimin e një shume të parave, të raportuara si të vjedhura në shtete tjera.

Të dyshuarit janë arrestuar në një lokacion të Prizrenit, ku fillimisht janë shoqëruar në stacion policor, kurse me vendim të prokurorit kompetent janë dërguar në mbajtje për 48 orë. /PrizrenPress.com/

Policia e Prizrenit ka bërë të ditur se dje, rreth orës 18:00, ka pranuar një informacion i cili bënte me dije se në fshatin Lybeqevë ka të shtëna me armë zjarri.

Një patrullë policore ka shkuar për verifikimin e informacionit dhe ka arritur ta gjejë vendin e ngjarjes në të cilin janë gjetur 45 gëzhoja të armës automatike të cilat janë mbledhur si dëshmi materiale, raporton PrizrenPress.

Më pas, gjatë hetimit, janë ndaluar katër persona për t’u pyetur për rastin.

Pas përfundimit të hetimeve fillestare, është sekuestruar një pushkë gjysmë automatike njëzetëshe pa fishekë.

Në konsultim me prokurorin e shtetit, poseduesi i armës ndalët nën masën e arrestit sepse i njëjti dyshohet të ketë konsumuar elemente të dy veprave penale: Shkaktim i rrezikut të përgjithshëm dhe mbajtje në pronësi ose kontroll të armëve luftarake. /PrizrenPress.com/

Policia Rajonale e Prizrenit njofton se rreth mesnate, në ambientet e një lokali hotelier në Gjinoc të Suharekës, një i dyshuar , me armë zjarri e ka kanosur një person i cili mbase kishte qenë i dehur dhe ishte rrezuar mbi tavolinën e të dyshuarit.

Pas kanosjes i dyshuari ishte larguar nga lokali me një automjet të cilin patrullat policore e kanë ndaluar në fshatin Dvoran. Gjatë kontrollit të automjetit, në brezin e pasagjerit, policia e ka gjetur armën e llojit revolver e kalibrit 7.6mm me pesë fishekë, raporton PrizrenPress.

Po ashtu, rreth orës 02:05 minuta në rrugën “Flamuri” në Prizren, gjatë një hetimi të Departamentit të Hetimeve Kundër Krimit të Organizuar në bashkëpunim me hetues nga Prizreni është ndaluar një automjet dhe gjatë kontrollit të automjetit është gjetur një pistoletë e llojit “SIG SAUER” i kalibrit 9mm me 14 fishekë.

Në konsultim me prokurorin e shtetit, i dyshuari është ndalur në mbajtje. /PrizrenPress.com/

Në Shirokë të Suharekës, ka ndodhur një vjedhje grabitqare. Policia Rajonale e Prizrenit bën të ditur se ngjarja ka ndodhur dje, rreth orës 18:17 minuta.

Sipas raporteve hetimore thuhet se dy të dyshuar ia kanë vjedhur viktimës femër një zinxhir të artë nga qafa përderisa e njëjta po ecte nëpër trotuar të fshatit, raporton PrizrenPress.

Pas pranimit të informatës, Policia e Suharekës ka nisur me hetimin e rastit i cili ka rezultuar me arrestimin e një të mituri i cili është intervistuar në prani të avokatit mbrojtës.

Pas intervistës, është njoftuar prokurori i shtetit i cili ka urdhëruar që i mituri të ndalët nën masën e arrestit policor, ndërkaq hetuesit janë në kërkim të dyshuarit tjetër. /PrizrenPress.com/